TV
Photo Courtesy: BCCI
ఐపీఎల్‌లో రోహిత్‌ శర్మ రెండు భారీ రికార్డులు సొంతం చేసుకున్నాడు. ఐపీఎల్‌ 2025లో భాగంగా గుజరాత్‌ టైటాన్స్‌తో ఇవాళ (మే 30) జరుగుతున్న కీలక ఎలిమినేటర్‌ మ్యాచ్‌లో 28 బంతుల్లో హాఫ్‌ సెంచరీ పూర్తి చేసిన రోహిత్‌.. ఐపీఎల్‌లో 7000 పరుగులు సహా 300 సిక్సర్లు పూర్తి చేశాడు.
ఈ ఇన్నింగ్స్‌లో ఇప్పటివరకు 2 సిక్సర్లు బాదిన రోహిత్‌ ఐపీఎల్‌లో 300 సిక్సర్లు కొట్టిన తొలి భారత క్రికెటర్‌గా, ఓవరాల్‌గా రెండో ఆటగాడిగా చరిత్ర సృష్టించాడు. ఈ ఇన్నింగ్స్‌లో 8 పరుగుల వద్ద 7000 పరుగులు పూర్తి చేసిన రోహిత్‌ ఐపీఎల్‌లో విరాట్‌ కోహ్లి తర్వాత ఈ మార్కును తాకిన ఆటగాడిగా రికార్డు నెలకొల్పాడు.
ఐపీఎల్‌లో అత్యధిక సిక్సర్లు కొట్టిన టాప్‌-5 బ్యాటర్లు..
క్రిస్‌ గేల్‌-357
రోహిత్‌ శర్మ-300
విరాట్‌ కోహ్లి-291
ఎంఎస్‌ ధోని-264
ఏబీ డివిలియర్స్‌-251
ఐపీఎల్‌లో అత్యధిక పరుగులు చేసిన టాప్‌-5 బ్యాటర్లు..
విరాట్‌ కోహ్లి-8618
రోహిత్‌ శర్మ-7000 (ఇన్నింగ్స్‌ కొనసాగుతుంది)
శిఖర్‌ ధవన్‌-6769
డేవిడ్‌ వార్నర్‌-6565
సురేశ్‌ రైనా-5528
మ్యాచ్‌ విషయానికొస్తే.. టాస్‌ గెలిచి తొలుత బ్యాటింగ్‌ చేస్తున్న ముంబై ఇండియన్స్‌ 13 ఓవర్ల అనంతరం రెండు వికెట్లు కోల్పోయి 143 పరుగులు చేసింది. రోహిత్‌ శర్మ (36 బంతుల్లో 60; 8 ఫోర్లు, 2 సిక్సర్లు), తిలక్‌ వర్మ (0) క్రీజ్‌లో ఉన్నారు. ముంబై ఇన్నింగ్స్‌లో జానీ బెయిర్‌స్టో 22 బంతుల్లో 47 (4 ఫోర్లు, 3 సిక్సర్లు), సూర్యకుమార్ యాదవ్‌ 20 బంతుల్లో 33 పరుగులు (ఫోర్‌, 3 సిక్సర్లు) చేశారు. ఈ ఇద్దరి వికెట్లు సాయి కిషోర్‌కు దక్కాయి.
కాగా, ఈ మ్యాచ్‌లో ఓడిన జట్టు లీగ్‌ నుంచి నిష్క్రమిస్తుంది. గెలిచిన జట్టు ఫైనల్‌కు ముందు మరో మ్యాచ్‌ (క్వాలిఫయర్‌-2లో పంజాబ్‌తో) ఆడాల్సి ఉంటుంది. నిన్న జరిగిన క్వాలిఫయర్‌-1లో పంజాబ్‌పై విజయం సాధించి ఆర్సీబీ నేరుగా ఫైనల్‌కు చేరిన విషయం తెలిసిందే.
