గిరిజన వర్సిటీని సందర్శించిన జర్నలిస్టుల బృందం

విజయనగరం రూరల్‌: కేంద్ర ప్రభుత్వ పథకాలు అమలు, జరుగుతున్న అభివృద్ధిని క్షేత్రస్థాయిలో పరిశీలించే లక్ష్యంతో కేంద్ర సమాచార, ప్రచార మంత్రిత్వ శాఖ ఆధ్వర్యంలో పర్యటిస్తున్న పంజాబ్‌ జర్నలిస్టుల బృందం ఏపీ కేంద్రీయ గిరిజన విశ్వవిద్యాలయాన్ని సోమవారం సందర్శించింది. వర్సిటీ వీసీ టి.శ్రీనివాసన్‌, రిజిస్ట్రార్‌ జితేంద్రమోహన్‌ మిశ్రా, ఫైనాన్స్‌ అధికారి ఎం.శరత్‌చంద్రబాబు, వివిధ విభాగాల అధిపతులు, అధ్యాపక బృందంతో పాత్రికేయుల బృందం ప్రత్యేకంగా సమావేశమై ముఖాముఖి చర్చ నిర్వహించారు. వర్సిటీ పనితీరు, విద్యార్థులకు అందిస్తున్న ఉన్నత విద్యావకాశాలు, ప్రాంతీయ ప్రజల అభ్యున్నతికి సంస్థ చేపడుతున్న విద్యా, పరిశోధనా పురోగతిని అధ్యాపక బృందం జర్నలిస్టులకు సమగ్రంగా వివరించింది. కార్యక్రమాన్ని వర్సిటీ జర్నలిజం విభాగాధిపతి డాక్టర్‌ ఇప్పిలి తారకేశ్వరరావు సమన్వయం చేశారు.