చీమకుర్తి: జీతం డబ్బుల్ని మొదటి భార్యకు పంపుతున్నాడని.. తనను సరిగా పట్టించుకోవడం లేదన్న కారణంతో మద్యం మత్తులో నిద్రపోతున్న భర్త మర్మాంగాన్ని రెండో భార్య కత్తితో కోసేసిన ఘటన ప్రకాశం జిల్లా చీమకుర్తి మండలం తొర్రగుడిపాడులో జరిగింది. పోలీసులు తెలిపిన వివరాల మేరకు.. బిహార్‌కు చెందిన విజయ్‌యాదవ్‌కు రెండు పెళ్లిళ్లు జరిగాయి. మొదటి భార్య బిహార్‌లో ఉంటోంది. ఆమెకు నలుగురు పిల్లలు. ఈ క్రమంలో విజయ్‌యాదవ్‌ బిహార్‌లోనే తన గ్రామానికే చెందిన సీతాకుమారిని మూడేళ్ల కిందట రెండో పెళ్లి చేసుకున్నాడు. ఆరు నెలల కిందట తొర్రగుడిపాడు వచ్చి స్థానిక డెయిరీ ఫాంలో రెండో భార్యతో కలిసి పనిచేస్తున్నాడు. అయితే జీతం డబ్బులను మాత్రం బిహార్‌లోని మొదటి భార్యకు పంపిస్తుండటం రెండో భార్యకు ఆగ్రహం తెప్పించింది. చెప్పిన మాట వినకపోవడంతో శనివారం రాత్రి మద్యం మత్తులో నిద్రపోతున్న విజయ్‌ యాదవ్‌ మర్మాంగాన్ని కూరగాయలు కోసే కత్తితో కోసి సీతాకుమారి పరారైంది. జరిగిన సంఘటన డెయిరీఫాం యజమానికి వివరించింది. తీవ్రంగా గాయపడిన విజయ్‌యాదవ్‌ను స్థానికులు ఒంగోలు ఆస్పత్రిలో చేర్ఫించారు. దీంతో ఆదివారం ఈ విషయం వెలుగులోకొచ్చి0ది. సీతాకుమారిని పోలీసులు అదుపులోకి తీసుకున్నారు. ఆమె ప్రస్తుతం 6 నెలల గర్భిణి కావడంతో ఒంగోలులోని సతీసదన్‌ (మహిళా సంరక్షణ సమితి)లో చేర్ఫించినట్లు సీఐ సుబ్బారావు తెలిపారు. బాధితుడి ఫిర్యాదు మేరకు కేసు దర్యాప్తు చేస్తున్నారు.

సాక్షి, హైదరాబాద్‌: మావోయిస్టులతో సంబంధాలు ఉన్నాయనే ఆరోపణలతో జాతీయ దర్యాప్తు సంస్థ (ఎన్‌ఐఏ) అధికారులు గురువారం హైదరాబాద్‌లో వీక్షణం పత్రిక ఎడిటర్, వరవరరావు అల్లుడు ఎన్‌. వేణుగోపాల్‌తోపాటు రచయిత, పౌరహక్కుల నేత రవిశర్మ నివాసాల్లో సోదాలు జరిపారు. తెల్లవారుజామున 4 గంటలకే హిమాయత్‌నగర్‌లోని ఎన్‌. వేణుగోపాల్‌ ఇంటితోపాటు ఎల్బీ నగర్‌ శ్రీనివాసనగర్‌ కాలనీలోని రవిశర్మ ఇంట్లో సోదాలు నిర్వహించారు. పలు పుస్తకాలు, కొన్ని అనుమానాస్పద డా­క్యు­మెంట్లు, సెల్‌ఫోన్లు స్వాధీనం చేసుకున్నారు. ఈ నె­ల 10న గచ్చిబౌలిలోని ఎన్‌ఐఏ కార్యాలయానికి వి­చారణ కోసం హాజరుకావాలని నోటీసులు ఇచ్చారు.  ఆ కేసు ఆధారంగా దర్యాప్తు...   మావోయిస్టు పార్టీ సెంట్రల్‌ కమిటీ సభ్యుడు సంజయ్‌ దీపక్‌రావును గతేడాది సెప్టెంబర్‌ 15న కూకట్‌పల్లి పీఎస్‌ పరిధిలోని మలేసియా టౌన్‌షిప్‌లో సైబరాబాద్‌ పోలీసులు, తెలంగాణ ఇంటెలిజెన్స్‌ సిబ్బంది అరెస్ట్‌ చేశారు. ఆ ఎఫ్‌ఐఆర్‌ ఆధారంగా ఈ ఏడాది జనవరి 3న ఎన్‌ఐఏ అధికారులు మరో ఎఫ్‌ఐఆర్‌ నమోదు చేశారు. సంజయ్‌ దీపక్‌రావుతో ఎన్‌. వేణుగోపాల్, రవిశర్మకు సంబంధాలు ఉన్నాయనే ఆరోపణల దృష్ట్యానే ఈ సోదాలు జరిగినట్లు సమాచారం. ఈ కేసులో వేణుగోపాల్‌ను 22వ నిందితుడిగా పేర్కొన్న ఎన్‌ఐఏ... రవిశర్మతోపాటు కేరళకు చెందిన మరో ముగ్గురిని సైతం నిందితులుగా చేర్చింది. కబలి దళం పేరిట సమావేశాలు నిర్వహించి ప్రభుత్వాన్ని కూలగొట్టడానికి ప్రయత్నించినట్లు ఎఫ్‌ఐఆర్‌లో ఆరోపించింది. ఇదే కేసు దర్యాప్తులో భాగంగా గురువారం తెలంగాణతో పాటు మహారాష్ట్ర, తమిళనాడు, కేరళలోనూ సోదాలు నిర్వహించినట్టు ఎన్‌ఐఏ ఓ ప్రకటనలో తెలిపింది. ఈ సోదాల్లో మావోయిస్టు సాహిత్యంతో పాటు ఆరు సెల్‌ఫోన్లు, రూ. 1,37,210 నగదు స్వా«దీనం చేసుకున్నట్టు ఎన్‌ఐఏ అధికారులు పేర్కొన్నారు.  పౌరహక్కుల సంఘాల ఖండన  వేణుగోపాల్, రవిశర్మ ఇళ్లపై ఎన్‌ఐఏ దాడులను పౌరహక్కుల సంఘాల నాయకులు ఖండించారు. కేంద్ర దర్యాప్తు సంస్థలు ఇష్టానుసారంగా దాడులు చేయకుండా సీఎం రేవంత్‌రెడ్డి ఆదేశాలు ఇవ్వాలని ప్రొఫెసర్‌ హరగోపాల్‌ డిమాండ్‌ చేయగా అక్రమ కేసులు ఎత్తివేయాలని, ఉపా చట్టాన్ని రద్దు చేయా­ల­ని పౌరహక్కుల సంఘం రాష్ట్ర అధ్యక్షుడు ప్రొఫె­సర్‌ గడ్డం లక్ష్మణ్, ప్రధాన కార్యదర్శి ఎన్‌ నారాయణరావు డిమాండ్‌ చేశారు. నిర్బంద వ్యతిరేక వేదిక తెలంగాణ సైతం ఈ అరెస్టులను ఖండించింది.  విచారణకు హాజరవ్వాలన్నారు: రవిశర్మ  మన్సూరాబాద్‌: రవిశర్మ మీడియాతో మాట్లాడుతూ 10న విచారణకు హాజరుకావాలని ఎన్‌ఐఏ అధికారులు ఆదేశించారని చెప్పారు. 2016­లో జనజీవన స్రవంతిలో కలిసినప్పటి నుంచి తాను ఎలాంటి మావోయిస్టు కార్యకలాపాల్లో పాల్గొనడం లేదని స్పష్టం చేశారు. 2019లో స్థానిక పోలీసులు, 2021లో ఎన్‌ఐఎ అధికారులు తన ఇంట్లో సోదాలు చేసినా ఎలాంటి ఆధారాలు లభించలేదని గుర్తుచేశారు.  ఇది పూర్తిగా అబద్ధపు కేసు: ఎన్‌.వేణుగోపాల్‌  ఎన్‌ఐఏ అధికారులు తనపై నమోదు చేసినది పూర్తిగా అబద్ధపు కేసని వీక్షణం పత్రిక ఎడిటర్‌ ఎన్‌. వేణుగోపాల్‌ ఆరోపించారు. ‘నేను ఒక మాస పత్రిక నడుపుతున్నాను. నేను ప్రస్తుతం విరసంలో లేను’అని మీడియాకు విడుదల చేసిన ఓ వీడియోలో ఆయన పేర్కొన్నారు. 2013లో నయీం బెదిరింపు లేఖలపై తాను రాసిన పుస్తకాలను ఎన్‌ఐఏ అధికారులు స్వాధీనం చేసుకున్నారన్నారు. తన మొబైల్‌ ఫోన్‌ను సీజ్‌ చేశారని, ఈ నెల 10న విచారణకు హాజరుకావల్సిందిగా నోటీసులు ఇచ్చారని వేణుగోపాల్‌ పేర్కొన్నారు.

సిద్దిపేట కమాన్‌: ట్రాన్స్‌జెండర్‌గా మారి వేధిస్తున్నాడంటూ సుపారీ ఇచ్చి మరీ భర్తను హత్య చేయించింది ఓ భార్య. సుపారీ కింద రూ.18 లక్షలు ఇస్తానని ఒప్పందం కుదుర్చుకొని.. రూ.4.60 లక్షలు అడ్వాన్స్‌గా చెల్లించింది. సిద్దిపేట వన్‌టౌన్‌ సీఐ కృష్ణారెడ్డి, ఎస్‌ఐ రంజిత్‌కుమార్‌ కథనం ప్రకారం.. సిద్దిపేట బోయిగల్లికి చెందిన వేదశ్రీకి నాసర్‌పూరకు చెందిన దరిపల్లి వెంకటేశ్‌(33)కు 2014లో వివాహమైంది. 2015లో వీరికి ఒక పాప జన్మించింది. కొద్ది రోజుల తర్వాత వెంకటేశ్‌కు మానసిక ఆలోచనల్లో మార్పు వచ్చింది. అమ్మాయిలాగా ప్రవర్తించడం చెవులకు కమ్మలు, ముక్కుకు పుడక పెట్టుకుని రాత్రి సమయంలో ఆడవారి దుస్తులు ధరించడం చేస్తుండేవాడు. అదనపు కట్నం కోసం కూడా వేధింపులకు గురి చేసేవాడు. 2019లో ఏకంగా వెంకటేశ్‌ ట్రాన్స్‌జెండర్‌గా మారి భార్యను తీవ్రంగా వేధించడం మొదలుపెట్టాడు. వేధింపులకు ఉద్యోగం పోవడంతో పగబట్టి.. రోజాగా పేరుమార్చుకున్న వెంకటేశ్‌ పలుమార్లు చీరకట్టుకుని వేదశ్రీ పనిచేస్తున్న స్కూలుకు వెళ్లి వేధిస్తుండటంతో తన ఉద్యోగాన్ని కోల్పోయింది. మరో స్కూల్లో చేరినా ఇదే పరిస్థితి ఎదురైంది. ఈ క్రమంలో తనకు పరిచయమైన సిద్దిపేట నాసర్‌పూర వాస్తవ్యుడు బోయిని రమేశ్‌తో తన బాధను చెప్పుకొని వాపోయింది. తనను, పాపను వేధిస్తున్న వెంకటేశ్‌ (రోజా)ను ఎలాగైనా అడ్డు తొలగించాలని నిర్ణయించుకుంది. దీంతో వేదశ్రీ, రమేశ్‌ కలిసి పట్టణంలోని కాకతీయ ఫుట్‌వేర్‌ యజమాని రమేశ్‌తో వెంకటేశ్‌(రోజా) హత్య కోసం 2023 సెప్టెంబర్‌లో రూ. 18లక్షలకు ఒప్పందం కుదుర్చుకున్నారు. ఇందుకు అడ్వాన్స్‌గా వేదశ్రీ మొదటగా రూ.2లక్షలు చెల్లించింది. ఈ క్రమంలో ఫుట్‌వేర్‌ రమేశ్‌కు మిత్రుడైన నంగునూరు మండలం నాగరాజుపల్లికి చెందిన ఇప్పల శేఖర్‌కు హత్య విషయం తెలిపారు. దీంతో ఇప్పల శేఖర్‌ ముందుగా వేసుకున్న పథకంలో భాగంగా వెంకటేశ్‌ (రోజా)తో పరిచయం చేసుకుని తరచూ అతడిని కలుస్తూ ఉండేవాడు. ఈ క్రమంలోనే ఇప్పల శేఖర్‌ వెంకటేశ్‌(రోజా)కు ఫోన్‌ చేసి వరంగల్‌ నుంచి సిద్దిపేటకు పిలిపించాడు.


 సాక్షి, హైదరాబాద్: ఏం కాదులే అని సిగ్నల్ జంపింగ్ చేసేస్తున్నారా? బైక్ నడుపుతూ ఫోన్లు మాట్లాడేస్తున్నారా? రోడ్డు పక్కన ఎక్కడపడితే అక్కడ బండి పార్కింగ్ చేసేస్తున్నారా? ఇకపై అలా చేస్తే.. జేబుకు భారీగానే చిల్లు పడుతుంది. ఈ నెల 12 నుంచి సిగ్నల్ జంపింగ్, సెల్‌ఫోన్ డ్రైవింగ్, ఓవర్‌లోడింగ్, అక్రమ పార్కింగ్‌కు పాల్పడే వారిపై 2011 జీవో ఆధారంగా రూ.1,000 చొప్పున భారీ జరిమానాలు విధించనున్నట్లు హైదరాబాద్ అదనపు పోలీసు కమిషనర్(ట్రాఫిక్) అమిత్ గార్గ్ తెలిపారు. ఈ మేరకు బుధవారం ఓ ప్రకటన విడుదల చేశారు.
  
  ట్రాఫిక్ పోలీసుల కోణంలో ట్రాఫిక్ ఉల్లంఘనలు ముఖ్యంగా మూడు రకాలు... వాహన చోదకుడికి ప్రమాదకరమైనవి, ఎదుటి వ్యక్తికి ప్రమాదకరంగా మారేవి, వాహనచోదకుడితో పాటు ఎదుటి వ్యక్తికీ ప్రాణాంతకమైనవి. వీటిలో అన్నింటికంటే చివరి అంశానికి సంబంధించినవి నిరోధించడానికి అధికారులు ఎక్కువ ప్రాధాన్యం ఇస్తున్నారు. ఇందులో భాగంగానే ఈ నాలుగు రకాల ఉల్లంఘనలపై ఉక్కుపాదం మోపాలని నిర్ణయించినట్లు అమిత్ గార్గ్ తెలిపారు.
  
    సైబరాబాద్ పోలీసులు గత నెల నుంచే ఈ విధానాన్ని అమల్లో పెట్టారు. ఇతర ఉల్లంఘనల కంటే మద్యం తాగి వాహనాలు నడపడం, సిగ్నల్ జంపింగ్, సెల్‌ఫోన్ డ్రైవింగ్, ఓవర్ లోడింగ్, అక్రమ పార్కింగ్ అత్యంత ప్రమాదకరమైనవని ట్రాఫిక్ పోలీసులు అభిప్రాయపడుతున్నారు. వీటికి పాల్పడేది ఎక్కువగా యువత కావడంతో వారు ప్రమాదాలబారిన  పడి.. బంగ రు భవిష్యత్తును పాడుచేసుకోవడంతోపాటు తల్లిదండ్రులకూ గర్భశోకాన్ని మిగుల్చుతున్నారు. ఇప్పటికే మద్యం తాగి వాహనాలు నడుపుతున్నవారి విషయంలో పోలీసులు కఠినంగా వ్యవహరించడంతోపాటు కోర్టులో హాజరుపరిచి, జైలు శిక్షలు సైతం పడేలా చేస్తున్నారు. ఇప్పుడు పైవాటిపై దృష్టి పెట్టారు.
  
  ఏమిటా జీవో?
  తక్కువస్థాయిలో ఉన్న జరిమానా మొత్తాలకు ఉల్లంఘనులు భయపడట్లేదని, ఈ మొత్తాలను భారీగా పెంచాల్సిన అవసరం ఉందని గతంలో అనేక సందర్భాల్లో న్యాయస్థానాలు అభిప్రాయపడ్డాయి. దీన్ని పరిగణనలోకి తీసుకున్న కేంద్ర ప్రభుత్వం మోటారు వాహన చట్టానికి సవరణ చేస్తూ 2011లో ఉత్తర్వులు జారీ చేసింది. దాని ఆధారంగా 18 అంశాలకు సంబంధించిన ఉల్లంఘనల జరిమానాలు పెంచుతూ అదే ఏడాది ఆగస్టు 18న రాష్ట్ర ప్రభుత్వం జీవో నం. 108ను విడుదల చేసింది.  దీనిపై విమర్శలు రావడంతో అమలును అనధికారికంగా నిలిపివేశారు. ఇప్పుడా జీవో దుమ్ము దులిపిన హైదరాబాద్ ట్రాఫిక్ పోలీసులు పై నాలుగు అంశాల విషయంలో అమలుకు నిర్ణయించారు.  
  


  ‘ఐఐటీ-హైదరాబాద్’ స్నాతకోత్సవంలో ‘ఇన్ఫోసిస్’ మూర్తి
  సాక్షి, సంగారెడ్డి: ‘గ్రాడ్యుయేషన్ తర్వాత నేను 1970లో పారిస్ వెళ్లాను. అప్పట్లో భారత్ అంటే విదేశీయుల దృష్టిలో పనికిరాని దేశం. గ్రాడ్యుయేట్లుగా మీరు బయటకు వస్తున్న ఈ తరుణంలో మాత్రం మన దేశం ప్రపంచం దృష్టిలో ఎంతో నిరూపించుకుంది’ అని ఇన్ఫోసిస్ కార్యనిర్వాహక చైర్మన్ ఎన్‌ఆర్ నారాయణమూర్తి అన్నారు.
  
  మెదక్ జిల్లా సంగారెడ్డి మండలం ఎద్దుమైలారంలోని ఓఎఫ్‌డీ కర్మాగారంలో తాత్కాలికంగా నిర్వహిస్తున్న ‘ఐఐటీ-హైదరాబాద్’ కళాశాల ద్వితీయ స్నాతకోత్సవం బుధవారం జరిగింది. బీటెక్, ఎంఎస్సీ కోర్సులు పూర్తి చేసుకున్న విద్యార్థులకు పట్టాలు, బంగారు, వెండి పతకాలు ప్రదానం చేశారు. ఈ కార్యక్రమానికి ముఖ్య అతిథిగా విచ్చేసిన ఎన్‌ఆర్ నారాయణ మూర్తి విద్యార్థులనుద్దేశించి ప్రసంగించారు. ‘ప్రపంచ ఆర్థిక, రాజకీయ సమస్యల పరిష్కారంలో నాయకత్వం వహించే దేశాల్లో ఒకటిగా ప్రపంచం భారతదేశం వైపు చూస్తోంది. ఈ గొప్ప అవకాశం, బాధ్యత మీపైనే ఉంది. మీ ప్రతి చర్య భవిష్యత్తు తరాలకు అద్భుత దేశాన్ని అందించేలా ఉండాలి. అవినీతి, అన్యాయానికి వ్యతిరేకంగా పోరాడండి. ఇది మీ పవిత్ర బాధ్యత’ అని ఆయన సూచించారు. క్రియాశీలం, వేగం, నిజాయతీ, సార్థకత, ఉత్సాహం, క్రమశిక్షణతో పనిచేసి కేంద్ర, రాష్ట్ర ప్రభుత్వాల సహకారంతో దేశ ప్రజాస్వామ్యాన్ని బలోపేతం చేయాలన్నారు.


 ప్రధాన డిమాండ్లపై కుదరని రాజీ.. 
  సాక్షి, హైదరాబాద్: 108 సిబ్బంది సమస్యలపై అదనపు లేబర్ కమిషనర్ సూర్యప్రసాద్ సమక్షంలో జీవీకే యాజమాన్యం, 108 సర్వీసెస్ కాంట్రాక్ట్ ఎంప్లాయీస్ యూనియన్ ఆధ్వర్యంలో బుధవారం జరిగిన చర్చలు విఫలమయ్యాయి. హైదరాబాద్ ఆర్టీసీ క్రాస్‌రోడ్‌లోని టి.అంజయ్య కార్మిక సంక్షేమ భవన్‌లో సాయంత్రం 4 గంటల నుంచి రాత్రి 9 గంటలవరకు జరిగిన చర్చల్లో సిబ్బంది ప్రధాన డిమాండ్లు.. కనీస వేతనం రూ.15 వేలు, అదనపు పనికి అదనపు వేతనం తదితర అంశాలపై జీవీకే యాజమాన్యం, యూనియన్ ప్రతి నిధుల మధ్య రాజీ కుదరలేదు. దీంతో గురువారం మధ్యాహ్నం 12 గంటలకు ఉభయపక్షాలతో మళ్లీ చర్చలు జరపాలని కార్మిక శాఖ నిర్ణయించింది. తాజా చర్చల్లో జీవీకే, ఈఎంఆర్‌ఐ ప్రతినిధులు భట్టాచార్య, మూర్తి, 108 యూనియన్ ప్రతినిధులు భూపాల్, అప్పిరెడ్డి తదితరులు పాల్గొన్నారు.


  అదీ ఎక్కువ ధరకా..?
  ఈఆర్‌సీని ప్రశ్నించిన విద్యుత్‌రంగ నిపుణులు
  సాక్షి, హైదరాబాద్: తక్కువ ధరకే విద్యుత్ అందుబాటులో ఉండగా... అధిక ధర చెల్లించి ఏకంగా 25 ఏళ్లపాటు కరెంటు కొనుగోలు చేయాల్సిన అవసరం ఏముందని విద్యుత్ రంగ నిపుణులు తిమ్మారెడ్డి, వేణుగోపాల్‌రావు తదితరులు ప్రశ్నించారు. కేస్-1 బిడ్డింగ్ ద్వారా రానున్న 25 ఏళ్లపాటు 250 మెగావాట్ల విద్యుత్‌ను కాంగ్రెస్ ఎంపీ సుబ్బరామిరెడ్డికి చెందిన థర్మల్ పవర్ టెక్ నుంచి కొనుగోలు చేయడంపై విద్యుత్ నియంత్రణ మండలి (ఈఆర్‌సీ) బుధవారం బహిరంగ విచారణ నిర్వహించింది.
  
   సింహాద్రి, హిందూజా తదితర విద్యుత్ ప్లాంట్ల నుంచి తక్కువ ధరకే దీర్ఘకాలంలో విద్యుత అందుబాటులో ఉండగా... యూనిట్‌ను ఏకంగా 15-16 రూపాయలు చెల్లించి థర్మల్ టెక్ నుంచి కొనుగోలు చేయవద్దని తిమ్మారెడ్డి, వేణుగోపాల్‌రావు అభిప్రాయపడ్డారు. ఈ విద్యుత్ కొనుగోలుకు అంగీకారం తెలపవద్దని ఈఆర్‌సీకి విన్నవించారు. ఈ విద్యుత్ కొనుగోలుపై పూర్తి సమాచారం ఇవ్వకుండా హడావుడిగా విచారణ నిర్వహించాల్సిన అవసరం ఏముందని ప్రశ్నించారు. అయితే విద్యుత్ అవసరాలు పెరిగిన నేపథ్యంలో ప్రైవేట్ ప్లాంట్ల నుంచి విద్యుత్ కొనుగోలు చేయవద్దనడం ఎంతవరకు సమంజసమని ఈఆర్‌సీ ఇన్‌చార్జి చైర్మన్ శేఖర్‌రెడ్డి, సభ్యుడు అశోకాచారిలు ప్రశ్నించారు. విద్యుత్ కొనుగోలు చేయకపోతే కోతలతో ఇబ్బందులు ఎదుర్కోవాల్సి ఉంటుంది కదా అని వ్యాఖ్యానించారు. అయితే, కేస్-1 బిడ్డింగ్ ద్వారా విద్యుత్ కొనుగోలుపై సలహాలు, సూచనలు, అభ్యంతరాలు తెలియచేసేందుకు మరో మూడు రోజుల పాటు సమయం ఇస్తున్నట్టు ప్రకటించారు. తర్వాత దీనిపై ఈఆర్‌సీ తుది ఆదేశాలు జారీచేయనుంది.


  తెలంగాణ రాష్ట్రం నేపథ్యంలో మారనున్న ముఖచిత్రం
  సాక్షి, హైదరాబాద్: తెలంగాణ రాష్ట్ర ఏర్పాటు నిర్ణయం నేపథ్యయంలో పాఠశాల విద్యాశాఖలో పరిస్థితిపై చర్చలు ఊపందుకున్నాయి. విద్యాశాఖ, దాని కార్యకలాపాలు ఎలా ఉండనున్నాయన్న విషయంలో వివిధ కోణాల్లో విశ్లేషణలు చేస్తున్నారు. తెలంగాణ రాష్ట్రం ఏర్పాటైతే పాఠశాల విద్యా శాఖ ముఖచిత్రమే మారిపోతుందని అంచనా వేస్తున్నారు. ముఖ్యంగా పాఠ్య పుస్తకాల్లో అనేక మార్పులు వస్తాయని భావిస్తున్నారు. కొత్త రాష్ట్రం ఏర్పడితే స్థానిక సంస్కృతీ సంప్రదాయాలను ప్రతిబింబించేవి పాఠ్య పుస్తకాలే. కాబట్టి ముఖ్యంగా తెలుగు, సాంఘిక శాస్త్రం వంటి పుస్తకాల్లోని పాఠ్యాంశాల్లో ఎక్కువ మార్పులు చేయాల్సి వస్తుందని పేర్కొంటున్నారు. పాలకుల అభీష్టం మేరకు కొత్త రాష్ట్రంలో అనుసరించాల్సిన విద్యా విధానాలు, విద్యా సంస్థల ఏర్పాటు తదితర అంశాలపై అధ్యయనం చేసి, ప్రత్యేక ప్రణాళికతో ముందుకు సాగాల్సి వస్తుందని చెబుతున్నారు.
  
  మారనున్న రాష్ట్ర గేయం?
  తెలంగాణ రాష్ట్రం ఏర్పడితే విద్యాశాఖ పరంగా ముందుగా రెండు వేర్వేరు రాష్ట్ర విద్యా పరిశోధన, శిక్షణ మండలి (ఎస్‌సీఈఆర్‌టీ) ఏర్పాటు చేయాల్సి వస్తుంది. అంతేకాదు ఉమ్మడి రాజధానిలో ప్రత్యేక డెరైక్టరేట్‌లను కూడా ఏర్పాటు చేసుకోవాలి. అవి ముందుగా పాఠ్య పుస్తకాల్లో మార్పులపైనే ప్రధానంగా దృష్టి సారిస్తాయి. రెండు రాష్ట్రాల్లోనూ కొత్తగా ఏర్పాటయ్యే ఆయా సంస్థలు ఆయా రాష్ట్రాల్లోని స్థానిక, సామాజిక, ఆర్థిక, భౌగోళిక పరిస్థితుల ఆధారంగా పాఠ్య పుస్తకాల్లో మార్పులు చేసుకుంటారు.
  
  మరోవైపు తెలుగు ప్రజలంతా ప్రస్తుతం ఆలపిస్తున్న రాష్ట్ర గేయం ‘మా తెలుగుతల్లికి మల్లెపూదండ..’ గేయాన్నే రెండు రాష్ట్రాల్లో ఆలపిస్తారా? లేదా మార్చుకుంటారా? అనే చర్చ ప్రధానంగా సాగుతోంది. తెలంగాణ ఉద్యోగులు మాత్రం రాష్ట్ర గేయాన్ని మార్చక తప్పదని అంటున్నారు. ప్రత్యేక రాష్ట్రం ఏర్పాటు కాకముందే తెలంగాణ ఉద్యోగులు ‘జయ జయహే తెలంగాణ.. జననీ జయ కేతనం...’ గేయాన్ని రూపొందించుకున్నారు. దీంతోపాటు మరో రెండు గేయాలు కూడా పరిశీలనలో ఉన్నాయి.
  
  సాంఘిక, తెలుగు పుస్తకాల్లోనే చాలా మార్పులు
  జాతీయ స్థాయి పోటీ పరీక్షల నేపథ్యంలో ప్రధాన సబ్జెక్టులైన సామాన్యశాస్త్రం, గణిత శాస్త్రం పుస్తకాల్లో పెద్దగా మార్పులు ఉండవు. ఇంగ్లిష్ విదేశీ భాష, హిందీ జాతీయ భాష కావడంతో ఆ పుస్తకాల్లోనూ పెద్దగా మార్పులు చేయాల్సిన అవసరం రాదు. అయితే భాషా, సంస్కృతీ సంప్రదాయాలు, కళలు, కళాకారులు, సాంఘిక, రాజకీయ, భౌగోళిక, ఆర్థిక పరిస్థితులను పరిగణనలోకి తీసుకుంటే రెండు రాష్ట్రాల్లోనూ స్థానిక పరిస్థితులకు పెద ్దపీట వేసి తెలుగు, సాంఘిక శాస్త్రం పుస్తకాల్లో మార్పులు చేయాల్సి వస్తుంది.
  
  ఒకటి నుంచి 10వ తరగతి వరకున్న పుస్తకాల్లో స్థాయిని బట్టి మార్పులు ఉండొచ్చు. వీటిల్లోనూ జాతీయ, అంతర్జాతీయ పాఠ్యాం శాల్లో పెద్దగా మార్పులు ఉండవు. రాష్ట్ర విభజనతో సరిహద్దులు మారుతాయి. దీంతో ఆయా రాష్ట్రాల సరిహద్దులు, భౌగోళిక అంశాలు, సహజ వనరులు వంటి అంశాలతో ప్రత్యేకంగా పాఠ్యాంశాలు ఉంటాయి. సాంఘిక శాస్త్రంలో ఆయా రాష్ట్రాల కొత్త చిత్రాలు ముద్రించాల్సిందే. అలాగే ప్రత్యేక రాష్ట్ర విభజనపైన పాఠ్యాంశాలు చేర్చే అవకాశముంది.


 సాక్షి, హైదరాబాద్: సమైక్య ఉద్యమ సెగతో రాజధాని నగరంలో కూరగాయల ధరలు వేడెక్కాయి. సీమాంధ్ర ప్రాంతంలో ఉద్యమం ఉధృతంగా సాగుతుండటంతో కర్నూలు, గుంటూరు, కృష్ణా జిల్లాల నుంచి పచ్చిమిర్చి, ఉల్లి దిగుమతి నిలిచిపోయింది. బెంగళూరు నుంచి బీన్స్, క్యారెట్, క్యాబేజి సరఫరా ఆగిపోయింది. దీంతో నగరంలో కూరగాయలకు కొరత రోజురోజుకూ పెరుగుతోంది. ఇదే అదనుగా భావించిన వ్యాపారులు అన్ని రకాల కూరగాయల ధరలు అమాంతం పెంచేశారు.
  
   ప్రస్తుతం మార్కెట్లో ఏ రకం కూరగాయలు కొందామన్నా కేజీ రూ.40-80ల వరకు ధర పలుకుతున్నాయి. అన్ని వర్గాల వారు నిత్యం వినియోగించే పచ్చిమిర్చి, ఉల్లి ధరలు రికార్డు స్థాయిలో ఆకాశానికి ఎగబాకాయి. బుధవారం ఉదయం గుడిమల్కాపూర్‌లోని రిటైల్ మార్కెట్లో  కేజీ రూ.100లు వసూలు చేశారు. కర్నూలు ప్రాంతం నుంచి ఉల్లి దిగుమతులు నిలిచిపోవడంతో ఉల్లి ధరల్లో కూడా అనూహ్యంగా మార్పు కన్పిస్తోంది. సాధారణంగా ఇళ్లలో వినియోగించే గ్రేడ్-2 రకం ఉల్లిని సైతం కేజీ రూ.40-50ల ప్రకారం విక్రయిస్తున్నారు.
  
  మార్కెట్లో రూ.500లు వెచ్చిస్తే కూడా కనీసం చేసంచి నిండని పరిస్థితి ఏర్పడింది. రైతుబజార్లలో సైతం కూరగాయల ధరలు మండిపోతుండటంతో సామాన్య, పేద వర్గాల వారు విలవిల్లాడిపోతున్నారు. నగరంలోని 10 రైతుబజార్లకు నిత్యం 8వేల క్వింటాళ్లకు పైగా వచ్చే కూరగాయలు బుధవారం కేవలం 4వేల క్వింటాళ్లే వచ్చాయి. బోయిన్‌పల్లి, గుడిమల్కాపూర్, ఎల్బీనగర్ హోల్‌సేల్ మార్కెట్లకు అన్నిరకాల కూరగాయల దిగుమతి తగ్గిందని మార్కెటింగ్ శాఖ అధికారులు చెబుతున్నారు. బుధవారం హోల్‌సేల్ మార్కెట్లకు 20వేల క్వింటాళ్లకు మించి సరుకు రాలేదని తెలిపారు. ఈ కొరత ప్రభావం క్రమేపీ ధరలపైపడుతూ ఐదు రోజులుగా కూరగాయల రేట్లు పెరగడం ప్రారంభమైంది. సీమాంధ్ర ప్రాంతంలో సమైక్య ఉద్యమం ఇలాగే కొనసాగితే... రానున్న రోజుల్లో కొన్ని రకాల కూరగాయలు కేజీ రూ.100లకు చేరినా ఆశ్చర్యపోవాల్సిన పనిలేదని వ్యాపారులు చెబుతున్నారు.
  
  మార్కెటింగ్ శాఖ ధరలు బోర్డులకే పరిమితం..
  మార్కెటింగ్ శాఖ నిర్ణయించిన ధరలు రైతు బజార్లలో బోర్డులకే పరిమితమవుతున్నాయి. సమీప హోల్‌సేల్ మార్కెట్‌లో ఉన్న ధరలను బట్టి వ్యాపారులకు కొంత లాభం వచ్చేలా మార్కెటింగ్ శాఖ రైతు బజార్లలో ధరలను నిర్ణయిస్తుంది. రైతు బజారులో అదే ధరకు కూరగాయలను రైతులు (వ్యాపారులు) విక్రయించాలి. అయితే ఇక్కడ బోర్డుల్లో ఉన్న ధర కంటే కిలోకు అయిదు నుంచి పది రూపాయల ఎక్కువ ధరలకు రైతు బజార్లలో వ్యాపారులు కూరగాయలను అమ్ముతున్నారు. ఎస్టేట్ ఆఫీసరుకు ఫిర్యాదు చేస్తామని వినియోగదారులు చెప్పినా వ్యాపారులు ఖాతరు చేయడం లేదు.  
  
  కృత్రిమ కొరత సృష్టిస్తున్న వ్యాపారులు...
  ఇతర ప్రాంతాల నుంచి సరుకు రాకపోవడంవల్ల కొరత ఏర్పడితే నగరమంతా అదే పరిస్థితి ఉండాలి. కానీ నగరంలో ఒక ప్రాంతానికీ, మరో ప్రాంతానికి మధ్య కూరగాయల ధరల్లో భారీ వ్యత్యాసం  ఉంటోంది. ‘‘నిజంగా బయట నుంచి సరుకులు రాకపోవడంవల్ల కొరత ఏర్పడితే రైతు బజార్లలోనూ భారీగా ధరలు పెరగాలి. అయితే రైతు బజార్లలో కొంత మేరకే ధరలు పెరిగి బయట మార్కెట్‌లో ఎక్కువ పెరిగింది. వ్యాపారులు కృత్రిమ కొరత సృష్టించడమే కారణం. ఈ వ్యవహారాన్ని నియంత్రించే దిశగా ప్రభుత్వం ఎలాంటి చర్యలూ తీసుకోకపోవడం దారుణం’’ అని అధికారులే  అంటున్నారు.
  
   గతంలో కూరగాయల ధరలు పెరిగిన సమయంలో ప్రభుత్వం చొరవ తీసుకుని రైతు బజార్లలో సరసమైన ధరలకు కూరగాయలను సరఫరా చేసేది. మార్కెటింగ్ శాఖకు ఇందుకోసం నిధులు కేటాయించేది. కానీ ప్రస్తుతం ముఖ్యమంత్రితో సహా మంత్రులు సచివాలయానికే రావడంలేదని, అధికార యంత్రాంగం నిద్రపోతోందని, దీంతో కూరగాయల వ్యాపారులకు కళ్లెం వేసేవారే లేరన్న విమర్శలు ఉన్నాయి. ‘‘అన్ని ధరలూ ఇలా పెరిగిపోతే జనం ఏమి తిని బతకాలి. రూ. 300 తీసుకొస్తే వారానికి సరిపడా కూరగాయలు రావడంలేదు. ఇలాగైతే జనం బతికేదెలా? ప్రభుత్వం ప్రజల బాధలు పట్టించుకోవడంలేదు. మంత్రులు వారి సంపాదన గురించి తప్ప జనం ఇబ్బందులను పరిష్కరిద్దామని ఆలోచించడంలేదు’’ అని విజయనగర్ కాలనీకి చెందిన విమల ఆగ్రహం వ్యక్తం చేశారు.


 హైదరాబాద్, న్యూస్‌లైన్ : సమైక్యాంధ్రకు మద్దతుగా ఈనెల 12 అర్ధరాత్రి నుంచి ఏపీఎన్జీవో చేపట్టనున్న నిరవధిక సమ్మెకు మద్దతు కూడగట్టడానికి బుధవారం ఆర్టీసీ క్రాస్‌రోడ్డులోని కార్మిక శాఖ కమిషనర్ కార్యాలయానికి వచ్చిన ఏపీ ఎన్జీవో నగర నేతలను టీఎన్‌జీవో నాయకులు అడ్డుకుని వెళ్లగొట్టారు. ఏపీ ఎన్జీవో నగర అధ్యక్షుడు జీవీ సత్యానారాయణ ఆధ్వర్యంలో పలువురు సీమాంధ్ర ఉద్యోగులు కార్మిక శాఖలో పనిచేసే సీమాంధ్ర ఉద్యోగులను సమ్మెకు సిద్ధం చేయడానికి వచ్చి వారితో మాట్లాడేందుకు వచ్చారు. సమాచారమందుకున్న అదే శాఖలోని టీఎన్జీవో నాయకులు ‘తెలంగాణ ముద్దు.. సమైకాంధ్ర వద్దు అన్నదమ్ములుగా విడిపోయి కలిసుందాం.. జై తెలంగాణ’ అంటూ పెద్ద ఎత్తున నినాదాలు చేస్తూ అడ్డుకున్నారు. దీంతో ఏపీ ఎన్జీవో నాయకులు వెనుదిరిగారు.
  
  12న సచివాలయం ముట్టడి: ఓయూ విద్యార్థి జేఏసీ పిలుపు
  ఈ నెల 12న సచివాలయం ముట్టడి, భారీ ర్యాలీ కార్యక్రమానికి ఓయూ విద్యార్థి జేఏసీ పిలుపునిచ్చింది. బుధవారం విద్యార్థి జేఏసీ ప్రధాన కార్యదర్శి కరాటే రాజు విలేకర్లతో మాట్లాడుతూ సీమాంధ్ర ఉద్యోగులు సచివాలయంలో తిష్టవేసి తెలంగాణలోని అన్నిరంగాలను నష్టపరిచి... ఇప్పుడు ప్రత్యేక రాష్ట్రాన్ని అడ్డుకునే ప్రయత్నం చేస్తున్నారని ఆరోపించారు. హైదరాబాద్ మహానగరంపై అనవసరపు రాద్ధాంతం చేయొద్దని ఏపీఎన్జీవోస్ నేతలను హెచ్చరించారు. సీఎం కిరణ్ ఏపీఎన్జీవోల వెనక ఉండి ఆందోళనలు చేయిస్తున్నారని ధ్వజమెత్తారు. హైదరాబాద్ తెలంగాణలో అంతర్భాగమన్నారు.


 హైదరాబాద్,న్యూస్‌లైన్: సీమాంధ్రలో సమైక్యాంధ్ర ఉద్యమం ఉధృతంగా కొనసాగుతుండడంతో రాయలసీమ, కోస్తాంధ్రాలవైపు వెళ్లే ఆర్టీసీ సర్వీసులు నిలిచిపోయాయి.  సీమాంధ్రలో సమైక్యాంధ్ర ఉద్యమం కారణంగా ఎనిమిది రోజులుగా ఆర్టీసీ సర్వీసులు నడవకపోవడంతో అటువైపు ప్రయాణం సాగించే ప్రయాణికులు తీవ్ర ఇబ్బందులకు గురవుతున్నారు. కోస్తావైపు  ఓ మోస్తరుగా ఆర్టీసీ బస్సులు నడుస్తున్నప్పటికీ రాయలసీమ వైపు వెళ్లాల్సిన బస్సులన్నీ పూర్తిగా నిలిచిపోయి డిపోలకే పరిమితమయ్యాయి.
  
   గత శనివారం నుంచి ఆర్టీసీ అధికారులు కర్నూలువరకు అరకొరగా బస్సులను నడుపుతున్నారు. బుధవారం రాత్రి 8గంటల వరకు ఎంజీబీఎస్ నుంచి 2588 బస్సులు వివిధ ప్రాంతాలకు వెళ్లాల్సి ఉండగా  కేవలం 2170 మాత్రమే వెళ్లాయి. అదేవిధంగా వివిధ ప్రాంతాల నుంచి 2648 బస్సులు ఎంజీబీఎస్‌కు రావాల్సి ఉండగా 2137 మాత్రమే వచ్చాయి. కాగా ఈనెల 9, 10,11 తేదీల్లో వరుస సెలవుల కారణంగా రాయలసీమ, కోస్తాంధ్ర వైపు వెళ్లే ఆర్టీసీ షెడ్యూల్డ్ సర్వీసులకు ఇప్పటికే ఆర్టీసీ అధికారులు ముందస్తుగా అడ్వాన్స్‌గా రిజర్వేషన్ కల్పించడంతో గురువారం షెడ్యూల్డ్ బస్సుల సీట్లు అన్నీ రిజర్వయ్యాయి. గురువారం పరిస్థితిని బట్టి బస్సులు నడిపిస్తామని, రాయలసీమ వైపు బస్సులు నడపలేని పక్షంలో ప్రయాణికులకు డబ్బులు తిరిగి చెల్లిస్తామని ఆర్టీసీ వర్గాలు తెలిపాయి.


 నాగార్జునసాగర్‌న్యూస్‌లైన్: నాగార్జునసాగర్ ప్రాజెక్టు క్రస్ట్‌గేట్ల నుంచి బుధవారం కృష్ణమ్మదిగువకు ఉరకలేసింది. సాగర్ జలాశయం గేట్లు ఎత్తే సమయానికి ప్రాజెక్టు నీటిమట్టం 585.40 అడుగుల నీరుంది. శ్రీశైలం నుంచి 4,48,550 క్యూసెక్కుల నీరు ఇన్‌ఫ్లోగా వస్తుండడంతో మధ్యాహ్నం 12 గంటలకు మరో 6 గేట్లను పైకి ఎత్తారు. సాయంత్రం 4 గంటలకు 18 గేట్ల ద్వారా 1,41,264 క్యూసెక్కుల నీటిని దిగువకు విడుదల చేశారు. సాయంత్రం 6.30 గంటలకు 20 గేట్ల ద్వారా,  8 గంటల సమయానికి 24 గేట్ల ద్వారా కృష్ణా డెల్టాకు నీటిని విడుదల చేశారు. సాగర్ ప్రాజెక్టు నుంచి 1,91,413 క్యూసెక్కుల నీటిని బయటకు పంపిస్తున్నారు. కుడికాల్వకు 8007 క్యూసెక్కులు, ఎడమకాల్వకు 8000 క్యూసెక్కులు, ప్రధాన జల విద్యుత్ కేంద్రం ద్వారా 36642, ఎస్‌ఎల్‌బీసీ 1200, వరదకాల్వకు 305 క్యూసెక్కుల నీటిని విడుదల చేస్తున్నారు.


 సాక్షి, హైదరాబాద్: ఆందోళనల సందర్భంగా రెచ్చగొట్టే వాఖ్యలుచేస్తే క్రిమినల్ కేసులు నమోదుచేస్తామని పోలీసుశాఖ ప్రకటించింది. ఆందోళనల సందర్భంగాప్రభుత్వ, ప్రైవేట్ ఆస్తులను నష్టపరిచే విధంగా వ్యవహరించిన వారిపై కఠిన చర్యలు తీసుకోవాలని అన్నిజిల్లాల ఎస్పీలకూ డెరైక్టర్ జనరల్ ఆఫ్ పోలీస్ (డీజీపీ) వి. దినేష్‌రెడ్డి ఆదేశించారు. ఈ మేరకు పోలీసు ప్రధాన కార్యాలయం బుధవారం ఒక ప్రకటన విడుదలచేసిం ది. ఆందోళనలను పురస్కరించుకుని హింసాత్మక ఘటనలకు దిగితే ఉపేక్షించేది లేదని పోలీసు ఉన్నతాధికారులు స్పష్టం చేశారు. సీమాం ధ్రలో ఆందోళనల సందర్భంగా హింసాత్మక ఘటనలకు సంబంధించి ఈ వారం రోజుల వ్యవధిలో 124 కేసులు నమోదు చేశామ ని, ఆ కేసుల్లో 221 మంది నిందితులను అరెస్టుచేశామని వివరించారు.
  
   మరో వెయ్యిమందిని అదుపులోకి తీసుకున్నట్లు తెలిపారు. జాతీయనేతల విగ్రహాల ధ్వంసానికి పాల్పడినవారిపై కఠి నంగా వ్యవహరిస్తామని హెచ్చరించారు. విగ్రహాల ధ్వంసానికి సంబంధించి ఇప్పటివరకూ 39 కేసులు నమోదుచేసి 94 మందిని అరెస్టు చేసినట్లు ప్రకటించారు. విగ్రహాల ధ్వంసానికి పాల్పడిన వారిపై ఐపీసీ సెక్షన్ 153 (ఎ) సెక్షన్ ప్రకారం కేసులు నమోదు చేస్తున్నామని, ఈ కేసు నిరూపితమైతే మూడేళ్లు జైలు శిక్ష పడే అవకాశం ఉందని పోలీసు ఉన్నతాధికారులు హెచ్చరించారు. శాంతియుత పద్ధతుల్లో ఆందోళనలు, నిరసనలు చేసే వారిపై పోలీసులు ఎలాంటి చర్యలూ తీసుకోబోరని, హింసాత్మకఘటనలకు పాల్పడితే మాత్రం కఠిన చర్యలుంటాయని స్పష్టం చేశారు.
  
  కఠినచర్యలు తీసుకోండి: సీఎం
  సీమాంధ్ర ఆందోళనలు మరింత ఉధృతం అవుతున్న నేపథ్యంలో వాటిని నివారించేందుకు మరింత కఠినంగా వ్యవహరించాలని ముఖ్యమంత్రి ఎన్. కిరణ్‌కుమార్‌రెడ్డి పోలీసు ఉన్నతాధికారులను ఆదేశించారు. సీమాంధ్రలో ఆందోళనల సందర్భంగా జాతీయ నేతల విగ్రహాల ధ్వంసంపై కేంద్ర ప్రభుత్వం సీరియస్ అయినట్లు సమాచారం. దీంతో అలాంటి ఘటనలు పునరావృతం కాకుండా పటిష్ట చర్యలు తీసుకోవాలని పోలీసు అధికారులకు సీఎం స్పష్టం చేశారు. ఆందోళనల విషయంలో కఠినంగా వ్యవహరించాలంటూ సీఎం ఆదేశించిన నేపథ్యంలో పోలీ సులు వేగం పెంచారు. విగ్రహాలు, ప్రభుత్వ, ప్రైవేట్ ఆ స్తుల ధ్వంసం కేసుల్లో అరెస్టులను మరింత వేగవంతం చేశారు.


  12న అర్ధరాత్రి నుంచి సమ్మె చేస్తామని సీఎస్‌కు నోటీసు
  సాక్షి, హైదరాబాద్: రాష్ట్ర విభజన నిర్ణయాన్ని నిరసిస్తూ 12వ తేదీ అర్ధరాత్రి నుంచి సమ్మె చేయనున్నామని సీమాంధ్ర రెవెన్యూ ఉద్యోగులు ప్రకటించారు. ఈ మేరకు ఏపీ రెవెన్యూ సర్వీసెస్ అసోసియేషన్ అధ్యక్షుడు బొప్పరాజు వెంకటేశ్వర్లు నేతృత్వంలో వీఆర్వోలు, రెవెన్యూ సహాయకుల సంఘాల ప్రతినిధులతో కూడిన బృందం బుధవారం ప్రభుత్వ ప్రధాన కార్యదర్శి పి.కె.మహంతికి సమ్మె నోటీసు అందజేసింది. అనంతరం వారు సచివాలయంలో విలేకరులతో మాట్లాడారు.
  
  12వ తేదీ అర్ధరాత్రిలోగా సీమాంధ్రకు చెందిన ప్రజా ప్రతినిధులు పదవులకు రాజీనా మా చేయాలని డిమాండ్ చేశారు. విభజన వల్ల ఉద్యోగులకు తీవ్రనష్టం జరుగుతుందన్నారు. జోనల్ వ్యవస్థ రద్దయితే ఉద్యోగుల సీనియారిటీ, ప్రమోషన్లు అస్తవ్యస్తంగా తయారవుతాయని, అందువల్ల విభజన నిర్ణయానికి వ్యతిరేకంగా సమ్మె చేయాలని నిర్ణయించినట్లు తెలిపారు. గ్రామ సహాయకుల నుంచి తహసీల్దార్ల వరకు.. దాదాపు 55 వేల మంది సమ్మెలో పాల్గొననున్నారని వెల్లడించారు. డిప్యూటీ కలెక్టర్ల సంఘంతోనూ తాము మాట్లాడామని, 13న కార్యాచరణ ప్రకటిస్తామని వారు చెప్పారని పేర్కొన్నారు.


  ‘శతకోటి దరిద్రాలకు అనంతకోటి ఉపాయాలు..’ అన్నట్టు మద్యం వ్యాపారం కొత్త పుంతలు తొక్కుతోంది. ఎవరెన్ని ఆంక్షలు పెట్టినా వ్యాపారం మూడ్ ఫుల్స్, ఆరు నిబ్‌లు మాదిరిగా సాగేలా వ్యాపారులు కొత్త దారులు వెదుకుతున్నారు. ఎన్నికల కమిషన్ ఆంక్షలతో ఈసారి మద్యం కేటాయింపులపై కచ్చితమైన చర్యలు తీసుకున్నారు. పల్లెపోరు నేపథ్యంలో అవకాశం ఉన్నంతమేర విక్రయాలు జరపడంలో లిక్కర్ సిండికేట్లు ఫలప్రదమయ్యారు. ఆంక్షలు కాస్త సడలిస్తే మరిన్ని లాభాలు వచ్చేవని మధనపడుతున్న సిండికేట్లకు తాజాగా సమైక్యాంధ్ర ఉద్యమం, అవనిగడ్డ ఉపఎన్నిక కోడ్ మింగుడుపడనీయడం లేదు.
  
  సాక్షి, మచిలీపట్నం :  జిల్లాలో పంచాయతీ ఎన్నికల సందర్భంగా మద్యం ఏరులై పారింది.  గత ఏడాది జూలైలో ఎంత సరకు కేటాయించారో.. ఈ ఏడాది  జూలైలోను అదే కోటాను అమలుచేయాలని ఎన్నికల కమిషన్ ఆదేశించింది. గత్యంతరంలేని ఎక్సైజ్ అధికారులు గతంలో వలే ఇప్పుడూ కోటా ఇచ్చారు. గుడివాడ, విజయవాడ డిపోల నుంచి నెలవారీగా ఇచ్చే మద్యం కోటాపై కంట్రోల్ పెట్టారు. గత ఏడాది జూలైలో విజయవాడ డిపో నుంచి మద్యం 1,88,509 కేసులు, బీర్లు 74,425 కేసులు ఇవ్వగా.. ఈ ఏడాది జూలైలో మద్యం 1,68,081 కేసులు, బీర్లు 63,879 కేసులు ఇచ్చారు. 
  
 గుడివాడ డిపో నుంచి గత జూలైలో లిక్కర్ 1,02,007 కేసులు, బీర్లు 29,609 కేసులు, ఈ ఏడాది జూలైలో మద్యం 93,796, బీర్లు 23,206 కేసులు కోటాగా ఇచ్చారు. గత ఏడాది మాదిరిగానే కోటా ఇచ్చినా ఈ ఏడాది దాదాపు 57 మద్యం షాపుల లెసైన్సులు రెన్యువల్ కాలేదు. వాటికి కేటాయించే  కోటా తగ్గినా లిక్కర్ సిండికేట్లు పంచాయతీ ఎన్నికలపై గంపెడాశలు పెట్టుకుని అడ్డదారులు వెదికారు. రెండు నెలలుగా దాచిన మద్యం నిల్వలను ఎన్నికల్లో వదిలించుకున్నారు. దీనికితోడు పట్టణాల్లోని బార్లు, మద్యం షాపుల్లో ఉన్న నిల్వలను పల్లెలకు తరలించి సొమ్ము చేసుకున్నారు. 
  
 పంచాయతీ ఎన్నికల్లో మద్యానికి డిమాండ్ ఉన్నప్పటికీ సరిపడే మద్యం స్టాకు లేకపోవడంతో  వారి ఆశలకు అడ్డుకట్ట పడినట్టయింది. ఎన్నికల వేళ బెల్ట్ షాపులను తొలగిస్తామన్న అధికారుల ప్రకటనలు అరకొరగానే నెరవేరాయి. పోలింగ్‌కు 48 గంటల ముందు మద్యం షాపుల్ని సీజ్ చేసినట్టు బిల్డప్ ఇచ్చినా.. వేరేచోట బెల్ట్ షాపుల ద్వారా యథేచ్ఛగా అమ్మకాలు సాగించారు. పలుచోట్ల నాటుసారా కూడా బాగానే తయారైంది. 
  
  ఆశ నిరాశేనా..
  జిల్లాలో చోటుచేసుకున్న వరుస పరిణామాలు మద్యం వ్యాపారులకు మింగుడుపడడం లేదు. ఇటీవల  335 మద్యం షాపుల రెన్యువల్ విషయంలో ఎక్సైజ్ అధికారులు సామ దాన భేద దండోపాయాలను ప్రయోగించారు. చివరి అస్త్రంగా పంచాయతీ ఎన్నికల్లో చూసీచూడనట్టుగానే ఉంటామని, అమ్మకాలు బాగుంటాయి కాబట్టి లాభాలు వస్తాయని ఆశ చూపారు. జిల్లాలో 57 షాపులు మినహా అన్నింటినీ రెన్యువల్ చేసుకున్నారు. 
  
  అంతవరకు బాగానే ఉన్నా పంచాయతీ ఎన్నికల్లో అడ్డంగా సంపాదించేద్దాం అనుకున్నవారికి జూలై కోటా ఆంక్షలు అవరోధంగా మారాయి. ప్రస్తుతం తాజాగా సమైక్యాంధ్ర ఉద్యమంతో షాపులు మూతపడుతున్నాయి. మరోవైపు అవనిగడ్డలో ఉపఎన్నిక జరుగుతుంటే ఎన్నికల కోడ్ కారణంగా జిల్లా అంతటా గత ఆగస్టు మాదిరిగానే ఈ నెలలోనూ మద్యం కోటా కేటాయిస్తున్నారు. అదనపు కోటా పొంది లాభాలు పొందుదామనుకున్న వ్యాపారులకు ప్రభుత్వం ఝలక్ ఇవ్వడంతో అడ్డదారులు వెదుకుతున్నారు. 
  


 సాక్షి; హైదరాబాద్: ‘‘హైదరాబాద్ నగరం తెలుగువారి అందరి ఆస్తి. రాష్ట్రంలోని ప్రతి కుటుంబానికి హైదరాబాద్‌తో ఆత్మీయ అనుబంధం ఉంది. నగరం నుంచి వెళ్లిపోమనే అధికారం ఎవరికీ లేదు. రాష్ట్ర ఉద్యోగులందరికీ హైదరాబాద్‌లో ఉండే హక్కు కాదనలేనిది. నగరాన్ని ఎట్టి పరిస్థితుల్లోనూ వదులుకోం’ అని సచివాలయ సీమాంధ్ర ఉద్యోగులు నినదించారు. రాష్ట్రాన్ని విభజించి సీమాంధ్రులకు హైదరాబాద్ నగరాన్ని దూరం చేసేందుకు కేంద్ర ప్రభుత్వం చేస్తున్న కుట్రను అడ్డుకుంటామని స్పష్టంచేశారు. యూపీఏ తెలంగాణ ప్రకటన నిర్ణయానికి వ్యతిరేకంగా సచివాలయ సీమాంధ్ర ఫోరం బుధవారం కూడా ఆందోళన కొనసాగించింది. సచివాలయ ప్రధాన ద్వారాల వద్ద బైఠాయించి యూపీఏ ప్రభుత్వానికి వ్యతిరేకంగా నినాదాలు చేశారు. సచివాలయం మొత్తం వెనక్కి నడిచి నిరసన వ్యక్తం చేశారు.
  
   వేలాది మంది ఉద్యోగులు నడకలో పాల్గొనడంతో సచివాలయం మొత్తం భారీ మానవహారం ఏర్పడింది. విభజన నిర్ణయాన్ని వెనక్కి తీసుకునే వరకూ ఆందోళన కొనసాగిస్తామని, ఇందుకోసం త్వరలోనే కార్యాచరణ ప్రకటిస్తామని ఫోరం నేతలు తెలిపారు. సీమాం ధ్రుల సమస్యలు, సందేహాలపై కేంద్ర ప్రభుత్వ పెద్దలకు తమ సమస్యలను వినిపించాలని నిర్ణయించారు. సమైక్యాంధ్రే ధ్యేయంగా ముందుకు సాగాలని తీర్మానించారు. ఫోరం చైర్మన్ యు.మురళీకృష్ణ, కార్యదర్శి కె.వి.కృష్ణయ్య, సచివాలయ హౌసింగ్ సొసైటీ అధ్యక్షుడు వెంకట్రామిరెడ్డి ఆందోళనలో పాల్గొన్నారు.


  ‘కంప్యూటర్ ముందు యంత్రంలా చేసే పనికన్నా మనసుపెట్టి చేసే ఆవిష్కరణలు ఎంతో సంతృప్తినిస్తాయి’అంటారు ఫ్యాషన్ డిజైనర్ శశి. బంజారాహిల్స్‌లో ‘ముగ్ధ ఆర్ట్ స్టూడియో’ పేరుతో నెలకొల్పిన తన బొటిక్‌లో ఆమె నిరంతరం సృజనత్మాక ఆలోచనల్లో మునిగితేలుతూ కనిపిస్తారు. రూ.50 వేలు ఉద్యోగం వచ్చే సాఫ్ట్‌వేర్  ఇంజినీర్ శశి.. ఫ్యాషన్ డిజైనర్‌గా మారే క్రమంలో పడ్డ కష్టాలు అన్నీ ఇన్నీ కావు. ‘‘సాఫ్ట్‌వేర్ ఇంజినీర్ అంటే మంచి పెళ్లి సంబంధాలు వస్తాయి కాని, దుస్తులు కుడతావంటే ఎవరూ రారని అమ్మ, నాన్న వద్దన్నారు. 
  
 వారిని ఒప్పించలేక ఇంటి నుంచి బయటకు వచ్చి బంజారాహిల్స్‌లోని స్లమ్ ఏరియాలో రూ.2,500కు గది అద్దెకు తీసుకున్నా. దాచుకున్న డబ్బు పెట్టి ఎంబ్రాయిడరీ మిషన్, మగ్గం కొన్నాను. విడి విడిగా క్లాత్‌లు తీసుకొచ్చి కాంబినేషన్స్ చూసుకునే దాన్ని. తొమ్మిది నెలల పాటు భిన్న ప్రయోగాలు చేసి ఆరు ప్రత్యేకమైన లంగా ఓణీలను రూపొందించాను. అవి అందరికీ బాగా నచ్చాయి. అవి నచ్చిన వారు ఇంట్లో వేడుకలకు ఆర్డర్లు ఇవ్వడం మొద లుపెట్టారు. అలా మొదలై ఇలా ఈ రోజు 30 మందికి ఉపాధి కల్పించే స్థాయికి చేరుకోగలిగాను. ‘రిపోర్టర్’ అనే తెలుగు సినిమాకు క్యాస్ట్యూమ్ డిజైనర్‌గా వర్క్ చేస్తున్నాను. 
  
 ‘మా అమ్మాయి డిజైనర్, అందంగా దుస్తులను రూపొందిస్తుంది. ఎందరికో ఉపాధి కల్పిస్తోంది’ అని ఇప్పుడు అమ్మనాన్న పదిమందికీ చెబుతున్నారు. స్నేహితులు అభినందిస్తున్నారు. ఫేస్‌బుక్‌లో ‘ముగ్ధ ఆర్ట్ స్టూడియో’కి యాభై వేలకు పైగా లైక్స్ వచ్చాయి. ఐదుగురు నిరుపేద అమ్మాయిలకు ఉచితంగా కుట్లు, డిజైనింగ్ పనిలో మెలకువలు నేర్పుతున్నాను. ఇంకా పేదపిల్లలకు చదువుకోసం డొనేట్ చేస్తున్నాను’’ అంటూ వివరిస్తారు శశి. ఉద్యోగంతో ఆగిపోతే ఇవన్నీ సాధ్యమయేవా? అని ప్రశ్నిస్తారామె.
  


 సాక్షి నెట్‌వర్క్: సమైక్యాంధ్రనే శ్వాసిస్తూ, ధ్యానిస్తూ జన నినాదమై ఉద్యమం సీమాంధ్రలో వెల్లువెత్తుతోంది. నగరాలు, పట్టణాలు, మండలాలు, గ్రామాలు, మారుమూల పల్లెలు అన్నీ ఒక్కటై సమైక్యమే లక్ష్యంగా పోరాటం చేస్తున్నాయి. కులాలు, మతాలు, శ్రామిక వర్గాల వారీగా ప్రజలు విభజనయత్నాలకు వ్యతిరేకంగా రోడ్డెక్కుతున్నారు. స్వచ్ఛందంగా వివిధ రూపాల్లో ఆందోళనలను హోరెత్తిస్తున్నారు. వరుసగా ఎనిమిదో రోజైన బుధవారం కూడా కోస్తా, రాయలసీమ జిల్లాల్లో జనజీవనం స్తంభించింది. ఆర్టీసీ బస్సులు డిపోలకే పరిమితమయ్యాయి. విద్యాసంస్థల మూత కొనసాగుతోంది. ప్రభుత్వ ఉద్యోగులకు తోడుగా ప్రైవేటురంగంలోని ఉద్యోగులందరూ సమైక్యపోరాటంలో భాగస్వాములవుతున్నారు. మున్సిపల్ ఉద్యోగులు చేపట్టిన 72గంటల పెన్‌డౌన్ బుధవారంతో ముగిసింది. భవిష్యత్ ఉద్యమ కార్యాచరణను గురువారం ప్రకటిస్తామని నేతలు వెల్లడించారు. కాంగ్రెస్ నాయకులు, ప్రజాప్రతినిధులపై  ఆగ్రహజ్వాలలు కొనసాగుతున్నాయి.
  
  గోదావరి తీరాన 300కుటుంబాల నిరాహారదీక్ష
  రాజమండ్రి లాలాచెరువు హౌసింగ్ బోర్డు కాలనీకి చెందిన 300కుటుంబాలు నిరాహార దీక్షలో స్వచ్ఛందంగా పాల్గొన్నాయి.  కాకినాడలో జర్నలిస్టు వారణాసి సాయిపెరుమాళ్లు ఒంటిపై కిరోసిన్ పోసుకుని ఆత్మహత్యాయత్నానికి పాల్పడగా తాజా మాజీ ఎమ్మెల్యే ద్వారంపూడి చంద్రశేఖరరెడ్డి అడ్డుకున్నారు.  గుంటూరులో ఏపీఎన్జీవో జేఏసీ పిలుపు మేరకు అన్నిశాఖల ప్రభుత్వ ఉద్యోగులు విధులు బహిష్కరించి ప్రదర్శన చేశారు. ఆచార్య నాగార్జున యూనివర్శిటీ విద్యార్థులు గుంటూరు-విజయవాడ హైవేపై రాస్తారోకో చే శారు.
  
  నడిరోడ్డుపై ముస్లింల ప్రార్ధన
  కర్నూలు జిల్లా ఆళ్లగడ్డ పట్టణంలో వేలాదిమంది ముస్లింలు మసీదుల నుంచి తహశీల్దార్ కార్యాలయం వరకు భారీ ర్యాలీ నిర్వహించి జాతీయ రహదారిని దిగ్బంధించారు.  సోనియా మనసు మార్చి రాష్ట్రం ముక్కలు కాకుండా చూడాలని నడిరోడ్డుపై ప్రత్యేక ప్రార్థనలు చేపట్టారు. కర్నూలులో పతంజలి యోగా కేంద్రం ఆధ్వర్యంలో సుమారు 500మంది సభ్యులు వెంకటరమణ కాలనీ సమీపంలో జాతీయ రహదారిపై యోగాసనాలతో వినూత్న ప్రదర్శన నిర్వహించారు.
  
  మేముసైతమంటూ అంధుల ర్యాలీ
  తిరుపతిలో అంధులు భారీ ర్యాలీ నిర్వహించారు. కపిలితీర్థం నుంచి లీలామహల్ కూడలి, మున్సిపల్ కార్పొరేషన్, నాలుగుకాళ్ల మంటపం, ఆర్టీసీ బస్టాండ్ మీదుగా తెలుగుతల్లి విగ్రహం వరకు సుమారు 7 కిలోమీటర్ల దూరం నడిచి సమైక్యనినాదాలతో ప్రదర్శన చేపట్టారు. చిత్తూరులో ఎమ్మెల్యే సీకేబాబు ఆధ్వర్యంలో ఉదయం 6 గంటల నుంచే షాపులను మూయించి బంద్ నిర్వహించారు. పరకాల ప్రభాకర్ బుధవారం మదనపల్లి నుంచి బస్సుయాత్రను కొనసాగించారు.
  
  సినిమా థియేటర్లమూత
  కృష్ణా జిల్లాలో ఫిలింఛాంబర్ నేతృత్వంలో ఎగ్జిబిటర్లు బుధవారం బంద్ పాటించి జిల్లా మొత్తం సినిమా థియేటర్లు మూసివేశారు. విజయవాడలో భారీ ప్రదర్శన చేపట్టారు. నాలుగురోజులుగా నిరాహారదీక్ష చేస్తున్న  కైకలూరు ఎమ్మెల్యే జయమంగళ వెంకటరమణకు బుధవారం రాత్రి  గుండెనొప్పి రావడంతో ఆసుపత్రికి తరలించారు. ఉయ్యూరులో రైతులు ఎడ్లబళ్లతో ప్రదర్శన చేశారు. గుడివాడలో నడిరోడ్డుపై నాట్లు వేశారు.
  
  సమ్మెకు తామూసిద్ధమన్న ఎంపీడీవోలు
  ఈ నెల 12 నుంచి సమ్మెలో పాల్గొంటున్నట్లు రాష్ట్ర ఎంపీడీవోల సంఘం అధ్యక్షుడు హరిహరనాధ్ విజయవాడలో ప్రకటించారు. విశాఖ జీవీఎంసీ గాంధీ విగ్రహం వద్ద వైఎస్సార్‌సీపీ నగర కన్వీనర్ వంశీకృష్ణ ఆధ్వర్యంలో నేతలు ఆమరణ నిరాహార దీక్షకు దిగారు. ప్రకాశం జిల్లాలో ఒంగోలులో బార్ అసోసియేషన్ సభ్యులు కోర్టు విధులకు హాజరయ్యేందుకు వెళ్తున్న జిల్లా న్యాయమూర్తి ఎ.రాధాకృష్ణ వాహనాన్ని అడ్డగించారు. ఒంగోలు నగరంలో పదివేల మంది విద్యార్థులతో ర్యాలీ నిర్వహించారు. వైఎస్‌ఆర్ కాంగ్రెస్ పార్టీ నెల్లూరు జిల్లా కన్వీనర్ మేరిగ మురళీధర్‌ఆధ్వర్యంలో బుజబుజ నెల్లూరు వద్ద జాతీయ రహదారిపై చేసిన రాస్తారోకోతో రాకపోకలు స్తంభించాయి.
  
  పదివేలమంది ఉద్యోగుల భారీ ప్రదర్శన
  అనంతపురం నగరంలో సమైక్యాంధ్రకు మద్దతుగా  గెజిటెడ్ అధికారుల అసోసియేషన్ ఆధ్వర్యంలో సుమారు పది వేల మంది ఉద్యోగులతో ఆర్ట్స్ కళాశాల నుంచి తెలుగుతల్లి విగ్రహం వరకు భారీ ర్యాలీ జరిగింది. మహిళా సంఘాల ఆధ్వర్యంలో ఐదు వేల మంది మహిళలు నగరంలో ర్యాలీ నిర్వహించారు.
  
  సమైక్య ఉపాధ్యాయ జేఏసీ ఏర్పాటు
  ఉత్తరాంధ్ర ఉపాధ్యాయ ఎమ్మెల్సీ గాదె శ్రీనివాసులనాయుడు ఆధ్వర్యంలో పీఆర్‌టీయూ నాయకులు శ్రీకాకుళంలో సమావేశమై సమైక్య రాష్ట్ర సాధన కోసం  సీమాంధ్రలోని 13 జిల్లాల్లో సమైక్య ఉపాధ్యాయ జేఏసీని ఏర్పాటు చేయాలని నిర్ణయించారు.  ఎచ్చెర్లలోని బీఆర్ అంబేద్కర్ వర్సిటీ విద్యార్థులు హౌరా-చెన్నై జాతీయ రహదారిపై హోమం నిర్వహించి, రహదారిని దిగ్బంధించడంతో సుమారు పది కిలోమీటర్ల పొడవునా వాహనాలు నిలిచిపోయాయి. రణస్థలం, నరసన్నపేట, టెక్కలి తదితర ప్రాంతాల్లోనూ రాస్తారోకోలునిర్వహించారు. విజయనగరంలో ఉద్యోగులు పీసీసీ చీఫ్ బొత్స సత్యనారాయణ ఇంటిని ముట్టడించడడంతో అక్కడ కొద్దిసేపు ఉద్రిక్త వాతావరణం నెలకొంది.  
  
   పేలుతున్న స్లో ‘గన్స్’
  సాక్షి నెట్‌వర్క్: రాష్ట్ర విభజనకు అనుకూలంగా ఏఐసీసీ తీసుకున్న నిర్ణయాన్ని వ్యతిరేకిస్తూ సీమాంధ్ర జిల్లాల్లో సమైక్యవాదులు చేస్తున్న నిరసనల్లో నినాదాలు హోరెత్తుతున్నాయి. ప్లకార్డులు, ఫ్లెక్సీలపై ఆందోళనకారులు రాసి, ప్రదర్శిస్తున్న నినాదాలు, వ్యాఖ్యలు ప్రత్యేక ఆకర్షణగా నిలుస్తున్నాయి. ముఖ్యంగా ఏఐసీసీ అధ్యక్షురాలు సోనియాగాంధీ,  టీడీపీ అధినేత చంద్రబాబు,  కేంద్రమంత్రులు చిరంజీవి, కావూరి సాంబశివరావు, సీఎం కిరణ్, పీసీసీ చీఫ్ బొత్సలను ఎండగడ్తూ చిత్రించిన, రూపొందించిన  ఫ్లెక్సీలు, వాల్‌పోస్టర్లకు జనం నుంచి మంచి స్పందన కనిపిస్తోంది. గత వారం రోజులుగా సీమాంధ్ర ప్రాంతంలో జరుగుతున్న సమైక్యాంధ్ర ఉద్యమంలో నిరసనకారులు ప్రదర్శించిన ప్లకార్లుల్లోని నినాదాలు, వాల్‌పోస్టర్లలోని వ్యాఖ్యలు మచ్చుకు కొన్ని....
  
  విభజనకు ముందు దర్జా... ఆ తర్వాత బికారి
   సమైక్యాంధ్రలో కుర్చీలో దర్జాగా ఉన్న కేసీఆర్.. విభజన జరిగితే బికారిగా మారతారంటూ రూపొందించిన ఫ్లైక్సీ అనంతపురం నగరంలో వెలిసింది.
  
  నాకు నచ్చని పదం రాజీనామా
   సినిమాల్లో  చిరంజీవి డైలాగులను పేరడీ చేస్తూ విజయవాడలో ప్లకార్డులు ప్రదర్శించారు. నాకు తెలుగుభాషలో నచ్చనిది ఒకే ఒక్క పదం ‘రాజీనామా’ అంటూ ఠాగూర్ సినిమాలో డైలాగ్‌ను,  నా ఇంటి ముందు ధర్నా చేయమని ముగ్గురికి చెప్పండి.. వారు ముగ్గురికి చెబుతారు.. వారు మరో ముగ్గురికి చెబుతారు.. అంటూ స్టాలిన్ సినిమాలో డైలాగ్‌ను పేర డీ చేశారు.
  
  బొత్స ఆచూకీ చెప్పండి
   ‘‘విజయనగరం జిల్లా చీపురుపల్లి నియోజకవర్గ ఎమ్మెల్యే, మంత్రి బొత్స సత్యనారాయణ కొన్ని రోజులుగా కనిపించడం లేదు. ఆంధ్రప్రదేశ్ ముఖ్యమంత్రి పదవిని వెతుక్కుంటూ వెళ్లి తప్పిపోయారు. ఆచూకీ తెలిసిన వారు సమైక్యాంధ్ర ఉద్యమ కార్యకర్తలకు తెలియజేయాలి.’’ అంటూ విజయనగరం జిల్లా  గరివిడి పట్టణంలో వాల్‌పోస్టర్ అంటించారు.
  
  తెలుగుతల్లికి సోనియా తూట్లు
   తెలుగు తల్లిని సోనియాగాంధీ బల్లెంతో పొడుస్తుంటే కారుతున్న రక్తాన్ని గద్ద రూపంలో కేసీఆర్ తాగుతున్న చిత్రాన్ని  తూర్పుగోదావరి జిల్లా రామచంద్రపురంలో ఫొటోగ్రాఫర్ల అసోసియేషన్ ప్రదర్శించింది.  రాష్ట్రం నుంచి తరిమికొట్టాలంటూ చిరంజీవి, బొత్స, గంటాశ్రీనివాసరావులను కోతి బొమ్మలుగా చిత్రీకరించినబ్యానర్‌ను తెలుగుశక్తి నేతలు విశాఖపట్నంలో ఊరేగించారు.
  
  కేసీఆర్ ఫామ్‌హౌస్ పాము.. చిరు చీటింగ్ జీవి... చెన్నైలో అవార్డులు
   సమైక్యాంధ్రను పరిరక్షించాలని కోరుతూ తమిళనాడు రాష్ట్రం చెన్నై మైలాపూర్‌లో తెలుగు సంఘాలు బుధవారం నిరాహారదీక్ష నిర్వహించాయి. ఈ సందర్భంగా వ్యంగ్యోక్తులతో అవార్డులను ప్రకటించారు. సోనియాకు ‘విభజన విధ్వంస స్వరూపిణి’, కేసీఆర్‌కు ‘ఫామ్ హౌస్ పాము’, చిరంజీవికి ‘చీటింగ్ జీవి’, పురంధేశ్వరికి ‘పితృ ఆత్మక్షోభకారిణి’, సీమాంధ్ర కేంద్ర మంత్రులకు ‘సోనియా పెట్స్’, కాంగ్రెస్ అధిష్టానానికి ‘అష్టదరిద్ర స్థానం’ అవార్డులను ప్రకటించారు.
  
  తొమ్మిదిమందిని మింగిన ‘విభజన’
  ఒకరి ఆత్మహత్య.. గుండెపోటుతో 8 మంది.. ఇద్దరి ఆత్మహత్యాయత్నం
  సాక్షి నెట్‌వర్క్:  రాష్ట్ర విభజన ప్రకటనను జీర్ణించుకోలేక బుధవారం ఒక్కరోజే  8 మంది గుండెపోటుతో మరణించగా, ఒకరు ఆత్మహత్యకు, మరో ఇద్దరు ఆత్మహత్యాయత్నానికి పాల్పడ్డాడు. పశ్చిమ గోదావరి జిల్లా ఇరగవరం మండలం కాకిలేరులో పెయింటర్ దిడుమర్తి రాజీవ్‌గాంధీ (24) ఆత్మహత్యకు పాల్పడ్డాడు. అత్తిలి మండలం గుమ్మంపాడులో వినుకొండ వెంకటసుబ్బమ్మ (54), ఉండి గ్రామానికి చెందిన దొమ్మేటి శ్రీను (31), పెంటపాడు మండలం గ్రామానికి చెందిన మేనేటి కోటేశ్వరరావు(61), ఉంగుటూరు మండలం నారాయణపురంలో కర్రి నాగరాజు(35), అనంతపురం జిల్లా ఉరవకొండకు చెందిన రంగప్ప (45), రాయదుర్గం మండలంలోని జుంజరంపల్లికి చెందిన అచ్చెల్లి మాబు(35) బుధవారం గుండెపోటుతో మృతి చెందారు.  
  
  రాష్ట్ర విభజనపై వస్తున్న వార్తలను టీవీలో వీక్షిస్తూ కర్నూలు జిల్లా అవుకు మండల పరిధిలోని రాఘవరాజపురానికి చెందిన బూరుగుల నాగేష్  బుధవారం గుండెపోటుతో మరణించాడు. చిత్తూరు జిల్లా రామచంద్రాపురంలో చంద్రమౌళి నాయుడు (55) సమైక్య ఉద్యమాలను టీవీలో చూస్తూ కుప్పకూలిపోయారు. కుటుంబసభ్యులు రుయాకు తరలించగా చికిత్సపొం దుతూ మరణించాడు. సత్యవేడులో బాలాజీ కిరోసిన్ పోసుకుని ఆత్మహత్యకు యత్నించగా పోలీసులు అడ్డుకున్నారు. రాష్ట్ర విభజనను వ్యతిరేకిస్తూ  అనంతపురం జిల్లా గుత్తికి చెందిన కిషోర్ బ్లేడ్‌తో కోసుకుని ఆత్మహత్యాయత్నానికి పాల్పడ్డాడు.  
  
  సమైక్య ద్రోహులకు కుంభీపాకం శిక్ష
  విజయనగరంలో  సమైక్యాంధ్ర జేఏసీ ఆధ్వర్యంలో  జరిగిన ఆందోళనలో  సోనియా, రాహుల్‌గాంధీ, దిగ్విజయ్‌సింగ్, కేసీఆర్ దిష్టిబొమ్మలను మరుగుతున్న నూనెలో దించి కుంభీపాకం శిక్ష విధించారు.


  బంజారాహిల్స్, న్యూస్‌లైన్: ఇళ్ల చోరీ కేసుల్లో ముగ్గురు దొంగలను పోలీసులు అరెస్టు చేశారు. వీరి నుంచి మొత్తం రూ. 24 లక్షల సొత్తును స్వాధీనం చేసుకున్నారు.  బంజారాహిల్స్ ఏసీపీ ఈ.శంకర్‌రెడ్డి తెలిపిన వివరాల ప్రకారం...  జూబ్లీహిల్స్ రోడ్డునెం.62లోని ప్లాట్‌నెం.1245లో ఇరవై రోజుల క్రితం చోరీ జరిగింది. ఇంటి యజమాని ఊరెళ్లగా..  వంట మనిషి దేవరాజ్ (23) ఇంటి తాళాలు పగులగొట్టి అల్మారాలో ఉన్న రూ.5.14 లక్షల నగదు, రూ.10 లక్షల విలువ చేసే బంగారు నగలు అపహరించకొని తన స్వస్థలం బీహార్‌లోని మధుమణి గ్రామానికి పారిపోయాడు. 
  
 ఇంటి యజమాని ఫిర్యాదు మేరకు  జూబ్లీహిల్స్ ఇన్‌స్పెక్టర్ ప్రదీప్‌కుమార్‌రెడ్డి, డీఐ సుమన్‌కుమార్ కేసు నమోదు చేసి ఆధారాలు సేకరించారు. వంట మనిషి దేవరాజ్ కుడిచేయికి ఆరు వేళ్లు ఉంటాయని యజమాని చెప్పడంతో పోలీసులు ఆ ఒక్క ఆధారంతో మిస్టరీ ఛేదించారు. నగరంలోని బీహార్ సెక్యూరిటీ గార్డుల సహాయంతో నిందితుడి ఆచూకీ కనుగొన్నారు. నిందితుడు దేవరాజ్ చోరీ సొత్తును ఒరిస్సాలోని రూర్కెలాలో విక్రయిస్తుండగా రెడ్‌హ్యాండెడ్‌గా పట్టుకున్నారు. అతడిని అరెస్టు చేసి నగదు, నగలు స్వాధీనం చేసుకున్నారు. 
  
  ఆధారాలు దొరక్కుండా కారం పొడి చల్లి..
  చోరీకి పాల్పడటం... ఘటన స్థలంలో కారం పొడి చల్లి పోలీసులకు ఆధారాలు దొరక్కుం డా చేసి తప్పించుకోవడం. ఇలా రెచ్చిపోతున్న  పాతనేరస్తుడు తిప్పరాజు రామకృష్ణ అలియా స్ రాము అలియాస్ అభిరామ్ (24)తో పాటు అతని సోదరి బొట్టిపల్లి భాగ్యమ్మ అలియాస్ బేబీ(36)ని బంజారాహిల్స్ పోలీసులు అరెస్టు చేశారు. వీరి నుంచి 21 తులాల బంగారంతో పాటు వెండి ఆభరణాలు, 3 ల్యాప్‌టాప్‌లు, 3 సెల్‌ఫోన్ల స్వాధీనం చేసుకున్నారు. 
  
 ఏసీపీ శంకర్‌రెడ్డి కథనం ప్రకారం... ఫిలింనగర్ అంబేద్కర్‌నగర్ వాసి రామకృష్ణ గతంలో సనత్‌నగర్, గోల్కొండ, ఎస్సార్‌నగర్, రాయదుర్గం, బం జారాహిల్స్ పోలీస్‌స్టేషన్ల పరిధిలో చోరీలు చేశాడు. ఇతను అర్ధరాత్రి పూట అపార్టుమెంట్‌లోని డ్రైనేజీ, వాటర్ పైపులైన్‌లపై పాకుతూ టార్గెట్ చేసిన ఫ్లాట్‌కు చేరుకుంటాడు. ఆ ఫ్లాట్ తాళాలు పగులగొట్టి చోరీకి పాల్పడతాడు.  డాగ్‌స్క్వాడ్ తనను పట్టుకోకుండా ఉండేం దుకు చోరీ చేసిన ప్రాంతంలో కారంపొడి చల్లుతాడు. చోరీ సొత్తును తన సోదరి భాగ్యమ్మ ద్వారా విక్రయిస్తాడు. 
  
 ఇటీవల బంజారాహిల్స్ రోడ్డునెం.12లోని సాయిశారదా అపార్ట్‌మెంట్స్, ఫిలింనగర్‌లోని పోర్ట్‌వ్యూ అపార్ట్‌మెంట్స్‌లో చోరీలకు పాల్పడ్డాడు. ఈ కేసులు దర్యాప్తు చేపట్టిన పోలీసులు రామకృష్ణతో పాటు అతని సోదరి భాగ్యమ్మను అరెస్టు చేసి రూ.9 లక్షల విలువైన సొత్తును రికవరీ చేశారు.  ఈ కేసుల మిస్టరీని ఛేదించిన బంజారాహిల్స్ ఇన్‌స్పెక్టర్ పి.మురళీకృష్ణ, డీఐ కె.కిరణ్‌ను ఏసీపీ అభినందించారు.
  


  లాలాపేట, న్యూస్‌లైన్/సాక్షి, సిటీబ్యూరో: రంజాన్ పర్వదినాన్ని పురస్కరించుకుని లాలాపేటలోని రాష్ట్ర పాడిపరిశ్రమాభివృద్ధి సమాఖ్య ఆధ్వర్యంలో ప్రత్యేక పాల కేంద్రాలను ఏర్పాటు చేస్తున్నారు. జంట నగరాల్లో గురువారం సాయంత్రం నుంచి శుక్రవారం ఉదయం వరకు విక్రయాలు కొనసాగుతాయి. లీటర్ రూ.32 చొప్పున పాలను విడిగానూ, ప్యాకెట్ రూపంలోనూ విక్రయిస్తామని విజయడైరీ ఎండీ డాక్టర్ మహ్మద్ అలీరఫత్ బుధవారం తెలిపారు. 
  
  విడిగా పాలు విక్రయించే కేంద్రాలు: నాంపల్లి, ఆజంపుర, దారుల్‌షిఫా, బేగంబజార్, బహదూర్‌పుర, సనత్‌నగర్, హెచ్‌ఏఎల్ క్యాంపస్, అమన్‌నగర్, చార్మినార్, ఫలక్‌నుమా, ముషీరాబాద్, చంచల్‌గూడ, యాకుత్‌పుర, గోల్కొండ, మెహిదీపట్నం, టోలిచౌకి, రాంగోపాల్‌పేట, పంజగుట్ట, సచివాలయం, ఎర్రగడ్డ, బోరబండ, ఏసీగార్డ్స్, మల్లేపల్లి, చిలకలగూడ, మౌలాలి.
  
  ప్యాకెట్ పాల విక్రయ కేంద్రాలు: కేపీహెచ్‌బీ కాలనీ, బోయిన్‌పల్లి, పటాన్‌చెరు, చాంద్రాయణగుట్ట, మోతీగల్లి, షమ థియేటర్, కాలాపత్తర్, సైదాబాద్, రెయిన్‌బజార్, నల్గొండ క్రాస్‌రోడ్డు, మాదన్నపేట, మురాద్‌నగర్, జానకినగర్, శశిగార్డెన్, సయ్యద్‌నగర్, టప్పాచపుత్ర, సీతారాంబాగ్, రాజ్‌భవన్, సోమాజిగూడ, ఖైరతాబాద్, బోరబండ, సుల్తాన్‌నగర్, మాణికేశ్వరినగర్, నార్త్‌లాలాగూడ, వారాసిగూడ, హెచ్‌ఎంటీనగర్, తార్నాక, శాంతినగర్.
  
  వివరాలకు ఫోన్: 040-27019851, 040-64643133, 9848172642, 9848172640, 9912526611.
  
  ఈద్గాకు ప్రత్యేక బస్సులు
  రంజాన్ సందర్భంగా శుక్రవారం మీరాలం ఈద్గా వద్ద జరిగే ఈద్ ఉల్ ఫితర్ ప్రార్థనల్లో పాల్గొనే ముస్లిం సోదరుల కోసం 36 ప్రత్యేక బస్సులు నడపనున్నట్లు ఆర్టీసీ గ్రేటర్ హైదరాబాద్ ఎగ్జిక్యూటివ్ డెరైక్టర్ కోటేశ్వరరావు ఒక ప్రకటనలో తెలిపారు. ఇవి వివిధ ప్రాంతాల నుంచి బయల్దేరి ఉదయం 9 గంటలకు ఈద్గాకు చేరతాయి. నమాజు అనంతరం సైతం ఇవి అందుబాటులో ఉంటాయి.
  


 ఉస్మానియా యూనివర్సిటీ, న్యూస్‌లైన్: గుజరాత్ ముఖ్యమంత్రి నరేంద్రమోడి ఎస్సీ, ఎస్టీ, బీసీ, ఇతర కులాలకు, భారత ప్రభుత్వం కల్పించిన రిజర్వేషన్లకు వ్యతిరేకమని సామాజికవేత్త, ఓయూ విశ్రాంత ప్రొఫెసర్ కంచ ఐలయ్య అన్నారు. బుధవారం ఓయూ క్యాం పస్ గ్రంథాయలంలోని ఐసీఎస్‌ఎస్‌ఆర్ హాలు లో టీవీఎస్, ఎస్‌ఎఫ్‌ఐ, ఏఐఎస్‌ఎఫ్, పీడీఎస్‌యూ, అంసా, బీఎస్‌ఎఫ్, టీవీవీ, ఎంఎస్ ఓ, డీఎస్‌యూ, టీఆర్‌వీడీ, టీఎస్‌ఏ ఆధ్వర్యంలో ‘గుజరాత్ అభివృద్ధి-ఒక అందమైన అబద్ధం’ అంశంపై రౌండ్‌టేబుల్ సమావేశం జరిగింది.
  
 ‘అంసా’ అధ్యక్షుడు మాందాల భాస్కర్ అధ్యక్షతన జరిగిన కార్యక్రమంలో కంచ ఐలయ్య, సామాజిక కార్యకర్త షబానా హష్మి (ఢిల్లీ), ప్రొఫెసర్ హేమంత్‌షా (అహ్మదాబాద్) ప్రసంగించారు. ఐలయ్య మాట్లాడుతూ మోడి బీసీ వర్గానికి చెందిన వారైనా బీసీలు, దళితులకు ప్రతినిధి కాదని, బ్రాహ్మణులకు మాత్రమే ప్రతినిధి అని అన్నారు. మోడికి దమ్ముంటే ఈ నెల 11న హైదరాబాద్‌లో జరిగే సభలో రిజర్వేషన్లకు మద్దతు ప్రకటించాలని డిమాండ్ చేశారు. ఇంకా పరిశోధన విద్యార్థులు కోట శ్రీనివాస్‌గౌడ్, సత్య, సుదర్శన్, బండారు వీరబాబు, డేవిడ్ తదితరులు పలు విషయాలపై చర్చించారు.
  


  సాక్షి, హైదరాబాద్:  నగరంలో ‘వెన్ను’కు దన్నులేకుండాపోతోంది. వెన్నుపూసకు పెద్ద ఆపదొచ్చింది. క్షణమైనా నిలబడనీయదు. కాసేపు నడవనివ్వదు. ఇక ప్రయాణమంటే గగనమే. పగలంతా తిరిగొస్తే రాత్రి ఒక పట్టాన నిద్ర పట్టదు. పడుకుని లేస్తే కలుక్కు.. కూర్చోవాలంటే నరకం. ఇదేదో అరవై ఏళ్లు నిండిన వారి వ్యధ కాదు.. నిండా ముప్ఫై కూడా పూర్తికాని యువత వెత. నడుము నొప్పి అని చెప్పుకోలేక.. తిరగనూ లేక ఎలాగో నెట్టుకొస్తున్న పరిస్థితి. కొనితెచ్చుకున్న జబ్బు కాదు. వెన్ను కలుక్కుమందంటే లక్షలకు లక్షలు వదుల్చుకోవాల్సిందే. జీవనశైలి, విధి నిర్వహణలోని తీరుతెన్నులు ఈ పరిస్థితికి ఒక కారణమైతే నగర రోడ్లు మరో ముఖ్య కారణం. రోడెక్కితే చాలు నడ్డి విరుగుతోందన్నట్టుగా ప్రస్తుత పరిస్థితి ఉంది. నగరంలో నడుమునొప్పి బాధితులు పెరుగుతున్నారు. ఏటా దాదాపు 3 లక్షల కేసులు కొత్తగా నమోదవుతున్నాయని జంటనగరాల ఆర్థోపెడిక్ అండ్ స్పైనల్ డాక్టర్స్ అసోసియేషన్ ప్రాథమికంగా అంచనా వేసింది.
  
  గతుకుల రోడ్లే వెన్ను విరుస్తున్నాయి..
  నగరంలో దాదాపు 25 లక్షల ద్విచక్ర వాహనాలు ఉన్నాయి. ప్రస్తుతం ఏటా రెండున్నర లక్షలమంది వెన్ను నొప్పికి గురవుతుండగా, వారిలో ద్విచక్ర వాహన దారులే 80 శాతం మంది ఉన్నారు. మిగతా వారిలో ఐటీ, ప్రభుత్వోద్యోగులు, ప్రమాద బాధితులు, జన్యుపర లోపాలతో బాధపడుతున్న వారు ఉన్నట్టు తేలింది. ద్విచక్ర వాహనచోదకులు ప్రస్తుతం నగర రోడ్లలో రోజూ 20 కిలోమీటర్లు పైగా ప్రయాణిస్తే చాలు రెండేళ్లలో వెన్నునొప్పికి గురయ్యే ప్రమాదమున్నట్టు వైద్యులు గుర్తించారు. గతుకుల రోడ్లలో ఒక్కసారి పడితే చాలు వెన్ను తీవ్ర ఒత్తిడికి గురవుతుంది. ఫలితంగా ఎక్కువ మంది వెన్నునొప్పికి గురవుతున్నారు.
  
  మూడువేల గోతులు
  గ్రేటర్ హైదరాబాద్ పరిధిలో సుమారు 6వేల కిలోమీటర్ల మేర రోడ్లున్నాయి. ఇందులో ప్రతి వర్షాకాలంలోనూ ఇవి దెబ్బతింటున్నాయి. ఏటా ప్రధాన రహదారులపై 3 వేలకుపైగా గోతులు ఏర్పడుతున్నాయి. ఒక్కో వాహనచోదకుడు రోజూ సరాసరిన 15 కి.మీ. మేర గోతుల రోడ్లపైనే ప్రయాణిస్తున్నారు. ఈ రోడ్లపై ప్రయాణంతో ఆటో, బస్సు డ్రైవర్లూ ఎక్కువగా వెన్నునొప్పికి గురవుతున్నట్టు తేలింది.
  
  వెన్నునొప్పికి ఎలా గురవుతున్నారంటే..
  ప్రతి ఒక్కరిలో వెన్నుపూస కీలకం. వెన్నుకు సంబంధించి మెడ భాగంలోని సీ4-సీ5, సీ5-సి6 భాగాలు, నడుము చివర భాగంలో ఉన్న ఎల్4-ఎల్5, ఎల్5-ఎస్1 భాగాలు అత్యంత కీలకమైనవి. గతుకుల రోడ్లలో వాహనాలు ఒక్కసారిగా కుదుపునకు గురవటం వల్ల ముఖ్యంగా ఎల్5-ఎస్1 భాగాలు దెబ్బతింటున్నాయి. దీనివల్ల నడుమునొప్పి రావడం, తర్వాత ఒక కాలు, ఒక చెయ్యి జాలుగా నొప్పి వస్తుంది.. ఈ ప్రభావం మెడ భాగంలో ఉన్న సీ4-సీ5 భాగంలోనూ పడుతోంది. పదేపదే ఆయా భాగాలపై ఒత్తిడి కారణంగా అవి ఎక్కువ అరుగుదలకు గురవుతున్నట్టు వైద్యుల అంచనా.
  
  ఏటా 10 వేలకు పైగా సర్జరీలు
  నగరంలో నడుమునొప్పి శస్త్రచికిత్సలు పెద్దసంఖ్యలో జరుగుతున్నాయి. 2002-2007 మధ్య జంటనగరాల్లో 5 వేల శస్త్రచికిత్సలు జరగ్గా, 2011-12 మధ్య ఒకే ఏడాదిలో సుమారు 10వేల శస్త్రచికిత్సలు జరిగినట్లు వైద్యుల పరిశీలనలో వెల్లడైంది. మరికొన్ని 
  
  ముఖ్యమైన అంశాలు పరిశీలిస్తే...
  గంటకు 40 మంది నడుమునొప్పి బాధితులు నమోదవుతున్నారు
   
  2005 తర్వాత సర్జరీల సంఖ్య 50 శాతంపైనే పెరిగాయి
   
  బ్యాక్‌పెయిన్ శస్త్రచికిత్సలకు ఏటా కనీసం రూ.130 కోట్ల వరకూ ఖర్చు చేస్తున్నారు
   
  జిల్లాలతో పోలిస్తే శస్త్రచికిత్సలు జంటనగరాల్లో 80 శాతం ఎక్కువ
   
  జంటనగరాల్లో ఆర్థోపెడిక్, స్పైనల్ సర్జన్‌లు 200 మందిపైనే ఉన్నా 30 మంది మాత్రమే 
   
  ఎక్కువగా శస్త్రచికిత్సలు చేస్తున్నారు. 
   
  చెన్నై, బెంగళూరు, త్రివేండ్రం, కొచ్చిన్ నగరాలతో పోలిస్తే హైదరాబాద్‌లోనే ఎక్కువమంది వెన్నునొప్పితో బాధపడుతున్నారు
  
  తప్పనిసరి పరిస్థితుల్లోనే సర్జరీ
  జంట నగరాల్లో వెన్నునొప్పి బాధితులు పెరుగుతున్నారు. గతుకుల రోడ్లు దీనికి ప్రధాన కారణం. సాఫ్ట్‌వేర్ రంగం నుంచి కూడా ఈ బాధితులు ఉన్నారు. ఒకే స్థితిలో ఎక్కువసేపు కూర్చోవడం, గతుకుల కారణంగా వెన్నుపై ఒత్తిడి పెరిగి ఆపై నొప్పిరావడం తొలిదశ. రెండో దశలో ఒత్తిడి ఉన్న భాగాల అరుగుదల మొదలవుతుంది. కొద్ది రోజులకు డిస్కులు జారిపోవడం జరుగుతుంది. దీంతో నడుమునొప్పితో పాటు ఒక కాలు, ఒక చేయికి నొప్పి రావడం మొదలవుతుంది. 90 శాతం మందికి మందులు, ఫిజియోథెరపీతోనే నయమయ్యేలా చూస్తాం. తప్పనిసరైతేనే సర్జరీకి వెళతాం. సర్జరీ అనంతరం జీవనశైలి మార్చుకోవాలి. గతుకుల రోడ్లలో ప్రయాణించరాదు. చిన్న చిన్న వ్యాయామాలు చేస్తుండాలి.
  - డాక్టర్ నరేష్‌బాబు, వెన్నుపూస వైద్య
   నిపుణులు, మెడిసిటీ ఆస్పత్రి
  (జంటనగరాల ఆర్థోపెడిక్, స్పైనల్ వైద్యుల అసోసియేషన్ సభ్యులు)
  


 రాష్ర్ట విభజన ప్రక్రియ ఆగిపోయింద ని సీమాంధ్రకు చెందిన కేంద్ర మంత్రులు చెప్పటం సరికాదని ఎమ్మెల్సీ పొంగులేటి సుధాకరరెడ్డి అన్నారు. ‘వారికి భిన్నాభిప్రాయాలు ఉంటే అధిష్టానంతో చెప్పుకోవాలి తప్ప తెలంగాణ ప్రజల్లో అపోహలు కలిగేలా మాట్లాడటం మంచిదికాదు’ అని బుధవారం అసెంబ్లీ మీడియా పాయింట్ వద్ద విలేకర్లతో అన్నారు.
 
 విభజనకు అనుకూలంగా నిర్ణయం తీసుకున్న సోనియా గాంధీని చరిత్ర క్షమించదన్న మంత్రి టీజీ వెంకటేష్ వ్యాఖ్యలను ఖండిస్తున్నానని చెప్పారు. హైదరాబాద్‌లోని సీమాంధ్ర ప్రజల్లో నెలకొన్న అభద్రతా భావాన్ని తొలగించే ందుకు కాలనీల్లో సద్భావనా సదస్సులు నిర్వహించాల్సిన అవసరం ఉందన్నారు.


 దేశంలోని 70 కోట్ల మంది వెనుకబడిన వర్గాల ప్రజల అభివృద్ధి కోసం ఎలాంటి చర్యలు చేపట్టకుండా కేంద్ర ప్రభుత్వం అన్యాయం చేస్తోందని బీసీ సంక్షేమ సంఘం రాష్ట్ర అధ్యక్షుడు ఆర్. కృష్ణయ్య ఆరోపించారు. కాంగ్రెస్ పార్టీలో ఎంతో మంది సమర్థులైన బీసీ నేతలున్నా వారికి ముఖ్యమంత్రి పదవి ఇవ్వకుండా అణగదొక్కుతున్నారని ఆయన విమర్శించారు.
 
 బుధవారం బీసీ భవన్‌లో జరిగిన ‘చలో ఢిల్లీ’ పోస్టర్ ఆవిష్కరణ కార్యక్రమంలో ఆయన పాల్గొని మాట్లాడుతూ బీసీ కులంలో పుట్టడమే ముఖ్యమంత్రి పదవికి అనర్హతగా మారిందని, ఇప్పటివరకు రాష్ట్రానికి ముఖ్యమంత్రులుగా 30 మంది ప్రమాణస్వీకారం చేస్తే ఒక్క బీసీ కూడా ఆ జాబితాలో లేరని ఆయన ఆవేదన వ్యక్తం చేశారు. మారుతున్న పరిస్థితుల నేపథ్యంలో ముఖ్యమంత్రి పదవిని ఖచ్చితంగా బీసీలకే ఇవ్వాలని ఆయన డిమాండ్ చేశారు.
 
 చట్టసభల్లో బీసీలకు 50శాతం రిజర్వేషన్లు, బీసీ ఉద్యోగులకు ప్రమోషన్లలో రిజర్వేషన్లు పెట్టాలని డిమాండ్ చేస్తూ ఈనెల 19న పార్లమెంటు వద్ద భారీ ప్రదర్శన జరపాలని నిర్ణయించామని ఆయన తెలిపారు. సమావేశంలో వివిధ బీసీ సంఘాల నేతలు జె.శ్రీనివాస్‌గౌడ్, గుజ్జ కృష్ణ, ర్యాగరమేశ్, ఎస్. దుర్గయ్యగౌడ్, కె. బాలరాజ్, నీలవెంకటేశ్, కుల్కచర్ల శ్రీనివాస్, పెరిక సురేశ్, అశోక్‌గౌడ్, నర్సింహనాయక్, జి. అంజి, ఎ.పాండు, పి.సతీశ్, జి.భాస్కర్, బి.సదానందం తదితరులు పాల్గొన్నారు.


 రాష్ట్ర విభజనపై ముఖ్యమంత్రి కిరణ్ కుమార్ రెడ్డి, ప్రతిపక్ష నాయకుడు చంద్రబాబు నాయుడు ఎందుకు మాట్లాడడం లేదని వైఎస్సార్ కాంగ్రెస్ నాయకుడు, రాయచోటి ఎమ్మెల్యే గడికోట శ్రీకాంత్ రెడ్డి ప్రశ్నించారు. తెలుగు ప్రజల మనోభావాలను వీరు పట్టించుకోవడం లేదన్నారు. సీఎం కిరణ్ అండర్ గ్రౌండ్లో ఉన్నట్టుగా వ్యవహరిస్తున్నారని విమర్శించారు. ఆస్తులను కాపాడుకోవడానికే చంద్రబాబు మౌనంగా ఉన్నారన్నారు. రాజకీయ ప్రయోజనాల కోసం జనం సెంటిమెంట్తో ఆడుకోవద్దని హెచ్చరించారు.  
 
 సీమాంధ్ర కాంగ్రెస్ నాయకులు విభజనపై నోరెత్తకపోవడాన్ని ఆయన తప్పుబట్టారు. అధికార కాంగ్రెస్ పార్టీ విభజించు పాలించులా వ్యవహరిస్తోందని శ్రీకాంత్ రెడ్డి ధ్వజమెత్తారు. 33 ఎంపీ స్థానాలు బహుమతిగా ఇచ్చిన రాష్ట్రాన్ని ప్రాంతాలవారీగా విభజించేందుకు కాంగ్రెస్ ప్రయత్నిస్తోందని అన్నారు. ఎక్కడా బలమైన నాయకుడు ఉండకూడదన్న ఉద్దేశంతో ప్రాంతాల మధ్య విభేదాలు సృష్టిస్తోందని ఆరోపించారు. చరిత్ర గత ప్రాంతాన్ని చీల్చితే చరిత్రహీనులుగా మిగిలిపోతారని శ్రీకాంత్ రెడ్డి హెచ్చరించారు.


 ‘చంచల్‌గూడ’ అధికారులకు సీబీఐ కోర్టు ఆదేశం
  సాక్షి, హైదరాబాద్: వైఎస్ జగన్ కంపెనీల్లో పెట్టుబడుల కేసులో నిందితుడిగా ఉన్న మాజీమంత్రి మోపిదేవి వెంకట రమణ  ఆరోగ్య పరిస్థితిపై ఉస్మానియా లేదా గాంధీ ఆస్పత్రి వైద్యుల నేతృత్వంలోని మెడికల్ బోర్డు నుంచి నివేదిక  తీసుకుని సమర్పించాలని సీబీఐ ప్రత్యేకకోర్టు చంచల్‌గూడ జైలు సూపరింటెండెంట్‌ను ఆదేశించింది. ఈ నెల 12లోగా నివేదిక తమకివ్వాలని తెలిపింది. తీవ్రమైన వెన్నునొప్పితో బాధపడుతున్నానని, సర్జరీ చేయించుకోవడానికి 6 నెలల మధ్యంతర బెయిలివ్వాలంటూ మోపిదేవి దాఖలు చేసిన పిటిషన్‌ను ప్రత్యేక కోర్టుల ప్రధాన న్యాయమూర్తి దుర్గాప్రసాద్‌రావు మంగళవారం విచారించి ఈ ఉత్తర్వులిచ్చారు.
  
  జూన్ 15న తాను తీవ్ర వెన్నునొప్పితో పడిపోవడంతో జైల్లోని ఆస్పత్రికి తరలించి ప్రాథమిక పరీక్షలు చేశారని మోపిదేవి పిటిషన్‌లో తెలిపారు. ‘తల, ఛాతీలో తీవ్రనొప్పి వచ్చింది. కుడి భుజం పనిచేయలేదు. 17న ఉస్మానియా ఆస్పత్రిలో ఎంఆర్‌ఐ పరీక్ష చేశారు. వెన్నుపూసలు కదిలినట్లు వైద్యులు నిర్ధారించారు. నిమ్స్ వైద్యులు పరీక్షించి సర్జరీ చేయాలని సిఫార్సు చేశారు. సర్జరీ చేయకుంటే శాశ్వతంగా వికలాంగునిగా మారే అవకాశముందన్నారు. సర్జరీ తర్వాత 3 నెలలు విశ్రాంతి అవసరమని చెప్పారు. అందుకే మధ్యంతర బెయిలివ్వండి’ అని  మోపిదేవి అభ్యర్థించారు.


 
  సాక్షి, హైదరాబాద్: ఫీజు రీయింబర్స్‌మెంట్ పథకం కింద లబ్ధి పొందేందుకు ఫ్రెష్ విద్యార్థుల రిజిస్ట్రేషన్ ప్రారంభమైంది. ఫ్రెష్ విద్యార్థులు ఈపాస్ వెబ్‌సైట్ ద్వారా దరఖాస్తు చేసుకునేందుకు మంగళవారం నుంచి అవకాశం కల్పించారు. ప్రస్తుతానికి డిగ్రీ కోర్సులకు మాత్రమే అవకాశమిస్తున్నట్లు సాంఘిక సంక్షేమశాఖ ముఖ్య కార్యదర్శి రేమండ్ పీటర్ తెలిపారు. ఇంటర్ కోర్సుల ఆన్‌లైన్ ప్రక్రియ పూర్తయిన తర్వాత  త్వరలోనే ఇంటర్ విద్యార్థులకు అవకాశమిస్తామని మంగళవారం ‘సాక్షి’తో ఆయన పేర్కొన్నారు. అయితే దరఖాస్తు చేసుకునేందుకు ఎలాంటి గడువు విధించడం లేదు.
  
  ఎందుకంటే ఆధార్‌కు సంబంధించిన యూఐడీ నంబర్‌ను ఈ-పాస్ వెబ్ సైట్‌లో నమోదు చేస్తేనే దరఖాస్తు ఓపెన్ అవుతుంది. దాదాపు 40 శాతం మంది విద్యార్థులకు ఆధార్ లేదని గణాంకాలు వెల్లడిస్తున్న నేపథ్యంలో గడువు విధించలేదని, యూఐడీ నంబర్ నమోదు చేస్తే దరఖాస్తు లభించేలా ఏర్పాట్లు చేశామని అధికారులు చెప్పారు. ఈ-పాస్ వెబ్‌సైట్‌లో టెన్‌‌తక్లాస్ వివరాలు సమర్పించిన తర్వాత ఆధార్ యూఐడీ నంబర్‌ను రెండుసార్లు, మొబైల్ నంబర్‌ను రెండు సార్లు నమోదు చేయాలి. వెంటనే విద్యార్థి మొబైల్ నంబర్‌కు వచ్చిన పాస్‌వర్డ్‌ను నమోదు చేస్తేనే దరఖాస్తు లభిస్తుందని అధికారులు సూచించారు. త్వరగా యూఐడీ నెంబర్ పొందితే పథకానికి దరఖాస్తు చేసుకోవచ్చు. ఈ నిబంధన ఫ్రెష్, రెన్యువల్ విద్యార్థులకు వర్తిస్తుంది.


 సాక్షి, హైదరాబాద్: పోలీసుశాఖలో కానిస్టేబుల్, ఎస్‌ఐ స్థాయి నియామకాలకు బ్రేక్ పడింది. తెలంగాణ ప్రత్యేక రాష్ట్ర ఏర్పాటుకు ప్రకటన వెలువడిన నేపథ్యంలో నియామక ప్రక్రియ వాయిదాపడక తప్పని పరిస్థితి ఏర్పడింది. ఎస్‌ఐ, కానిస్టేబుల్ స్థాయిలో 11,623 పోస్టులను భర్తీచేసేందుకు ప్రభుత్వం జూన్ మూడో తేదీన ఆమోదం తెలిపింది. ఈ మేరకు అధికారిక ప్రకటన కూడా వెలువడిం ది. సివిల్, ఆర్మ్‌డ్ రిజర్వు, ఏపీఎస్పీతోపాటు స్పెషల్ ప్రొటెక్షన్ ఫోర్స్, జైళ్లు, అగ్నిమాపక శాఖ లలో పోస్టులను భర్తీచేయాల్సి ఉంది.
  
  ప్రస్తుతం రాత పరీక్ష జరిగిన పోలీసు నియామక ఫలితాలను విడుదల చేసిన అనంతరం కొత్త నోటిఫికేషన్ ఇచ్చేవిధంగా రిక్రూట్‌మెంట్ బోర్డు సన్నాహాలు చేసింది. తీరా తెలంగాణ రాష్ట్ర ఏర్పాటు ప్రకటన వెలువడటంతో పోలీసు నియామక ప్రక్రియకు బ్రేక్‌పడింది. తెలంగాణ, ఆంధ్రప్రదేశ్ రాష్ట్రాల విభజన పక్రియ పూర్తయిన తరువాత ఆయా రాష్ట్రాలలో ఖాళీల సంఖ్యకు అనుగుణంగా నియామకాలు చేపట్టడమే మంచిదని ప్రభుత్వం నిర్ణయించుకున్నట్లు సమాచారం. గతంలో ఇచ్చిన నోటిఫికేషన్ల ప్రకారం కానిస్టేబుల్, ఎస్‌ఐ నియామకాలు పూర్తిచేయడానికే మరో మూడు నెలలకాలం పట్టే అవకాశం ఉంది.
  
   ఈ మూడు నెలలకాలంలో నియామకాల ప్రక్రియ పూర్తిచేసేవిధంగా పోలీసుశాఖ ప్రణాళిక రూపొందించింది. ఈ నేపథ్యంలో కొత్త నోటిఫికేషన్ల జోలికి వెళ్లకపోవడమే మంచిదని అధికారులు నిర్ణయించారు. దీంతో కొత్త నోటిఫికేషన్ల కోసం ఎదురుచూస్తున్న అభ్యర్థుల ఆశలు అడియాశలయ్యాయి. రాష్ట్రాల విభజన అనంతరం జనాభా ప్రాతిపదికన ఏ రాష్ట్రానికి ఎంత శాతం సిబ్బందిని కేటాయించాలనేది నిర్ణయించనున్నారు. అందుకు అనుగుణంగానే పోలీసు సిబ్బందిని రెండు రాష్ట్రాలకు బదలాయిస్తారు. జోన్లవారీగా నియామకాలు జరిగినందున సిబ్బంది కేటాయింపు విషయంలో సమస్యలూ తలెత్తే అవకాశం లేదు. కిందిస్థాయి సిబ్బంది బదలాయింపు ప్రక్రియను పూర్తిచేసిన అనంతరం ఖాళీలకు అనుగుణంగా రెండు రాష్ట్రాలలో వేర్వేరుగా నియామకాలు చేపడతారు. ఈలోగానే పాతనోటిఫికేషన్లకు సంబంధించిన నియామక ప్రక్రియను పూర్తిచేసేందుకు పోలీసుశాఖ చర్యలు వేగవంతంచేసింది.


 సాక్షి, హైదరాబాద్: ప్రముఖ న్యాయ కోవిదుడు, సీనియర్ న్యాయవాది సి.పద్మనాభరెడ్డికి హైకోర్టు మంగళవారం ఘనంగా నివాళులు అర్పించింది. న్యాయ వ్యవస్థకు ఆయన చేసిన సేవలను కొనియాడింది. పద్మనాభరెడ్డి మరణం రాష్ట్రానికి తీరని లోటని విచారం వ్యక్తంచేసింది. గుండెపోటుతో ఈనెల 4న కన్నుమూసిన పద్మనాభరెడ్డికి నివాళులు అర్పించేందుకు మంగళవారం ప్రధాన న్యాయమూర్తి జస్టిస్ కళ్యాణ్‌జ్యోతి సేన్‌గుప్తా నేతృత్వంలో న్యాయమూర్తులందరూ సమావేశయ్యారు. అడ్వొకేట్ జనరల్ ఎ.సుదర్శన్‌రెడ్డి, బార్ కౌన్సిల్ చైర్మన్ ఎ.నర్సింహారెడ్డి, అదనపు ఏజీలు, పబ్లిక్ ప్రాసిక్యూటర్, ప్రభుత్వ న్యాయవాదులతో పాటు న్యాయవాదులు ఇందులో పాల్గొన్నారు. ఈ సందర్భంగా ప్రధాన న్యాయమూర్తి మాట్లాడుతూ.. న్యాయవాద వృత్తిలోకి వచ్చిన కొత్తలోనే మానవ హక్కుల రక్షణ కోసం పద్మనాభరెడ్డి ఎంతో తపనపడ్డారని, చివరి వరకు అలాగే పనిచేశారని కొనియాడారు.
  
   ‘‘వృత్తిపట్ల అంకితభావం, క్రిమినల్ లా పట్ల అపారమైన విజ్ఞానం, వెరసి ఆయనకు భారీస్థాయిలో కేసులు తీసుకొచ్చాయి. హైకోర్టులో అపారమైన ప్రాక్టీస్ దృష్ట్యా ఆయన క్రిమినల్ లాలో నడిచే ఎన్‌సైక్లోపీడియాగా పేరుపొందారు. తన వ్యక్తిత్వంతో ఆంధ్రప్రదేశ్ హైకోర్టుకు పద్మనాభరెడ్డి ప్రత్యేక గుర్తింపు తెచ్చారు. పేదలు, అణగారిన వర్గాల న్యాయవాదిగా పేరుపొందారు. ’అని జస్టిస్ సేన్‌గుప్తా ప్రశంసించారు. ఆయన ఆత్మకు శాంతి చేకూరాలని, ఆయన కుటుంబ సభ్యులకు మనోధైర్యం ప్రసాదించాలని తన తరఫున, తన సహచర న్యాయమూర్తుల తరఫున ఆ భగవంతుడిని ప్రార్థిస్తున్నట్లు తెలిపారు. పద్మనాభరెడ్డి మృతికి సంతాపంగా మధ్యాహ్నం నుంచి కోర్టు కార్యకలాపాలను నిలిపివేశారు.


 సాక్షి, హైదరాబాద్: రాష్ట్ర విభజన ప్రకటనతో పోటీ పరీక్షల నోటిఫికేషన్ల కోసం ఎదురుచూస్తున్న లక్షలాది మంది ఉద్యోగార్థుల పరిస్థితి ఆయోమయంలో పడింది. ఇప్పట్లో నోటిఫికేషన్లుండవనే వార్తలు, రాష్ట్రాన్ని విభజించిన తర్వాత కూడా నోటిఫికేషన్లు ఎప్పుడు ఇస్తారో తెలియకపోవడంతో వీరు గందరగోళానికి గురవుతున్నారు. ఈ పరిస్థితుల్లో గ్రూప్-1, గ్రూప్-2తో పాటు డీఎస్సీ, ఎస్సైలు, ఇతర ప్రభుత్వ ఉద్యోగాల రాతపరీక్షల కోసం శిక్షణ తీసుకోవాలా వద్దా అనే దానిపై కూడా నిరుద్యోగుల మెదళ్లలో సవాలక్ష ప్రశ్నలు తలెత్తుతున్నాయి. గ్రామాల నుంచి తరలివచ్చి.. హైదరాబాద్ సహా పలు నగరాల్లోని కోచింగ్ సెంటర్లలో శిక్షణ తీసుకుంటున్న వారిలో కొందరు ఇప్పటికే స్వస్థలాలకు తిరుగుముఖం పట్టగా.. మరికొందరు నేడో రేపో వెళ్లిపోదామనుకుంటున్నారు. ప్రస్తుత పరిస్థితుల నేపథ్యంలో కోచింగ్ సెంటర్లకు ఇక గడ్డుకాలమేనని చెబుతున్నారు.
  
  ఖర్చు తప్ప ఉపయోగం లేదు..
  గ్రూప్-1, గ్రూప్-2తో పాటు డీఎస్సీ, ఎస్సైలు, ఇతర ప్రభుత్వ ఉద్యోగాల రాతపరీక్షల కోసం శిక్షణ ఇచ్చేందుకుగాను హైదరాబాద్‌తో పాటు రాష్ట్రవ్యాప్తంగా పెద్ద సంఖ్యలో కోచింగ్ సెంటర్లున్నాయి. ఈ కోచింగ్ సెంటర్లలో లక్షల మంది శిక్షణ తీసుకుంటున్నట్లు అంచనా. రాష్ట్ర విభజనపై యూపీఏ నిర్ణయం నేపథ్యంలో సాధారణ ఎన్నికలు అయిపోయేంతవరకు మళ్లీ ప్రభుత్వ ఉద్యోగాల కోసం నోటిఫికేషన్లు రావంటూ వస్తున్న వార్తలతో వీరు ఆందోళన చెందుతున్నారు.
  
  దీని వల్ల కోచింగ్ సెంటర్లకు వచ్చే వారి సంఖ్య కూడా తగ్గిపోయిందని విద్యానగర్‌లోని ఓ కోచింగ్ సెంటర్‌లో పనిచేస్తున్న అధ్యాపకుడు చెప్పారు. ఇప్పుడు ఉద్యోగార్థులకు సంధికాలమని, ఈ సంధికాలం ముగిసి ఉద్యోగ ప్రకటనలపై స్పష్టత వచ్చేంతవరకు కోచింగ్ సెంటర్లు మూతపడినా ఆశ్చర్యపోవాల్సిన అవసరం లేదని ఆయన అభిప్రాయపడ్డారు.  గ్రూప్-1 కోచింగ్‌కయితే సెంటర్‌ను బట్టి గరిష్టంగా రూ.50 వేలు, గ్రూప్-2కు రూ.20 వేల వరకు వసూలు చేస్తున్నారు. ఈ పరిస్థితుల్లో కోచింగ్ తీసుకుంటే ఆర్థికంగా ఖర్చు తప్ప ఉపయోగం లేదనే ఆలోచనతో కొందరు నిరుద్యోగులు సొంత గ్రామాలకు వెళ్లిపోతున్నారు. ‘మీడియాలో కథనాలు వస్తున్నాయి. ఇప్పట్లో ఉద్యోగ ప్రకటనలు ఉండకపోవచ్చు. ఇక్కడ ఉండి ఉపయోగం ఏముంది? హాస్టళ్లలో ఉన్నా ఖాళీగా ఉండి డబ్బు ఖర్చు పెట్టుకోవాల్సిందే. మళ్లీ నోటిఫికేషన్లు వచ్చే పరిస్థితి వచ్చినప్పుడు కోచింగ్ సెంటర్లే కబురు పెడతాయి. రెండు రోజుల్లో మా ఇంటికి వెళ్లిపోతా’ అని ఆర్టీసీ క్రాస్‌రోడ్డులో ఉంటున్న ఓ నిరుద్యోగి అన్నాడు.
  
  ఉద్యోగాల భర్తీ కొత్త రాష్ట్రాల్లోనేనా?
  కొత్త రాష్ట్రాల్లోనే ఉద్యోగాల ప్రకటనలు వస్తాయని నిరుద్యోగులు నమ్ముతున్నారు. ఏపీపీఎస్సీ, పోలీస్ రిక్రూట్‌మెంట్ బోర్డు నిర్వహించే పోటీ పరీక్షలకు శిక్షణ తీసుకోవడానికి పెద్ద సంఖ్యలో ఉద్యోగార్థులు హైదరాబాద్ వస్తుంటారు. విభజన వల్ల పబ్లిక్ సర్వీసు కమిషన్ రెండుగా విడిపోతుంది. అప్పుడున్న ఖాళీలు, పోస్టుల అవసరం మేరకు నోటిఫికేషన్లు వచ్చే అవకాశముంది. సిలబస్, పరీక్షా విధానం పాతదే కొనసాగుతుందని చెప్పడానికీ లేదని అధికార వర్గాలు చెబుతున్నాయి. అయితే, కోచింగ్ సెంటర్ల నిర్వాహకులు మాత్రం సిలబస్‌లో మార్పేమీ ఉండదని, కనీసం రెండేళ్ల వరకైతే మారదని అంటున్నారు.
  
  వయసు మీరిన వారి పరిస్థితేంటి?
  ప్రభుత్వ ఉద్యోగాలు పొందేందుకు విధించిన గరిష్ట వయోపరిమితికి అతి సమీపంలోఉన్న వారి పరిస్థితి మరింత దారుణంగా ఉంది. ఏడాది, ఏడాదిన్నరలో వయోపరిమితి దాటే నిరుద్యోగుల సంఖ్య దాదాపు లక్ష ఉంటుందని ఒక అంచనా. ఈ నేపథ్యంలో రాష్ట్రంలో పరిస్థితులు మారి.. ఉద్యోగాల నోటిఫికేషన్లు వచ్చేసరికి తమ వయసు అడ్డంకిగా మారుతుందనే ఆవేదన వారిలో వ్యక్తమవుతోంది. అయితే, నిరుద్యోగ సంఘాలు ఒక డిమాండ్‌ను తెరపైకి తెస్తున్నాయి. ఇప్పటివరకు గుర్తించి, నోటిఫికేషన్ కోసం సిద్ధంగా ఉన్న ఉద్యోగాలను వెంటనే భర్తీ చేసే ప్రక్రియను ప్రారంభించాలని ఇవి కోరుతున్నాయి. రాష్ట్ర విభజన జరిగినా కనీసం ఆరేడు నెలలు పడుతుందని, పోటీపరీక్షలు నిర్వహించి.. వాటి ఫలితాలు వచ్చి పోస్టింగ్‌లిచ్చేందుకు కూడా అదే సమయం పడుతుందని, అప్పుడు రెండు రాష్ట్రాలకు ఉద్యోగులను పంచవచ్చని గ్రూప్-2 సాధన సమితి నాయకుడు చందు అన్నారు. ఈ పరిస్థితుల్లో ప్రభుత్వం చొరవ తీసుకుని నోటిఫికేషన్లు ఇస్తుందా? లేక రెండు రాష్ట్రాల్లోనే ఉద్యోగాలు భర్తీ అవుతాయా అనే దానిపై సర్వత్రా ఉత్కంఠ, ఆందోళన నెలకొంది.
  


  జెన్‌కో ఆస్తులు, ప్లాంట్ల సామర్థ్యం ఇక్కడే ఎక్కువ  ఆస్తులతో పోలిస్తే.. అప్పులూ తక్కువే
   తెలంగాణలో విద్యుత్ ప్లాంట్ల ఆస్తులు రూ.12,500 కోట్లు.. అప్పులు 6,800 కోట్లు
   ఆంధ్రాలో ఆస్తులు 6,800 కోట్లు, అప్పులు 4,539 కోట్లు
   జెన్‌కో ప్లాంట్ల సామర్థ్యంలో 54% తెలంగాణలో.. 46% ఆంధ్రలో..
  
  సాక్షి, హైదరాబాద్: రాష్ట్రం మొత్తమ్మీద జెన్‌కోకు చెందిన విద్యుత్ ప్లాంట్ల ఆస్తులు తెలంగాణలోనే ఎక్కువగా ఉన్నాయి. ఇక్కడ ఆస్తులతో పోలిస్తే.. అప్పులు తక్కువగా ఉన్నాయి. ఆంధ్ర ప్రాంతంలో పరిస్థితి ఇందుకు భిన్నంగా ఉంది. తెలంగాణలో జెన్‌కోకు చెందిన విద్యుత్ ప్లాంట్ల ఆస్తులు రూ.12,500 కోట్లు. ఈ ప్లాంట్ల కోసం తెచ్చిన అప్పులు రూ.6,800 కోట్లు మాత్రమే. అంటే ఆస్తులు-అప్పుల నిష్పత్తి 100:54.4గా ఉందన్నమాట. అదే ఆంధ్రా ప్రాంతంలోని విద్యుత్ ప్లాంట్ల ఆస్తులు రూ.6,800 కోట్లు కాగా అప్పులు రూ.4,539 కోట్లు ఉన్నాయి.
  
   ఆస్తులు-అప్పుల నిష్పత్తి 100:66.75 శాతంగా ఉంది. అయితే, ఇరు ప్రాంతాలకు చెందిన విద్యుత్ పంపిణీ సంస్థ(డిస్కం)ల నిధులతో నిర్మించిన నెల్లూరు జిల్లాలోని కృష్ణపట్నం థర్మల్ పవర్ ప్లాంటు(1,600 మెగావాట్లు) ఆస్తులు-అప్పులు రెండూ రూ.8 వేల కోట్లుగా ఉన్నాయి. ఇది ఇరు ప్రాంతాలకు చెందనుంది. ప్రతీ ప్రభుత్వ విభాగం నుంచి ఆస్తులు-అప్పుల వివరాలను రాష్ట్ర ప్రణాళిక శాఖ ఇప్పటికే సేకరించడం ప్రారంభించింది. ఇందులో భాగంగా ఇంధనశాఖ కూడా ఇరు ప్రాంతాల్లోని ఆస్తులు-అప్పుల వివరాలను సేకరిస్తోంది. రెండు, మూడు రోజుల్లో ప్రభుత్వానికి ఇంధనశాఖ నివేదిక సమర్పించనున్నట్టు సమాచారం. విభజన అనంతరం కూడా ఈ అప్పులను మరో 15 ఏళ్లపాటూ చెల్లించాల్సి ఉంటుందని ఇంధనశాఖ వర్గాలు పేర్కొన్నాయి. అయితే, థర్మల్ విద్యుత్ ప్లాంట్ల సామర్థ్యం ఆధారంగా చూస్తే మాత్రం ఆంధ్రాలోనే అధిక విద్యుత్ ప్లాంట్లు ఉన్నాయి.
  
  తెలంగాణ ప్రాంతంలో థర్మల్ విద్యుత్ ప్లాంట్ల సామర్థ్యం 2282.5 మెగావాట్లు కాగా.. ఆంధ్రా ప్రాంతంలో 2810 మెగావాట్ల సామర్థ్యం కలిగిన విద్యుత్ ప్లాంట్లు ఉన్నాయి. అయితే, జల విద్యుత్ ప్లాంట్లు మాత్రం తెలంగాణలోనే ఎక్కువ ఉన్నాయి. తెలంగాణలో జల విద్యుత్ ప్లాంట్ల సామర్థ్యం 2541.8 మెగావాట్లు. ఆంధ్రా ప్రాంతంలో 1287.6 మెగావాట్లు మాత్రమే. ప్రైవేట్ విద్యుత్ ప్లాంట్లను పరిగణనలోని తీసుకుంటే ఆంధ్రా ప్రాంతంలోని విద్యుత్ ప్లాంట్ల సామర్థ్యం ఎక్కువగా ఉంది. మొత్తమ్మీద రాష్ట్రవ్యాప్తంగా జెన్‌కోకు 8924.86 మెగావాట్ల సామర్థ్యం కలిగిన విద్యుత్ ప్లాంట్లు ఉన్నాయి. ఇందులో తెలంగాణ ప్రాంతంలో 4825.26 మెగావాట్ల విద్యుత్ ప్లాంట్లు ఉన్నాయి. అంటే మొత్తం జెన్‌కో సామర్థ్యంలో 54 శాతం తెలంగాణలోనే ఉన్నాయి. ఇక ఆంధ్రా ప్రాంతంలో 4099.60 మెగావాట్ల ప్లాంట్లు... అంటే 46 శాతం ఉన్నాయి. 


 సాక్షి నెట్‌వర్క్: పదిహేను రోజుల్లో మూడుసార్లు తీరప్రాంతాలను ముంచెత్తిన గోదావరి వరద క్రమంగా తగ్గుముఖం పడుతోంది. అయితే వరదనీరు తొలగిపోవడంతో మిగిలిన బురదతో బాధితులకు కొత్తకష్టాలు వస్తున్నాయి. ముంపు గ్రామాల్లో పారిశుధ్య సమస్య తీవ్రంగా ఉంది. దోమలబెడద పెరిగిపోవడంతో అంటువ్యాధులు విజృంభిస్తున్నాయి. ఖమ్మం జిల్లా కూనవరం మండలం టేకులబోరుకు చెందిన తలారి వేదవతి(33) మంగళవారం అతిసారతో మృత్యువాత పడింది. సహాయ శిబిరాల్లోనూ బాధితులు అనారోగ్యంతో బాధపడుతున్నారు.
  
  ఖమ్మం జిల్లా భద్రాచలం వద్ద మంగళవారం సాయంత్రం గోదావరి నీటిమట్టం 45.5 అడుగులుగా, తూర్పుగోదావరి జిల్లా ధవళేశ్వరం కాటన్ బ్యారే జీ వద్ద  16.30 నీటిమట్టం అడుగులకు చేరింది. దీంతో అధికారులు ఇక్కడ మూడవ ప్రమాద హెచ్చరికను ఉపసంహరించారు. వరద తగ్గుముఖం పట్టినా ఖమ్మం జిల్లా వాజేడు మండలంలోని పలు గ్రామాలతోపాటు, ఉభయగోదావరి జిల్లాల్లోని అనేక లంకగ్రామాలు ఇప్పటికీ జలదిగ్బంధంలోనే ఉన్నాయి. భద్రాచలం పట్టణంలోని రామాలయం ఎదురుగా ఉన్న విస్తా కాంప్లెక్స్, అన్నదాన సత్రం ఇంకా ముంపులోనే ఉన్నాయి. ఉత్తర ద్వారం వద్ద బురదమయంగా తయారైంది.
  
  కోస్తాలో చురుకుగా నైరుతి: తెలంగాణపై తీవ్ర ప్రభావం చూపిన నైరుతి రుతుపవనాలు ప్రస్తుతం కోస్తాంధ్రలో చురుకుగా ఉన్నాయి. బంగాళాఖాతంలో ఏర్పడిన అల్పపీడనం ఉపరితల ఆవరణంగా మారిపోయింది. ఛత్తీస్‌గఢ్ దానిని ఆనుకుని ఉన్న పరిసర ప్రాంతాల్లో 5.7కి.మీ ఎత్తులో ఉపరితల ఆవరణం ఏర్పడింది. దీని కారణంగా రానున్న 24 గంటల్లో రాష్ట్రంలో కొన్ని ప్రాంతాల్లో ఓ మోస్తరు వర్షం అవకాశం ఉందని విశాఖలోని తుపాను హెచ్చరికల కేంద్రం అధికారులు తెలిపారు. ఛత్తీస్‌గఢ్ నుంచి దక్షిణ తమిళనాడు వరకు కోస్తాంధ్ర మీదుగా అల్పపీడన ద్రోణి కొనసాగుతోంది. దీని కారణంగా పలు జిల్లాల్లో భారీ వర్షం పడే అవకాశాలున్నాయి. ఆంధ్రా తీరంలో పశ్చిమ దిశగా గంటకు 45నుంచి 50కి.మీ వేగంతో ఈదురుగాలులు వీచే ప్రమాదం ఉంది.


 సూళ్లూరుపేట, న్యూస్‌లైన్ : జీఎస్‌ఎల్‌వీ డీ-5ను ఈనెల 19 సాయంత్రం 4.50 గంటలకు ప్రయోగించనున్నారు. భారత అంతరిక్ష పరిశోధనా కేంద్రం (ఇస్రో) సతీష్ ధావన్ స్పేస్ సెంటర్‌లో  మంగళవారం జరిగిన  మిషన్ రెడీనెస్ రివ్యూ  సమావేశంలో ముహూర్తం నిర్ణయించారు. ఈ విషయాన్ని వెహికల్ డెరైక్టర్ డాక్టర్ బీఎన్ సురేష్ ప్రయోగతేదీని లాంచ్ ఆథరైజేషన్ బోర్డుకు తెలియజేశారు.


 సాక్షి, హైదరాబాద్: ఇండోర్-యశ్వంత్‌పూర్ మధ్య నడిచే కొత్త ఎక్స్‌ప్రెస్ రైలు పట్టాలెక్కింది. 2012-13 బడ్జెట్‌లో రైల్వేశాఖ ఈ ఎక్స్‌ప్రెస్‌ను ప్రకటించింది. అయితే వివిధ కారణాలతో ప్రారంభంకాని ఈ రైలు ఇప్పుడు అందుబాటులోకి వచ్చింది. ప్రతి ఆదివారం రాత్రి 8.55కు ఇండోర్‌లో బయలుదేరే ఈ రైలు యశ్వంత్‌పూర్‌కు మంగళవారం ఉదయం 11.15కు చేరుకుంటుంది. తిరుగు ప్రయాణంలో ప్రతి మంగళవారం మధ్యాహ్నం 1.30కి యశ్వంత్‌పూర్‌లో బయల్దేరి ఇండోర్‌కు గురువారం ఉదయం 5.15కు చేరుకుంటుంది. ఇది నిజామాబాద్, కామారెడ్డి, కాచిగూడ, మహబూబ్‌నగర్, గద్వాల, కర్నూలు సిటీ, గుత్తి, ధర్మవరం మీదుగా వెళ్తుంది.


 సాక్షి, హైదరాబాద్: వివాదాస్పదంగా మారిన డీఎస్సీ-2012 నియామకాల కోసం రాష్ట్ర పరిపాలనా ట్రిబ్యునల్(ఏపీఏటీ) మంగళవారం మార్గదర్శకాలను జారీ చేసింది. నియామకాల కోసం రెండోసారి తయారు చేసిన జాబితా.. తమ మార్గదర్శకాల ప్రకారం ఉందో లేదో పరిశీలించి, వాటి ప్రకారమే తుది జాబితా విడుదల చేయాలని విద్యా శాఖకు తేల్చి చెప్పింది. ‘నియామక ఉత్తర్వులు కూడా మా మార్గదర్శకాలకు లోబడే ఉం డాలి. వాటికి విరుద్ధంగా నియామక ఉత్తర్వులు ఇచ్చి ఉంటే వాటిని చట్టవిరుద్ధమైనవిగా భావించాల్సి ఉంటుంది’ అని పేర్కొంది. డీఎస్సీ-2012 పరీక్షా ఫలితాల్లో మొదట తాము ఎంపికైనట్లు ప్రకటించి తర్వాత మరో జాబితా విడుదల చేశారని, అందులో తమ పేర్లు తొలగించాలని ఆరోపిస్తూ సయ్యద్ మహమూద్ అనే అభ్యర్థితోపాటు మరికొంత మంది అభ్యర్థులు దాఖలు చేసిన 262 పిటిషన్లను ట్రిబ్యునల్ మంగళవారం విచారించింది.
  
   ట్రిబ్యునల్ చైర్మన్ జస్టిస్ డాక్టర్ జి.యతిరాజులు, సభ్యులు ఎంవీపీ శాస్త్రిల నేతృత్వంలోని ధర్మాసనం పిటిషనర్ల వాదనలు వినింది. పిటిషనర్ల తరఫున న్యాయవాదులు ఎం.రాంగోపాల్‌రావు, సీహెచ్ జగన్నాథరావు, పి.వీరభద్రారెడ్డిలు వాదనలు వినిపించారు. అనంతరం ధర్మాసనం డీఎస్సీ-2012 నియామకాల కోసం 26 మార్గదర్శకాలను రూపొందించింది. వీటి ప్రకారమే నియామక ప్రక్రియ చేపట్టాలని పాఠశాల విద్యాశాఖ కమిషనర్‌ను ఆదేశించింది. పిటిషనర్ల కోసం ఖాళీగా ఉంచాలని గతంలో తామిచ్చిన ఆదేశాలను కొట్టేస్తున్నామని చెబుతూ, తమ మార్గదర్శకాల ప్రకారం పోస్టులను భర్తీ చేసుకోవచ్చని పేర్కొంది.
  
  ఏపీఏటీ మార్గదర్శకాల్లో ముఖ్యమైనవి..
  -    {పకటించిన ఖాళీల్లో 20 శాతం పోస్టులను స్థానికులు, స్థానికేతరులతో, 80 శాతం పోస్టులను స్థానికులతో రిజర్వేషన్ల ప్రకారం భర్తీ చేయాలి.
  -    ఓపెన్ కేటగిరీ పోస్టులను ప్రతిభ ఆధారంగానే భర్తీ చేయాలి. రిజర్వేషన్ కేటగిరీలోని అభ్యర్థి మెరిట్ జాబితాలో ఎంపికైతే రిజర్వేషన్ కోటాలో ఆ సంఖ్యను తగ్గించ కూడదు.
  -    స్థానిక అభ్యర్థులకు రాష్ట్రపతి ఉత్తర్వుల ప్రకారమే రిజర్వేషన్లు కల్పించాలి. గతంలో మిగిలిన పోస్టులను రోస్టర్ పాయింట్ల ఆధారంగా భర్తీ చేయాలి.
  -    ఉద్యోగుల సర్వీసు నిబంధన 22(2)(ఇ) ప్రకారమే మహిళలు, ఎస్సీ, ఎస్టీ, బీసీ, వికలాంగులు, మాజీ సైనికుల కేటగిరీ నియామకాలు చేపట్టాలి.
  -    ఏజెన్సీ ప్రాంతాల్లో ఖాళీలకు అనుగుణంగా స్థానిక ఎస్టీ అభ్యర్థులను పరిగణనలోకి తీసుకోవాలి. ఏజెన్సీయేతర ప్రాంతాల్లోనూ అర్హులైన ఎస్టీలు ఉంటే నియమించవచ్చు.
  -    నోటిఫికేషన్‌లో ప్రకటించిన ఖాళీలకన్నా ఎక్కువ మంది అభ్యర్థులను ఎంపిక చేయరాదు. వెయిటింగ్ లిస్టు ఉండకూడదు.
  -    అభ్యర్థులకు ఒకే మార్కులు వస్తే అందులో ఎక్కువ వయసు ఉన్న అభ్యర్థికి ఎక్కువ ర్యాంక్ కేటాయించాలి. ఇందులో ఒకే వయసున్న మహిళలు ఉంటే వారికే ఎక్కువ ర్యాంక్ ఇవ్వాలి.
  -    విద్యాశాఖ కమిషనర్ జిల్లా, కేటగిరీ వారీగా మెరిట్ లిస్టును రూపొందించి డీఎస్సీలకు పంపాలి.
  -    ఒకే వయసున్న అభ్యర్థులు ఉంటే అందులో ఎస్సీ, ఎస్టీ, బీసీ, ఓసీల వారీగా ప్రాధాన్య క్రమంలో ఎంపిక చేయాలి.
  -    ఎంపికైన అభ్యర్థి ఉద్యోగంలో చేరకపోతే ఏర్పడే ఖాళీని తదుపరి నియామకాల్లో భర్తీ చేయాలి. మాజీ సైనికుల కోటా పోస్టులకు అర్హులెవరూ లేకపోతే వాటిని ఓపెన్ కేటగిరీ కింద భర్తీ చేయవచ్చు.


 తమ దిష్టిబొమ్మలు కాదు.. తమను తగలబెట్టినా రాష్ట్ర విభజనపై తమ విధానం మారదని సీపీఐ రాష్ట్ర కార్యదర్శి కె నారాయణ స్పష్టం చేశారు. సమైక్య రాష్ట్రం కోరుకునే వారు 23జిల్లాల్లోనూ ఆందోళనలు చేయాలని ఆయన సూచించారు. తెలంగాణపై కేసీఆర్‌కు చిత్తశుద్ధి లేదని ఆయన విమర్శించారు. ఇరుప్రాంతాల ప్రజల అనుమానాలను కేంద్ర ప్రభుత్వం నివృత్తి చేయాలని సూచించారు.
 
 రాష్ట్ర విభజనను వ్యతిరేకిస్తూ సీమాంధ్రలో పెద్ద ఎత్తున నిరసనలు, ఆందోళనలు పెచ్చరిల్లాయి. జాతీయ నాయకులను విగ్రహాలను ఆందోళనకారులు ధ్వంసం చేశారు. విభజనకు మద్దతు పలికిన నాయకుల దిష్టిబొమ్మలను తగులబెట్టారు. రాష్ట్ర విభజనపై నోరెత్తని నాయకుల దిష్టిబొమ్మలకు శవయాత్రలు, పిండ ప్రదానాలు నిర్వహించారు.
 
 మరోవైపు రాష్ట్ర విభజన అనివార్యమయితే సీమాంధ్రుల్ని ఎలా సముదాయించాలనే సీపీఐ కసరత్తు మొదలుపెట్టింది. చారిత్రక పరిస్థితుల నేపథ్యంలో తెలంగాణ ఏర్పాటవుతోందని చెబుతూనే.. కొత్తగా ఏర్పడే రాష్ట్రానికి సమన్యాయం దక్కేలా చూడడమే తమ ప్రధాన కర్తవ్యమని చెబుతోంది. ఇందుకు అనుసరించాల్సిన వ్యూహంపై సీపీఐ రాష్ట్ర కార్యదర్శి కె.నారాయణ ఆదివారం హైదరాబాద్‌లో వివిధ రంగాల నిపుణులు, మేధావులతో చర్చలు జరిపారు.


 తిరుపతి : సీమాంధ్రలో విభజన సెగలు ఇంకా కొనసాగుతున్నాయి. రాష్ట్ర విభజనను వ్యతిరేకిస్తూ తిరుపతి మున్సిపల్‌ కార్యాలయం వద్ద జేఏసీ నేతలు చేపట్టని దీక్ష నాలుగో రోజుకు చేరింది. మరోవైపు పట్టణంలో ఆటో కార్మికులు బంద్ నిర్వహిస్తున్నారు. సమైక్యాంధ్రకు మద్దతుగా కేబుల్ ఆపరేటర్లు దీక్ష చేపట్టిన విషయం తెలిసిందే. వైఎస్ఆర్ కాంగ్రెస్ పార్టీ ఎమ్మెల్యే భూమన కరుణాకర్ రెడ్డి మంగళవారం దీక్ష శిబిరాన్ని సందర్శించి వారికి సంఘీభావం తెలిపారు.
  
 వరదాయపాలెంలో వైఎస్ఆర్ కాంగ్రెస్ పార్టీ ఆధ్వర్యంలో వంటావార్పు కార్యక్రమం చేపట్టారు. అలాగే విద్యార్థులు సోనియా, కేసీఆర్ దిష్టి బొమ్మలకు శవయాత్ర నిర్వహించారు. అనంతరం దగ్ధం చేశారు. కాగా సత్యవీడు మండలం మదనంబేడు వద్ద ఆందోళనకారులు ఓ ఆర్టీసీ బస్సును దగ్ధం చేశారు. మరోవైపు చిత్తూరు జిల్లాలో బంద్ కొనసాగుతోంది. ఆర్టీసీ బస్సులు డిపోలకే పరిమితమైయ్యాయి. నేడు జిల్లావ్యాప్తంగా కేబుల్ ప్రసారాలు నిలిచిపోయాయి. రాష్ట్ర విభజనను నిరసిస్తూ ఎమ్మెల్యే సీకే బాబు చేపట్టిన ఆమరణ దీక్ష నేటికి ఏడోరోజుకు చేరింది. ఆయన ఆరోగ్యం క్షీణిస్తోంది. మరోవైపు పుంగనూరులో సమైక్యవాదులు ఆందోళనకు దిగారు. చెన్నై-ముంబై జాతీయ రహదారిపై గోడ కట్టారు.
  
 మరోవైపు సమైక్యాంధ్రకు మద్దుతుగా ఎస్వీయూలో విద్యార్థులు చేపట్టిన దీక్షలను పోలీసులు భగ్నం చేశారు. దీక్ష చేపట్టిన వారిని పోలీసులు బలవంతంగా ఆస్పత్రికి తరలించారు. కాణిపాకంలో అర్చకులు ర్యాలీ నిర్వహించారు.


 సాక్షి, హైదరాబాద్: సమైక్య ఉద్యమంలో కలిసిరావాలని, విభజనను అడ్డుకోవడానికి మద్దతు ఇవ్వమని తాము చేసిన విజ్ఞప్తికి టీడీపీ అధ్యక్షుడు చంద్రబాబు నాయుడు, పీసీసీ అధ్యక్షుడు బొత్స సత్యనారాయణ సానుకూలంగా స్పందించలేదని ఏపీఎన్జీవో అధ్యక్షుడు అశోక్‌బాబు వెల్లడించారు. అశోక్‌బాబు నేతృత్వంలోని ఉద్యోగుల ప్రతినిధి బృందం సోమవారం చంద్రబాబు, బొత్సలతో వేర్వేరుగా భేటీ అయింది. అనంతరం ఆయన విలేకరులతో మాట్లాడారు.
  
   సీమాంధ్ర ప్రజల ఆందోళనల నేపథ్యంలో విభజనపై టీడీపీ నిర్ణయాన్ని పునఃసమీక్షించుకోమని, సమైక్య ఉద్యమానికి అండగా నిలబడమని చంద్రబాబును కోరామని, ఆయన స్పష్టమైన హామీ ఇవ్వలేదని చెప్పారు. సమైక్య ఉద్యమానికి ప్రతికూల వైఖరి తీసుకోవడం వల్ల సీమాంధ్ర ప్రజల్లో టీడీపీ పట్ల వ్యతిరేకత ఏర్పడుతోందని, చంద్రబాబును ప్రజలు దోషిగా చూస్తున్నారని చెప్పినప్పు డు.. ‘అదంతా పొలిటికల్ గేమ్. తప్పదు. భరించా లి’ అని బాబు స్పందించారని వెల్లడించారు. పార్టీకి సంబంధించిన వ్యవహారం కాబట్టి అంత సులభంగా నిర్ణయం తీసుకోలేనన్నారని అశోక్‌బాబు చెప్పారు.
  
  అయితే ఇరు ప్రాంతాలకూ న్యాయం జరిగే విధంగా సరైన సమయంలో తగిన నిర్ణయం తీసుకుంటానని బాబు చెప్పారని వివరించారు. పీసీసీ అధ్యక్షుడు బొత్స సత్యనారాయణ కూడా ఇదే తీరు గా స్పందించారని చెప్పారు. అన్ని పార్టీల నాయకులను కలుస్తామని, విభజనను ఆపడానికి ఆఖరు వరకు తమ శక్తి మేరకు ప్రయత్నిస్తామన్నారు. ‘సమైక్యానికి కలిసొచ్చే పార్టీలతో నడుస్తాం. అన్ని రాజకీయ పార్టీలు కలిసిరాకపోతే.. ఏ పార్టీతో కలిసి వెళ్లాలనే విషయంలో మేం కూడా రాజకీయ నిర్ణయం తీసుకుంటాం. సీమాంధ్ర ఎమ్మెల్యేలంతా రాజీనామాలు చేసి రాజకీయ శూన్యత సృష్టిస్తే సమస్యకు పరిష్కారం లభిస్తుంది’ అని విశ్వాసం వ్యక్తం చేశారు. సమైక్య ఉద్యమం వల్ల ప్రజలు, ఉద్యోగులకు కష్టాలు, నష్టాలు ఉంటాయని, విభజన వల్ల జరిగే నష్టం కంటే అవేమీ ఎక్కువ కాదన్నారు. 12న అర్ధరాత్రి నుంచి సమ్మె ఉంటుందన్నారు. అనంతరం ఢిల్లీ వెళ్లి వివిధ పార్టీల నాయకులు, ప్రభుత్వ పెద్దలను కలుస్తామన్నారు.
  
  ఇరు ప్రాంతాల్లో పార్టీని కాపాడుకోవాలి..
  ఇరు ప్రాంతాల్లో పార్టీ ఇబ్బందులను దృష్టిలో పెట్టుకొని నిర్ణయం తీసుకోవాల్సి ఉంటుందని, సమైక్యవాదానికి అనుకూలంగా ప్రస్తుతం నిర్ణయం తీసుకొనే పరిస్థితుల్లో లేనని చంద్రబాబు ఉద్యోగ సంఘాల నేతలతో అన్నారు. విశ్వసనీయ సమాచారం మేరకు విభజన బాధ కలిగించిందంటూనే.. ఇరు ప్రాంతా ల్లో పార్టీని బతికించుకోవాల్సిన బాధ్యతను మర్చిపోకూడదని, తెలంగాణకు అనుకూలంగా తీసుకున్న నిర్ణయాన్ని వెనక్కి తీసుకోలేనని పేర్కొన్నారు.
  
  యూటీఎఫ్ ఆందోళనలు వాయిదా
  సాక్షి, హైదరాబాద్: ఉపాధ్యాయుల సమస్యలను పరిష్కరించాలని డిమాండ్ చేస్తూ ఈ నెల 6న నిర్వహించ తలపెట్టిన ఆందోళనలను వాయిదా వేసినట్లు యూటీఎఫ్ సోమవారం ఒక ప్రకటనలో తెలిపింది. రాష్ట్రంలో నెలకొన్న పరిస్థితుల నేపథ్యంలో జిల్లా కలెక్టరేట్ల ముందు నిర్వహించాల్సిన ర్యాలీలు, ధర్నాలను వాయిదా వేసినట్లు పేర్కొంది. కాగా, రాష్ట్ర విభజన అనివార్యంగా మారిన పరిస్థితుల్లో ఉద్యోగ, ఉపాధ్యాయ సమస్యలను ప్రభుత్వం వెంటనే పరిష్కరించాలని యూటీఎఫ్ రాష్ట్ర అధ్యక్షులు ఎ.నర్సిరెడ్డి, ప్రధానకార్యదర్శి ఐ.వెంకటేశ్వర్‌రావు డిమాండ్ చేశారు.  
  
  ‘సమైక్య’ సమ్మెలో ఎన్‌ఎంయూ
  సాక్షి, హైదరాబాద్: విభజనను వ్యతిరేకిస్తూ ఉద్యోగ సంఘాలు ఈనెల 12 అర్ధరాత్రి నుంచి తలపెట్టిన నిరవధిక సమ్మెలో పాల్గొనాలని ఆర్టీసీ నేషనల్ మజ్దూర్ యూనియన్(ఎన్‌ఎంయూ) నిర్ణయించింది. సీమాం ధ్రలోని 13 జిల్లాల్లోని 123 డిపోల్లో దాదాపు 75 వేల మంది కార్మికులు పనిచేస్తున్నారు. డిపోలు, రీజియన్ల వారీగా స్థానికంగా సమ్మె నోటీసు జారీ చేయాలని ఎన్‌ఎంయూ నిర్ణయించినట్లు సమాచారం. ఆందోళనల వల్ల ఇప్పటికే దాదాపు 60 డిపోల్లో బస్సులు పూర్తిగా నిలిచిపోయాయి. కార్మికులు సమ్మెకు దిగితే.. పూర్తిగా నిలిచిపోయే అవకాశం ఉంది.


  సచివాలయ సీమాంధ్ర ఉద్యోగులకు సీఎం హామీ
  సాక్షి, హైదరాబాద్: సచివాలయ సీమాంధ్ర ఉద్యోగుల ఫోరం ప్రతినిధి బృందాన్ని తన నేతృత్వంలో ఢిల్లీకి తీసుకెళ్లడానికి ముఖ్యమంత్రి కిరణ్‌కుమార్‌రెడ్డి అంగీకరించారు. ఫోరం చైర్మన్ యు.మురళీకృష్ణ నేతృత్వంలో డి.మురళీమోహన్, వెంకటసుబ్బయ్య, కృష్ణయ్య, ఏడుకొండలు, రవీందర్, బెన్సన్ తదితరులతో కూడిన ప్రతినిధి బృందం సోమవారం ముఖ్యమంత్రిని సీఎం క్యాంపు కార్యాలయంలో కలిసింది.
  
  ఉద్యోగుల అంశాన్ని కనీసం పరిగణనలోనికి కూడా తీసుకోకపోవడం వల్లే తమకు బాధ కలిగిందని ఉద్యోగులు ఆయనకు వివరించారు. తమ ప్రతినిధి బృందాన్ని ఢిల్లీకి తీసుకెళ్లాలని, తమ బాధను, సీమాంధ్రుల వాణిని ఢిల్లీ పెద్దలకు వివరిస్తామని కోరగా, ముఖ్యమంత్రి సానుకూలంగా స్పందించారు. ఢిల్లీకి వెళ్లే ప్రతినిధి బృందానికి నేతృత్వం వహించడానికీ సమ్మతించారు. త్వరలో తేదీ నిర్ణయించి తెలియజేస్తానని ముఖ్యమంత్రి హామీ ఇచ్చారు.


  ప్రభుత్వ నిర్ణయం కోరిన ఉన్నత విద్యామండలి
  సాక్షి, హైదరాబాద్: ఇంజనీరింగ్, ఫార్మసీ కోర్సుల్లో ప్రవేశానికి ఎంసెట్ వెబ్ కౌన్సెలింగ్ నిర్వహించడంపై నిర్ణయం కోసం ఉన్నత విద్యామండలి ప్రభుత్వానికి లేఖ రాసింది. కన్వీనర్ కోటా భర్తీ, యాజమాన్య కోటా భర్తీ అంశాలు రెండూ హైకోర్టు పరిధిలో ఉన్న విషయాన్ని సర్కారు దృష్టికి తీసుకెళ్లింది. యాజమాన్య కోటా భర్తీ అంశంపై హైకోర్టు తన తీర్పును రిజర్వు చేసిన వైనం కూడా తెలిపింది. కన్వీనర్ కోటా కోసం నోటిఫికేషన్ జారీచేస్తే యాజమాన్య కోటా భర్తీకి కూడా వెసులుబాటు కల్పించినట్లవుతుందని తెలియజేసింది.
 ఈ నేపథ్యంలో కన్వీనర్ కోటా భర్తీకి నోటిఫికేషన్ జారీచేసి.. యాజమాన్య కోటా భర్తీని మాత్రం హైకోర్టు తీర్పునకు లోబడి చేయాలనే ఆదేశాలను ఆ నోటిఫికేషన్‌లో పొందుపరచడానికి గల సాధ్యాసాధ్యాలను న్యాయశాఖ పరిశీలి స్తోంది. మరోవైపు డిప్యూటీ సీఎం, ఉన్నత, సాంకేతిక విద్యాశాఖ మంత్రి దామోదర రాజనర్సింహ తక్షణం నోటిఫికేషన్ విడుదల చేసేందుకు గల అన్ని అంశాలను పరిశీలించాలని సూచించారు.


 సాక్షి నెట్‌వర్క్: రాష్ట్రాన్ని ఎట్టిపరిస్థితుల్లోనూ విడిపోనివ్వమంటూ సీమాంధ్రలో రగిలిన ఆందోళనలు ఉద్ధృతంగా సాగుతున్నాయి. వరుసగా ఆరో రోజు సోమవారం కూడా కోస్తా, రాయలసీమ జిల్లాల్లో బంద్ సంపూర్ణంగా సాగింది.  ప్రభుత్వ, ప్రైవేటు కార్యాలయాలు, విద్యా సంస్థలు, బ్యాంకులు మూతపడ్డాయి. ఆర్టీసీ బస్సులు ఎక్కడికక్కడ నిలిచిపోయాయి. వేర్పాటు నిర్ణయాన్ని నిరసిస్తూ సమైక్యవాదులు, రాజకీయపార్టీల నేతలు, మేధావులు, వివిధవర్గాల ప్రజలే కాదు.. సామాన్యజనం కూడా రోడ్లపైకి వస్తున్నారు. పిల్లా, పెద్దా, ముసలి, ముతక బేధం లేకుండా వ్యక్తిగతంగా కుటుంబాలు సైతం నిరసనదీక్షలకు దిగుతున్నాయి. రాష్ట్రం సమైక్యంగా లేకుంటే తమకు భవితవ్యమే లేదనే ఆందోళనతో అన్ని కులాలు, వృత్తుల వారు స్వచ్ఛందంగా ఆందోళనలు చేపడుతున్నారు.
  
  నగరాలు, పట్టణాలు, మండలాలు, గ్రామీణప్రాంతాల నుంచి ఉద్యమం ఇప్పుడు మూరుమూల పల్లెలకు సైతం విస్తరించింది. ఆంధ్రప్రదేశ్‌ను ముక్కలు చేయాలని కాంగ్రెస్ అధిష్టానం తీసుకున్న నిర్ణయాన్ని వ్యతిరేకించని ఆ పార్టీ నేతల మెడకు ఉచ్చు బిగుసుకుంటోంది. కాంగ్రెస్ పార్టీ ప్రజాప్రతినిధులు, మంత్రులతీరుపై సమైక్యవాదులు, సామాన్యప్రజానీకమే కాదు స్వయంగా ఆ పార్టీ కార్యకర్తలే నిప్పులు చెరుగుతున్నారు. వైఎస్సార్ జిల్లా కడప కలెక్టరేట్ వద్ద సమైక్యవాదులు చేపట్టిన రిలే దీక్షల శిబిరాన్ని సందర్శించేందుకు వచ్చిన మంత్రి అహ్మదుల్లాకు చేదు అనుభవం ఎదురైంది.
  
  దీక్షా శిబిరం వద్దకు రావద్దని చెప్పడంతో మంత్రి, సమైక్యవాదుల మధ్య తోపులాట జరిగి ఘర్షణ వాతావరణం నెలకొంది. ఓ దశలో సమైక్యవాదులు మంత్రిపై దాడికి యత్నించడంతోపాటు చెప్పులు విసిరారు. దీంతో ఆయన అతికష్టంపై పోలీసు రక్షణలో దీక్షా శిబిరం వద్దకు రాకుండానే వెనుదిరగాల్సి వచ్చింది. చిరంజీవి, కావూరి, బొత్స డబ్బుకు అమ్ముడుపోయి మాకంటే హీనంగా మారారని ఏలూరు ఫైర్‌స్టేషన్ సెంటర్‌లో హిజ్రాలు దుమ్మెత్తిపోశారు. మంత్రి పదవి కోసం కావూరి కక్కుర్తి పడి రాష్ట్రం ముక్కలవుతున్నా చేతకానివాడిలా ఉండిపోయారని ఆయన ఇంటిని ముట్టడించిన మహిళలు ఆగ్రహం వ్యక్తం చేశారు. విశాఖ జిల్లా పెదబొడ్డేపల్లిలో సోమవారం ఉదయం మంత్రి బాలరాజు కాన్వాయ్‌ను ఉపాధ్యాయులు అడ్డగించి మంత్రి రాజీనామా చేయాలంటూ డిమాండ్ చేశారు. కోపోద్రిక్తుడైన మంత్రి  వారిపై చెయ్యెత్తి దాడి చేసేంత పని చేశారు. పరిస్థితి వేడెక్కడంతో పోలీసులు ఆయనను బతిమాలి అక్కడ నుంచి పంపించేశారు.
  
  విశాఖలో తన వాహనాన్ని అడ్డగించిన నిరసనకారులపై గాజువాక ఎమ్మెల్యే చింతలపూడి వెంకట్రామయ్య ఆగ్రహం వ్యక్తం చేస్తూ.. పక్కనే ఉన్న సీఐ సత్యనారాయణతో ‘నీ గన్ ఇవ్వు..ఒక్కొక్కరినీ కాల్చేస్తా’నంటూ ఆవేశంతో ఊగిపోయూరు. తూర్పుగోదావరి జిల్లా జగ్గంపేటలో రిలే నిరాహార దీక్షల శిబిరాన్ని సందర్శించిన మంత్రి తోట నరసింహం సరైన సమయంలో తాను రాజీనామా చేస్తానన్నారు. టీడీపీ ద్వంద్వ వైఖరిని నిరసిస్తూ అనంతపురం నగరంలోని కోర్టు రోడ్డులో ఆ పార్టీ ఎమ్మెల్యే బీకే పార్థసారథిని న్యాయవాదులు అడ్డుకున్నారు. విజయనగరం పట్టణంలో చంద్రబాబు దిష్టిబొమ్మను చెప్పులతో కొట్టి దహనం చేశారు.
  
  అన్నిచోట్లా మున్సిపల్ ఉద్యోగుల సమ్మె
  సమైక్యాంధ్ర రాజకీయ జేఏసీ పిలుపుమేరకు కోస్తా, రాయలసీమ జిల్లాల్లోని అన్ని కార్పొరేషన్లు, మున్సిపాలిటీల్లోనూ అధికారులు, సిబ్బంది 72గంటల సమ్మెలో భాగంగా సోమవారం విధులను బహిష్కరించారు. తూర్పుగోదావరి జిల్లా కాకినాడ, రాజమండ్రిలలో  ప్రైవేట్ ఆస్పత్రుల్లో ఓపీలో వైద్యసేవలను నిలుపుచేసి డాక్టర్లు సమ్మెలో పాల్గొన్నారు. క్వారీ ఏరియాలో గుడాల ప్రసాద్ అనే  యువకుడు భార్య, ఇద్దరు పిల్లలతో పాటు 24 గంటల దీక్ష ప్రారంభించారు.
  
  ఉద్యోగ సంఘాల జేఏసీ ఆధ్వర్యంలో కాకినాడలో జరిగిన భారీ బహిరంగసభకు వైఎస్సార్ కాంగ్రెస్ పార్టీ ఎమ్మెల్సీ బొడ్డు భాస్కర రామారావు, సీజీసీ సభ్యులు పిల్లి సుభాష్ చంద్రబోస్, జ్యోతుల నెహ్రూ, తాజా మాజీ ఎమ్మెల్యే ద్వారంపూడి చంద్రశేఖరరెడ్డి హాజరై ఉద్యమానికి ఊతమిచ్చారు.  పశ్చిమగోదావరి జిల్లా అత్తిలిలో రైల్ రోకో నిర్వహించారు. ప్రకాశం  జిల్లా కనిగిరిలో వైఎస్సార్ కాంగ్రెస్ పార్టీ నేతలు తెలంగాణ ప్రాంతానికి చెందిన ఆర్ ఆండ్ బీ ఈఈ లక్ష్మీనారాయణరెడ్డికి సన్మానం చేశారు. ప్రజాసంఘాల జేఏసీ ఆధ్వర్యంలో గుంటూరు శంకర్‌విలాస్ సెంటర్‌లో యాచకులు నిరసన ప్రదర్శన, మానవహారం చేపట్టారు. వైఎస్‌ఆర్ కాంగ్రెస్ గుంటూరు నగర పార్టీ కన్వీనర్ లేళ్ల అప్పిరెడ్డి ఆధ్వర్యంలో కేంద్ర ప్రభుత్వ కార్యాలయాల్ని మూయించారు.
  
  విజయవాడ సబ్‌కలెక్టర్ కార్యాలయం వద్ద వైఎస్సార్ సీపీ నేతృత్వంలో జరిగిన  ధర్నాలో  పార్టీ  జిల్లా కన్వీనర్ సామినేని ఉదయభాను, సెంట్రల్ కన్వీనర్ పి. గౌతంరెడ్డి పాల్గొన్నారు. రాష్ట్రాన్ని సమైక్యంగా ఉంచడం కోసం సీమాంధ్రకు చెందిన కేంద్ర, రాష్ట్ర మంత్రులతోపాటు ఎంపీలు, ఎమ్మెల్యేలు రాజీనామా చేయాల్సిందేనని పొలిటికల్ జేఏసీ తరపున మాజీ మంత్రులు మండలి బుద్ద ప్రసాద్, దేవినేని నెహ్రూ డిమాండ్ చేశారు. విజయనగరం శివారు ప్రాంతంలో మజ్జిపేట కాలనీ వద్ద విజయనగరం నుంచి విశాఖ వెళ్తున్న దుర్గ్ పాసింజర్ రైలును ఆందోళనకారులు అరగంటపాటు అడ్డుకున్నారు. బొబ్బిలిలో  రైల్‌రోకో నిర్వహించారు.
  
   హిందూపురం మెప్మా పీఓ విజయభాస్కర్ రాజీనామా
  అనంతపురం జిల్లా హిందూపురం మునిసిపాలిటీలో మెప్మా ప్రాజెక్టు ఆఫీసర్‌గా పనిచేస్తున్న విజయభాస్కర్ సమైక్యాంధ్రకు మద్దతుగా ఉద్యోగానికి రాజీనామా చేశారు. రాష్ట్ర విభజనకు వ్యతిరేకంగా కలెక్టరేట్ ఉద్యోగులు చేస్తున్న ఆందోళనకు అనంతపురం జిల్లా అదనపు జాయింట్ కలెక్టర్ చెన్నకేశవరావు, డీఆర్వో హేమసాగర్ మద్దతు తెలిపారు.  కర్నూలు జిల్లా ఆళ్లగడ్డలో గుండా రవికుమార్ అనే వికలాంగుడు ఆత్మహత్యకు విఫలయత్నం చేశాడు.
  
  తెలంగాణ ఉద్యోగుల ‘సమైక్యాంధ్ర’ నినాదాలు
  చిత్తూరు జిల్లా పీలేరులో తెలంగాణ ప్రాంత అధికారులు ‘జై సమైక్యాంధ్ర’ అంటూ నినాదాలు చేయడంతో వారికి స్థానిక ఉద్యోగులు సన్మానం చేశారు. ఐదురోజులుగా నిరాహారదీక్ష చేస్తున్న చిత్తూరు ఎమ్మెల్యే సీకేబాబు సోమవారం నుంచి ఆమరణ నిరాహార దీక్షకు దిగుతున్నట్టు ఆయన సతీమణి లావణ్య ప్రకటించారు. చిత్తూరులోని మత్య్సశాఖ కార్యాలయంలో రెండు ప్రభుత్వ వాహనాలకు ఆందోళనకారులు నిప్పుపెట్టారు.
  
  శ్రీకాకుళం జిల్లా ఎచ్చెర్లలో డాక్టర్ బీఆర్ అంబేద్కర్ యూనివర్సిటీ జేఏసీ ఆధ్వర్యంలో రెండున్నర గంటలు జాతీయ రహదారిని దిగ్బంధించారు. విశాఖ జిల్లా ఏజెన్సీలో వైఎస్సార్ సీపీ సహా వర్తక, వాణిజ్య సంఘాల ఆధ్వర్యంలో దుకాణాలు మూయించారు. మన్యంలోని టూరిస్టు ప్రదేశాల్లో బంద్ సంపూర్ణంగా జరిగింది. మ్యూజియం, పద్మావతి గార్డెన్, బొర్రా గుహలు మూతపడ్డాయి. నెల్లూరు జిల్లా గూడూరులో వైఎస్సార్‌సీపీ ఆధ్వర్యంలో రైల్‌రోకో చేశారు. కావలి ఎమ్మెల్యే బీద మస్తాన్‌రావు పాల్గొన్న నిరసన కార్యక్రమంలో గోపి అనే యువకుడు కిరోసిన్ పోసుకుని ఆత్మహత్యాయత్నం చేశాడు.
  
  విభజన వార్తలతో కలత
  ఒకరి ఆత్మహత్య, నలుగురు గుండెపోటుతో మృతి
  సాక్షి నెట్‌వర్క్: రాష్ట్ర విభజన వార్తలను తట్టుకోలేక సోమవారం వేర్వేరు ప్రాంతాలలో ఐదుగురు వ్యక్తులు మృతి చెందారు. వీరిలో ముగ్గురు గుండెపోటుతో మరణించగా, ఒకరు ఆత్మహత్యకు పాల్పడ్డారు. పశ్చిమగోదావరి జిల్లా చింతలపూడికి చెందిన కొవ్వూరి రాంబాబు (50), కామవరపుకోట మండలం వీరంపాలెంకు చెందిన బొమ్మగంటి సత్యనారాయణ (63) విభజన వార్తలపై తీవ్ర కలత చెందారు. దీంతో వారు నిద్రలోనే గుండెపోటుతో మరణించారు. శ్రీకాకుళం జిల్లా లావేరు మండలం గుమడాం గ్రామానికి చెందిన పొడమచ్చిలి బంగారి(51) టీవీలో విభజన వార్తలు చూస్తుండగా ఉద్వేగానికి గురై గుండెనొప్పితో ఒక్కసారిగా కుప్పకూలిపోయాడు. వెంటనే అతన్ని శ్రీకాకుళం రిమ్స్‌కు తరలించగా.. కొద్దిసేపటికే మృతి చెందారు. రాష్ట్ర విభజనను తట్టుకోలేక అనంతపురం జిల్లా గుమ్మఘట్ట మండలం గోనబావికి చెందిన వడ్డే కొల్లప్ప (60), అనంతపురం నగరానికి చెందిన శివశంకరరావు(42) గుండెపోటుతో మృతి చెందారు. కాగా, నిడదవోలు మండలం ఉనకరమిల్లిలో రవికుమార్ (35) మూడు రోజులుగా సమైక్య ఉద్యమంలో పాల్గొంటున్నాడు. రాష్ట్ర విభజన ఖాయమనే వార్తల నేపథ్యంలో పురుగుమందు తాగి ఆత్మహత్య చేసుకున్నాడు.
  
   ఆంజనేయులు కుటుంబానికి చెవిరెడ్డి సాయం
  సమైక్యాంధ్ర కోసం ఆత్మాహుతి చేసుకున్న చిత్తూరు జిల్లా పాకాల మండలం కూనపల్లెకు చెందిన ఆంజనేయులు(48) కుటుంబానికి వైఎస్సార్ కాంగ్రెస్ పార్టీ చంద్రగిరి నియోజకవర్గ ఇన్‌చార్జి చెవిరెడ్డి భాస్కర్‌రెడ్డి సోమవారం ఆర్థిక సాయం అందజేశారు. మృతుడి కుటుంబాన్ని పరామర్శించి ఓదార్చిన ఆయన రూ.50 వేలు ఆర్థిక సహాయాన్ని అందజేశారు. ఈ సందర్భంగా చెవిరెడ్డి మాట్లాడుతూ ఎవరూ బలిదానాలకు పాల్పడవద్దని కోరారు.


 సాక్షి, తిరుపతి: రాష్ట్రం ముక్కలు కావడానికి టీడీపీ అధ్యక్షుడు చంద్రబాబు శల్య సారధ్యం వహించారని తిరుపతి ఎమ్మెల్యే భూమన కరుణాకర రెడ్డి అన్నారు. విభజనకు ప్రధాన పాత్రను పోషించిన కపట నాటక సూత్రధారి బాబేనని ఆరోపించారు. సోమవారం తిరుపతిలో ఆయన మాట్లాడారు. సీమాంధ్ర ప్రజల ఆగ్రహావేశాలను చూసిన టీడీపీ, కాంగ్రెస్ నేతలు రాజీనామా నాటకాలు ఆడుతున్నారని దుయ్యబట్టారు. రెండు ప్రాంతాలవారికి సమాన న్యాయం చేయాలని వైఎస్‌ఆర్ కాంగ్రెస్ పార్టీ ఇచ్చిన సూచనను సోనియా తుంగలోతొక్కారన్నారు. రాష్ట్రాన్ని చీల్చడం వల్ల జగన్‌మోహన్ రెడ్డి ప్రాబల్యం తగ్గించాలని తాపత్రయ పడుతున్నారని అయితే ఈ విషయాన్ని ప్రజలు సహించరని పేర్కొన్నారు.


 సాక్షి, హైదరాబాద్: మూలిగే నక్కపై తాటిపండు పడినట్లు...అసలే నష్టాలతో అల్లాడుతున్న ఆర్టీసీపై సమైక్య ఉద్యమ దెబ్బ పడింది. గత 31 నుంచి సోమవారం వరకు ..ఆర్టీసీ రోజుకు దాదాపు రూ. 9కోట్ల రాబడి కోల్పోయింది. ఆర్టీసీకి రోజుకు దాదాపు రూ. 20 కోట్ల రాబడి వస్తుంది. సమైక్య ఉద్యమం ప్రారంభమైనప్పటినుంచి రోజూ రాబడి రూ. 11 కోట్లు దాటట్లేదని ఆర్టీసీ అధికారవర్గాలు తెలిపాయి. సీమాంధ్ర ప్రాంతంలో దాదాపు 12 వేల బస్సులను ఆర్టీసీ నడుపుతోంది. అందులో సోమవారం 7,000 బస్సులను ఆర్టీసీ తిప్ప గలిగింది.
  
  మిగతా 5వేల బస్సులు డిపోలకే పరిమితయమ్యాయి. సాధారణంగా ఆక్యుపెన్సీ రేషియో (ఓఆర్) దాదాపు 70 శాతం వరకు ఉంటుంది. ఆందోళనల ఫలితంగా ఓఆర్ 30 శాతానికి దాటడం లేదు. 5-10 శాతం ఓఆర్‌తో పలు బస్సులు తిరిగాయని అధికార వర్గాలు చెప్పాయి. కడప, అనంతపురం జిల్లాల్లో ఒక్క బస్సు కూడా సోమవారం తిరగలేదు. మిగతా జిల్లాల్లోనూ బస్సులు బయటకే రాని డిపోలు ఉన్నాయి. సీమాంధ్రలో దాదాపు 60 డిపోల నుంచి ఒక్కబస్సూ గడప దాటడం లేదు. రాబడి కోల్పోవడం ఒక ఎత్తయితే.. ఓఆర్ కనిష్ట స్థాయికి పడిపోవడం వల్ల నిర్వహణ వ్యయం పెరుగుతుందని, ఫలితంగా నష్టాలు అధికమవుతాయని ఆర్టీసీ అధికారులు ఆందోళన వ్యక్తం చేస్తున్నారు.


 హైదరాబాద్, న్యూస్‌లైన్: హైదరాబాద్ నుంచి సీమాంధ్రులను వెళ్లగొడతారని దుష్ర్పచారం జరుగుతోందని, అది నిజం కాదని, ఈ ప్రాంతంలో వారు స్వేచ్ఛగా జీవించవచ్చునని జేఏసీ చైర్మన్ ప్రొఫెసర్ కోదండరాం అన్నారు. సోమవారం ఖైరతాబాద్ విద్యుత్ ప్రధాన కార్యాలయం విద్యుత్‌సౌధలో తెలంగాణ విద్యుత్ ఇంజనీర్ల జేఏసీ ఆధ్వర్యంలో భోజన విరామ సమయంలో రాష్ట్ర ఏర్పాటును అడ్డుకునేందుకు సీమాంధ్రులు కుట్రలు చేస్తున్నారంటూ నిరసన తెలిపారు. ఈ కార్యక్రమానికి సంఘీభావం తెలిపేందుకు కోదండరాంతో పాటు ఎమ్మెల్యేలు నాగం జనార్దన్‌రెడ్డి, హరీష్‌రావు, ఉద్యోగ సంఘం నాయకులు దేవీప్రసాద్, శ్రీనివాస్‌గౌడ్, విఠల్ హాజరయ్యారు. ఈ  సందర్భంగా వారు మాట్లాడుతూ...ఆరు దశాబ్దాల పోరాటం అనంతరం తెలంగాణ రాష్ట్రం ఏర్పడబోతోందని, ఈ సమయంలో హైదరాబాద్‌లో సీమాంధ్రుల భద్రత పేరుతో వచ్చిన రాష్ట్రాన్ని అడ్డుకోవద్దని కోరారు.
  
  విభజన కోసం ఓ ప్రత్యేక కమిటీ వేస్తారని, అందులోనే ఉద్యోగాల పంపిణీ, నీటి కేటాయింపులు రాజ్యాంగబద్ధంగా జరుగుతాయని వారు తెలిపారు. తెలంగాణ ఉద్యమం ఎంతో ఉధృతంగా సాగిన సమయంలో కూడా హైదరాబాద్‌లో సీమాంధ్రులపై దాడులు జర గలేదనే విషయాన్ని గుర్తుంచుకోవాలని  హితవు పలికారు. తమ ఉద్యమం ఎవరికీ వ్యతిరేకం కాదని, హక్కుల రక్షణ కోసం మాత్రమేనని వారు తెలిపారు. కేవలం కొన్ని రాజకీయ పార్టీలు తమ ఉనికిని కాపాడుకునేందుకే సమైక్యవాదమంటూ అక్కడి ప్రజలను రెచ్చగొడుతున్నారని తెలిపారు. కలిసి ఉంటామని చెప్పడం ఒక భావన అని, అందుకు అవతలి వారు అంగీకరించనప్పుడు కూడా బలవంతంగా కలిసే ఉంటామనడం అనైతిక చర్య అవుతుందని కోదండరాం అన్నారు. తెలంగాణకు అనుకూలమని లేఖ ఇచ్చిన తెలుగుదేశం పార్టీ నేడు పార్లమెంట్‌లో సమైక్యాంధ్ర అంటూ ప్లకార్డులు పట్టుకోవడం హేయమని వారు తెలిపారు. ఈ కార్యక్రమంలో జేఏసీ నాయకులు అద్దంకి దయాకర్, రఘు, నాగరాజు తదితరులు పాల్గొన్నారు.


 సాక్షి, విశాఖపట్నం : పశ్చిమ మధ్య బంగాళాఖాతం, దానిని ఆనుకుని వాయవ్య ఉత్తర కోస్తా, దక్షిణ ఒడిశా తీరాల్లో సోమవారం ఉదయం అల్పపీడనం ఏర్పడింది. ఇది మరింత బలపడే అవకాశముందని విశాఖ తుపాను హెచ్చరికల కేంద్రం తెలిపింది. తాజాగా ఏర్పడిన అల్పపీడనం మధ్య బంగాళాఖాతంలో కేంద్రీకృతం కావడంవల్ల కోస్తాంధ్రపై ప్రభావం ఉంటుందని అధికారులు అంచనా వేస్తున్నారు. అదే సమయంలో ఒడిశా నుంచి దక్షిణ తమిళనాడు వరకు కోస్తాంధ్ర మీదుగా అల్పపీడన ద్రోణి కొనసాగుతోందని, దీని ప్రభావం కారణంగా రానున్న 24గంటల్లో ప్రధానంగా కోస్తాంధ్రలో ఉత్తర దిశగా విస్తారంగా వర్షాలు పడే అవకాశాలున్నాయని అధికారులు తెలిపారు. అదే సమయంలో కోస్తాలో దక్షిణ దిశగా, కొన్నిచోట్ల వాయవ్య దిశగా గంటకు 45నుంచి 50కి.మీ వేగంతో ఈదురు గాలులు వీచే ప్రమాదం ఉందని, వేటకు వెళ్లే మత్స్యకారులు అప్రమత్తం కావాలని హెచ్చరించారు.


 సాక్షి, హైదరాబాద్: గుండెపోటుతో హఠాన్మరణం చెందిన హైకోర్టు సీనియర్ న్యాయవాది సి.పద్మనాభరెడ్డి అంత్యక్రియలు సోమవారం ఈఎస్‌ఐ శ్మశానవాటికలో నిర్వహించారు. పద్మనాభరెడ్డి చితికి ఆయన కుమారుడు, హైకోర్టు న్యాయమూర్తి జస్టిస్ సి.ప్రవీణ్‌కుమార్ నిప్పంటించారు. అంతకుముందు పద్మనాభరెడ్డి పార్థివదేహాన్ని టీడీపీ అధినేత చంద్రబాబు, మాజీ మంత్రి వైఎస్.వివేకానందరెడ్డి, ఎమ్మెల్యే పయ్యావుల కేశవ్, డీజీపీ దినేష్‌రెడ్డితో పాటు పలువురు న్యాయమూర్తులు, రాజకీయ నాయకులు, న్యాయవాదులు సందర్శించి నివాళులు అర్పించారు. అనంతరం జూబ్లీహిల్స్‌లోని జస్టిస్ ప్రవీణ్‌కుమార్ ఇంటి నుంచి ప్రారంభమైన పద్మనాభరెడ్డి అంతిమయాత్ర మధ్యాహ్నం ఈఎస్‌ఐ శ్మశానవాటికకు చేరుకుంది. అక్కడ ప్రజాగాయకుడు గద్దర్, వామపక్ష నాయకులు నివాళులర్పించారు. న్యాయవాదిగా పద్మనాభరెడ్డి ప్రజలకు అందించిన సేవలపై కరపత్రాలను ఓపీడీఆర్ కమిటీ సభ్యులు పంచారు.
  
  ఆయన సేవలు అజరామరం: ఐఏఎల్
  న్యాయవాద వృత్తిలో పద్మనాభరెడ్డి సేవలు అజరామరమని ఇండియన్ అసోిసియేషన్ ఆఫ్ లాయర్స్(ఐఏఎల్) కార్యనిర్వాహక అధ్యక్షుడు చలసాని అజయ్‌కుమార్, ప్రధాన కార్యదర్శి బి.ప్రభాకర్ పేర్కొన్నారు. హైకోర్టు సీనియర్ న్యాయవాది పద్మనాభరెడ్డి సంతాపసభ సోమవారం బషీర్‌బాగ్ ప్రెస్‌క్లబ్‌లో ఐఏఎల్ ఆధ్వర్యంలో జరిగింది. న్యాయవాదిగా పద్మనాభరెడ్డి సేవలను అజయ్‌కుమార్ కొనియాడారు. న్యాయవాదుల హక్కుల కోసం కృషి చేశారని చెప్పారు. డబ్బు గురించి పద్మనాభరెడ్డి ఎప్పుడూ ఆలోచించలేదని, న్యాయం పక్షానే నిలిచారని వివరించారు. న్యాయవాదులు ఆయననొక మార్గదర్శిగా తీసుకొని, ఆయన ఆదర్శాలను ముందుకు తీసుకెళ్లాలని సూచించారు. ఈ కార్యక్రమంలో హైకోర్టు బార్ అసోసియేషన్ మాజీ అధ్యక్షులు ఎస్.సత్యంరెడ్డి, విద్యాసాగర్‌రావు, మాజీ ప్రధాన కార్యదర్శి బ్రహ్మారెడ్డిలతో పాటు ఒ.అబ్బాయిరెడి ్డ, చల్లా శ్రీనివాస్‌రెడ్డి తదితర న్యాయవాదులు పాల్గొన్నారు.


 సాక్షి, హైదరాబాద్: రాష్ట్ర విభజనకు వ్యతిరేకంగా రాయలసీమ, ఆంధ్రా ప్రాంతాల్లో వారం రోజులుగా కొనసాగుతున్న ఆందోళనలపై కేంద్ర నిఘా వర్గాలు ఆరా తీస్తున్నాయి. సీమాంధ్ర ప్రాంతంలో ఆందోళనలు ఉధృతమవుతున్న నేపథ్యంలో కేంద్ర నిఘావర్గాలు నేరుగా రంగంలోకి దిగాయి. సమైక్యాంధ్ర కోరుతూ జరుగుతున్న ఆందోళనలు రాజకీయ ప్రమేయంతో జరుగుతున్నాయా, స్వచ్ఛందంగా ప్రజలే పాల్గొంటున్నారా, ఆందోళనలను ప్రేరేపించేలా తెర వెనక ఏమైనా ప్రయత్నాలు జరుగుతున్నాయా అనే కోణంలో ఆరా తీస్తున్నాయి. విద్యార్థులు, యువతతో పాటు ఉద్యోగులు ఎక్కువ సంఖ్యలో ఆందోళనల్లో భాగస్వాములవుతున్నట్టు నిఘా పరిశీలనలో స్పష్టమైంది. ప్రధానంగా రాయలసీమలోని అనంతపురం, కర్నూలు జిల్లాల్లో ఆందోళనలు మరింత ఉధృత రూపు దాల్చుతున్నాయని, అక్కడ పరిస్థితి చేయి దాటేలా కన్పిస్తోందని నిఘా అధికారులు ప్రాథమిక ంగా అంచనా వేశారు. కడప, చిత్తూరుతో పాటు విశాఖపట్నం, శ్రీకాకుళం జిల్లాల్లో కూడా ఆందోళనలు పెరుగుతున్నట్టు గుర్తించారు. ఈ మేరకు కేంద్ర హోం శాఖకు వారు ప్రాథమిక నివేదిక సమర్పించారు. ఆందోళనలు పెరుగుతున్నా శాంతిభద్రతలు మాత్రం ప్రస్తుతం అదుపులోనే ఉన్నాయని పేర్కొన్నట్టు సమాచారం.
  
  తెలంగాణ రాష్ర్ట ఏర్పాటు ప్రకటన తర్వాత సీమాంధ్రలో తొలి మూడు రోజుల ఆందోళనపై రాష్ర్ట నిఘా వర్గాలు తొలుత కేంద్ర హోం శాఖకు ప్రాథమిక నివేదిక అందించాయి. ఆందోళనలు కొనసాగుతున్నా పరిస్థితి పూర్తిగా అదుపులో ఉందని, అనంతపురంలో మాత్రం కొన్ని హింసాత్మక ఘటనలు జరిగాయని పేర్కొన్నారు. పరిస్థితి వారంలోపే కుదుట పడవచ్చని పేర్కొన్నాయి.అయితే రోజురోజుకూ సీమాంధ్రలో ఆందోళనలు తీవ్ర రూపం దాల్చడం, నిరసనలు జిల్లా కేంద్రాల నుంచి మండల కేంద్రాల వరకూ విస్తరించడంతో కేంద్ర నిఘా అధికారులు నేరుగా రంగంలోకి దిగారు. అత్యధిక ప్రాంతాల్లో ఆందోళనలు పార్టీలు, నేతల ప్రమేయం లేకుండానే కొనసాగుతున్నాయని, రాజకీయాలకు అతీతంగా అన్ని వర్గాల ప్రజలూ రోడ్లపైకి వస్తున్నారని వారి అధ్యయనంలో తేలింది. గ్రామ స్థాయిల్లో కూడా నిరసన ర్యాలీలు కొనసాగడం మరింత ఆందోళనకరమై అంశమని భావిస్తున్నారు. ఆందోళనలు ఎన్ని రోజుల పాటు కొనసాగవచ్చేనే అంశాలపై వివిధ వర్గాల ప్రతినిధుల ద్వారా నిఘా అధికారులు సమాచారం సేకరిస్తున్నారు.
  
  రాజధానిలో పరిస్థితులపై అధ్యయనం
  హైదరాబాద్‌లో తాజాగా నెలకొన్న పరిస్థితుల నేపథ్యంలో నిఘా అధికారులు ప్రత్యేక పరిశీలనకు దిగాయి. సీమాంధ్రకు చెందిన ప్రభుత్వ, ప్రైవేటు రంగ ఉద్యోగులు, వ్యాపారులు, సంఘటిత, అసంఘటిత రంగ కార్మికుల భయాందోళనలపై కూడా పూర్తిస్థాయిలో ఆరా తీస్తున్నారు. తెలంగాణ ప్రకటన వెలువడిన మర్నాటి నుంచే సచివాలయంలో పనిచేసే సీమాంధ్ర ఉద్యోగులు భయాందోళనలు వ్యక్తం చేస్తుండటం, టీఆర్‌ఎస్ అధినేత కేసీఆర్ ప్రకటన వారిలో మరింత అలజడి రేపడం తెలిసిందే.
  
  ఉద్యోగుల నిరవధిక సమ్మె మొదలైతే
  విభజనకు వ్యతిరేకంగా ఆగస్టు 13 నుంచి నిరవధిక సమ్మెకు దిగుతామని ఏపీ ఎన్జీవో నేతలు ప్రకటించడం ఎలాంటి పరిణామాలకు దారి తీయవచ్చనే అంశంపై కూడా నిఘా వర్గాలు ఆరా తీస్తున్నాయి. ఉద్యోగుల సమ్మె వల్ల శాంతిభద్రతల పరంగా ఇబ్బందేమీ ఉండకపోవచ్చు గానీ సీమాంధ్రలో ఆందోళనలు మరింత ఉధృతమవుతాయని భావిస్తున్నాయి. ‘‘ఉద్యోగులు సచివాలయంతో పాటు ఆయా కార్యాలయాల్లోనూ నిరసనలు, ఆందోళనలకు దిగవచ్చు. దాంతో హైదరాబాద్‌లో ఆయా ప్రభుత్వ కార్యాలయాల్లో ఇరు ప్రాంతాల ఉద్యోగుల మధ్య ఘర్షణ వాతావరణం నెలకొనవచ్చు’’ అని అనుమానిస్తున్నాయి.
  
  శాంతిభద్రతలపై డీజీపీ సమీక్ష
  సీమాంధ్రలో ఆందోళనల నేపథ్యంలో శాంతిభద్రతల పరిస్థితిని డీజీపీ వి.దినేశ్‌రెడ్డి సమీక్షించారు. అన్ని రీజియన్ల ఐజీలు, రేంజ్ డీఐజీలతో ఫోన్‌లో మాట్లాడారు. అవాంఛనీయ ఘటనలకు తావు లేకుండా, ప్రభుత్వ, ప్రైవేటు ఆస్తులకు నష్టం కలగకుండా చూడాలని ఆదేశించారు. ఆందోళనలు కొనసాగుతున్నా పరిస్థితి పూర్తిగా అదుపులో ఉందని జిల్లా ఎస్పీల నుంచి నివేదికలందాయి.


 సాక్షి, విశాఖపట్నం : సమైక్యాంధ్ర ఉద్యమాన్ని సాధ్యమైనంత వరకు అణగదొక్కేందుకు పోలీసు యంత్రాం గం సిద్ధమైంది. పాఠశాలలు, కళాశాలల విద్యార్థులు ఉద్యమంలో పాల్గొనేందుకు వీల్లేకుండా కఠిన చర్యలు తీసుకుంటోంది. జువనైల్ జస్టిస్ యాక్ట్‌ను తెరపైకి తీసుకొచ్చింది. ఈ మేరకు ఇంటర్మీడియెట్ బోర్డు ప్రాంతీయ పర్యవేక్షణాధికారి(ఆర్‌ఐఓ), జిల్లా విద్యాశాఖాధికారి(డీఈవో) కార్యాలయాలకు ప్రత్యేక హెచ్చరికలు పంపింది. ఇన్నాళ్లూ ఉద్యమాలకు ఆతిథ్యమిచ్చిన కొన్ని ప్రాంతాలను రెడ్ జోన్లుగా ప్రకటించి తమ వైఖరి బయటపెట్టుకుంది.
  
  విద్యార్థుల్ని రోడ్డెక్కనీయొద్దు!
 
  ఏ ఉద్యమమైనా విద్యార్థుల భాగస్వామ్యం తోనే ఉధృత స్థితికి చేరుతుంద న్న విషయం అందరికీ తెలిసిందే. ప్రత్యేక తెలంగాణ ఉద్యమంలో కూడా ఈ విషయం తేటతెల్లమయింది. అదే దారిన జిల్లాలో కూడా ఉద్యమాల్లో విద్యార్థులు కీలకపాత్ర పోషిస్తున్నారు. కానీ 18 ఏళ్లలోపు వయసున్నవారు తల్లిదండ్రులు/విద్యాసంస్థల యాజమాన్యాల పర్యవేక్షణలో ఉండాలని, అలాంటి
  
  వారిని రోడ్లపైకి ఆందోళనకు పంపిస్తే ఊరుకునేది లేదని నగర పోలీసు కమిషనర్ హెచ్చరికలు జారీ చేశారు. దీనిపై విద్యార్థి జేఏసీ, రాజకీయ ప్రతినిధులు, సమైక్యాంధ్ర ఉద్యమకారులు తీవ్ర అభ్యంతరాలు వ్యక్తం చేస్తున్నారు. పోలీసు యంత్రాంగం తెలంగాణవాదులకు అనుకూలంగా వ్యవహరిస్తోందని ఆరోపిస్తున్నారు. రాష్ట్రంలో ఎక్కడా లేని నిబంధనల్ని విశాఖలోనే ప్రవేశపెట్టడం ఎంత వరకు సబబని ప్రశ్నిస్తున్నారు. నగరంలో ఉద్యమం తీవ్రరూపం దాల్చుతుండడంతో భయపడిన కొందరు తెలంగాణ సానుభూతిపరుల కుట్రపూరిత చర్యలేనని ధ్వజమెత్తుతున్నారు. విద్యార్థులు శాంతియుత ఉద్యమాలు చేస్తున్నారు తప్ప, ఎలాంటి విధ్వంసాలకు పాల్పడట్లేదని చెప్తున్నారు.
  


 మాదాపూర్, న్యూస్‌లైన్: మహిళలు పారిశ్రామిక రంగంలో రాణించాలంటే ప్రతి ఒక్కరూ నాయకత్వ లక్షణాలు కలిగి ఉండాలని కెనైటిక్ ఇంజినీరింగ్ లిమిటెడ్ వైస్ చైర్మన్ సులజ్జ చిరోబియా మోత్వానీ పేర్కొన్నారు. సోమవారం మాదాపూర్‌లోని ఓ హోటల్‌లో ఫిక్కీ మహిళా ఆర్గనైజేషన్ ఆధ్వర్యంలో ‘లీడర్‌షిప్ ఇన్ ఉమెన్’ కార్యక్రమం నిర్వహించారు.
 ముఖ్య అతిథిగా పాల్గొన్న ఆమె మాట్లాడుతూ.. మహిళా పారిశ్రామికవేత్తల సాధికారత కోసం ఏర్పాటు చేసిన సంస్థ వారికి పలు సలహాలు, సూచనలు అందిస్తుందన్నారు. ఫిక్కీ మహిళా ఆర్గనైజేషన్ చైర్మన్ జోత్స్నా అంగారా మాట్లాడుతూ మహిళలకు కావాల్సిన నాయకత్వ లక్షణాలు, పారిశ్రామిక రంగాల్లో ముందుకు దూసుకువెళ్లడానికి అవసరమైన సూచనలు అందిస్తామన్నారు.


  కుత్బుల్లాపూర్, న్యూస్‌లైన్:  చిట్టీల పేరుతో టీడీపీ నేత ఒకరు జనానికి రూ.5 కోట్లకు టోకరా వేసి పరారయ్యారు. స్థానికంగా కలకలం రేపిన ఈ ఘటన కుత్బుల్లాపూర్‌లో సోమవారం వెలుగు చూసింది. కృ ష్ణా జిల్లా ఘంటశాల మండలం తాడపల్లి గ్రా మానికి చెందిన సూరపనేని వెంకట శివాజీ  జీవనోపాధి కోసం కొనేళ్ల క్రితం నగరానికి వ చ్చి.. జీడిమెట్ల డివిజన్ ప్రసూననగర్‌లో ఉం టున్నారు. స్థానికంగా చిట్టీల వ్యాపారం నిర్వహిస్తున్నారు. రూ.2 లక్షల నుంచి రూ. 5 లక్షల చిట్టీలు నిర్వహిస్తున్నారు. అయితే, చిట్టీల కాలపరిమితి ముగిశాక ఖాతాదారులకు డబ్బు లు తిరిగి చెల్లించడంలేదు. రూ.3 చొప్పున వడ్డీ ఇస్తూ ఆ డబ్బును తన వద్దే ఉంచుకుంటున్నా రు. సానికంగా నిర్వహించే కార్యక్రమాల్లో విం దు, వినోదాల్లో హడావిడి చేసేవారు. దీంతో స్థానికులు అతని వెంట పడేవారు.
 
 ఇదే అదను గా భావించిన శివాజీ స్థానికులతో పాటు ఉ ద్యోగస్తులను సైతం నమ్మించి మోసం చేయడ మే పనిగా పెట్టుకుంటూ వచ్చారు.  అంతే కా కుండా బాలానగర్‌లోని లోకేష్ కంపెనీకి చెం దిన పలువురు ఉద్యోగులు ఇతని వలలో పడి సుమారు రూ. 2 కోట్ల చిట్టీలు వేశారు.  పది రోజులుగా శివాజీ ఆచూకీ లభించకపోవడంతో సుమారు 160 మంది వేట ప్రారంభించి అతని సొంత గ్రామానికి వెళ్లారు. అయినా ఫలితం లే కుండా పోవడంతో సోమవారం ప్రసూననగర్ కమ్యూనిటీ హాల్‌లో బాధితులంతా సమావేశమై తాము మోసపోయిన డబ్బుల వివరాలను రాసుకున్నారు.
 
 అక్కడికి హాజరైన 73 మందికి రూ.5 కోట్లకు పైగానే డబ్బులు ఇవ్వాల్సి ఉందని లెక్క తేలింది. బాధితులు ‘న్యూస్‌లైన్’ను ఆశ్రయించి తాము మోసపోయిన విధానాన్ని వివరించారు. సుధాకర్, రామచౌదరి అనే బాధితుల్లో ఒకరికి రూ.20 లక్షలకు, మరొకరికి రూ. 13 లక్షలకు శివాజీ టోకరా వేశారు. కేవలం వడ్డీ ఆశ చూపే వీరందరికీ మస్కా కొట్టడం గమనార్హం . అంతే కాదండోయ్.. ఇతగాడు జీడిమెట్ల డివిజన్ టీడీపీ కోశాధికారిగా కొనసాగుతున్నారు. అంతేగా ప్రసూన నగర్ స్థానిక సంక్షేమ సంఘం అడ్వైజర్‌గానూ  వ్యవహరిస్తున్నారు. బాధితులంతా సోమవారం రాత్రి జీడిమెట్ల పోలీసులకు ఫిర్యాదు చేశారు. పోలీసులు దర్యాప్తు చేస్తున్నారు.
  


 సాక్షి, సిటీబ్యూరో:  మెట్రోరైలు మార్గాల్లో రహదారుల అభివృద్ధి పనులకు హైదరాబాద్ మెట్రోరైలు(హెచ్‌ఎంఆర్ ) నిధులివ్వాలన్న జీహెచ్‌ఎంసీ స్టాండింగ్ కమిటీ చేసిన తీర్మానాల్ని ప్రభుత్వం తిరస్కరించింది. మెట్రోరైలుకు ప్రకటనలు, వాణిజ్య కార్యకలాపాల ద్వారా భవిష్యత్తులో వచ్చే ఆదాయంలో సగం వాటా ఇవ్వాలన్న ప్రతిపాదననూ హెచ్‌ఎంఆర్   కొట్టిపడేసింది. ఈ నేపథ్యంలో.. ఎంపికచేసిన ఏడు ప్రాంతాల్లో రహదారి అభివృద్ధి పనులను జీహెచ్‌ఎంసీ నిధులతోనే చేయాల్సిన పరిస్థితి ఏర్పడింది.
 
  మెట్రో రైలు పనులు జరుగుతున్న ఏడు ప్రాంతాల్లో దీర్ఘకాలం మన్నికగా ఉండే సీసీ రోడ్లు వేయాలని అధికారులు భావించారు. అనుమతి కోసం సదరు ప్రతిపాదనను జీహెచ్‌ఎంసీ స్టాండింగ్ కమిటీ ముందుంచారు. మెట్రోరైలు కోసం అవసరమయ్యే రోడ్ల విస్తరణకు జీహెచ్‌ఎంసీ నిధులు వెచ్చించడమేంటంటూ 2011 నవంబర్ 24న జరిగిన సమావేశం తిరస్కరించింది. ఆ నిధుల్ని హెచ్‌ఎంఆర్ వర్గాల నుంచే ఇప్పించాలని ప్రభుత్వాన్ని కోరింది. నగరంలో రహదారుల్ని వేస్తున్నదీ, నిర్వహిస్తున్నదీ జీహెచ్‌ఎంసీయే అయినందున.. మెట్రోరైలుకు వచ్చే ప్రకటనల ఆదాయంలో సగం వాటా తమకిచ్చేలా చర్యలు తీసుకోవాలని విజ్ఞప్తి చేసింది.
 
 ఇదిలా ఉండగా, మాస్టర్‌ప్లాన్‌కు అనుగుణంగా సదరు రహదారుల విస్తరణ చేయాల్సింది స్థానిక సంస్థ(జీహెచ్‌ఎంసీ)యేనని, రహదారుల నిర్వహణ తదితర బాధ్యతలు కూడా దానివే అయినందున ఆ వ్యయం జీహెచ్‌ఎంసీయే భరించాలని హెచ్‌ఎంఆర్ వర్గాలు పేర్కొన్నాయి. పైగా ఆస్తుల సేకరణకు నష్టపరిహారం తామే చెల్లిస్తున్నందున, ఆమేరకు జీహెచ్‌ఎంసీపై భారం తగ్గిందని పేర్కొంది. ఈ నేపథ్యంలో స్టాండింగ్ కమిటీ తీర్మానాన్ని ప్రభుత్వం అంగీకరించకపోగా కమిటీకి షోకాజ్ నోటీసు జారీ చేసింది. దీనికి తలొగ్గని స్టాండింగ్ కమిటీ తన నిర్ణయాన్ని వెనక్కు తీసుకోలేదు. పాత నిర్ణయానికే కట్టుబడి ఉన్నట్లు పునరుద్ఘాటించింది. మెట్రో రైలుకు ప్రకటనల ద్వారా వచ్చే ఆదాయంలో తమ వాటా ఇస్తేనే రహదారుల అభివృద్ధికి నిధులు వెచ్చిస్తామని స్పష్టం చేసింది. ఆమేరకు, గత సెప్టెంబర్ 12న జరిగిన స్టాండింగ్ కమిటీ సమావేశంలో మరోమారు తీర్మానం చేశారు.
  
 ఆ వ్యవహారంపై తిరిగి ఇప్పటి వరకు ఎలాంటి చర్యలు తీసుకోలేదు. మెట్రోరైలు కోసం జీహెచ్‌ఎంసీ అదనంగా ఎలాంటి రోడ్డు నెట్‌వర్క్‌ను ఏర్పాటు చేయలేదని,  పీపీపీ ప్రాజెక్టుల్లోని వయబిలిటీ గ్యాప్ ఫండింగ్(వీజీఎఫ్) స్కీం మార్గదర్శకాల కనుగుణంగా రాష్ట్ర ప్రభుత్వం వ్యవహరించాలని మెట్రోరైలు వర్గాలు పేర్కొన్నాయి. అన్నీ పరిగణనలోకి తీసుకున్న ప్రభుత్వం, జీహెచ్‌ఎంసీ చట్టం మేరకు తనకున్న అధికారాలను వినియోగించి స్టాండింగ్ కమిటీ తీర్మానాన్ని రద్దు చేసింది. తదుపరి చర్యలు తీసుకోవాల్సిందిగా జీహెచ్‌ఎంసీ కమిషనర్‌కు సూచించింది. ఈ మేరకు మునిసిపల్ పరిపాలన, పట్టణాభివృద్ధిశాఖ సోమవారం జీవో జారీ చేసింది.
  


 ఆరోగ్య రంగంలో పెను మార్పు చోటు చేసుకుంటోంది. అవయవ దాతల సంఖ్య ఏటేటా పెరుగుతోంది. అవగాహన పెరగడం, దాతలు ముందుకు రావడంతో నగరంలో అవయవ మార్పిడి శస్త్రచికిత్సలు విరివిగా జరుగుతున్నాయి. గత పదేళ్లలో 155 బ్రెయిన్ డెడ్ కేసుల నుంచి వెయ్యి అవయవాలను సేకరించి 854 మందికి అమర్చగా.. ఒక్క ఈ ఏడాది జూలై నాటికి నిమ్స్ జీవన్‌దాన్ ద్వారా 23 మంది బాధితుల నుంచి అవయవాలు సేకరించి, 150 మందికి పునర్జన్మను ప్రసాదించారు. కేవలం బ్రెయిన్ డెడ్ బాధితులే కాదు, ఆరోగ్యంగా ఉన్న వారు (లైవ్ డోనర్స్) సైతం ముందుకు వస్తుండడంతో.. ఆరోగ్య రాజధాని హైదరాబాద్ తాజాగా అవయవ మార్పిడి శస్త్రచికిత్సలకు కేంద్ర బిందువుగా మారుతోంది. నేడు (మంగళవారం) జాతీయ అవయవదాన దినోత్సవం సందర్భంగా ‘సాక్షి’ ప్రత్యేక కథనం
  
  సాక్షి, సిటీబ్యూరో: మనం మరణించినా మన కళ్లు ఈ లోకాన్ని చూస్తూనే ఉంటాయి. మనం ఏ లోకంలో ఉన్నా మూత్రపిండాలు రక్తాన్ని శుద్ధి చేస్తూనే ఉంటాయి. మన శ్వాస ఆగిపోయినా గుండె ఁలబ్‌డబ్‌రూ.మంటూ కొట్టుకుంటూనే ఉంటుంది. కేవలం అవయవ దానం వల్ల మరణించినా బతికి ఉండే అవకాశం లభిస్తోంది! మృత్యువును జయించిన వారంతా దేవతలైతే.. ఆ జాబితాలో అవయవాలను దానం చేసిన వారు కూడా చేరుతారు. కేవలం బ్రెయిన్‌డెడ్ బాధితుల నుంచే కాదు, లైవ్‌డోనర్స్ కూడా అవయవాలను దానం చేసేందుకు ముందుకు వస్తుండటంతో నగరంలో ఇటీవల అవయవ మార్పిడి శస్త్రచికిత్సలు ఊపందుకున్నాయి. నిమ్స్‌లో ఇప్పటివరకు 650 కిడ్నీ ట్రాన్స్‌ప్లాంటేషన్లు జరిగితే, గ్లోబల్ ఆస్పత్రిలో 250 కాలేయ మార్పిడి, 110 మూత్ర పిండాలు, ఐదు గుండె మార్పిడి శస్త్రచికిత్సలు జరిగాయి. రాష్ట్రంలో తొలిసారిగా యశోద ఆస్పత్రిలో రెండు ఊపిరితిత్తుల మార్పిడి శస్త్రచికిత్సలు జరిగాయి.
  
  ఒక్కరితో పలువురికి పునర్జన్మ
  మనిషి జీవించి ఉండగా రక్తదానంతో పాటు కిడ్నీ (రెండింట్లో ఒకటి), కాలేయం (మూడింట ఒక భాగం) మాత్రమే దానం చేసే అవకాశం ఉంది. రక్తదానం ఎవరికైనా చేయవచ్చు కానీ.. కిడ్నీ, కాలేయ దానాలపై ప్రభుత్వం ఆంక్షలు విధించింది. రక్త సంబంధీకుల నుంచి మినహా ఇతరుల నుంచి వీటిని సేకరించకూడదు. అదే బ్రెయిన్‌డెడ్‌గా నిర్ధారించిన వ్యక్తి నుంచి గుండె తో పాటు రెండు జతల కవాటాలు, కిడ్నీలు, నేత్రాలు, చర్మం, ఎముకలు, కండరాలు, ఎముకల్లోని మజ్జ, కాలేయం, ఊపిరితిత్తులు, క్లోమం సేకరించ వచ్చు. ఇలా ఒక వ్యక్తి నుంచి సేకరించిన అవయవాలతో ఏడు నుంచి తొమ్మిది మందికి పునర్జన్మను ప్రసాదించే అవకాశం ఉందని వైద్య నిపుణులు చెబుతున్నారు.
  
  బ్రెయిన్‌డెడ్ నిర్ధారిస్తారిలా..
  ప్రమాదం వల్ల, నివారణ సాధ్యం కాని వ్యాధుల వల్ల కోమాలోకి చేరుకుని, మళ్లీ స్పృహలోకి రాలేని పరిస్థితిలో ఉన్న బాధితుడిని వైద్యులు ‘బ్రెయిన్‌డెడ్’గా నిర్ధారిస్తారు. ఈ సమయంలో వీరి మెదడు నుంచి ఇతర భాగాలకు సంకేతాలు అందవు. వైద్యులు దీన్ని గుర్తించి, వెంటిలేటర్ సహాయంతో ఆక్సిజన్‌ను ఎక్కువ ఒత్తిడితో శరీరంలోకి పంపిస్తారు. ఆ వ్యక్తి మరణించినా అవయవాలు మాత్రం కొన్ని గంటల పాటు పనిచేస్తూనే ఉంటాయి. వీటిని సాధ్యమైనంత త్వరగా సేకరించి బ్లడ్‌గ్రూప్ తదితర అంశాలు సరిపోలిన వారికి నిర్ధేశిత సమయంలో అమర్చుతారు.
  
  ఎన్ని గంటల్లో అమర్చాలంటే..
  అవయవాల మార్పిడి శస్త్రచికిత్సలు దుర్వినియోగం కాకుండా చూసేందుకు ప్రభుత్వం 1994లో ట్రాన్స్‌ప్లాంటేషన్ ఆఫ్ హ్యూమన్ రైట్స్ యాక్ట్‌ను తీసుకొచ్చింది. ఈ చట్టం ప్రకారం అవయవాల అమ్మకాలు నిషేధం. బ్రెయిన్ డెడ్‌గా నిర్ధారించిన వ్యక్తి నుంచి మాత్రం కుటుంబ సభ్యుల అంగీకారంతో అవయవాలు సేకరించొచ్చు. సేకరించిన అవయవాలను నిర్దేశిత సమయాల్లో అవసరమైన వారికి అమర్చాలి. ఆలస్యమైతే అవి పాడైపోయే ప్రమాదముంది. కాలేయాన్ని 10-12 గంటల లోపు, మూత్రపిండాలను 24 గంటల్లోపు, గుండెను 4 గంటల్లోపు, కళ్లను 6-8 గంటల్లోపు అమర్చాలి.
  
  జీవన్‌దాన్ నెట్‌వర్క్‌లో ఉన్న ఆస్పత్రులు ఇవే
  అవయవాల మార్పిడి శస్త్రచికిత్సలు చేయాలంటే ముందస్తుగా ఆయా ఆస్పత్రులు, వైద్యులు తమ పేర్లను జీవన్‌దాన్ కార్యాలయంలో నమోదు చేసుకోవాలి. రిజిస్ట్రేషన్ కానీ ఆసుపత్రుల్లో అవయవ మార్పిడి చేయడం చట్టారీత్యా నేరం. రాష్ట్ర వ్యాప్తంగా ఇప్పటివరకు 23 ఆస్పత్రులు జీవన్‌ధాన్‌లో పేర్లు నమోదు చేసుకున్నాయి. వీటిలో నగరంలోని నిమ్స్, గ్లోబల్, కేర్, అపోలో, కిమ్స్, యశోదా, స్టార్, గాంధీ, ఉస్మానియా, కామినేని, డెక్కన్ ఆస్పత్రులున్నాయి. ఆసక్తి గలవారు ఫోన్ నెం. 2348 9494లో సంప్రదించవచ్చు.
  
  ఇది పునర్జన్మే
  చాలా కాలంగా గుండె నొప్పితో బాధపడ్డా. నాలుగేళ్ల క్రితం డాక్టర్ గోఖలేను సంప్రదించగా, గుండె పూర్తిగా దెబ్బతింది.. గుండె మార్పిడి ఒక్కటే దీనికి పరిష్కారమన్నారు. అప్పుడే బ్రెయిన్‌డెడ్ అయిన ఓ మహిళ గుండెను దానం చేసేందుకు ఆమె బంధువులు అంగీకరించడంతో గోఖలే నేతృత్వంలోని వైద్య బృందం వెంటనే ఆ అవ యవాన్ని సేకరించి నాకు అమర్చారు. నిజంగా ఇది నాకు పునర్జన్మే.    
  - వాణి, నిజాంపేట్
  
  ప్రాధాన్యతను బట్టి అవయవాల సరఫరా..
  అవయవాలు కావాలనుకునే వారు జీవన్‌దాన్ అర్హత ఉన్న ఆస్పత్రుల్లో వివరాలు నమోదు చేసుకోవాలి. ఇందుకు సభ్యత్వ రుసుం కింద రూ.5 వేలు చెల్లించాలి. అవయవాల మార్పిడి శస్త్రచికిత్సల కోసం ఎదురు చూస్తున్న బాధితుల బాబితాలోని పేర్ల ప్రకారం అవయవాలను సమకూర్చుతాం. అయితే ఈ అంశంలో యువతకు మొదటి ప్రాధాన్యత ఇస్తాం.
  - డాక్టర్ స్వర్ణలత, జీవన్‌దాన్ ఇన్‌చార్జి, నిమ్స్
  
  లైవ్‌డోనర్స్ ముందుకు వస్తున్నారు
  నిమ్స్‌లో పదేళ్ల కాలంలో 650 మందికి కిడ్నీల మార్పిడి శస్త్రచికిత్సలు నిర్వహించగా, వీరిలో సుమారు 610 మందికి లైవ్‌డోనర్స్ నుంచి సేకరించినవే. మిగిలిన 40 మందికి మాత్రమే బ్రెయిన్‌డెడ్ బాధితుల కిడ్నీలను అమర్చాం.
  - ప్రొ.శ్రీభూషణ్‌రాజు, కిడ్నీ విభాగాధిపతి, నిమ్స్
  
  బాధితులు ముందుకు రావట్లేదు
  అవయవాలను దానం చేసేందుకు దాతలు ముందుకు వస్తున్నా.. వాటిని అమర్చుకునేందుకు బాధితులు ఆసక్తి చూపడం లేదు. దీంతో బ్రెయిన్‌డెడ్ కేసుల నుంచి సేకరించిన అవయవాలు పాడైపోతున్నాయి.
  - డాక్టర్ ఏజీకే గోఖలే, గుండె, ఊపిరితిత్తుల మార్పిడి నిపుణుడు, యశోద ఆస్పత్రి
  
  సక్సెస్ రేటు 90 శాతం
  రాష్ట్రంలోనే తొలిసారిగా గ్లోబల్ ఆస్పత్రిలో లివర్ ట్రాన్స్‌ప్లాంటేషన్ సర్జరీలు చేశాం. ఇలా ఇప్పటివరకు 250కి పైగా శస్త్రచికిత్సలు చేసి, 90 శాతం సక్సెస్ రేట్ సాధించాం. నగరంలో తక్కువ ధరకే ఖరీదైన వైద్యం అందుతుండటంతో విదేశీయులు సైతం ఇక్కడికే వస్తున్నారు.
  - డాక్టర్ రవీంద్రనాథ్, సీఎండీ, గ్రూప్ ఆఫ్ గ్లోబల్ హాస్పిటల్స్
  


  సాక్షి,హైదరాబాద్:అభిమానం వెల్లువెత్తింది... జోరువానను సైతం లెక్కచేయక.. జయహో జగన్ అన్న నినాదం శంషాబాద్ ఎయిర్‌పోర్టును హోరెత్తించింది. తొమ్మిది నెలలు, పద్నాలుగు జిల్లాల మీదుగా 3112 కి.మీ. ప్రజాప్రస్థానం పాదయాత్రను ముగించుకుని సోమవారం ఉదయం  విశాఖ నుంచి శంషాబాద్ ఎయిర్‌పోర్టుకు చేరుకున్న వైఎస్ షర్మిల, వైఎస్సార్ కాంగ్రెస్ పార్టీ గౌరవ అధ్యక్షురాలు వైఎస్ విజయమ్మలకు వేలాదిగా తరలివచ్చిన కార్యకర్తలు ఆత్మీయ స్వాగతం పలికారు.
  
  వైఎస్సార్ కాంగ్రెస్ పార్టీ నాయకులు, కార్యకర్తలు, అభిమానుల నినాదాల మధ్య షర్మిల శంషాబాద్ ఎయిర్‌పోర్టు నుంచి నేరు గా చంచల్‌గూడ జైలుకు వెళ్లి ములాఖత్‌లో తన సోదరుడు వైఎస్ జగన్‌మోహన్‌రెడ్డిని కలుసుకున్నారు. తన సుదీర్ఘ పాదయాత్రలో రాష్ట్ర ప్రజలు ఎదుర్కుంటున్న ఇబ్బందులు, కష్టాలు, కన్నీళ్లను ఆమె ప్రజల పక్షాన జగన్‌మోహన్‌రెడ్డికి వివరించినట్లు సమాచారం. వైఎస్ కుటుంబంపై ప్రజలకు ఉన్న నమ్మకం, విశ్వాసాన్ని షర్మిల ఈ సందర్భంగా జగన్‌తో పంచుకున్నారు. ములాఖత్ అనంతరం షర్మిల వేలాదిమంది అభిమానులు,
  
  భారీ కాన్వాయ్‌తో వెంటరాగా లోటస్‌పాండ్‌లోని తన నివాసానికి చేరుకున్నారు. షర్మిలకు వైఎస్సార్ కాంగ్రెస్ కేంద్ర పాలక మండలి సభ్యులు బాజిరెడ్డి గోవర్ధన్, రాష్ట్ర నాయకులు వడ్డేపల్లి నర్సింగ్‌రావు, కె.శివకుమార్, బి.జనార్దన్‌రెడ్డి, పి.విజయారెడ్డి,  అధికార ప్రతినిధి గట్టు రాంచందర్‌రావు, మైనారిటీ సెల్ కన్వీనర్ రహమాన్, కార్మిక విభాగం కన్వీనర్ జనక్‌ప్రసాద్, ిసీఈసీ సభ్యులు మతీన్ ముజదాది, యువజన, సేవాదళం కన్వీనర్లు పుత్తా ప్రతాప్‌రెడ్డి, కోటింరెడ్డి వినయ్‌రెడ్డి, నగర కన్వీనర్ ఆదం విజయ్‌కుమార్, ఆయా నియోజకర్గాల సమన్వయకర్తలు దేప భాస్కర్‌రెడ్డి, ధన్‌పాల్‌రెడ్డి, శేఖర్‌గౌడ్, లింగాల హరిగౌడ్, సాయినాథ్‌రెడ్డి, వెల్లాల రామ్మోహన్, శీలం ప్రభాకర్, సురేష్‌రెడ్డి, సూర్యనారాయణరెడ్డి, రాచమళ్ల సిద్దేశ్వర్, రూపానందరెడ్డి, శ్రీలక్ష్మీ తదితరుల ఆధ్వర్యంలో  స్వాగతం పలికారు.
  


 హైదరాబాద్: జంటనగరాల నుంచి వివిధ ప్రాంతాలకు రాకపోకలు సాగించే పలు ప్రత్యేక రైళ్లలో బెర్తులు ఖాళీ ఉన్నట్లు దక్షిణమధ్య రైల్వే సీపీఆర్వో కె.సాంబశివరావు సోమవారం ఓ ప్రకటనలో  తెలిపారు. ప్రయాణికులు ఈ అవకాశాన్ని సద్వినియోగం చేసుకోవాలని కోరారు.
  
  -    లింగంపల్లి-కాకినాడ (07101) ప్రత్యేక రైల్లో ఈనెల 18న సెకండ్ ఏసీ, థర్డ్ ఏసీలలో, కాకినాడ-లింగంపల్లి (07102) ప్రత్యేక రైల్లో ఈనెల 8న థర్డ్ ఏసీ, స్లీపర్ క్లాస్‌లలో బెర్తులు ఖాళీగా ఉన్నాయి.
  -    సికింద్రాబాద్-కాకినాడ (07202) స్పెషల్ ట్రైన్లో ఈనెల 11న సెకండ్ ఏసీ, స్లీపర్ క్లాస్‌లలో బెర్తులు ఉన్నాయి.
  -    సికింద్రాబాద్-గువాహటి (07149) ప్రత్యేక రైల్లో ఈనెల 9న సెకండ్ ఏసీ, థర్డ్ ఏసీ, స్లీపర్ క్లాస్‌లో బెర్తులు ఖాళీగా ఉన్నాయి.
  -    కాచిగూడ-మంగళూరు (07606) ప్రత్యేక రైల్లో ఈనెల 24న థర్డ్ ఏసీ, స్లీపర్‌క్లాస్‌లలో బెర్తులున్నాయి.
  -    ఔరంగాబాద్-తిరుపతి (07405) స్పెషల్ ట్రైన్‌లో ఆగస్టు 28, 30 తేదీలలో థర్డ్ ఏసీ, స్లీపర్‌క్లాస్‌లలో, తిరుపతి-ఔరంగాబాద్ (07406) ప్రత్యేక రైలులో ఆగస్టు 24, 31 తేదీలలో థర్డ్ ఏసీ, స్లీపర్ క్లాస్‌లలో బెర్తులు ఖాళీగా ఉన్నాయి.


 హైదరాబాద్: బుల్లితెర నటి పట్ల అసభ్యంగా ప్రవర్తించారనే ఆరోపణలపై నిర్మాత పరుచూరి ప్రసాద్‌పై బంజారాహిల్స్ పోలీసులు సోమవారం కేసు నమోదు చేశారు. బేగంపేటకు చెందిన బి.మాధవి (36) బుల్లితెర నటి. స్నేహితుల దినోత్సవం సందర్భంగా ఆదివారం రాత్రి గం.10 సమయంలో ఆమె మరికొందరితో కలిసి సంగీత దర్శకుడు చక్రి నివాసానికి విందు నిమిత్తం వెళ్లారు. ఇదే కార్యక్రమానికి వచ్చిన పరుచూరి ప్రసాద్ రాత్రి 12 గంటల సమయంలో మాధవితో అనుచితంగా ప్రవర్తించారు. దీంతో తన ఇంట్లో గలభా చేయవద్దంటూ వారిని చక్రి బయటకు పంపేశారు. అక్కడ నుంచి బయటకు వచ్చిన మాధవి, ప్రసాద్‌లు రోడ్డుపైనా ఘర్షణ పడ్డారు. ఈ నేపథ్యంలోనే ప్రసాద్ తన పట్ల అసభ్యంగా ప్రవర్తించారని మాధవి పోలీసులకు ఇచ్చిన ఫిర్యాదులో పేర్కొన్నారు. దీనికి సంబంధించి పోలీసులు ఐపీసీ సెక్షన్ 354 కింద కేసు నమోదు చేశారు.
  


 ప్రధాని మన్మోహన్ సింగ్ అసమర్ధత వల్లే సీమాంధ్రలో ఆందోళనలు జరుగుతున్నాయని బీజేపీ రాష్ట్ర అధ్యక్షుడు జి కిషన్‌రెడ్డి విమర్శించారు. తన మంత్రులను ఒక తాటిపై నిలపడంలో ప్రధాని విఫలమని మండిపడ్డారు. కాంగ్రెస్ అధినేత్రి సోనియా గాంధీయే ఇరుప్రాంతాల్లో ఆందోళన చేయిస్తుందన్న అనుమానాన్ని కిషన్రెడ్డి వ్యక్తం చేశారు.
 
 కాంగ్రెస్, టీడీపీ ద్వంద్వ ప్రమాణాల వల్లే రాష్ట్రంలో ఆందోళన పరిస్థితులు నెలకొన్నాయని దుయ్యబట్టారు. టీఆర్‌ఎస్‌తో పొత్తు సమయంలో టీడీపీ, కాంగ్రెస్‌లు తెలంగాణపై ఎందుకు ప్రశ్నించలేదని నిలదీశారు. ఉద్యమకారుల ముసుగులో తమ పార్టీపై మజ్లీస్ దాడులకు పాల్పడుతోందని కిషన్‌రెడ్డి తెలిపారు.
 
 దేశంలో సుస్థిరపాలన అందించే సత్తా ఒక్క నరేంద్ర మోడీకే ఉందని, ఆయనకు భయపడే కాంగ్రెస్ పార్టీ తెలంగాణ రాష్ట్ర ఏర్పాటు ప్రకటన చేసిందని అంతకుముందు ఆయన ఎద్దేవా చేశారు. రాహుల్‌గాంధీని ప్రధాని చేయడానికి సోనియా గాంధీ పావులు కదుపుతున్నారని, దీనికి టీడీపీ, టీఆర్‌ఎస్‌లు పునాదులు వేస్తున్నాయని ఆయన ఆరోపించారు.


 తాడేపల్లిగూడెం: పశ్చిమ గోదావరి జిల్లాలో దారుణం జరిగింది. తన ప్రేమను నిరాకరించిదనే అక్కసుతో ఓ ఉన్మాది దాడికి పాల్పడ్డాడు. ఇంట్లో నిద్రిస్తున్న యువతిని భాష అనే యువకుడు బ్లేడ్తో దాడి చేశాడు. తాడేపల్లి గూడెంలోని భాగ్యలక్ష్మిపేటలో జరిగిన ఈ సంఘటన స్థానికంగా కలకలం సృష్టించింది. దాడిలో గాయపడిన బాధితురాలు ప్రస్తుతం ఓ ప్రయివేటు ఆస్పత్రిలో చికిత్స పొందుతుంది. గత కొంతకాలంగా భాష.... ఈ యువతిని వేధిస్తున్నట్లు సమాచారం. గతంలో ఇదే విషయంపై యువతి తల్లిదండ్రులు పోలీసులకు ఫిర్యాదు చేశారు. ప్రస్తుతం నిందితుడు పరారీలో ఉన్నట్లు సమాచారం.


 అన్ని వర్గాలూ ఏకమవుతుండటంతో సమైక్య పోరు మరింత రాజుకుంది. 13 జిల్లాల ఏపీ ఎన్జీవోలు, మున్సిపల్ ఉద్యోగుల జేఏసీ, పొలిటికల్ జేఏసీ ఆధ్వర్యంలో ఉద్యమాన్ని మరింత ఉధృతం చేసేందుకు ఆదివారం విజయవాడలో సమావేశమై కార్యాచరణ రూపొందించారు.
  
  సాక్షి, మచిలీపట్నం/విజయవాడ : జిల్లాలో సమైక్యాంధ్ర ఉద్యమం రోజురోజుకు బలపడుతూ మరింత ఉధృతమవుతోంది. ఐదోరోజైన ఆదివారం ఏపీ ఎన్జీవోలు, మున్సిపల్ ఉద్యోగుల జేఏసీ ప్రతినిధులు విజయవాడలో వేర్వేరుగా సమావేశాలు నిర్వహించి భవిష్యత్తు కార్యాచరణ ప్రకటించడంతో ఉద్యమానికి మరింత బలం చేకూరింది. వారితో కలిసి పోరాటం చేయడానికి విద్యార్థి సంఘ జేఏసీ నేతలు సిద్ధమౌతున్నారు. వీరికితోడు ప్రజాప్రతినిధులు, రాజకీయ నాయకులు రోడ్లపైకి వచ్చి ఉద్యమాన్ని ముందుండి నడిపిస్తామంటూ ప్రకటనలు చేయడంతో రాబోయే రోజుల్లో ఉద్యమం మరింత తీవ్రతరమయ్యే పరిస్థితి కనబడుతోంది. రాష్ట్ర విభజనపై 13 జిల్లాల ఏపీ ఏన్జీవోల సంఘ ప్రతినిధులు గాంధీనగర్‌లోని ఎన్జీఓ హోమ్‌లో సమావేశమవడం జిల్లాలో చర్చనీయాంశంగా మారింది. మరోవైపు మున్సిపల్ గెస్ట్‌హౌస్‌లో 13 జిల్లాల ఏపీ మున్సిపల్ ఎంప్లాయీస్ జేఏసీ నాయకులు సమావేశమై సమైక్యాంధ్రకు మద్దతుగా నిర్ణయాలు తీసుకున్నారు. తొలుత మూడు రోజులు విధులు బహిష్కరించాలని, పౌరసేవల్ని నిలిపివేయాలని నిర్ణయించారు.
  
  పొలిటికల్ జేఏసీ నిరసన ప్రదర్శన..
  
  విజయవాడలో పొలిటికల్ జేఏసీ ఆధ్వర్యంలో నిరసన ప్రదర్శన నిర్వహించారు. అధికార భాషా సంఘం అధ్యక్షుడు మండలి బుద్ధప్రసాద్, ఎమ్మెల్యేలు మల్లాది విష్ణు, వెల్లంపల్లి శ్రీనివాస్, కాంగ్రెస్ నాయకులు కొలనుకొండ శివాజీ, ఆకుల శ్రీనివాసకుమార్, వైఎస్సార్ సీపీ నాయకులు తాడి శకుంతల, అబ్దుల్ ఖాదర్, తెలుగుదేశం నాయకులు బొండా ఉమామహేశ్వరరావు, గొట్టిపాటి రామకృష్ణ ప్రసాద్ తదితరులు పాల్గొని సమైక్యాంధ్ర ఉద్యమానికి అండగా నిలబడతామని హామీ ఇచ్చారు. వీఆర్‌ఓల సంక్షేమ సంఘం స్వర్ణాప్యాలెస్‌లో సమావేశమై కేసీఆర్‌ను ఉరితీయాలని, సోనియాను తరిమేయాలని డిమాండ్ చేశారు. వైఎస్సార్ సీపీ తూర్పునియోజకవర్గ సమన్వయకర్త వంగవీటి రాధాకృష్ణ కార్యాలయం నుంచి రంగా విగ్రహం వరకు కొవ్వొత్తుల ప్రదర్శన జరిగింది. అక్కడ మానవహారం ఏర్పాటు చేశారు.
  
  మచిలీపట్నంలో కార్లు, బైక్‌ల ర్యాలీ..
  
  మచిలీపట్నంలో సమైక్యంధ్ర ప్రతినిధులు కార్లు, బైక్‌లతో ర్యాలీ నిర్వహించి తమ నిరసన తెలియజేశారు. జగ్గయ్యపేటలో సమైక్యంధ్రకు మద్దతుగా మహిళలు రోడ్లపైకి వచ్చి కబడ్డీ ఆడారు. రాష్ట్రాన్ని విడదీస్తే సహించబోమని హెచ్చరించారు. గుడివాడ నెహ్రూ చౌక్‌లో వైఎస్సార్ సీపీ ఆధ్వర్యంలో వంటావార్పులు నిర్వహించి ర్యాలీ జరిపారు. అనంతరం రాస్తారోకో నిర్వహించారు. నందివాడ, గుడ్లవల్లేరు మండలాల్లో సమైక్యాంధ్ర జేఏసీ ఆధ్వర్యంలో ర్యాలీలు జరిగాయి. ఉయ్యూరులో జర్నలిస్టు జేఏసీ ఆధ్వర్యంలో ధర్నా, ప్రధాన వీధుల్లో బైక్ ర్యాలీ నిర్వహించారు. నల్లబ్యాడ్జీలు ధరించి గాంధీ విగ్రహం వద్ద అధికారులకు పూలు అందచేసి సమైక్యాంధ్రకు మద్దతుగా సహకరించాలని కోరారు. భవన నిర్మాణ కార్మికుల ఆధ్వర్యంలో కార్మికులు ప్రదర్శన చేశారు. తిరువూరులో ఉద్యోగ సంఘాల ప్రతినిధులు కొవ్వొత్తుల ప్రదర్శన నిర్వహించగా వైఎస్సార్ సీపీ నేతలు అందులో పాల్గొన్నారు.
  
  కేసీఆర్ దిష్టిబొమ్మ దహనం..
  
  రాష్ట్ర విభజనకు నిరసనగా హనుమాన్‌జంక్షన్‌లో కేసీఆర్ దిష్టిబొమ్మకు చెప్పుల దండ వేసి దహనం చేశారు. కైకలూరు ఎమ్మెల్యే జయమంగళ వెంకటరమణ ఆధ్వర్యంలోనూ కేసీఆర్ దిష్టిబొమ్మ దహనం చేసి, తాలూకా కార్యాలయం వద్ద నిరవధిక నిరాహారదీక్షకు సిద్ధమయ్యారు. కేంద్ర ప్రభుత్వం నిర్ణయాన్ని వెనక్కి తీసుకునేవరకు తాను దీక్ష కొసాగిస్తానని ప్రకటించారు. అవనిగడ్డలో అధికార భాషాసంఘం చైర్మన్ మండలి బుద్ధప్రసాద్ ఆధ్వర్యంలో నిరసన ప్రదర్శన జరిగింది. ఈ ప్రదర్శనలో పాల్గొన్న శ్రీనివాసరావు అనే యువకుడు ఒంటిపై కిరోసిన్ పోసుకుని ఆత్మహత్యాయత్నానికి పాల్పడబోగా పోలీసులు అడ్డుకున్నారు.
  


 చార్మినార్/చాంద్రాయణగుట్ట, న్యూస్‌లైన్: చారిత్రక నగరిలో ఆధ్యాత్మికత వెల్లివెరిసింది. బోనాల జాతరతో భాగ్యనగరం పండుగ కళ సంతరించుకుంది. పాతబస్తీతో పాటు నగర వ్యా ప్తంగా ఉన్న ఆలయాలకు భక్తజనం పోటెత్తింది. డప్పు వాయిద్యాలు, పోతురాజుల నృత్యాలు, శివసత్తుల పూనకాలతో బోనాల వేడుక అంబరాన్నంటింది. ఫలహారపు బండ్లు, తొట్టెల ఊరేగింపుతో పాత నగరం మార్మోగింది. పాతబస్తీలోని లాల్‌దర్వాజ సింహవాహిణి ఆలయానికి ఆదివారం తెల్లవారుజాము నుంచే భక్తు లు తరలివచ్చారు. ప్రత్యేక పూజలు నిర్వహించి, అమ్మవారికి అత్యంత ప్రీతిపాత్రమైన బోనాన్ని సమర్పించారు.
  
  అలాగే, అక్కన్నమాదన్న ఆలయం, బేలా ముత్యాలమ్మ ఆలయం, హరిబౌలి బంగారు మైసమ్మ దేవాలయం, సుల్తాన్ షాహి శీతల్‌మాత జగదాంబ ఆలయం, రాంబక్షి బండ అమ్మవారి ఆలయంతోపాటు మీరాలం మండి, ఉప్పుగూడ, గౌలిపురా, మురాద్ మహాల్‌లలోని శ్రీమహంకాళి ఆలయాల్లో భక్తులు బారులు తీరారు. గౌలిపురా నల్లపోచమ్మ దేవాలయం, మేకలబండ నల్లపోచమ్మ ఆల యం, కోట్ల అలిజా కోట మైసమ్మ, కసరట్టా మహంకాళి ఆలయాలు కిటకిటలాడాయి. కార్వాన్‌లోని దర్బార్ మైసమ్మ అమ్మవారి బోనాల ఉత్సవాలు వైభవంగా జరిగా యి.
  
  అంబారీపై అమ్మవారి చిత్రపటాన్ని ఉంచి ఊరేగించా రు. లోయర్ ట్యాంక్‌బండ్ శ్రీకనకాల కట్టమైసమ్మ దేవాలయానికి భక్తులు పోటెత్తారు. డిప్యూటీ సీఎం దామోదర రాజనర్సింహా అమ్మవారిని దర్శించుకున్నారు. అనంతరం ఆయన మాట్లాడుతూ తనపుట్టు వెంట్రుకలు ఇక్కడే అమ్మవారికి సమర్పించానని, తాను ఇక్కడి సమీపంలోని నల్లగుట్టలోనే పుట్టానన్నారు. అహ్మద్‌నగర్ పోచమ్మబస్తీలో జరిగిన బోనాల ఉత్సవాల్లో వైఎస్సార్ సీపీ నేతలు గట్టు రాంచందర్‌రావు, విజయారెడ్డి, పార్టీ నగర స్టీరింగ్ కమిటీ సభ్యులు జూడి విల్సన్, నీలంరాజు తదితరులు పాల్గొన్నారు. ఆలయ ప్రాంగణంలో నిర్వహించిన జానపద కార్యక్రమాలను వారు ఎంతో ఆసక్తిగా తిలకించారు.
  
  ప్రముఖల రాక..
  
  బోనాల వేడుకలకు ప్రముఖులు తరలివచ్చారు. అన్ని ప్ర దాన ఆలయాల్లో రాష్ట్ర ప్రభుత్వం తరఫున దేవాదాయ శా ఖ ఆధ్వర్యంలో అమ్మవారికి పట్టువస్త్రాలను సమర్పించా రు. ఉప ముఖ్యమంత్రి దామోదర రాజనర్సింహా, మంత్రు లు జానారెడ్డి, దానం నాగేందర్, ముఖేశ్‌గౌడ్, గీతారెడ్డి, ఎంపీలు అంజన్‌కుమార్‌యాదవ్, రేణుకా చౌదరి, మధుయాష్కి, రాపోలు ఆనంద్‌భాస్కర్, వీహెచ్, ఎమ్మెల్యేలు కిషన్‌రెడ్డి, కేటీఆర్, జూపల్లి కృష్ణారావు, మాజీ మంత్రి తలసాని శ్రీనివాసయాదవ్, కేంద్ర మాజీ మంత్రి బం డారు దత్తాత్రేయ, నగర పోలీసు కమిషనర్ అనురాగ్ శర్మ, విమలక్క తది తరులు ప్రత్యేక పూజలు నిర్వహించారు.
  
  ట్రాఫిక్ ఆంక్షలు..
  
  ఓవైపు బోనాల ఉత్సవాలు, మరోవైపు పవిత్ర రంజాన్ మాసం నేపథ్యంలో పోలీసులు భారీ బందోబస్తు ఏర్పాటు చేశారు. సోమవారం పాతబస్తీ వీధుల్లో అమ్మవారి ఘటాల సామూహిక ఊరేగింపు, రాత్రి ముస్లిం సోదరులు షబ్-ఏ-ఖదర్ జాగరణ ఉండడంతో అప్రమత్తమయ్యారు. శాలిబండ నుంచి నయాపూల్ వరకు రంజాన్ మార్కెట్‌ల ను అనుమతించరు. సోమవారం మధ్యాహ్నం 12 నుంచి రాత్రి 10 గంటల వరకు ట్రాఫిక్ ఆంక్షలు విధించారు.
  
  నేడు రంగం
  
  బోనాల జాతరలో విశిష్ట స్థానం ఉన్న రంగం సోమవారం జరగనుంది. లాల్‌దర్వాజ సింహవాహిణి ఆలయంలో సుశీలమ్మ అనే వివాహిత భవిష్యవాణిని వినిపిస్తారు.
  


 సాక్షి,సిటీబ్యూరో: వర్షాకాలంలోనేకాదు..మామూలు రోజుల్లో కూడా నగర రహదారులను ముంచెత్తుతున్న మురుగునీటి సమస్యను శాశ్వతంగా తీర్చే ఉద్దేశంతో ప్రారంభించినసొరంగం పనులు నత్తకు నడక నేర్పిస్తున్నాయి. లిబర్టీ నుంచి కాచిగూడ(నింబోలిఅడ్డా)వరకు ఉన్న ప్రధానరహదారి మార్గంలో 5 కిలోమీటర్ల మేర 1.6 మీటర్ల వ్యాసార్థంలో ఉన్న భారీ పైప్‌లైన్ ఏర్పాటుచేయడం ఈ ప్రాజెక్టు ఉద్దేశం. జర్మనీకి చెందిన ట్రెంచ్‌లెస్ టెక్నాలజీ పరికరాలతో భూగర్భ డ్రైనేజీ వ్యవస్థను ఏర్పాటు చేసే పనులను విశ్వ సంస్థకు అప్పగించారు. ఆగస్టు 2009లో పనులు మొదలుకాగా.
  
  .ఒప్పందం ప్రకారం 2011 ఫిబ్రవరి నాటికి పూర్తికావాల్సి ఉంది. అయితే సాంకేతికకారణాలతో మరో రెండేళ్లపాటు గడువును పొడిగించారు. ఈ ఏడాది ఆగస్టు చివరినాటికి పనులు పూర్తికావాల్సి ఉండగా..ఇప్పట్లో పూర్తయ్యేలా కనిపించడం లేదు. గత నాలుగేళ్లుగా ఐదుకిలోమీటర్ల పనుల్లో కేవలం 3.5 కిలోమీటర్లు మాత్రమే పూర్తికాగా..1.5 కిలోమీటర్ల మేర పనులు అసంపూర్తిగా మిగిలాయి.  
  
  పనులు పూర్తికాకున్న బిల్లుల మంజూరు : నాలుగేళ్లక్రితం సుమారు రూ.76.43 కోట్ల అంచనా వ్యయంతో చేపట్టిన ఈ పనుల్లో ఇప్పటివరకు సుమారు రూ.35 కోట్లు సదరు సంస్థకు బిల్లుల రూపేణా ముట్టజెప్పారు. కానీ గడువులోగా పైపులైన్ పనులు పూర్తిచేయడంలో సదరు సంస్థ చతికిలపడింది. పనుల మందగమనంపై రాష్ట్ర ప్రభుత్వ పరిధిలోని ఈపీసీ(ఇంజనీరింగ్ ప్రొక్యూర్‌మెంట్ అండ్ కన్‌స్ట్రక్షన్)బృందం ఇటీవల అసంతృప్తి వ్యక్తంచేసినట్లు తెలిసింది.
  
  ఈ దుస్థితితో కోర్‌సిటీకి ఇప్పట్లో మురుగుకష్టాలు తీరే అవకాశాలు కనిపించడం లేదు. అయితే కాచిగూడ-నారాయణగూడ మార్గంలో మెట్రోరైలు పనుల నేపథ్యంలో హెచ్‌ఎంఆర్,జలమండలి విభాగాల మధ్య సమన్వయలోపం కూడా పనుల మందగమనానికి కారణమవుతోంది.
  
  ఇదీ ప్రాజెక్టు స్వరూపం
  ప్రాజెక్టు: భూగర్భ సొరంగ డ్రైనేజీ నిర్మాణం  
  పనులు ప్రారంభం : ఆగస్టు 2009
  పూర్తికావాల్సింది : 2013 ఆగస్టు
  ఎక్కడి నుంచి ఎక్కడివరకు: లిబర్టీ నుంచి కాచిగూడ నింబోలిఅడ్డా వరకు ఐదుకిలోమీటర్ల మేర 1.6 మీటర్ల వ్యాసార్థంతో..
  పూర్తయిన పనులు: 3.5 కిలోమీటర్లు మాత్రమే.
  కలిగే ప్రయోజనం: మూసీలో యథేచ్ఛగా కలిసే మురుగునీరు ప్రవాహానికి అడ్డుకట్ట వేయడంతోపాటు లిబర్టీ,పాత ఎమ్మెల్యే క్వార్టర్స్, బషీర్‌బాగ్,కాచిగూడ ప్రాంతాల్లో పొంగిపొర్లుతున్న డ్రైనేజీ సమస్యకు శాశ్వత  పరిష్కారం లభిస్తుంది. ట్రాఫిక్‌కు అంతరాయం కలగకుండా పనులు చేపట్టడం ట్రెంచ్‌లెస్ టెక్నాలజీ ప్రత్యేకత.
  


  సాక్షి, సిటీబ్యూరో : నగరాభివృద్ధికి దిశానిర్దేశం చేసే హెచ్‌ఎండీఏ ఇప్పుడు ‘మహా’ ఇరకాటంలో పడింది. నిధుల సముపార్జనలో భాగంగా 12 లేఅవుట్లలో 42 విడి ప్లాట్లను వే లానికి సిద్ధం చేసినా ప్రస్తుత రాజకీయ అనిశ్చితి కారణంగా పునరాలోచనలో పడింది. ప్రస్తుతం ప్లాట్లను వేలానికి పెడితే వివిధ ఉద్యమ పార్టీల నుంచి తీవ్ర వ్యతిరేకత పెల్లుబికే అవకాశం ఉండటంతో అధికారులు ఆ అంశాన్ని పూర్తిగా పక్కకు పెట్టేశారు.
  
  రాష్ట్ర విభజన ప్రకటన వెలువడిన రోజు నుంచి బహుళ అంతస్తుల భవనాల నిర్మాణానికి, కొత్త లేఅవుట్స్ పర్మిషన్ కోసం ఒక్కటంటే ఒక్క దరఖాస్తు కూడా రాకపోవడం హెచ్‌ఎండీఏ అధికారులను విస్మయానికి గురిచేస్తోంది. ఇప్పటికే దరఖాస్తు చేసుకొన్న వారు కూడా నిర్దేశిత ఫీజు చెల్లించేందుకు ఆసక్తి చూపట్లేదు. ఎల్‌ఆర్‌ఎస్ కింద జోనల్ కార్యాలయాల నుంచి వచ్చే ఆదాయం కూడా స్తంభించిపోయింది. మొన్నటివరకు హెచ్‌ఎండీఏ ప్లాట్ల కోసం ఆరా తీసినవారు ఇప్పుడు ఆ ఛాయలకు కూడా రావట్లేదు.
  
  దీంతో గత 4 రోజులుగా హెచ్‌ఎండీఏ కార్యాలయం బోసిపోయి కన్పిస్తోంది. కొత్త వెంచర్ల మాట అటుంచితే... ఇప్పటికే నిర్మించిన అపార్టుమెంట్ల, పలు లేఅవుట్స్‌లోని ప్లాట్లు అమ్ముడుపోని పరిస్థితి ఎదురైందని బిల్డర్లు, రియల్టర్లు వాపోతున్నారు. ల్యాండ్ యూజ్ సర్టిఫికెట్లు, వివిధ పర్మిషన్లు, భూ వినియోగం మార్పు, ల్యాండ్ లీజులు, కొత్తప్రాజెక్టుల కోసం నిత్యం అనేక మంది హెచ్‌ఎండీఏ కార్యాలయానికి వచ్చేవారు.
  
  అయితే... ఇప్పుడు పరిస్థితి పూర్తిగా మారిపోయింది. రాష్ట్ర విభజన వ్యవహారం ఏదో ఒకటి తేలాకే... కొత్త లేఅవుట్లు, గ్రూపు హౌసింగ్ ప్రాజెక్టుల గురించి ఆలోచిద్దామన్న నిర్ణయానికి రియల్టర్లు వచ్చారు. ప్రస్తుతం హెచ్‌ఎండీఏలో పెద్దగా హడావుడి లేకపోవడంతో కమిషనర్ నీరభ్‌కుమార్ ప్రసాద్ కూడా  బేగంపేటలోని గ్రీన్‌ల్యాండ్స్ భవనానికే పరిమితమవుతున్నారు. ఏవైనా అత్యవసర ఫైళ్లు ఉంటే అక్కడికే తెప్పించుకొని పరిశీలిస్తున్నారు.
  
  ఆ ప్రాజెక్టులకు విఘాతం
  
  నగరాభివృద్ధిలో భాగంగా పీపీపీ విధానంలో చేపట్టిన పలు ప్రాజెక్టులకూ విఘాతం ఎదురైంది. ప్రధానంగా బాటసింగారం, మంగళపల్లిలో లాజిస్టిక్ పార్కులు, మియాపూర్‌లో భారీ బస్‌టెర్మినల్ నిర్మాణాన్ని హెచ్‌ఎండీఏ తలపెట్టింది. టెండర్‌లో వీటిని దక్కించుకొన్న సంస్థలు ఆయా ప్రాజెక్టుల నిర్మాణానికి సంబంధించి ఇప్పుడు పునరాలోచనలో పడ్డట్టు సమాచారం. అలాగే ఖానామెట్‌లో తలపెట్టిన సైన్స్ సిటీ, జవ హర్‌నగర్‌లో ప్రతిపాదించిన ఎడ్యుకేషనల్ హబ్‌లపై కూడా నీలినీడలు కమ్ముకొన్నాయి. ఎడ్యుకేషన్ ఇనిస్టిట్యూట్స్‌ను ఇక్కడ ఏర్పాటు చేసేందుకు అంతర్జాతీయ సంస్థలే కాదు... దేశీయ విద్యాసంస్థలు కూడా వెనుకడుగు వేస్తున్నాయి.
  
  జవహార్‌నగర్‌లో భూమి కావాలంటూ ఇటీవల హెచ్‌ఎండీఏను సంప్రదించిన సంస్థలు సైతం ఇప్పుడు మొహం చాటేస్తుండటం గమనార్హం. విభజన వ్యవహారం ఓ కొలిక్కి వచ్చే వరకు హెచ్‌ఎండీఏతో ఎలాంటి ఒప్పందం చేసుకోవద్దని ఆయా సంస్థలు వెనక్కి తగ్గినట్లు తెలుస్తోంది. హెచ్‌ఎండీఏ చేసిన ల్యాండ్ పూలింగ్ ప్రయోగం కూడా రాష్ట్ర విభజన ప్రకటనతో బెడిసికొట్టడం అధికారులకు మింగుడు పడకుండా ఉంది.
  
  ఆశలపై నీళ్లు
  
  అసలే పీకల్లోతు అప్పుల్లో కూరుకుపోయిన హెచ్‌ఎండీఏ.. నగరంలోని 42 విడి ప్లాట్లను విక్రయించడం ద్వారా రూ.50 కోట్ల ఆదాయం సముపార్జించాలని భావించింది. గత ఏడాది మొత్తం 41 పాట్లు వేలానికి పెట్టగా 36 ప్లాట్లు అమ్ముడుపోయి సుమారు రూ.124 కోట్ల మేర ఆదాయం లభించింది. ఆ స్ఫూర్తితో వివిధ లేఅవుట్లలో మిగిలిపోయిన ప్లాట్లను వెలికితీసి అధికారులు     వేలానికి సిద్ధం చేశారు. ఈ తరుణంలో రాష్ట్ర విభజన ప్రకటన హెచ్‌ఎండీఏ ఆశలపై నీళ్లు చల్లినట్లైంది.
  


 సాక్షి, సిటీబ్యూరో: అధికార, ప్రతిపక్ష పార్టీల కుమ్మక్కును నిరసిస్తూ.. తొమ్మిది నెలల పాటు పద్నాలుగు జిల్లాల మీదుగా 3112 కి.మీ. మేర సాగిన పాదయాత్రను ఆదివారం సాయంత్రం ఇచ్ఛాపురంలో ముగించిన జగనన్న సోదరి వైఎస్ షర్మిల.. సోమవారం ఉదయం నగరానికి చేరుకోనున్నారు. ఆమె ఉదయం పది గంటలకు విశాఖపట్నం నుంచి శంషాబాద్ ఎయిర్‌పోర్టుకు చేరుకుని అక్కడి నుంచి నేరుగా చంచల్‌గూడ జైలుకు చేరుకుని తన సోదరుడు, వైఎస్సార్ కాంగ్రెస్ పార్టీ అధ్యక్షులు వైఎస్ జగన్‌మోహన్‌రెడ్డితో ములాఖత్ అవుతారు. పాదయాత్రలో తన దృష్టికి వచ్చిన ప్రజల కన్నీళ్లు, కష్టాలను ఆమె నేరుగా జగన్‌మోహన్‌రెడ్డికి వివరించనున్నారు. 
  భారీ స్వాగత సన్నాహం
  
  ప్రపంచ చరిత్రలో ఏ మహిళ చేయని విధంగా 3112 కి.మీ.ల పాదయాత్రతో రికార్డు సృష్టించిన షర్మిలకు శంషాబాద్‌లో పార్టీ శ్రేణులు, వైఎస్ కుటుంబ అభిమానులు భారీ స్వాగతం పలకనున్నారు. శంషాబాద్ నుంచి కాటేదాన్, చాంద్రాయణగుట్ట క్రాస్‌రోడ్డు ఫ్లైఓవర్ కింద నుంచి కంచన్‌బాగ్, ఒవైసీ ఆస్పత్రి, ఐఎస్ సదన్ మీదుగా చంచల్‌గూడకు చేరుకుంటారని వైఎస్సార్ కాంగ్రెస్ నగర పార్టీ కన్వీనర్ ఆదం విజయ్‌కుమార్, యువజన విభాగం అధ్యక్షులు పుత్తా ప్రతాప్‌రెడ్డిలు తెలిపారు. 
  తరలిరండి: జనార్దన్‌రెడ్డి
  
  సోమవారం నగరానికి చేరుకోనున్న షర్మిలకు దారిపొడవునా ఘన స్వాగతం పలుకుతామని వైఎస్సార్ కాంగ్రెస్ పార్టీ రాష్ట్ర నాయకుడు బి.జనార్దన్‌రెడ్డి తెలిపారు. ఆదివారం అత్తాపూర్‌లో ఆయన విలేకరుల సమావేశంలో మాట్లాడారు. విమానాశ్రయం నుంచి చంచల్‌గూడ జైలు వరకు షర్మిలకు అడుగడుగునా స్వాగ తం పలికే కార్యక్రమానికి పార్టీ కార్యకర్తలు, అభిమానులు పెద్దసంఖ్యలో తరలిరావాలని విజ్ఞప్తి చేశారు.