అంగరంగ వైభవంగా..

ఇంద్రకీలాద్రి(విజయవాడపశ్చిమ): ఇంద్రకీలాద్రిపై దుర్గమ్మ సన్నిధిలో కుంభాభిషేక మహోత్సవాలు శుక్రవారం అంగరంగ వైభవంగా ప్రారంభమయ్యాయి. ఉత్సవాల్లో తొలి రోజు గంగా పార్వతీ సమేత మల్లేశ్వరస్వామివార్ల ఉత్సవ మూర్తులతో అర్చకులు, వేద పండితులు, ఈవో శీనానాయక్‌, చైర్మన్‌ రాధాకృష్ణ, ఆలయ అధికారులు, సిబ్బంది మోడల్‌ గెస్ట్‌ హౌస్‌ సమీపంలోని వీఐపీ స్నానఘాట్‌కు చేరుకున్నారు. మేళతాళాలు, మంగళవాయిద్యాల నడుమ స్నానఘాట్‌ నుంచి పవిత్ర జలాలను కలశాలతో తీసుకుని కనకదుర్గ నగర్‌కు చేరుకున్నారు. అక్కడి నుంచి అర్చకులు కుటుంబ సమేతంగా కలశాలతో ఆలయ ప్రాంగణంలోని కళావేదిక వద్దకు చేరుకుని పూజలు చేశారు. అమ్మవారి ఆలయ ప్రాంగణంలో పలువురు కళాకారులు కోలాట నృత్యాలు, భక్తి గీతాల ఆలాపన, కూచిపూడి నృత్య ప్రదర్శన ఇచ్చారు. అమ్మవారి దర్శనానికి విచ్చేసిన భక్తులు ఆలయ ప్రాంగణంలో ఏర్పాటు చేసిన సాంస్కృతిక, భక్తి గీతాలను వీక్షించి తరించారు. ఉత్సవాలను పురస్కరించుకుని శుక్రవారం 11 వేల మంది భక్తులకు అమ్మవారి అన్న ప్రసాద వితరణ జరిగింది. క్యూలోని చిన్నారుల కోసం వంద లీటర్ల పాలు, భక్తుల కోసం పది వేల మజ్జిగ ప్యాకెట్లు, చిన్నారులకు బిస్కెట్‌ ప్యాకెట్లను పంపిణీ చేశారు. సాయంత్రం కూడా అన్న ప్రసాద వితరణ జరిగింది. భక్తులు పెద్ద సంఖ్యలో తరలివచ్చారు.

పవిత్ర జలాలతో యాగశాల ప్రవేశం