తండ్రి నిర్మాత.. కుమార్తె కథానాయిక

‘అలాంటి ఇలాంటి లాంచింగ్‌ కాదు.. ఓ రేంజ్‌లో ఉండాలి’ అన్నట్లు కుమార్తె సుహానా ఖాన్‌ వెండితెర అరంగేట్రానికి షారుక్‌ ఖాన్‌ రంగం సిద్ధం చేస్తున్నారట. ఇప్పటికే సుహానా నటిగా మేకప్‌ వేసుకుంది. జోయా అక్తర్‌ దర్శకత్వంలో ‘ది ఆర్చీస్‌’ అనే సినిమాలో నటిస్తోంది. ఈ చిత్రం ఓటీటీ ప్లాట్‌ఫామ్‌లో త్వరలో స్ట్రీమింగ్‌ కానుంది.

ఈలోపు సుహానా వెండితెరపై పరిచయం కావడానికి ఓ సినిమా సైన్‌ చేసిందని సమాచారం. కుమార్తె అరంగేట్రం అట్టహాసంగా జరగాలనే ఆలోచనతో తనకు ఇటీవల ‘పఠాన్‌’లాంటి హిట్‌ ఇచ్చిన దర్శకుడు సిద్ధార్థ్‌ ఆనంద్‌తో కలిసి ఈ చిత్రాన్ని నిర్మించాలని షారుక్‌ అనుకుంటున్నారట. అది మాత్రమే కాదు.. అతిథి పాత్ర కూడా చేయాలని అనుకుంటున్నారట. ప్రస్తుతం కథ రెడీ అవుతోందని సమాచారం. ఇంకా దర్శకుడి ఎంపిక జరగలేదని టాక్‌.