TV
శ్రీకాకుళం: రాజస్థాన్‌ రాష్ట్రంలోని జైపూర్‌లో జరిగిన పదో డిస్ట్రిబ్యూషన్‌ యుటిలిటీ మీట్‌–2026 కార్యక్రమంలో కాలిఫోర్నియా ప్రతినిధిగా గుండ శివగంగాధర్‌ పాల్గొన్నారు. దివంగత శ్రీకాకుళం మాజీ ఎమ్మెల్యే గుండ అప్పలసూర్యనారాయణ, లక్ష్మీదేవిల పెద్ద కుమారుడైన శివగంగాధర్‌ కాలిఫోర్నియాలో ఆ రాష్ట్ర ఎనర్జీ కమిషన్‌ వైస్‌ చైర్మన్‌గా పనిచేస్తున్నారు. ఆయనను జైపూర్‌లో పారిశ్రామిక రంగం అభివృద్ధిలో భాగంగా జరుగుతున్న యుటిలిటీ మీట్‌లో ఆ దేశ ప్రతినిధిగా హాజరయ్యేందుకు పంపించారు. రాజస్థాన్‌ రాష్ట్రం విద్యుత్‌ రంగం అభివృద్ధి పురోగతిలో భాగంగా కాలిఫోర్నియా రాష్ట్రంతో కుదుర్చుకున్న ఒప్పందంపై సంతకం చేసేందుకు గాను ఆయన భారతదేశానికి వచ్చారు. మంగళవారం ఈ ఒప్పందంపై రాజస్థాన్‌ రాష్ట్ర విద్యుత్‌ శాఖ మంత్రి, ప్రిన్సిపల్‌ సెక్రటరీలతో కలిసి ఒప్పందాలపై సంతకాలు చేసుకున్నారు. ఈ సందర్భంగా ఆయన మాట్లాడుతూ తాను పుట్టిన దేశానికి కాలిఫోర్నియా ప్రతినిధిగా హాజరు కావడం సంతోషం కలిగించిందని పేర్కొన్నారు. దేశ అభివృద్ధికి వృత్తిరీత్యా తనవంతు సహాయ, సహకారాలు అందిస్తామని చెప్పారు.
