నిఫ్టీ, సెన్సెక్స్‌ రికార్డుల మోత

ముంబై : దేశీయ ఈక్విటీ సూచీలు సెన్సెక్స్‌, నిఫ్టీ రికార్డుల మోత మోగించాయి. మొట్టమొదటిసారి నిఫ్టీ తన అ‍త్యంత కీలకమైన మార్కు 10,000కు పైన నిలిచింది. తీవ్ర దోబూచులాటల మధ్య నడిచిన నిఫ్టీ, మధ్యాహ్న ట్రేడింగ్‌ నుంచి పుంజుకుని, ఈ మైలురాయిని పునరుద్ధరించుకుంది. మంగళవారం ఆరంభంలో నిఫ్టీ 10వేల మార్కును తాకి, ఇన్వెస్టర్లలో కోలాహాలం నింపిన సంగతి తెలిసిందే. కానీ ఆ సంతోషం ఎంతో సేపు మిగలలేదు. వెనువెంటనే ఆ మార్కు నుంచి పడిపోయింది. నిన్నటి ట్రేడింగంతా మళ్లీ ఆ మార్కును అందుకోలేకపోయింది. కానీ బుధవారం ట్రేడింగ్‌లో నిఫ్టీ తన మార్కును మళ్లీ అందుకుని, ఇన్వెస్టర్లకు కొత్త ఆశలు చిగురించేలా చేసింది. ఆఖరి గంటల్లో జరిగిన స్ట్రాంగ్‌ ట్రేడింగ్‌తో మొట్టమొదటిసారి 10వేల మైలురాయి పైన, 56 పాయింట్ల లాభంలో 10020.65 వద్ద ముగిసింది.