ఐదు రోజుల పని విధానం అమలు చేయాలి

● ఈ నెల 28, 29, 30 తేదీల్లో బ్యాంకుల సమ్మె

కర్నూలు(అగ్రికల్చర్‌): ఐదు రోజుల పని దినాల విధానం తక్షణమే అమలు చేయాలని యునైటెడ్‌ ఫోరం ఆఫ్‌ బ్యాంక్‌ యూనియన్స్‌ జిల్లా నాయకులు డిమాండ్‌ చేశారు. బ్యాంకుల యాజమాన్య సంస్థ ఐబీఏ, బ్యాంకు యూనియన్స్‌ మధ్య జరిగిన ఒప్పందం అమలు చేయకపోవడంతో ఈ నెల 28, 29, 30 తేదీల్లో సమ్మె అనివార్యమైందని తెలిపారు. బ్యాంకుల మూడు రోజుల సమ్మెకు ముందస్తుగా గురువారం సాయంత్రం గాయత్రీ ఎస్టేటులోని యూనియన్‌ బ్యాంక్‌ ఆఫ్‌ ఇండియా బ్రాంచ్‌ వారు ఎదుట నిరసన కార్యక్రమాన్ని చేపట్టారు. ఈ సందర్భంగా యూఎఫ్‌బీయూ కన్వీనర్‌ నాగరాజు మాట్లాడుతూ.. ఐదు రోజుల పని దినాలు కల్పించే విధానం అమలు చేయాలని పలు దఫాలుగా కేంద్ర కార్మిక కమిషనర్‌ సమక్షంలో ఐబీఏ, ఆర్థిక శాఖ అధికారులతో జరిపిన చర్చల్లో ఎలాంటి హామీ ఇవ్వనందున సమ్మె అనివార్యమైందన్నారు. ఈ నెల 28 నుంచి చేపడుతున్న మూడు రోజుల సమ్మెను విజయవంతం చేయాలని పిలుపునిచ్చారు. ఈ సమ్మెకు అన్ని బ్యాంకుల ఖాతా దారులు సహకరించాలని కోరారు. ఆందోళనలో ఏఐబీఈఏ నాయకులు శివ కృష్ణ, వాసుదేవరెడ్డి, ఏఐబీఓసీ నాయకులు రాజు, సూర్య శివ పర్సాద్‌, పుష్పాకుమార్‌, ఏబీజీబీ నాయకులు హనుమంతరెడ్డి, రాఘవేంద్ర తదతరులు పాల్గొన్నారు.