సీఎం చంద్రబాబు ఈవెంట్స్‌కు మరో రూ.10.59 కోట్లు

సాక్షి, అమరావతి: సీఎం చంద్రబాబు జి­ల్లాల పర్య­టనల్లో ఈవెంట్‌ మేనేజ్‌మెంట్‌ పనుల­కు భారీగా ఖర్చు చేస్తున్నారు. జిల్లాల్లో సీఎం కార్య­క్రమాలను మాన్‌ డెకరేటర్స్‌ నిర్వహి­స్తోంది. ఇందుకోసం రూ.­44.62 కోట్లు ఖర్చయిందని, ఇందులో 50 శాతం బకాయిలను చెల్లించా­లని ఆ సంస్థ రాష్ట్ర ప్రభు­త్వా­న్ని కోరింది. దీంతో ఆర్థిక శాఖ రూ.22.31 కోట్ల అదనపు నిధులను విడుదల చేసింది. ఇందులో గత నెలలో అయిన ఖర్చు రూ.11.71 కోట్లు చెల్లించేందుకు పరిపాలన అనుమతి ఇస్తూ సాధారణ పరిపాలన శాఖ ఉత్తర్వులిచ్చింది.

మరో రూ.­10.59 కోట్లు చెల్లించేందుకు పరిపాలన అనుమతి మంజూరు చేస్తూ సాధారణ పరిపాలన శాఖ (రాజకీయ) ముఖ్య కార్యదర్శి జె.శ్యామల­రావు సోమవారం ఉత్తర్వులిచ్చారు. దీంతో సీఎం ఈవెంట్లకు ఇప్పటివరకు రూ.22.31 కోట్లు చెల్లించారు. ఈ ఖర్చును ప్రముఖుల ప్రోటోకాల్‌ వ్యయం ఖా­తా కింద విడుదల చేసినట్లు పేర్కొన్నారు. ఈ చె­ల్లింపులు ‘షెడ్యూల్‌ ఆఫ్‌ రేట్స్‌’ ఖరారు, చర్చలకు లోబడి జరగాలని ఉత్తర్వుల్లో పేర్కొన్నారు.

డీడీ­వోలందరూ ఆర్థిక శాఖ సూచ­నల ప్రకారం అడ్వా­న్సులు ఇచ్చి ఉంటే వాటిని ధృవీకరించుకుని, మాన్‌ డెకరేటర్లకు మంజూరైన బడ్జె­ట్‌ను రూపొందించి, పంపిణీకి అనుమతించాలని పేర్కొన్నారు. పొరపాటున అదనంగా విడుదల చేసిన మొత్తాలంటే, వాటిని ఎటువంటి నోటీసు లేకుండా ఏజెన్సీకి చెల్లించవలసిన మిగిలిన మొత్తాల నుంచి వసూలు చేయనున్నట్లు ఉత్తర్వుల్లో స్పష్టం చేశారు.