సర్వజనుల సంక్షేమమే మా విధానం

న్యూఢిల్లీ: సర్వజనుల సంక్షేమం, సంతోషమే బహుజన్ సమాజ్ పార్టీ(బీఎస్పీ) విధానమని ఆ పార్టీ అధ్యక్షురాలు మాయావతి పేర్కొన్నారు. ఢిల్లీ విధానసభకు జరుగుతున్న ఎన్నికల కోసం దక్షిణ ఢిల్లీలోని నానక్‌పురాలో నిర్వహించిన బహిరంగ సభలో మాయావతి మాట్లాడారు. ఢిల్లీలో అధికారంలో ఉన్న షీలాదీక్షిత్ ప్రభుత్వం పూర్తిగా అవినీతి మయమైందని, పరప్రాంతీయుల కోసం షీలా ప్రభుత్వం చేసిందేమీ లేదని విమర్శిం చారు. సర్వజనుల సంక్షేమం కోరే బీఎస్పీకి ఓటువేసి గెలిపిస్తే ఉత్తరప్రదేశ్‌లాగా ఢిల్లీలోని పేదలకు కూడా తలెత్తుకు బతికే పరిస్థితి కల్పిస్తామన్నారు. ఉత్తరప్రదేశ్‌లో పేదలకు తమ ప్రభుత్వం ఇళ్లు నిర్మించి ఇచ్చిందని, యువతకు ఉపాధి కల్పిం చిందని, పేదలు కూడా హుందాగా బతికే పరిస్థితి కల్పించామన్నారు. ఇవన్నీ కావాలనుకుంటే బీఎస్పీకి ఓటువేసి గెలిపించాలన్నారు.