అప్పుడు అభిమన్యుడు.. ఇప్పుడు శక్తి

తమిళనాట మంచి మాస్‌ హీరోగా ఫాలోయింగ్‌ ఉన్న శివ కార్తికేయన్‌ కథానాయకుడిగా ‘ఇరుంబుదురై (అభిమన్యుడు)’ ఫేమ్‌ పీఎస్‌ మిత్రన్‌ దర్శకత్వం వహించిన తమిళ చిత్రం ‘హీరో’. కళ్యాణి ప్రియదర్శిని హీరోయిన్‌గా నటించిన ఈ చిత్రాన్ని కేజేఆర్ స్టూడియోస్‌, గంగా ఎంట‌ర్‌టైన్‌మెంట్స్ సంయుక్తంగా నిర్మించాయి. గతేడాది డిసెంబర్‌ 20న తమిళంలో విడుదలైన ఈ చిత్రం హిట్‌ టాక్‌ను సొంతం చేసుకుంది. అయితే అభిమన్యుడు చిత్రంతో డైరెక్టర్‌ మిత్రన్‌, కౌసల్య కృష్ణమూర్తి చిత్రంతో శివ కార్తికేయన్‌ తెలుగులో మంచి మార్కెట్‌ సంపాదించుకున్నారు. దీంతో వీరిద్దరి కాంబినేషన్‌లో వచ్చిన హీరో చిత్రాన్ని తెలుగులో విడుదల చేయనున్నారు. ఈ తమిళ చిత్రాన్ని తెలుగులో శక్తి పేరిట విడుదల చేయబోతున్నట్లు చిత్ర యూనిట్‌ అధికారికంగా ప్రకటించింది. 

ఇక యాక్షన్‌ కింగ్‌ అర్జున్‌ కీలక పాత్ర పోషించిన ఈ మూవీలో బాలీవుడ్‌ నటుడు అభయ్‌ డియోల్‌ తొలి సారి దక్షిణాదిచిత్రంలో కనిపించాడు. ఇక అభిమన్యుడు చిత్రంతో పీఎస్‌ మిత్రన్‌ తెలుగులో ఎంతటి ఘన విజయం సాధించిందో ప్రత్యేకంగా చెప్పక్కర్లేదు. ఇప్పటికే తెలుగు డబ్బింగ్‌ మొదలు పెట్టిన చిత్ర బృందం ఈ సినిమాను నెలాఖరులో విడుదల చేయాలని భావిస్తున్నారు. యువన్‌శంకర్‌ రాజా సంగీతమందించిన ఈ చిత్రానికి జార్జి.సి.విలియమ్స్‌ సినిమాటోగ్రఫీ అందించారు. ఇక అఖిల్‌ అక్కినేని హీరోగా పీఎస్‌ మిత్రన్‌ దర్శకత్వంలో ఓ సినిమా తెరకెక్కనున్న విషయం తెలిసిందే. ప్రస్తుతం బొమ్మరిల్లు భాస్కర్‌ చిత్రంతో అఖిల్‌, హీరో(శక్తి) చిత్రంతో మిత్రన్‌ బిజీగా ఉన్నారు. వారి వారి సినిమాలు పూర్తి చేసిన తర్వాత వీరిద్దరి కొత్త సినిమా మొదలవుతుందని తెలిసింది.