కేసీఆర్‌ ఆమరణ దీక్ష మహోత్తర మలుపు

జగిత్యాల: 2009 నవంబర్‌ 29న కేసీఆర్‌ చేపట్టిన ఆమరణ దీక్ష ఒక మహోత్తర మలుపు అని, తెలంగాణ తెచ్చిన వీరుడు కేసీఆర్‌ అని బీఆర్‌ఎస్‌ జిల్లా అధ్యక్షుడు కల్వకుంట్ల విద్యాసాగర్‌రావు అన్నారు. శనివారం 16వ దీక్ష దివస్‌ సందర్భంగా జిల్లా కేంద్రంలోని బీఆర్‌ఎస్‌ కార్యాలయంలో కేసీఆర్‌ చిత్రపటానికి క్షీరాభిషేకం చేశారు. ఈ సందర్భంగా ఆయన మాట్లాడుతూ, దీక్ష దివస్‌ ప్రజల్లో తెలంగాణ ఆత్మ గౌరవ జ్వాలను మరింత రగిలించి రాష్ట్ర సాధనకు బాటలు వేసిందన్నారు. అలాగే ఉద్యమం కోసం ప్రాణాలు త్యాగాలు చేసిన వీరులను మరువలేమని పేర్కొన్నారు. పార్టీ స్థాపించిన నాటి నుంచి ఉద్యమకాలంలో కేసీఆర్‌ ఎన్నో ఆటుపోట్లు ఎదుర్కొన్నారని, జైలులో సైతం దీక్ష చేపట్టి కేంద్ర ప్రభుత్వం ద్వారా తెలంగాణ ప్రకటన చేస్తామని చెప్పడం కేసీఆర్‌ దీక్ష ఫలితమేనని వివరించారు. కేసీఆర్‌ రాష్ట్రానికి శ్రీరామ రక్ష అని, ఎన్నికలు ఎప్పుడు వచ్చినా విజయం కోసం కృషి చేయాలన్నారు. కోరుట్ల ఎమ్మెల్యే సంజయ్‌కుమార్‌, దావ వసంత, నాయకులు పాల్గొన్నారు.

బీఆర్‌ఎస్‌ జిల్లా అధ్యక్షుడు విద్యాసాగర్‌రావు