‘హిట్‌ 3’లోని వయెలెన్స్‌ని ఎంజాయ్‌ చేస్తారు: నాని

‘‘హిట్‌ ఫ్రాంచైజీలో వచ్చిన ‘హిట్‌: ది ఫస్ట్‌ కేస్, హిట్‌: ది సెకండ్‌ కేస్‌’ రెండూ కూడా ఇన్వెస్టిగేటివ్‌ థ్రిల్లర్స్‌. ‘హిట్‌: 3’లో యాక్షన్, వయొలెన్స్‌ కథ డిమాండ్‌ని బట్టి వచ్చాయి. ఇది రెగ్యులర్‌ సినిమాల్లా ఉండదు. సహజంగా కుదిరిన కొన్ని అంశాలు విజిల్స్‌ వేయించేలా ఉంటాయి’’ అని హీరో నాని చెప్పారు. శైలేష్‌ కొలను దర్శకత్వంలో నాని, శ్రీనిధీ శెట్టి జంటగా నటించిన చిత్రం ‘హిట్‌: ది థర్డ్‌ కేస్‌’. యునానిమస్‌ ప్రొడక్షన్స్‌తో కలిసి వాల్‌ పోస్టర్‌ సినిమాపై ప్రశాంతి తిపిర్నేని నిర్మించిన ఈ సినిమా నేడు పాన్‌ ఇండియా స్థాయిలో విడుదలైంది. ఈ సందర్భంగా నాని పంచుకున్న విశేషాలు.

‘హిట్‌ 3’ షూటింగ్‌ కోసం దేశమంతా తిరిగాం. అలాగే ప్రమోషన్స్‌ కోసం కూడా దేశం మొత్తం తిరిగాం... ఆడియన్స్‌ నుంచి మంచి స్పందన వచ్చింది. ‘హిట్‌ 3’ చూడాలని వారు ఫిక్స్‌ అయిపోయారు. సినిమా విడుదల కాక ముందే అలాంటి ఒక ΄పాజిటివ్‌ వైబ్‌ రావడం చాలా హ్యాపీగా ఉంది. ఈ చిత్రంలోని వయొలెన్స్‌ డిస్ట్రబ్‌ చేసేలా ఉండదు. ‘సలార్‌’ సినిమాలోని యాక్షన్‌ని ఎంజాయ్‌ చేసినట్లు ‘హిట్‌ 3’ యాక్షన్‌ని కూడా ఎంజాయ్‌ చేస్తారు. చిన్నపిల్లలు ఈ సినిమా చూడొద్దనే ‘ఎ’ సర్టిఫికెట్‌ ఇచ్చారు. నా కొడుక్కి కూడా ఈ మూవీ చూపించను. ఈ సినిమా నేనే చేయడానికి కారణం ఏంటి? అనేది సినిమా చూస్తున్నప్పుడు ప్రేక్షకులకే అర్థం అవుతుందని భావిస్తున్నాను.

వయొలెంట్‌ సినిమాలు చేయడాన్ని నేను ట్రాన్స్‌ఫర్మేషన్‌గా చూడటం లేదు. ప్రతి సినిమానీ కొత్త జానర్‌లో చేయాలని ప్రయత్నం చేస్తాను. ‘జెర్సీ, హాయ్‌ నాన్న, దసరా’... ఇప్పుడు ‘హిట్‌ 3’... ఇవన్నీ వైవిధ్యమైన జానర్లలో చేసిన సినిమాలే. ‘హిట్‌ 3’ వైవిధ్యమైన జానర్‌ సినిమా. అన్ని వర్గాలు అని కాకుండా ఓ వర్గం ప్రేక్షకులను మెప్పించినా కచ్చితంగా సినిమా బ్లాక్‌ బస్టర్‌ అవుతుంది. నేను నా పనిని చాలా ఎంజాయ్‌ చేస్తాను. అందుకే నాకు రా అండ్‌ ఇంటెన్స్‌ క్యారెక్టర్స్‌ చేయడం కష్టంగా అనిపించదు.  

శైలేష్‌ కొలను ‘హిట్‌’ లాంటి ఇంటెన్స్‌ యాక్షన్‌ సినిమాలు తీస్తున్నాడు కానీ, తన మాటల్లోనే జోకులు పేలిపోతుంటాయి. తనకి ఒక మంచి కామెడీ స్క్రిప్ట్‌ రాయమని చెప్పాను. ఈ మధ్య ప్రేక్షకులు థియేటర్స్‌కి రావడం లేదని తరచుగా వింటున్నాం. ఆ మాట తప్పు. వారిని థియేటర్లకు రప్పించే కంటెంట్‌తో సినిమాలు తీయడం మేకర్స్‌ బాధ్యత. ‘హిట్‌ 3’ అడ్వాన్స్‌ టికెట్‌ బుకింగ్స్‌ చూస్తుంటే చాలా ఆనందంగా ఉంది. 

మన సినిమా మాత్రమే హిట్‌ కావాలనుకోవడం తప్పు. అన్ని సినిమాలు బాగా ఆడితేనే మన సినిమా ఇంకా బాగా ఆడుతుంది. ఇండస్ట్రీలోని వారందరూ అన్ని సినిమాలూ హిట్టవ్వాలని కోరుకోవాలి.. అప్పుడే ఇండస్ట్రీ బాగుంటుంది. ఇక చిరంజీవిగారి అభిమాని అయిన నేను ఆయనతో సినిమా నిర్మించనున్నానంటే ఇంకా జీర్ణించుకోలేకపోతున్నా (నవ్వుతూ).. ఇదొక ప్రౌడ్‌ మూమెంట్‌. శ్రీకాంత్‌ ఓదెల చెప్పిన కథ చిరంజీవిగారికి నచ్చడంతో ఆయన చేసేందుకు ఒప్పుకున్నారు. నా తర్వాతి సినిమా ‘ప్యారడైజ్‌’ కూడా సరికొత్త కథాంశంతో ఉంటుంది.