బల్బు వెలగదు.. ఫ్యాన్ తిరగదు ఎడాపెడా కోతలు

సాక్షి, రాజమండ్రి :విద్యుత్తు కోతలు వేసవిని తలపిస్తున్నాయి. విద్యుత్ ఉత్పత్తి తగ్గిందంటూ సాకు చూపి వేళాపాళా లేకుండా కోతలు అమలు చేస్తున్నారు. గ్రామాల్లో ఎనిమిది, పట్టణాల్లో కనీసం ఆరు, నగరాల్లో నాలుగు గంటల చొప్పున విద్యుత్ కోత విధిస్తున్నారు. ఉత్పత్తి తగినంత లేకపోతే అదనంగా మరో రెండు గంటలు కోతలు తప్పవని ఈపీడీసీఎల్ అధికారులు స్పష్టం చేస్తున్నారు. చలికాలం వస్తున్నా.. విద్యుత్ కోతలేమిటంటూ వినియోగదారులు ఆవేదన చెందుతున్నారు. గత ఏడాది అక్టోబర్‌లో వినియోగంతో పోల్చి చూస్తే ఈ ఏడాది వినియోగం విపరీతంగా పెరిగిందని విద్యుత్తు శాఖ లోడ్ మానిటరింగ్ విభాగం అధికారులు చెబుతున్నారు.