వెంచర్‌లో క్షుద్రపూజల కలకలం

చేర్యాల(సిద్దిపేట): పట్టణ శివారులోని ఓ వెంచర్‌లో గుర్తుతెలియని వ్యక్తులు క్షుద్రపూజలు చేసిన ఘటన కలకలం రేపుతోంది. రోజు వారీలాగా ఉదయం వాకింగ్‌కు వెళ్లిన వాకర్స్‌ వెంచర్‌లోని ఓ ప్రదేశంలో పసుపు, కుంకుమ, నిమ్మకాయలతో పాటు చిన్న పందిపిల్ల ఉండటం గమనించి ఆందోళనకు గురయ్యారు. గుర్తుతెలియని వ్యక్తులు రాత్రి వేళ ఈ చర్యకు పాల్పడి ఉంటారని అనుమానం వ్యక్తం చేస్తున్నారు. ఈ ఘటన వెనుక కారణాలేమై ఉంటాయన్నది చర్చనీయాంశంగా మారింది. వెంచర్‌లో చోటు చేసుకున్న ఈ క్షుద్ర పూజల ఘటనపై స్థానికులు పలు అనుమానాలు వ్యక్తం చేస్తున్నారు. ఇదే విషయమై ఎస్‌ఐ అపూర్వరెడ్డితో మాట్లాడగా.. తమ దృష్టికి రాలేదని, అలాంటి మూఢనమ్మకాలను నమ్మవద్దని సూచించారు.