క్లుప్తంగా

కనెక్షన్‌ ఇవ్వకుండానే రూ.428 విద్యుత్‌ బిల్లు వసూలు

తిరువొత్తియూరు: కడలూరు జిల్లా సేథియాతోప్పు సమీపంలోని మదువానైమేడు గ్రామానికి చెందిన విజయకుమార్‌ (48) రైతు. ఈయన కొత్త ఇల్లు నిర్మిస్తున్న తరుణంలో, ముందస్తుగానే విద్యుత్‌ కనెక్షన్‌ పొందడం కోసం ఆన్‌లైన్‌ ద్వారా డబ్బులు చెల్లించారు. అయితే ఇప్పటివరకు ఆయనకు విద్యుత్‌ కనెక్షన్‌ కానీ లేదా కొత్త మీటర్‌ బాక్స్‌ కానీ అందించలేదు. ఇలాంటి పరిస్థితుల్లో, ఎలాంటి విద్యుత్‌ వినియోగం లేని ఆయనకు అకస్మాత్తుగా రూ. 428 విద్యుత్‌ బిల్లు వచ్చింది. దీనిని చూసి షాక్‌కు గురైన విజయకుమార్‌ ఆ మొత్తాన్ని చెల్లించి రశీదును కూడా తీసుకున్నారు. అంతేకాకుండా, కొత్త విద్యుత్‌ కనెక్షన్‌ ఆలస్యం కావడం వల్ల ఇంటి నిర్మాణ పనుల కోసం నీళ్లు తోడటానికి ట్రాక్టర్‌ను ఉపయోగించాల్సి వచ్చింది. దీంతో ఆయన మరింత ఆర్థిక ఇబ్బందులను ఎదుర్కొన్నారు. ఈ సమస్యపై త్వరలోనే జిల్లా కలెక్టర్‌ను నేరుగా కలిసి ఫిర్యాదు చేయాలని ఆయన నిర్ణయించుకున్నారు.

కరూర్‌లో పెంపుడు కుక్కకు బేబీ షవర్‌

అన్నానగర్‌: కరూర్‌ జిల్లాలోని సోమూర్‌కి చెందిన గోమతి. ఆమె తన ఇంట్లో ’సారా’ అనే సిట్సు జాతి కుక్కను పెంచుకుంటుంది. కుటుంబ సభ్యులందరూ సారాను తమ కుటుంబ సభ్యురాలిగా భావిస్తూ, దానిని ఎంతో ప్రేమగా పెంచుకుంటారు.ఈ పరిస్థితిలో, గర్భవతిగా ఉన్న సారా 15 నుండి 20వ తేదీల మధ్య ప్రసవించే అవకాశం ఉంది. అందువల్ల, మహిళలకు జరిపే బేబీ షవర్‌ వేడుకను పోలిన విధంగా గోమతి, ఆమె కుటుంబం మంగళవారం తమ పెంపుడు కుక్క సారాకు బేబీ షవర్‌ వేడుకను నిర్వహించారు. ఆ సమయంలో సారాకు ఇష్టమైన మిక్శర్‌, బిస్కెట్లు, పండ్లు, పువ్వులు, కుక్కల కోసం ప్రత్యేకంగా తయారుచేసిన ఆహారం ఉన్నాయి. వస్తువులను బహుమతిగా తెచ్చి బల్ల పై పెట్టారు. తర్వాత సారాకు ఒక కంకణం ఇచ్చారు. గోమతి బంధువులతో సహా 20 మందికి పైగా ఈ కార్యక్రమానికి హాజరయ్యారు. అందరికీ విందు ఏర్పాటు చేశారు.

తలపై రాయి విసిరి

రౌడీ హత్య

అన్నానగర్‌: మదురైలో తల పై రాయి విసిరి రౌడీని చంపిన స్నేహితుడి కోసం పోలీసులు గాలిస్తున్నారు. మధురై సోలైళకుపురానికి చెందిన మణి (30) పై పలు పోలీస్‌ స్టేషన్లలో కేసులు పెండింగ్‌లో ఉన్నాయి. నేర నిందితుడైన ఇతని పై పోలీసులు చురుకుగా నిఘా పెట్టారు. ఇతని స్నేహితుడు, సుబ్రమణియాపురం అరిజన్‌ కాలనీకి చెందిన దివాకర్‌ (30). నకిలీ నోట్లను చలామణి చేయడంతో సహా పలు కేసులు అతని పై పెండింగ్‌లో ఉన్నాయి. ఈ నేపథ్యంలో, బుధవారం రాత్రి మణి, దివాకర్‌ ఆ ప్రాంతంలోని ఒక టాస్మాక్‌ దుకాణంలో మద్యం సేవించారు. అనంతరం, ఒకరిపై ఒకరు దాడి చేసుకున్నారు. గొడవతో ఆగ్రహానికి గురైన దివాకర్‌, అక్కడ పడి ఉన్న రాయిని తీసుకుని మణి తలపై బలంగా కొట్టి అతడిని చంపి పారిపోయాడు. ఆ ప్రాంత ప్రజల నుంచి సమాచారం అందుకున్న జైహింద్‌పురం పోలీసులు సంఘటనా స్థలానికి చేరుకున్నారు. మణి మృతదేహాన్ని స్వాధీనం చేసుకుని శవ పరీక్ష కోసం మదురై ప్రభుత్వ ఆసుపత్రికి తరలించి పోలీసులు కేసు దర్యాప్తు చేస్తున్నారు.

ప్రముఖ సంస్థకు చెందిన చాక్లెట్‌లో పురుగులు

తిరువొత్తియూరు: దిండుకల్‌ జిల్లా, కొడైకెనాల్‌ కీళ్‌భూమి ప్రాంతానికి చెందిన బెనిక్‌ అనే వ్యక్తి, రెండు రోజుల క్రితం నగరంలోని అన్నాసాలైలో ఉన్న ఒక ప్రముఖ దుకాణంలో ఓ ప్రముఖ కంపెనీకి చెందిన చాక్లెట్‌ను కొనుగోలు చేశారు. ఇంటికి వచ్చిన తర్వాత అతని కుమార్తె ఆ చాక్లెట్‌ కవర్‌ను సగం తెరిచి తిన్నది. ఆ తర్వాత చాక్లెట్‌ పై ఉన్న పూర్తి కవర్‌ను తొలగించడానికి ప్రయత్నించినప్పుడు, అందులో ఒక పురుగు కనిపించింది. పురుగుతో ఉన్న ఆ చాక్లెట్‌ను ఫొటో తీసిన బెనిక్‌, ఆహార భద్రతా విభాగానికి ఫిర్యాదు చేసి సదరు ప్రముఖ చాక్లెట్‌ కంపెనీకి ఈ–మెయిల్‌ ద్వారా ఫిర్యాదును పంపారు. దీనికి స్పందనగా, తమ కంపెనీ ఉద్యోగులు మిమ్మల్ని సంప్రదిస్తారని ఆ కంపెనీ నుండి ఈ–మెయిల్‌ సమాధానం వచ్చింది. ఇదిలా ఉండగా బెనిక్‌ మాట్లాడుతూ ఆహార భద్రతా విభాగంలో ఫిర్యాదు చేయడంతో పాటు, కోర్టులో కేసు కూడా వేయబోతున్నాను. పిల్లలకు చాక్లెట్లు కొనిచ్చే తల్లిదండ్రులు, వాటిని పూర్తిగా తనిఖీ చేసిన తర్వాతే పిల్లలకు తినడానికి ఇవ్వాలి. ఈ చాక్లెట్‌ గత జూన్‌ నెలలో తయారు చేశారు, దీనిని 2027 సంవత్సరం వరకు ఉపయోగించవచ్చని కవర్‌పై ముద్రించి ఉండడం గమనార్హం అని తెలిపారు.