సంబరాల్లో ఏపీ కాంగ్రెస్‌

హైదరాబాద్‌: గత ఎన్నికలతో పోల్చితే ఆయా రాష్ట్రాల్లో కాంగ్రెస్ బలపడుతోందని ఏపీ పీసీసీ అధ్యకుడు ఎన్ రఘువీరారెడ్డి వ్యాఖ్యానించారు. ప్రస్తుత ఎన్నికల్లో ప్రాంతీయ పార్టీలు మరుగున పడ్డాయని, జాతీయ పార్టీలు బలపడ్డాయని చెప్పారు. యూపీలో బీజేపీ నైతికంగా ఓడిపోయిందని విశ్లేషించారు. నరేంద్ర మోదీ తరహాలో ఏ ప్రధానమంత్రి కూడా ఒక రాష్ట్రంలో 45 రోజుల పాటు ప్రచారం నిర్వహించలేదని, ఆ రకంగా చూస్తే బీజేపీ నైతికంగా ఓడిపోయినట్టేనని రఘువీరా చెప్పారు. పలు రాష్ట్రాల అసెంబ్లీ ఎన్నికల్లో కాంగ్రెస్ కు అనుకూలంగా తీర్పు రావడంపై ఆంధ్ర రత్న భవన్ లో కాంగ్రెస్ శనివారం విజయోత్సవ సంబరాలు నిర్వహించింది.