సిద్ధమైన ఎన్నికల యంత్రాంగం!

చిత్తూరు కలెక్టరేట్‌ : జిల్లా స్థానిక సంస్థల పరిషత్‌ (జెడ్పీటీసీ, ఎంపీటీసీ) ఎన్నికల ప్రక్రియలో అత్యంత కీలకమైన, ఉత్కంఠభరితమైన నామినేషన్ల ఉపసంహరణ ఘట్టం మంగళవారం సాయంత్రం 3.00 గంటలతో ముగిసింది. జిల్లా పరిషత్‌ సమావేశ మందిరంలో ఈ నెల 27 వ తేదీన పలు పార్టీలు, ఇండిపెండెంట్‌ అభ్యర్థులు నామినేషన్లను ఉససంహరించుకున్నారు. అలాగే జిల్లాలోని 27 మండలాల్లోని ఎంపీడీవో కార్యాలయాల్లో ఆయా మండలాల ఆర్‌వోల సమక్షంలో పలువురు ఎంపీటీసీ అభ్యర్థులు తాము పోటీ నుంచి తప్పుకుంటున్నట్లు ఉపసంహరణలు చేసుకున్నారు. వారి ఉపసంహరణ పత్రాలను ఆర్వోలకు అందజేశారు. నామినేషన్ల పరిశీలన, అప్పీళ్ల విచారణ, అనంతరం జరిగిన ఉపసంహరణ ప్రక్రియ ముగియడంతో ఎన్నికల బరిలో నిలిచే జెడ్పీటీసీ, ఎంపీటీసీ అభ్యర్థుల తుది జాబితాను జిల్లా ఎన్నికల అధికారులు అధికారికంగా ప్రకటించారు. దీంతో జిల్లాలోని గ్రామీణ ప్రాంతాల్లో బుధవారం నుంచి ఎన్నికల వేడి ఊపందుకోనుంది.

హోరెత్తనున్న ప్రచార పర్వం!

పరిషత్‌ ఎన్నికల్లో ప్రధాన ఘట్టమైన నామినేషన్ల పర్వం, ఉపసంహరణ ప్రక్రియ పూర్తి కావడంతో ఇక అభ్యర్థుల దృష్టి ప్రచారంపై పడింది. నవంబర్‌ 1వ తేదీ సాయంత్రం 5.00 గంటల వరకు అభ్యర్థులు ప్రచారం నిర్వహించుకోవడానికి ఎన్నికల సంఘం గడువు ఇచ్చింది. నవంబర్‌ 3వ తేదీన ఉదయం నుంచి సాయంత్రం వరకు జెడ్పీటీసీ, ఎంపీటీసీ ఎన్నికల ఓటింగ్‌ (పోలింగ్‌) జిల్లా వ్యాప్తంగా జరగనుంది. పోలింగ్‌ ముగిసిన అనంతరం నవంబర్‌ 5వ తేదీన ఓట్ల లెక్కింపు జరిపి, విజేతలను సైతం అదేరోజు ప్రకటించనున్నారు. ఈ తక్కువ వ్యవధిలోనే ప్రతి పల్లెను చుట్టేసేలా ప్రధాన రాజకీయ పార్టీల నేతలు, అభ్యర్థులు విస్తృత ప్రచార ప్రణాళికలు సిద్ధం చేసుకున్నారు.

పోటీలోని జెడ్పీటీసీల సమాచారం పార్టీల వారీగా

పచ్చ నేతల అరాచకాలు..

బెదరని వైఎస్సార్‌సీపీ

పరిషత్‌ ఎన్నికల నామినేషన్ల ప్రక్రియ ప్రారంభమైన రోజు నుంచే అధికార టీడీపీ నేతలు, కార్యకర్తలు తీవ్రస్థాయిలో అరాచకాలు, అక్రమాలకు పాల్పడ్డారు. జిల్లాలోని జెడ్పీటీసీ, ఎంపీటీసీ నామినేషన్‌ కేంద్రాల వద్ద అరాచకాలు సృష్టించి నామినేషన్లు వేయకుండా భౌతిక దాడులకు పాల్పడ్డారు. నామినేషన్‌ పత్రాలను లాక్కుని దారుణంగా చించివేయడం వంటి ప్రజాస్వామ్య విరుద్ధ చర్యలకు తెగబడ్డారు. మహిళలను సైతం కించ పరిచేలా వ్యవహరించి నామినేషన్లు దాఖలు చేయనివ్వకుండా రౌడీయిజం చేశారు. పోలీసులు, పలు ప్రాంతాల్లోని ఆర్‌వోలు సైతం ఏకపక్షంగా వ్యవహరిస్తూ వైఎస్సార్‌సీపీ అభ్యర్థుల నామినేషన్లకు అడ్డంకులు సృష్టించారు. అయినప్పటికీ వైఎస్సార్‌సీపీ జెడ్పీటీసీ, ఎంపీటీసీ అభ్యర్థులు ఏమాత్రం వెనకడుగు వేయకుండా ధైర్యంగా నిలబడ్డారు. టీడీపీ నేతల ఒత్తిళ్లను తట్టుకుని బరిలో నిలిచి ప్రజాక్షేత్రంలోనే తేల్చుకోవడానికి సిద్ధమయ్యారు.

జెడ్పీటీసీ, ఎంపీటీసీ స్థానాల్లో పోటీపడుతున్న అభ్యర్థుల జాబితా ఖరారు కావడంతో జిల్లా ఎన్నికల అధికారి, కలెక్టర్‌ సుమిత్‌ కుమార్‌ గాంధీ నేతృత్వంలో జిల్లా యంత్రాంగం పోలింగ్‌ నిర్వహణ ఏర్పాట్లను వేగవంతం చేసింది. చిత్తూరులోని పీవీకేఎన్‌ ప్రభుత్వ డిగ్రీ కళాశాల, సీతమ్స్‌ ఇంజినీరింగ్‌ కళాశాలల్లో రిసెప్షన్‌ సెంటర్లు, స్ట్రాంగ్‌ రూమ్‌లు, కౌంటింగ్‌ కేంద్రాల వద్ద మూడంచెల భద్రతను ఏర్పాటు చేస్తున్నారు. పోలింగ్‌ అధికారులకు ఇప్పటికే రెండో విడత శిక్షణ పూర్తిచేసి, బ్యాలెట్‌ పేపర్లు, బ్యాలెట్‌ బాక్సుల పంపిణీకి సర్వం సిద్ధం చేశారు. పరిషత్‌ ఎన్నికల సమరానికి అభ్యర్థులు, ఏర్పాట్లకు యంత్రాంగం సిద్ధం కావడంతో నవంబర్‌ 3న జరగబోయే పోలింగ్‌ పై జిల్లా వ్యాప్తంగా సర్వత్రా ఆసక్తి నెలకొంది!