TV
మెగా కోడలు లావణ్య త్రిపాఠి నటించిన తొలి తెలుగు సినిమా ‘అందాల రాక్షసి’. హను రాఘవపూడి దర్శకత్వ వహించిన ఈ చిత్రంలో నవీన్‌ చంద్ర, రాహుల్‌ రవీంద్ర హీరోలుగా నటించారు. వారిద్దరికి కూడా హీరోలుగా ఇదే తొలి సినిమా. 2012లో విడుదలైన ఈ ప్రేమకథా చిత్రం ఎంత సూపర్‌ హిట్‌ అయిందో అందరికి తెలిసిందే. సినిమాలోని డైలాగ్స్‌, పాటలు బాగా వైరల్‌ అయ్యాయి.
అప్పట్లో సూపర్‌ హిట్‌గా నిలిచిన ఈ క్లాసిక్‌ మూవీ ఇప్పుడు మరోసారి థియేటర్స్‌లోకి రాబోతుంది. జూన్‌ 13న ఈ చిత్రం రీరిలీజ్‌ కాబోతుంది. ఈ సందర్భంగా లావణ్యతో పాటు చిత్రబృందం అంతా మరోసారి సినిమా కోసం ప్రచారం చేస్తున్నారు. ఇంటర్వ్యూల్లో సినిమా షూటింగ్‌ నాటి అనుభవాలను పంచుకుంటున్నారు.
ఈ సందర్భంగా లావణ్య ఈ సినిమాకు సంబంధించి ఓ ఆసక్తికర విషయాన్ని షేర్‌ చేసుకుంది. హీరోలతో పాటు తను కూడా మేకప్‌ లేకుండానే నటించానని చెప్పింది. ఓ సారి అనుకోకుండా ముఖానికి మేకప్‌ వేసుకొని వస్తే.. దర్శకుడు హను రాఘవపూడి తిట్టాడని చెప్పింది.
‘ఈ సినిమా కోసం నేను ఎలాంటి మేకప్‌ వేసుకోలేదు. రియల్‌ హెయిర్‌తోనే నటించాను. కనీసం పౌడర్‌ కూడా వేసుకోలేదు. ఫస్ట్‌ షెడ్యూల్‌ షూటింగ్‌లోనే నేను పౌడర్‌ వేసుకొని సెట్‌కి వచ్చాను. దర్శకుడు హను ఫోటో తీసి నా దగ్గరకు వచ్చి జూమ్‌ చేసి చూపించాడు. నీ ముఖంపై పౌడర్‌ పటికలు ఎలా కనిపిస్తున్నాయో చూడు’ అన్నారు. వెంటనే నేను ముఖం కడుక్కొని వచ్చాను’ అంటూ నాటి షూటింగ్‌ అనుభవాలను లావణ్య పంచుకున్నారు. ఇక రాహుల్‌ మాట్లాడుతూ.. జీరో మేకప్‌తో సినిమా చేశాం. కనీసం సన్‌స్క్రీన్‌ కూడా వాడలేదని చెప్పారు.
