‘నాకు, నీకు సంబంధం లేదు.. నీ చావు నీవు చావు’

.

మరిపెడ రూరల్‌: అత్తింటి వేధింపులతో ఓ వివాహిత ఉరేసుకుని ఆత్మహత్యకు పాల్పడింది. ఈ ఘటన మహబూబాబాద్‌ జిల్లా మరిపెడ మండలం ఎల్లంపేటలో బుధవారం చోటు చేసుకోగా గురువారం ఆలస్యంగా వెలుగుచూసింది. స్థానికులు, బంధువుల కథనం ప్రకారం.. గ్రామానికి చెందిన పాక వెంకన్న, ఉమ దంపతులకు ఇద్దరు కూతుళ్లు, కుమారుడు ఉన్నారు. చిన్నకూతురు ప్రత్యూషను (24) ఐదేళ్ల క్రితం సూర్యాపేట జిల్లా మోతే మండలం జగ్గుగూడెం గ్రామానికి చెందిన పెరుగు పరశురాములుకు ఇచ్చి వివాహం జరిపించారు. ఇద్దరి కుమార్తెలకు వివాహం జరిపించి కట్న, కానుకల కింద చెరో ఒకరం వ్యవసాయ భూమిని రాసి ఇచ్చారు. ప్రత్యూష, పరశురాములు దంపతుల దాంపత్య జీవితం కొంతకాలం సజావుగా కొనసాగింది. 

ఈ క్రమంలో ప్రత్యూష అత్తగారి ఇంటి వద్ద మరిది పెత్తనంతో ఆ ఉమ్మడి కుటుంబంలో గొడవలు చోటు చేసుకున్నాయి. ఆ గొడవలు చిలికిచిలికి గాలివానలా మారి ప్రత్యూషను కట్నం కింద ఇచ్చిన భూమి అమ్మి డబ్బులు తీసుకురావాలని అత్తింటి సభ్యులు వేధింపులు మొదలు పెట్టారు. ఈ విషయంలో ఇటీవల అత్తామామ, మరిది, భర్త కలిసి ప్రత్యుషపై దాడికి దిగారు. అనంతరం ప్రత్యూషను భర్త పరశురాములు పది రోజుల క్రితం తల్లిగారి ఊరు ఎల్లంపేటలో బలవంతంగా వదిలి వెళ్లాడు. ఎంతకూ తీసుకెళ్లకపోవడంతో ప్రత్యూష ఫోన్‌లో భర్తను నిలదీసింది. 

దీంతో భర్త ‘నాకు, నీకు సంబంధం లేదు.. నీ చావు నీవు చావు’ అని తెగేసి చెప్పాడు. దీంతో మనస్తాపానికి గురైన ప్రత్యూష ఈ నెల 19వ తేదీన ఇంట్లో ఫ్యాన్‌కు ఉరేసుకుని ఆత్మహత్యకు యత్నంచగా పక్కంటి వారు చూసి రక్షించే ప్రయత్నం చేశారు. కొన ఊపిరితో ఉన్న ఆమెను కుటుంబీకులు 108లో ఖమ్మంలోని ఓ ఆస్పత్రికి తరలించగా చికిత్స పొందుతూ ఈ నెల 20 తేదీన మృతి చెందింది. మృతురాలి తండ్రి వెంకన్న ఫిర్యాదు మేరకు పోలీసులు కేసు నమోదు చేసుకుని దర్యాప్తు చేపట్టినట్లు తెలిపారు. మృతురాలికి 11 నెలల కుమార్తె ఉంది. ఈ ఘటనతో ఎల్లంపేటలో విషాదఛాయలు అలుముకున్నాయి.