తొలి రెండు సెట్లు చేజార్చుకున్నా... విజయంపై ఆశలు వదులుకోకుండా తుదికంటా పోరాడిన క్రొయేషియా వెటరన్ టెన్నిస్ స్టార్ ఇవో కార్లోవిచ్ అనుకున్న ఫలితం సాధించాడు. టెన్నిస్ సీజన్ తొలి గ్రాండ్స్లామ్ టోర్నీ ఆస్ట్రేలియన్ ఓపెన్లో రెండో రోజు కార్లోవిచ్, రాసియో జెబలోస్ల మధ్య జరిగిన ఈ మ్యాచ్ హైలైట్గా నిలిచింది. విజయం కోసం ఇద్దరూ నువ్వా నేనా అన్నట్లు పోరాడారు. దాంతో మ్యాచ్లో ఫలితం రావడానికి ఏకంగా 314 నిమిషాలు పట్టింది. ఈ మ్యాచ్లో చివరిదైన ఐదో సెట్ ఒక్కటే 177 నిమిషాలు జరగడం విశేషం. తుదకు తన అనుభవాన్నంతా రంగరించి ఆడిన కార్లోవిచ్కే విజయం దక్కింది. ఈ క్రమంలో మూడు రికార్డులు తెరమరుగయ్యాయి.
మెల్బోర్న్: వరుసగా 14వ ఏడాది ఆస్ట్రేలియన్ ఓపెన్లో ఆడుతోన్న క్రొయేషియా ఆజానుబాహుడు ఇవో కార్లోవిచ్ కాస్త అటుఇటు అయితే ఎనిమిదోసారి తొలి రౌండ్లోనే ఇంటిముఖం పట్టేవాడు. కానీ 50వ గ్రాండ్స్లామ్ టోర్నీ ఆడుతోన్న అతను తొలి రెండు సెట్లు కోల్పోయినా ఓటమి ఆలోచనను తన మదిలోకి రానీయలేదు. పోరాడితే పోయేదేముందీ అనుకుంటూ మూడో సెట్ నుంచి తన ప్రయత్నంలో మరింత జోరు పెంచాడు. అదే ఉత్సాహంలో వరుసగా మూడు సెట్లు గెలిచాడు. చివరకు 5 గంటల 14 నిమిషాల్లో విజయాన్ని సొంతం చేసుకొని ఔరా అనిపించాడు. హోరాసియో జెబలోస్ (అర్జెంటీనా)తో మంగళవారం జరిగిన ఈ పురుషుల సింగిల్స్ మ్యాచ్లో కార్లోవిచ్ పోరాటపటిమ అందర్నీ ఆకట్టుకుంది.
20వ సీడ్గా బరిలోకి దిగిన కార్లోవిచ్ 6–7 (6/8), 3–6, 7–5, 6–2, 22–20తో ప్రపంచ 69వ ర్యాంకర్ జెబలోస్ను ఓడించి రెండో రౌండ్లోకి ప్రవేశించాడు. ఈ మ్యాచ్లో ఒక్క ఐదో సెట్టే 2 గంటల 57 నిమిషాలు జరగడం విశేషం. ఆస్ట్రేలియన్ ఓపెన్ చరిత్రలో సుదీర్ఘంగా సాగిన ఐదో సెట్ ఇదే కావడం గమనార్హం. అంతేకాకుండా 1972లో టైబ్రేక్ నిబంధన మొదలయ్యాక అత్యధిక గేమ్లు (84) జరిగిన మ్యాచ్గానూ ఈ మ్యాచ్ నిలిచింది. 2003లో ఆండీ రాడిక్ (అమెరికా), యూనెస్ అల్ అయనూయి (మొరాకో) మధ్య జరిగిన మ్యాచ్లో 83 గేమ్లు జరిగాయి. అయితే సుదీర్ఘ సమయంపాటు జరిగిన మ్యాచ్ రికార్డును కార్లోవిచ్, జెబలోస్ బ్రేక్ చేయలేకపోయారు. జొకోవిచ్, నాదల్ మధ్య జరిగిన 2012 ఆస్ట్రేలియన్ ఓపెన్ ఫైనల్ 5 గంటల 53 నిమిషాలు జరిగింది.
ఏస్లతో అదరగొట్టి...
6 అడుగుల 11 అంగుళాల ఎత్తు, 105 కేజీల బరువున్న 37 ఏళ్ల కార్లోవిచ్ ఈ మ్యాచ్లో ఏకంగా 75 ఏస్లు సంధించాడు. తద్వారా ఆస్ట్రేలియన్ ఓపెన్ చరిత్రలో ఒకే మ్యాచ్లో అత్యధిక ఏస్లు కొట్టిన ప్లేయర్గా రికార్డు సృష్టించాడు. ఇంతకుముందు ఈ రికార్డు జోచిమ్ జొహాన్సన్ (స్వీడన్) పేరిట ఉండేది. 2005లో ఆండ్రీ అగస్సీ (అమెరికా)తో జరిగిన మ్యాచ్లో జొహాన్సన్ 51 ఏస్లు కొట్టాడు. మ్యాచ్ మొత్తంలో 33 ఏస్లు కొట్టిన జెబలోస్ తొలి రెండు సెట్లు గెలిచి విజయం దిశగా సాగుతున్నట్లు కనిపించాడు. కానీ మూడో సెట్లో కార్లోవిచ్ పుంజుకున్నాడు. జెబలోస్ సర్వీస్ను ఒకసారి బ్రేక్ చేసి సెట్ను 7–5తో నెగ్గి మ్యాచ్లో నిలిచాడు. నాలుగో సెట్లో అదే జోరు కొనసాగించిన కార్లోవిచ్ ఈసారి రెండుసార్లు జెబలోస్ సర్వీస్ను బ్రేక్ చేసి సెట్ను 6–2తో దక్కించుకున్నాడు. అయితే ఐదో సెట్లో మాత్రం ఈ ఇద్దరూ కొదమ సింహాల్లా పోరాడారు. ఇద్దరూ తమ సర్వీస్లను నిలబెట్టుకోవడంతో మ్యాచ్ సుదీర్ఘంగా సాగింది. చివరకు 41వ గేమ్లో తన సర్వీస్ను నిలబెట్టుకొని... 42వ గేమ్లో జెబలోస్ సర్వీస్ను బ్రేక్ చేసిన కార్లోవిచ్ చిరస్మరణీయ విజయాన్ని దక్కించుకున్నాడు.
సెరెనా శుభారంభం
రికార్డుస్థాయిలో 23వ గ్రాండ్స్లామ్ సింగిల్స్ టైటిల్పై గురి పెట్టిన అమెరికా స్టార్ సెరెనా విలియమ్స్ తొలి అడ్డంకిని సులువుగానే అధిగమించింది. ప్రపంచ మాజీ ఏడో ర్యాంకర్ బెలిండా బెన్సిచ్ (స్విట్జర్లాండ్)తో జరిగిన మహిళల సింగిల్స్ తొలి రౌండ్లో రెండో సీడ్ సెరెనా 6–4, 6–3తో గెలుపొందింది. 79 నిమిషాలపాటు జరిగిన ఈ మ్యాచ్లో సెరెనా ఎనిమిది ఏస్లు సంధించి, ప్రత్యర్థి సర్వీస్ను నాలుగుసార్లు బ్రేక్ చేసింది. ఇతర తొలి రౌండ్ మ్యాచ్ల్లో ఐదో సీడ్ ప్లిస్కోవా (చెక్ రిపబ్లిక్) 6–2, 6–0తో సోరిబెస్ టోర్మో (స్పెయిన్)పై, మూడో సీడ్ అగ్నెస్కా రద్వాన్స్కా (పోలండ్) 6–1, 4–6, 6–1తో పిరన్కోవా (బల్గేరియా)పై, ఆరో సీడ్ సిబుల్కోవా (స్లొవేకియా) 7–5, 6–2తో అలెర్టోవా (చెక్ రిపబ్లిక్)పై, తొమ్మిదో సీడ్ జొహాన కొంటా (బ్రిటన్) 7–5, 6–2తో ఫ్లిప్కెన్స్ (బెల్జియం)పై నెగ్గారు. యూఎస్ ఓపెన్ మాజీ చాంపియన్, 18వ సీడ్ సమంతా స్టోసుర్ (ఆస్ట్రేలియా) 3–6, 6–3, 0–6తో హితెర్ వాట్సన్ (బ్రిటన్) చేతిలో ఓడిపోయింది.
జొకోవిచ్, నాదల్ సులువుగా...
మరోవైపు డిఫెండింగ్ చాంపియన్ నొవాక్ జొకోవిచ్ (సెర్బియా), మాజీ విజేత రాఫెల్ నాదల్ (స్పెయిన్), మూడో సీడ్ మిలోస్ రావ్నిచ్ (కెనడా) తొలి రౌండ్ను సాఫీగా అధిగమించారు. ఫెర్నాండో వెర్డాస్కో (స్పెయిన్)తో జరిగిన మ్యాచ్లో రెండో సీడ్ జొకోవిచ్ 6–1, 7–6 (7/4), 6–2తో గెలుపొందగా... తొమ్మిదో సీడ్ నాదల్ 6–3, 6–4, 6–4తో మాయెర్ (జర్మనీ)పై, రావ్నిచ్ 6–3, 6–4, 6–2తో డస్టిన్ బ్రౌన్ (జర్మనీ)పై విజయం సాదించారు. ఇతర తొలి రౌండ్ మ్యాచ్ల్లో 11వ సీడ్ డేవిడ్ గాఫిన్ (బెల్జియం) 6–4, 4–6, 6–2, 4–6, 6–4తో ఒపెల్కా (అమెరికా)పై, 15వ సీడ్ దిమిత్రోవ్ (బల్గేరియా) 7–6 (7/2), 6–3, 6–3తో ఒకానెల్ (ఆస్ట్రేలియా)పై, ఎనిమిదో సీడ్ డొమినిక్ థీమ్ (ఆస్ట్రేలియా) 4–6, 6–4, 6–4, 6–3తో స్ట్రఫ్ (జర్మనీ)పై, ఆరో సీడ్ మోన్ఫిల్స్ (ఫ్రాన్స్) 6–2, 6–3, 6–2తో వెసిలీ (చెక్ రిపబ్లిక్)పై, 13వ సీడ్ బాటిస్టా అగుట్ (స్పెయిన్) 6–3, 6–1, 6–1తో పెలా (అర్జెంటీనా)పై నెగ్గారు. వెర్డాస్కోతో 2 గంటల 20 నిమిషాలపాటు జరిగిన మ్యాచ్లో జొకోవిచ్ ఆరుసార్లు తన ప్రత్యర్థి సర్వీస్ను బ్రేక్ చేశాడు. మాయెర్తో రెండు గంటల నాలుగు నిమిషాలపాటు జరిగిన మ్యాచ్లో నాదల్ ఆరు ఏస్లు సంధించగా... ఒక్క డబుల్ ఫాల్ట్ కూడా చేయలేదు. ఒక్క బ్రేక్ పాయింట్ అవకాశం కూడా ఇవ్వని నాదల్ ప్రత్యర్థి సర్వీస్ను మూడుసార్లు బ్రేక్ చేశాడు.
మ్యాచ్ 314 నిమిషాలు...సెట్ 177 నిమిషాలు...
Published Wed, Jan 18 2017 12:49 AM
Advertisement
మారిన క్రెడిట్ కార్డ్ నిబంధనలు.. మే 1 నుంచి అమల్లోకి..
గోబెల్స్ స్ఫూర్తితో.. ప్రధాని మోదీపై జైరాం ఆగ్రహం
ఇక ‘వందే మెట్రో’.. రైల్వే కీలక అప్డేట్
దిగ్గజ బ్యాంకర్ అభయ్ ఐమా కన్నుమూత
హైదరాబాద్లో భారీగా పెరిగిన ఆఫీస్ లీజింగ్
అతి త్వరలోనే గ్రేట్ సమ్మర్ సేల్.. స్మార్ట్ఫోన్లపై భారీ డిస్కౌంట్లు!
Shankar-Ram Charan Movie: సరికొత్త పాత్రలో చెర్రీ
నిమిషానికి 500 గంటల కంటెంట్ అప్లోడ్.. యూట్యూబ్ ప్రస్థానం ఇదే..
కొత్త రకం ఏటీఎంలు.. భారత్తో తొలిసారి
ఉత్తరాఖండ్ టూరిజం ఆధ్వర్యంలో ‘నక్షత్ర సభ’: థ్రిల్లింగ్ అనుభవం కావాలంటే!
నేడు రాష్ట్రానికి అమిత్ షా, రాజ్నాథ్సింగ్ రాక
జైళ్లకు భయపడను.. ప్రాణాలైనా బలిపెడతా: కేసీఆర్
Jammu and Kashmir: ఉగ్ర ఘాతుకం
తెల్దేవర్పల్లి @ 46.7
బాలసదనాన్ని తనిఖీ చేసిన కలెక్టర్
బీజేపీది రైతు వ్యతిరేక ప్రభుత్వం
సోషల్ మీడియా ప్రకటనలపై నిఘా : ఎస్పీ
చెరువు శిఖం కబ్జా
ఎన్నికల విధుల కేటాయింపులో ఇష్టారాజ్యం
రిజర్వేషన్లపై మోదీ స్పష్టత ఇచ్చినా.. రేవంత్ గోబెల్స్ ప్రచారం
తప్పక చదవండి
- నేడు నీట్ యూజీ
- ఐరాసలో జగన్ విజన్
- మండే ఎండలు X మధుమేహం!
- నెల ముందే గరిష్టానికి..!
- నాన్స్టాప్గా...
- ఐపీఎల్పై వివాదాస్పద కామెంట్స్.. క్లారిటీ ఇచ్చిన స్టార్ డైరెక్టర్
- ట్రెండింగ్లో 'హీరామండి'.. సిరీస్పై అద్భుతమైన ప్రశంసలు
- పూంచ్లో ఉగ్రదాడి.. సైనికులకు గాయాలు
- ఐసీయూలో అమ్మ... కలుస్తానంటే వెళ్లనివ్వలేదు: ప్రముఖ టీవీ నటి
- బాలుడి ఊపిరితిత్తుల్లోకి ఎల్ఈడీ బల్బు.. డాక్టర్లు ఏం చేశారంటే..
Advertisement