నిబంధనలు అమలయ్యేనా?

జగిత్యాలక్రైం: జిల్లాలోని 72 మద్యం దుకాణాల నిర్వహణకు (2025–27 సంవత్సరానికి) ఇటీవల టెండర్లు పిలిచి లక్కీ డ్రా పద్ధతిలో ఎంపిక చేశారు. డిసెంబర్‌ 1 నుంచి కొత్త దుకాణాలు ప్రారంభం కానున్నాయి. కాగా ప్రభుత్వానికి ఆదాయ నిధిగా ఉన్న ఎకై ్సజ్‌ శాఖ అమ్మకాలపై చూపిస్తున్న శ్రద్ధ కొత్త మద్యం పాలసీ నిర్వహణలో నిబంధనలు అమలు చేయడంలో విఫలమవుతుందని ఆరోపణలున్నాయి. గతంలో జిల్లాలోని ప్రధాన పట్టణ కేంద్రాల్లో జనావాసాలు అధికంగా సంచరించే ప్రాంతాల్లో మద్యం దుకాణాలు ఏర్పాటు చేయవద్దంటూ ఆందోళనలు చేసిన ఘటనలున్నాయి. అయినా ఎకై ్సజ్‌ అధికారులు అవేం పట్టించుకోకుండా వ్యాపారులకు వత్తాసు పలుకుతూ వారికి అనుకూలమైన ప్రాంతంలో ఏర్పాటు చేసేందుకు అనుమతులిచ్చారని ఆరోపణలున్నాయి. కొత్త మద్యం పాలసీ నిర్వహణలోనైనా నిబంధనలు అమలు చేస్తారా, మామూలుగానే వదిలేస్తారా అనే దానిపై ఉత్కంఠ నెలకొంది.

కళాశాలకు సమీపంలో..

ప్రభుత్వ నిబంధనల ప్రకారం స్కూల్‌ జోన్స్‌, ఆలయాలు, మసీదులు, చర్చిలకు 100 మీటర్ల దూరంలో, గ్రామాల్లో జాతీయ రహదారికి 500 మీటర్ల దూరంలో మద్యం దుకాణాలు ఏర్పాటు చేయాలి. 50 స్క్వేర్‌ మీటర్లు కలిగిన రూంలో సిట్టింగ్‌ ఏర్పాటు చేసుకోవాలి. వాటర్‌ బాటిళ్లు, కూల్‌డ్రింక్స్‌, తినుబండారాలు విక్రయించకూడదు. కానీ, జిల్లాలో ఎక్కడా ఈ నిబంధనలు అమలు కాకపోవడం గమనార్హం. జిల్లా కేంద్రంలోని అన్నపూర్ణ చౌరస్తా వద్ద మహిళా డిగ్రీ కళాశాల ముందే మూడు మద్యం దుకాణాలు కొనసాగుతున్నాయి. అలాగే బైపాస్‌రోడ్‌లో దేవిశ్రీ గార్డెన్స్‌ వద్దనున్న మద్యం షాపు వల్ల ప్రజలకు ఇబ్బందులు ఎదురవుతున్నాయని పలుమార్లు అధికారులకు ఫిర్యాదు చేశారు. మల్లాపూర్‌ మండల కేంద్రంలోని వైన్స్‌ కూడా ప్రభుత్వ పాఠశాలకు సమీపంలోనే ఉన్నా పట్టించుకోవడం లేదు. మహిళ డిగ్రీ కళాశాల ఆవరణలో బాలికల వసతి గృహం ముందే మద్యం దుకాణాలు కొనసాగుతున్నాయి. దీంతో విద్యార్థులు, తల్లిదండ్రులు ఇబ్బందులు ఎదుర్కొంటున్నారు. కొత్త మద్యం పాలసీలో జనవాసాలకు దూరంగా మద్యం దుకాణాలు ఏర్పాటు చేయాలని ప్రజలు కోరుతున్నారు.

మున్సిపాల్టీల్లో క్లస్టర్ల తొలగింపు

జిల్లాలోని ఐదు మున్సిపాల్టీల్లో మద్యం దుకాణాల ఏర్పాటుకు ఎకై ్సజ్‌ శాఖ క్లస్టర్‌ విధానాన్ని తొలగించింది. దీంతో మద్యం దుకాణం లక్కీడ్రాలో వస్తే పట్టణం, నగరాల్లో ఎక్కడైనా ఏర్పాటు చేసుకునేందుకు అవకాశం కల్పించింది. ఎండోమెంట్‌ ఆదీనంలోని ఆలయాలతో పాటు, బడి, గుడి, హాస్పిటల్స్‌కు వంద మీటర్ల దూరంలో ఏర్పాటు చేసుకోవాలనే నిబంధనలు మాత్రం ఉన్నాయి. ఇది కచ్చితంగా పాటించాల్సిందే. మున్సిపాల్టీ, నేషనల్‌ హైవే, స్టేట్‌ హైవే పరిధిలో ఎక్కడైనా ఏర్పాటు చేసుకునే వీలుంటుంది. దీంతో మంచి అడ్డాలపై దుకాణాలు ఏర్పాటు చేసేందుకు కన్నేస్తున్నారు.

రేపటి నుంచి నూతన మద్యం షాపులు ప్రారంభం