సీనియారిటీకి ప్రాధాన్యమివ్వాలి

శ్రీకాకుళం పాతబస్టాండ్‌ : రానున్న పంచాయతీ ఎన్నికల్లో ఆర్‌ఓ, ఏఆర్‌ఓ నియామకాల్లో సీనియారిటీకి ప్రాధాన్యమివ్వాలని, స్టేజ్‌–1, స్టేజ్‌–2 ఆర్వోలలో ఏదో ఒక డ్యూటీ మాత్రమే వేయాలని ఏపీటీఎఫ్‌ జిల్లా ప్రధాన కార్యదర్శి బుక్కూరు వెంకటేశ్వర్లు, అదనపు కార్యదర్శి పి.బాలాజీ, ఉపాధ్యక్షులు బి.నవీన్‌ కోరారు. ఈ మేరకు మంగళవారం డీఆర్‌ఓ వి.విశ్వేశ్వరరావును ఆయన చాంబర్‌లో కలిసి వినతిపత్రం అందించారు. దీర్ఘకాలిక వ్యాధిగ్రస్తులకు, గర్భిణులకు, బాలింతలకు మినహాయింపులు ఇవ్వాలని, ఎన్నికల మరుసటి రోజు జర్నీడేగా ఓడీని కేటాయించాలని, డిస్ట్రిబ్యూషన్‌ రిసెప్షన్‌ కౌంటర్లలో గందరగోళం లేకుండా చూడాలని, ఎలక్షన్‌ కమిషన్‌ నిర్ణయించిన పారితోషికాన్ని చెల్లించాలని విన్నవించారు.

ఆదిత్య కళాశాలకు అవార్డు

టెక్కలి: ఇండియన్‌ సొసైటీ ఫర్‌ టెక్నికల్‌ ఎడ్యుకేషన్‌ (ఐఎస్‌టీఈ) 2026 సంవత్సరానికి ప్రకటించిన ఉత్తమ ఇంజినీరింగ్‌ కళాశాల విభాగంలో టెక్కలి ఆదిత్య ఇంజినీరింగ్‌ కళాశాలకు అవార్డు లభించింది. ఈ మేరకు మంగళవారం ఒక ప్రకటన విడుదల చేశారు. బెస్ట్‌ ఇంజినీరింగ్‌ కళాశాల విభాగంలో ఆదిత్య కళాశాలకు ఈ అవార్డు దక్కింది. విద్యా ప్రమాణాలు, నాణ్యమైన బోధన అంశాలను పరిగణనలోకి తీసుకుని ఉత్తమ కళాశాలగా ఎంపిక చేసినట్లు పేర్కొన్నారు. అనంతపురం శ్రీనివాస రామానుజన్‌ ఇన్‌స్టిట్యూట్‌ ఆఫ్‌ టెక్నాలజీ ఆధ్వర్యంలో నిర్వహించిన అవార్డుల ప్రదానోత్సవ కార్యక్రమంలో భాగంగా విజయనగరం జేఎన్‌టీయూ వీసీ ప్రొఫెసర్‌ వి.వి.సుబ్బారావు, ఐఎస్‌టీఈ ఏపీ చైర్మన్‌ ప్రొఫెసర్‌ జి.రంగ జనార్దన, కార్యవర్గ సభ్యుడు శంభుప్రసాద్‌ చేతుల మీదుగా కళాశాల డైరెక్టర్లు వి.వి.నాగేశ్వరరావు, కె.మధుకుమార్‌ తదితరులు అవార్డును అందుకున్నారు. ఈ సందర్భంగా ప్రిన్సిపాల్‌ ఎ.ఎస్‌.శ్రీనివాసరావుతో పాటు అన్ని విభాగాల అధ్యాపక, అధ్యాపకేత సిబ్బంది అభినందనలు తెలిపారు.