మనసంతా ఇక్కడే...

 సినిమాల కోసం సిద్ధార్థ్ మల్హోత్రా దేశరాజధాని ఢిల్లీ నుంచి ముంబైకి మకాం మార్చినా.. సొంత నగరంపై మాత్రం ప్రేమ తగ్గలేదు. ముంబై తనను ఇంత వాడిని చేసినా, మనసంతా ఢిల్లీపైనే ఉంటుందన్నాడు. ‘కొత్త నటుల కోసం నిర్మాతలు వెతుకుతున్న సమయంలోనే ముంబైకి రావడం మంచిదయింది. ఇక్కడికి వచ్చాక నేనెంతో మారిపోయాను. నా వ్యక్తిత్వం మరింత పరిణతి చెందడానికి ముంబై ఎంతో ఉపయోగపడింది. ప్రతిభ ఉన్న వాళ్లకు ఇక్కడ అవకాశాలు సులువుగా దొరుకుతాయి. ఇలాంటి పరిస్థితే ఢిల్లీలోనూ ఉండాలని కోరుకుంటున్నాను. ఢిల్లీ సొంత నగరం కాబట్టి ప్రేమ ఉన్నా.. ముంబై కూడా గొప్పదే’ అని ఈ 29 ఏళ్ల యువనటుడు వివరించాడు.