TV
అంత‌ర్జాతీయ వ‌న్డేల్లో స్కాట్లాండ్ ఆల్ రౌండర్ బ్రాండన్ మెక్‌ముల్లెన్ అరుదైన ఘనత సాధించాడు. వన్డే ఫార్మాట్‌లో అత్యంత వేగంగా 1000 ప‌రుగుల‌తో పాటు 50 వికెట్లు సాధించిన రెండో ఆట‌గాడిగా మెక్‌ముల్లెన్ చరిత్ర సృష్టించాడు. ఐసీసీ వన్డే ప్రపంచకప్ 2023-27 లీగ్ టూలో భాగంగా నెదర్లాండ్స్‌తో జరిగిన ఈ మ్యాచ్‌లో బ్రాండన్ ఈ రికార్డు సాధించాడు.
ఈ ఫీట్‌ను స్కాటిష్ ఆల్‌రౌండర్ తన 33వ వన్డే ఇన్నింగ్స్‌లోనే అందుకోవడం విశేషం. ఈ క్రమంలో దిగ్గజ క్రికెటర్లు కపిల్‌దేవ్‌(46 ఇన్నింగ్స్‌లు), లాన్స్ క్లూసెనర్(42 ఇన్నింగ్స్‌లు), స్టీవ్ వా (46 ఇన్నింగ్స్‌లు) షకీబ్ అల్ హసన్‌(50 ఇన్నింగ్స్‌లు)ను మెక్‌ముల్లెన్ అధిగమించాడు. కాగా ఈ అరుదైన ఫీట్ సాధించిన జాబితాలో నెదర్లాండ్స్ క్రికెట్ దిగ్గజం ర్యాన్ టెన్ డెష్కాట్ అగ్రస్ధానంలో ఉన్నాడు.
డెష్కాట్ కేవలం 25 వన్డే ఇన్నింగ్స్‌లలోనే ఈ ఘనత సాధించాడు. ఇక బ్రాండన్ మెక్‌ముల్లెన్.. తన 33 మ్యాచ్‌ల వన్డే కెరీర్‌లో 4 సెంచరీలు, 4 అర్ధ సెంచరీలతో సహా 1,149 పరుగులు చేశాడు. అతడి అత్యధిక స్కోర్ 151గా ఉంది. అదేవిధంగా 20.09 సగటుతో 52 వికెట్లు పడగొట్టాడు. ఇందులో ఓ ఫైవ్ వికెట్ హాల్ కూడా ఉంది.
డచ్ జట్టు చిత్తు..
కాగా మ్యాచ్ విషయానికి వస్తే.. డచ్ జట్టుపై స్కాట్లాండ్ 44 పరుగుల తేడాతో విజయం సాధించింది. తొలుత బ్యాటింగ్ చేసిన స్కాట్లాండ్ నిర్ణీత 50 ఓవర్లలో 9 వికెట్ల నష్టానికి 262 పరుగులు చేసింది. స్కాటిష్ బ్యాటర్లలో ఫిన్లే మెక్‌క్రీత్ (106 బంతుల్లో 7 ఫోర్లు ఒక సిక్సర్‌తో 81) టాప్ స్కోరర్‌గా నిలవగా..మార్క్ వాట్ (72 బంతుల్లో 5 ఫోర్లు, 2 సిక్సర్‌లతో 60) అర్ధ సెంచరీతో రాణించాడు. అనంతరం లక్ష్య చేధనలో నెదర్లాండ్స్ 45 ఓవర్లలో 218 పరుగులకే ఆలౌటైంది.
