ట్రాన్స్‌కో పై ‘ఉచిత’ భారం!

 బొబ్బిలి, న్యూస్‌లైన్ : ఎస్సీ, ఎస్టీలు 50 యూనిట్ల లోపు విద్యుత్ వినియోగిస్తే.. ఆ భారాన్ని ప్రభుత్వమే భరిస్తుందని  పాలకులు ఏడు నెలల క్రితం ప్రకటించారు.  ఈ మేరకు గత ఏడాది ఏప్రిల్ ఒకటో తేదీన ఉత్తర్వులు జారీ అయ్యాయి.  జిల్లాలో ఎస్సీ, ఎస్టీల్లో ఎంతమంది 50 యూనిట్లు వాడుతున్నారు... దీని వల్ల ఎంత భారం అవుతుందన్న లెక్కలను  ట్రాన్స్‌కో అధికారులు కట్టారు. జిల్లాలో ఉచిత విద్యుత్‌కు అర్హత ఉన్న వారిలో ఎస్సీల్లో 17,300 మంది, ఎస్టీల్లో 34,450 ఉన్నట్టు గుర్తించారు.   వీరందరికీ ట్రాన్స్‌కో అధికారులు ఏప్రిల్ నెల నుంచే ఉచితంగా విద్యుత్ సరఫరా చేస్తున్నారు.   ఆ భారాన్ని ప్రభుత్వం భరించాల్సి ఉంది. కానీ ఇప్పటివరకు ప్రభుత్వం ట్రాన్స్‌కోకు పైసా కూడా చెల్లించలేదు. జిల్లావ్యాప్తంగా  ప్రతి నెలా ఎస్సీ లబ్ధిదారులు వినియోగించిన విద్యుత్‌కు రూ. 25 లక్షలు, ఎస్టీ లబ్ధిదారులు వినియోగించిన దానికి రూ. 15 నుంచి రూ. 17 లక్షల వరకూ చెల్లించాల్సి  ఉంది. గత ఏడాది నవంబరు నాటికి ఈ బకారుు రూ. 3.50 కోట్ల వరకూ ఉన్నట్టు ఆ శాఖాధికారులు ప్రభుత్వానికి ప్రతిపాదనలు పంపారు.