నామినేషన్ల జోరు

జగిత్యాల: సర్పంచ్‌, వార్డు సభ్యుల ఎన్నికలకు నోటిఫికేషన్‌ విడుదల కావడంతో గ్రామాల్లో రోజురోజుకు రాజకీయ వాతావరణం వేడెక్కుతోంది. మొదటి విడత నామినేషన్ల ప్రక్రియ శనివారం పూర్తి కావడంతో ఆదివారం నుంచి రెండో విడత నామినేషన్ల ప్రక్రియ మొదలు కానుంది. దీంతో రాజకీయ సమావేశాలతో పల్లెలు హోరెత్తుతున్నా యి. ఆశావహులు ఓటర్లను ప్రసన్నం చేసుకునే పని లో ఏ అవకాశం దొరికినా తమకు అనుకూలంగా మలుచుకునేలా విశ్వప్రయత్నాలు చేస్తున్నారు. గ్రామాల్లో రచ్చబండల వద్ద నిత్యం సమావేశాలతో జోరందుకుంటోంది. జిల్లాలోని మరో 7 మండలాల్లో నేటి నుంచి రెండో విడత నామినేషన్ల పర్వం మొదలుకావడంతో అభ్యర్థులు మంతనాలు మొదలుపెడుతున్నారు. రాత్రి, పగలు తేడా లేకుండా సమావేశాలు ఏర్పాటు చేస్తూ ‘అన్నా నేను నిలబడుతున్నా.. మాకు మద్దతు ఇవ్వాలి’ అంటూ బతిమి లాడుతున్నారు. రాత్రి చలిలో సైతం ఇంటింటికీ తిరుగుతూ బోట్లు అభ్యర్థిస్తున్నారు. సర్పంచ్‌ ఎన్నికలు పార్టీల గుర్తులతో కానప్పటికీ కాంగ్రెస్‌, బీఆర్‌ఎస్‌ పార్టీలు సమావేశాలు ఏర్పాటు చేస్తూ గెలుపే ధ్యేయంగా ముందుకెళ్తున్నారు. కాంగ్రెస్‌ పార్టీ ఇప్పటికే జూబ్లీహిల్స్‌లో జరిగిన ఎన్నికల్లో విజయం సాధించడంతో ఆ దిశగానే సర్పంచ్‌, వార్డు సభ్యుల స్థానాలు అత్యధికంగా గెలిచేలా నాయకులు ముందుకెళ్తున్నారు. అలాగే బీఆర్‌ఎస్‌ నాయకులు సైతం అత్యధికంగా సీట్లు సాధించాలని ప్రయత్నిస్తున్నా రు. జిల్లాలో బీజేపీ ఎంపీ ఉండటంతో అధిక సీట్లు గెలిచేలా ఎవరి వ్యూహం వారు పన్నుతున్నారు.

బలమైన అభ్యర్థుల కోసం వేట

కొన్ని గ్రామపంచాయతీల్లో వివిధ పార్టీలకు చెందిన నేతలు బలమైన అభ్యర్థులను నిలబెట్టేందుకు ప్రయత్నాలు చేస్తున్నారు. ఈ ఎన్నికలను కాంగ్రెస్‌, బీఆర్‌ఎస్‌, బీజేపీ నాయకులు ప్రాధాన్యతగా తీసుకుంటున్నారు. బలమైన నాయకులు ప్రజల్లోకి వెళ్తూ ఓటర్లను తమవైపు తిప్పుకునే ప్రయత్నాలు చేస్తున్నారు. ఎక్కడ చూసినా నలుగురైదుగురు గుంపుగా ఏర్పడి ఎన్నికలపైనే చర్చించుకుంటున్నారు.

సోషల్‌ మీడియా భయం

పంచాయతీ ఎన్నికల్లో పోటీచేస్తున్న అభ్యర్థులకు సోషల్‌ మీడియా భయం పట్టుకుంది. అలాగే సెల్‌ఫోన్లలో మాట్లాడేందుకు భయపడుతున్నారు. సోషల్‌ మీడియాలో ఏమైనా పోస్ట్‌ పెడితే అది ఏ దిశగా వెళ్తుందో తెలియదని భావిస్తున్నారు. రాజకీయ పరిస్థితులను అంచనా వేసుకుంటూ ముందుకెళ్తున్నారు.

మంచి రోజులు లేక ఇబ్బందులు

నామినేషన్లు వేసే అభ్యర్థులు ముహూర్తం కోసం ఏం చేయాలో తెలియని పరిస్థితి నెలకొంది. ఫిబ్రవరి 17 వరకు మంచిరోజులు లేక ఆచీతూచి వ్యవహరిస్తున్నారు. ఐదేళ్ల పాటు పదవీలో ఉండే ఈ పదవీ కోసం మంచిరోజు వేస్తే గెలుస్తామని ఆశాభావంతో ఉంటారు. కానీ, ఇప్పుడు మూఢం కావడంతో అనాసక్తిగా ఎప్పుడో ఓసారి నామినేషన్‌ వేసేలా చూస్తున్నారు. కాగా, మొదటి విడత నామినేషన్లు పూర్తి కావడంతో జిల్లాలో ఇబ్రహీంపట్నం మండలం మూలరాంపూర్‌ గ్రామంలో బీఆర్‌ఎస్‌ పార్టీకి చెందిన కాసుగంటి లాస్యప్రియ ఒకే ఒక్క నామినేషన్‌ రావడంతో దాదాపు ఏకగ్రీవంగా ఎన్నికై నట్లే. అధికారులు ప్రకటించాల్సి ఉంది. ఇప్పటికే సర్పంచ్‌ స్థానం బీఆర్‌ఎస్‌ బోణి కొట్టిందని చెప్పవచ్చు.

ముగిసిన మొదటి విడత నామినేషన్ల ప్రక్రియ

నేటి నుంచి రెండోవిడత నామినేషన్ల స్వీకరణ

గ్రామాల్లో సమావేశాల జోరు

బలమైన అభ్యర్థుల కోసం పార్టీల వేట

మొదటి విడతలో..

మండలాలు 7

గ్రామాలు 122

వార్డులు 1172

సర్పంచ్‌ స్థానాలకు నామినేషన్లు 709

వార్డులకు 2,006

రాత్రి వరకూ నామినేషన్ల స్వీకరణ

కోరుట్లరూరల్‌: కోరుట్ల మండలంలో సర్పంచ్‌ ఎన్నికల నామినేషన్ల స్వీకరణ ప్రక్రియ రాత్రి వరకూ కొనసాగింది. మొదటి విడత శనివారం చివరి రోజు కావడంతో అభ్యర్థులు భారీగా తరలి వచ్చి నామినేషన్‌ వేసేందుకు రాత్రి 9 గంటల వరకూ క్యూలో ఉన్నారు. కాగా ఎన్నికల్లో పోటీ చేసేందుకు కుల ధ్రువీకరణ, బ్యాంక్‌ ఖాతాలు తీసుకోవడంలో జాప్యంతో చివరి రోజు వరకు ఆగాల్సి వచ్చిందని పలువురు పేర్కొన్నారు. మండలంలోని ఒక్కో గ్రామంలో 10కి పైగా వార్డులు ఉండటం, ఒక్కో వార్డుకు ఇద్దరు నుంచి ముగ్గురు పోటీలో ఉండటంతో నామినేషన్‌ కేంద్రాల్లో రద్దీ నెలకొంది.

మల్లాపూర్‌లో..

మల్లాపూర్‌: మండలంలోని మల్లాపూర్‌, కొత్తదాంరాజుపల్లి, మొగిలిపేట, రాఘవపేట, సాతారం, గొర్రెపల్లి, కుస్తాపూర్‌ నామినేషన్‌ కేంద్రాల్లో శనివారం నామినేషన్ల దాఖలుకు అభ్యర్థులు పోటెత్తారు. కొత్తదాంరాజ్‌పల్లిలో రాత్రి 7గంటల వరకు వేచి ఉండి నామినేషన్‌ వేశారు.