వెంటనే పసిగట్టే కళ్లు

కర్నూలు: ఈ కెమెరాకు ఒళ్లంతా కళ్లే. ఏ తప్పు చేసినా దొరికిపోతారు. ఒక్క ముక్కలో చెప్పాలంటే దీనికి చిక్కితే కష్టాలే. పోలీసులు వినియోగిస్తున్న బాడీ వార్న్‌ (బీడబ్ల్యూఎస్‌) వీడియో పరికరానికి ఎన్నో ప్రత్యేకతలు ఉన్నాయి. ఈ పరికరాన్ని జిల్లాలో ఇంతకుముందు నుంచే వాడినా మున్సిపల్‌ ఎన్నికల నేపథ్యంలో ఇంకా విస్తృతంగా వినియోగించనున్నారు. అరచేతిలో ఇమిడిపోయే దీనిని పోలీసులు భుజం, ఛాతి, తలభాగంలో అమర్చుకుని విధులు నిర్వహిస్తారు. ఏకకాలంలో వీడియో, ఫొటో చిత్రీకరణతో పాటు శబ్ధాలను నమోదు చేస్తుంది. గతంలో తుంగభద్ర పుష్కరాలు, పంచాయతీ ఎన్నికల్లో వీటి వినియోగం సత్ఫలితాలు ఇవ్వడంతో పుర పోరులోనూ వినియోగించనున్నారు. జిల్లాలో 78 పరికరాలు అందుబాటులో ఉన్నాయి. డీఎస్పీ, సీఐల పర్యవేక్షణలో పనిచేసే బృందాలు వీటిని వినియోగించి రౌడీ, అల్లరిమూకల ఆట కట్టించనున్నారు. సమస్యాత్మక, అత్యంత సమస్యాత్మక కేంద్రాలతో పాటు రద్దీ ప్రాంతాల్లో వీటితో నిఘా వేయనున్నారు. వీటి వాడకంపై పోలీసులకు పలు దఫాలుగా శిక్షణ కూడా ఇచ్చారు.

పాత నేరస్తులు తారసపడితే

అప్రమత్తం చేస్తుంది

ఈ పరికరానికి ఉన్న మరో ప్రత్యేకత ముఖాన్ని గుర్తించడం (ఫేస్‌ రికగ్నైజేషన్‌). జిల్లాలోని పాత నేరస్తులు, రౌడీ షీటర్లు, సమస్యాత్మక వ్యక్తుల ఫొటోలు స్కాన్‌ చేసి ఇందులో పొందుపరిస్తే చాలు ఆ వ్యక్తి ఎక్కడ తారసపడినా ఈ పరికరం పోలీసులను అప్రమత్తం చేస్తుంది.

పుర పోరుకు బాడీ వార్న్‌ కెమెరాలతో

పోలీసు నిఘా

అందుబాటులో 78 పరికరాలు

సమస్యాత్మక, రద్దీ ప్రాంతాల్లో వినియోగం