TV
ఖమ్మంరూరల్: ఏదులాపురం మున్సిపాలిటీ పరిధి 29వ వార్డు శ్రీరాంనగర్లో ప్రతిష్ఠించిన వినాయకుడి వద్ద లడ్డూను ముస్లిం నాయకుడు వేలంలో దక్కించుకున్నాడు. మండపం నిర్వాహకులు లడ్డూ వేలం నిర్వహించగా కాలనీవాసులు పలువురు పోటీపడ్డారు. చివరకు వరంగల్ క్రాస్ రోడ్డుకు చెందిన ముస్లిం మైనార్టీ నేత షేక్ హుస్సేన్ రూ.60,500 సొంతం చేసుకున్నాడు. కాగా, హుస్సేన్ కొన్నేళ్లుగా ఈ ప్రాంతంలో కులమతాలకు అతీతంగా పండుగల్లో పాల్గొంటూ ఆదర్శంగా నిలుస్తున్నారు.
సత్తుపల్లిటౌన్: సత్తుపల్లిలోని శ్రీ ప్రసన్న గణపతి క్షేత్రం మహా గణనాథుడి చేతిలోని 24 కేజీల లడ్డూకు బుధవారం వేలం నిర్వహించారు. స్థానిక రింగ్ సెంటర్లో జరిగిన వేలంలో నారాయణపురానికి చెందిన మందపాటి కేశవరెడ్డి, అలవాల వెంకటరెడ్డి పోటీ పడగా చివరకు రూ.6,56,646తో కేశవరెడ్డి దక్కించుకున్నారు. ప్రసన్న గణపతి ట్రస్ట్ నిర్వాహకులు కూసంపూడి శ్రీనివాసరావు, వడ్లపట్ల ఫణికుమార్, బోనగిరి కృష్ణారావు, శ్రీను, రామ్మోహన్, రాజు, నాగేశ్వరరావు, దారా ఏకాదశమూర్తి, రామకృష్ణ పాల్గొన్నారు. అలాగే, గంగారంలో 111 కేజీల లడ్డూను మల్లిమొగ్గల సాయినాథ్ రూ.1.40లక్షలకు, రైతు బజార్ వద్ద గణపతి లడ్డూను రూ.20వేలకు రావి రంగారావు దక్కించుకున్నారు.
రూ.60,500కు లడ్డూ దక్కించుకున్న ముస్లిం నేత
