కొనుగోళ్లు వేగవంతం చేయాలి

జగిత్యాలరూరల్‌: కేంద్రాలకు వచ్చిన ధాన్యం తేమ శాతం రాగానే కొనుగోళ్లు వేగవంతం చేయాలని అదనపు కలెక్టర్‌ లత సూచించారు. శనివారం జగిత్యాల రూరల్‌ మండలం లక్ష్మీపూర్‌ గ్రామంలోని కేంద్రాన్ని ఆకస్మికంగా సందర్శించారు. ఈ సందర్భంగా ఆమె మాట్లాడుతూ, వాతావరణ పరిస్థితుల దృష్ట్యా నాణ్యత ప్రమాణాల ప్రకారం వెంటనే ధాన్యం కొనుగోలు చేసి అదే రోజు మిల్లులకు తరలించాలన్నారు. కొనుగోలు చేసిన ధాన్యం వివరాలు ఎప్పటికప్పుడు ఆన్‌లైన్‌లో నమోదు చేయాలని, రైతులకు 48 గంటల్లోగా చెల్లింపులు జరిగేలా చూడాలని అధికారులను ఆదేశించారు. మిల్లుల వద్ద జాప్యం లేకుండా ధాన్యం దిగుమతి అయ్యేలా చూడాలని, హమాలీ సమస్య లేకుండా జాగ్రత్త వహించాలని అధికారులకు సూచించారు. రూరల్‌ తహసీల్దార్‌ వరందన్‌, డెప్యూటీ తహసీల్దార్‌ అరుణ్‌కుమార్‌, ఆర్‌ఐ రాజేంద్రప్రసాద్‌, సీసీ గంగారాం పాల్గొన్నారు.

నామినేషన్‌ కేంద్రాల తనిఖీ

కథలాపూర్‌/ఇబ్రహీంపట్నం: కథలాపూర్‌ మండలం దుంపేట, కథలాపూర్‌, బొమ్మెన, ఇబ్రహీంపట్నం మండలంలో నామినేషన్‌ స్వీకరణ కేంద్రాలను జిల్లా పరిశీలకులు రమేశ్‌ శనివారం తనిఖీ చేశారు. నామినేషన్లు స్వీకరిస్తున్న తీరును పరిశీలించి అధికారులతో మాట్లాడారు. కేంద్రాల వద్ద ఏర్పాట్లు, బందోబస్తు వివరాలను తెలుసుకున్నారు. ఆయన వెంట ఎంపీడీవోలు శంకర్‌, గణేశ్‌, ఎంపీవో రాజశేఖర్‌, రిటర్నింగ్‌ ఆఫీసర్లు శ్రీరాం కిషన్‌, అంబటి వెంకట్రాజం ఉన్నారు.

పాఠశాలలను శుభ్రంగా ఉంచాలి

మల్లాపూర్‌: ప్రభుత్వ పాఠశాలల్లో శుభ్రతను పాటిస్తూ విద్యార్థులకు నాణ్యమైన విద్య అందించాలని ఎస్‌సీఈఆర్టీ డైరెక్టర్‌, పంచాయతీ ఎన్నికల రాష్ట్ర పరిశీలకులు రమేశ్‌ అన్నారు. శనివారం మల్లాపూర్‌ మండల కేంద్రంలోని జిల్లా పరిషత్‌ ఉన్నత పాఠశాలను ఆకస్మికంగా సందర్శించారు. పదో తరగతి విద్యార్థులను పలు ప్రశ్నలు అడిగి వారి అభ్యసన సామర్థ్యాలను తెలుసుకున్నారు. ఎంపీడీవో శ్రీకాంత్‌, ఎంపీవో జగదీశ్‌, హెచ్‌ఎం చంద్రమోహన్‌రెడ్డి తదితరులున్నారు.

జేఎన్టీయూలో విద్యార్థుల గొడవ

కొడిమ్యాల: మండలంలోని నాచుపల్లి జేఎన్టీయూ కళాశాలలో విద్యార్థుల మధ్య గొడవకు సంబంధించిన విషయం శనివారం వెలుగుచూసింది. మూడో సంవత్సరం చదువుతున్న ఓ విద్యార్థిని(అమ్మాయి), మొదటి సంవత్సరం చదువుతున్న విద్యార్థిని(అబ్బాయి) కొట్టేందుకు ప్రయత్నించింది. దీంతో తోటి విద్యార్థులు భయభ్రాంతులకు గురై పోలీసులకు సమాచారం ఇవ్వగా వారు అక్కడికి చేరుకొని దర్యాప్తు చేస్తున్నట్లు తెలిపారు. ఈ ఘటనపై కళాశాల ప్రిన్సిపాల్‌ను వివరణ కోరగా, సదరు విద్యార్థులకు మొదటి నుంచి పరిచయం ఉందని, అన్ని వివరాలు తెలుసుకొని సోమవారం కమిటీ నిర్ణయం తీసుకుంటుందని తెలిపారు.

సాధారణ ప్రసవాలకు ప్రాధాన్యమివ్వాలి

కోరుట్ల: ప్రభుత్వాసుపత్రిలో సాధారణ ప్రసవాలకు ప్రాధాన్యం ఇవ్వాలని డిప్యూటీ డీఎంహెచ్‌వో జైపాల్‌రెడ్డి అన్నారు. పట్టణంలోని ప్రభుత్వ ఏరియా ఆసుపత్రిని శనివారం ఆకస్మికంగా తనిఖీ చేశారు. ఆసుపత్రిలో రోగులు, బాలింతలు, గర్భిణులతో మాట్లాడారు. సూపరింటెండెంట్‌ సునీతారాణి, వైద్యులు చైతన్య సుదా, విజయలక్ష్మి, వినోద్‌, రమేశ్‌, సూపర్‌వైజర్లు ధనుంజయ, నాగభూషన్‌ పాల్గొన్నారు.

స్కానింగ్‌ సెంటర్లు పరిశీలన

పట్టణంలోని పలు స్కానింగ్‌ సెంటర్లను డిప్యూటీ డీఎంహెచ్‌వో జైపాల్‌రెడ్డి తనిఖీ చేశారు. నిబంధనలు పాటించాలని నిర్వాహకులను ఆదేశించారు. లింగ నిర్ధారణ పరీక్షల సమయంలో గోప్యత పాటించకుంటే చట్ట రీత్యా కేసులు తప్పవని హెచ్చరించారు. అనంతరం క్యాంపు కార్యాలయానికి వెళ్లి ఎమ్మెల్యే సంజయ్‌ను మర్యాదపూర్వకంగా కలిశారు.

కొనుగోళ్లు వేగవంతం చేయాలి