దుబ్బాక ఆస్పత్రిలో అరుదైన ఆపరేషన్‌

మహిళ కడుపులోంచి 6.1 కిలోల ఫైబ్రాయిడ్‌ గడ్డ తొలగింపు

దుబ్బాక: దుబ్బాక ప్రభుత్వ వంద పడకల ఆస్పత్రిలో వైద్యులు అరుదైన ఆపరేషన్‌ చేసి మహిళ ప్రాణాలు కాపాడారు. దవాఖాన సూపరింటెండెంట్‌, ప్రముఖ సర్జన్‌ హేమరాజ్‌సింగ్‌ ఆధ్వర్యంలో శనివారం ఈ ఆపరేషన్‌ చేశారు. వివరాలు ఇలా..కామారెడ్డి జిల్లా ఫరీద్‌పేట గ్రామానికి చెందిన కవిత(44) కొన్నేళ్లుగా తీవ్ర కడుపునొప్పితో బాధపడుతూ వివిధ ఆస్పత్రులకు వెళ్లినా నయం కాలేదు. ఈ క్రమంలో దుబ్బాక ఆస్పత్రికి రాగా ఆమెకు వైద్యపరీక్షలు నిర్వహించి కడుపులో ఫైబ్రాయిడ్‌ గడ్డ ఉందని వైద్యులు గుర్తించారు. దీంతో ఆమెకు ఆపరేషన్‌ చేసి కడుపులోంచి 6.1 కేజీల గడ్డను తొలగించారు. ప్రస్తుతం కవిత ఆరోగ్యం నిలకడగా ఉందని వైద్యులు తెలిపారు. ఈ ఆపరేషన్‌లో గైనకాలజిస్టు స్రవంతి, వైద్యులు ప్రేమ్‌కిశోర్‌, ఆస్మా, పూజ, ఆస్పత్రి సిబ్బంది పాల్గొన్నారు. కాగా శనివారం దుబ్బాక ఆస్పత్రిలో ఒకే రోజు ఆరోగ్యశ్రీ కింద 15 ఆపరేషన్లు చేసినట్లు సూపరింటెండెంట్‌ డాక్టర్‌ హేమరాజ్‌సింగ్‌ తెలిపారు.