2.ఓలో సూపర్‌స్టార్ త్రిపాత్రాభినయం?

రోజు రోజుకు అంచనాలను పెంచుతున్న చిత్రం 2.ఓ. కారణం ప్రత్యేకంగా చెప్పనక్కర్లేదు. ఇది సూపర్‌స్టార్ చిత్రం. దీనికి సృష్టికర్త బ్రహ్మాండ చిత్రాల దర్శకుడు శంకర్. ఈ రెండు ధ్రువాలు చాలు 2.ఓ చిత్రానికి క్రేజ్‌ను తెచ్చి పెట్టడానికి.అయితే పలు ఆసక్తికరమైన అంశాలతో తెరకెక్కుతున్న చిత్రం ఇది. ఎందిరన్ చిత్రంలో రజనీకాంత్ వశీకరన్, చిట్టీ పాత్రల్లో నటించారు. ఆ చిత్రం అమోఘ విజయాన్ని సాధించింది. ఇప్పుడు దానికి సీక్వెల్‌గా రూపొందుతున్న 2.ఓ చిత్రంలో రజనీ అదనంగా మరో పాత్రలోనూ కనిపించనున్నారన్నది తాజా సమాచారం. ఈ పాత్ర కూడా రోబోనే నట.

ఎందిరన్ చిత్రంలోని చిట్టి(రోబో)పాత్ర కోడ్‌లతో కొత్తగా మరో రోబోను విలన్ అక్షయ్‌కుమార్ తయారు చేస్తారట. కాగా ఇందులో మరో విలన్‌గా బాలీవుడ్ నటుడు సుదన్‌షా పాండే నటిస్తున్నారు. ఈ విలన్‌లను వారు కనిపెట్టిన దుష్ట రోబోను నాశనం చేయడానికి రజనీకాంత్ మరో రోబోను సృష్టించి ఎలా వారిని మట్టుపెట్టారన్నదే 2.ఓ చిత్ర ఇతివృత్తం అని కోలీవుడ్ వర్గాల సమాచారం. ఎమీజాక్సన్ నాయకిగా నటిస్తున్న ఈ చిత్రంలో ఒకే ఒక్క పాట చోటు చేసుకుంటుందని తెలిసింది.

అయితే చిత్ర ఆల్బమ్‌లో మాత్రం ఆరు పాటలు ఉంటాయట. చిత్ర నిర్మాణం చివరి దశకు చేరుకుంది. లైకా ప్రొడక్షన్‌‌స సంస్థ 300 కోట్ల వ్యయంతో నిర్మిస్తున్న ఈ చిత్రానికి నీరవ్‌షా చాయాగ్రహణం,  ఏఆర్.రెహ్మాన్ సంగీతాన్ని అందిస్తున్నారు. పలువురు హాలీవుడ్ సాంకేతిక నిపుణులు పని చేస్తున్న ఈ చిత్రం కోసం ఇటు చిత్ర పరిశ్రమ, అటు రజనీ అభిమానులు ఎంతో ఆతృతగా ఎదురు చూస్తున్నారు.