10.30 గంటలకు మొదటి రౌండ్‌ ఫలితాలు

కర్నూలు(సెంట్రల్‌): జెడ్పీటీసీ, ఎంపీటీసీ ఎన్నికల ఓట్ల లెక్కింపులో భాగంగా ఉదయం 10.30 గంటల్లోపు మొదటి రౌండ్‌ ఫలితాలు వెల్లడించాలని జిల్లా కలెక్టర్‌/జిల్లా ఎన్నికల అధికారి డాక్టర్‌ ఏ.సిరి అధికారులను ఆదేశించారు. శనివారం ఓట్ల లెక్కింపు సందర్భంగా శుక్రవారం ఆమె స్పెషల్‌ ఆఫీసర్లు, ఆర్వోలు, ఏఆర్వోలతో టెలీ కాన్ఫరెన్స్‌ నిర్వహించారు. ఈ సందర్భంగా మాట్లాడుతూ స్ట్రాంగ్‌ రూమ్‌ తెరవడం, సీల్‌ తొలగించడం, బ్యాలెట్‌ బాక్సులను బయటకు తీసే ప్రక్రియను పూర్తిగా వీడియోగ్రఫీ చేయాలన్నారు. ఉదయం 8 గంటలకు పోస్టల్‌ బ్యాలెట్ల లెక్కింపు ప్రారంభించాలన్నారు. కౌంటింగ్‌ ప్రారంభానికి ముందు ఉదయం 7 నుంచి 7.30 గంటల మధ్య సిబ్బందికి ప్రత్యేకంగా శిక్షణనిచ్చి ఓట్ల చెల్లుబాటుపై సందేహాలను నివృత్తి చేయాలన్నారు. కౌంటింగ్‌ ప్రారంభమైన తర్వాత ఏ కారణంతోనూ ప్రక్రియను నిలిపివేయడానికి వీల్లేదని కలెక్టర్‌ స్పష్టం చేశారు. టెలీ కాన్ఫరెన్స్‌లో జాయింట్‌ కలెక్టర్‌ నూరుల్‌ ఖమర్‌, జిల్లా పరిషత్‌ సీఈఓ సుధాకర్‌ రెడ్డి తదితరులు పాల్గొన్నారు.