IND vs NZ: టీమిండియా సరికొత్త చరిత్ర.. ప్రపంచంలోనే తొలి జట్టుగా

అంతర్జాతీయ టి20 క్రికెట్‌లో టీమిండియా సరికొత్త ప్రపంచ రికార్డును నెలకొల్పింది.  ఒక క్యాలెండర్ ఇయర్‌లో 400 సిక్సర్లు బాదిన తొలి జట్టుగా భారత్ చరిత్ర సృష్టించింది. ఆదివారం హామిల్ట‌న్ వేదిక‌గా న్యూజిలాండ్‌తో జ‌రిగిన ఐదో టీ20లో శ్రేయ‌స్ సేన ఈ ఫీట్ సాధించింది.

ఈ ఆఖ‌రి మ్యాచ్‌లో భార‌త్  11 సిక్సర్లు బాది ఈ ఘనత న‌మోదు చేసింది. ఈ ఏడాది ఆడిన 40 టీ20 మ్యాచ్‌లలో భారత్ మొత్తం 400 సిక్సర్లు సాధించింది. త‌ర్వాత స్ధానాల్లో ఆస్ట్రియా (24 మ్యాచ్‌ల్లో 224 సిక్సర్లు), వెస్టిండీస్ (21 మ్యాచ్‌ల్లో 224 సిక్సర్లు) ఉన్నాయి.

కాగా ఈ ఏడాది భారత్ సాధించిన 400 సిక్సర్లలో ఒక్క న్యూజిలాండ్‌పైనే ఏకంగా 142 సిక్సర్లు బాదడం గమనార్హం. ఒక క్యాలెండర్ ఇయర్‌లో ఒక ప్రత్యర్థి జట్టుపై ఒక టీమ్‌ సాధించిన అత్యధిక సిక్సర్లు ఇవే.

ఈ ఏడాది టీ20ల్లో అత్య‌ధిక సిక్స‌ర్లు కొట్టిన భార‌త‌ బ్యాట‌ర్లు వీరే

అభిషేక్ శర్మ: 86 సిక్సర్లు

ఇషాన్ కిషన్: 60 సిక్సర్లు

సంజూ శాంసన్: 50 సిక్సర్లు

టీమిండియా ఓట‌మి
కాగా ఈ మ్యాచ్‌లో 7 వికెట్లు తేడాతో టీమిండియా ఓట‌మిపాలైంది. 192 ప‌రుగుల ల‌క్ష్యాన్ని కివీస్ కేవ‌లం మూడు వికెట్లు మాత్ర‌మే కోల్పోయి 18 ఓవ‌ర్ల‌లోనే చేధించింది. కివీస్ విజ‌యంలో టిమ్ సీఫెర్ట్‌(93), గ్లెన్ ఫిలిప్స్‌(65) కీల‌క పాత్ర పోషించారు. అంత‌కుముందు బ్యాటింగ్ చేసిన భార‌త్ 8 వికెట్ల న‌ష్టానికి 191 ప‌రుగులు చేసింది.
చదవండి: ఫైన‌ల్లో ఆస్ట్రేలియా చిత్తు.. ఛాంపియ‌న్స్‌గా అఫ్గానిస్తాన్‌