రాకపోకలంటేనే హడల్‌

సైదాపురం: మండలంలోని ఆర్‌ అండ్‌ బీ రోడ్లు దుర్భరంగా మారాయి. గుంతలు ఏర్పడినా, వాటిని పూడ్చే దిశగా ఎలాంటి చర్యలు చేపట్టడంలేదు. ఫలితంగా సైదాపురం నుంచి పొదలకూరుకు వెళ్లే రహదారిలో అడుగుకో గుంత దర్శనమిస్తోంది. దాదాపు 23 కిలోమీటర్లున్న ఈ రహదారిలో సుమారు పది కిలోమీటర్లలో ప్రయాణం వాహనదారులకు చుక్కలను చూపుతోంది. దాదాపు గంట పడుతోందని వాహనదారులు మండిపడుతున్నారు. మరోవైపు గుంతల్లో వర్షపు నీరు నిలుస్తుండటంతో ప్రమాదాల బారిన పడాల్సి వస్తోంది. అధికారులు స్పందించి సమస్యను పరిష్కరించాలని కోరుతున్నారు.

ట్రాక్టర్‌ బోల్తా: వ్యక్తి మృతి

వెంకటగిరి రూరల్‌: ట్రాక్టర్‌ బోల్తాపడిన ఘటనలో వ్యక్తి మృతి చెందిన ఘటన బాలాయపల్లి మండలంలోని జయంపులో మంగళవారం చోటుచేసుకుంది. స్థానికులు, పోలీసుల వివరాల మేరకు.. స్థానిక గిరిజన కాలనీకి చెందిన సంజీవయ్య (37).. జయంపు సమీపంలోని పొలంలో ట్రాక్టర్‌ ద్వారా దుక్కి దున్నుతున్నారు. ఈ క్రమంలో ట్రాక్టర్‌ అదుపుతప్పి బోల్తాపడింది. బురదలో సంజీవయ్య ఇరుక్కపోయి ఊపిరాడక అక్కడికక్కడే మృతి చెందారు. జేసీబీ సాయంతో ట్రాక్టర్‌ను పక్కకు తొలగించి మృతదేహాన్ని వెలికి తీశారు. కేసు దర్యాప్తు చేస్తున్నారు.