యూరియా కోసం రేయింబవళ్లూ పడిగాపులు

విజయనగరం జిల్లాలోని ఓ ప్రైవేటు దుకాణం వద్ద యూరియా కోసం బారులు తీరిన రైతులు

సంతకవిటి:  ఉమ్మడి విజయనగరం జిల్లా రైతులను యూరియా కష్టాలు వీడడం లేదు. ఆర్‌ఎస్‌కేలు, పీఏ­సీ­ఎస్‌లు, ప్రైవేటు దుకాణాల వద్ద క్యూ కడుతూనే ఉన్నారు. నిద్రకూడా మానుకుని రాత్రుళ్లూ షాపుల వద్దే పడిగాపులు పడుతున్నారు. వేకువనే అక్కడే కాలకృత్యాలు తీర్చుకుంటున్నారు. యూరి­యా కోసం ఇన్ని కష్టాలు ఎన్నడూ చూడలేదంటూ ఆవేదన చెందు­తున్నారు. విజయనగరం జిల్లా సంతకవిటిలో ఓ ప్రైవేటు దుకాణం వద్ద బుధవారం రాత్రి 9 గంటల వరకు యూరియా కోసం క్యూకట్టి­న రైతులు సరుకు అందకపోవడంతో నిరాశచెందారు. 

గురువారం మళ్లీ పంపిణీ చేస్తామని దుకా­ణం యజమాని చెప్పడంతో రాత్రంతా రైతు­లు అక్కడే ఉండిపోయారు. దోమ­లతో జాగారం చేశా­రు. గురువారం వేకువనే ఇలా బారులుతీరారు. భారీ­గా బారు­లు తీరిన రైతులను చూసి యజమాని దుకాణం తెరిచేందుకు భయపడ్డారు. ఏఓ సి.బి.యశ్వంతరావు, పోలీసుల సమక్షంలో దుకాణం తెరిచి యూరియా పంపిణీ ప్రారంభించారు. 

ఆధార్‌కార్డు, వన్‌–బి తెచ్చిన వారికే యూరి­యా ఇస్తామని చెప్పడంతో రైతులు ఆందోళనకు దిగారు. రాత్రి నుంచి దోమల్లో కాపలా ఉంటే ఇప్పు­డు నిబంధనలు పెట్టడంపై వాగ్వాదానికి దిగారు. టోకెన్‌లు ఉన్న రైతులకు 444 బస్తాలు పంపిణీ చేయడంతో మిగిలిన రైతులు నిరాశతో వెనుదిరగాల్సి వచ్చింది.  

వ్యవసాయం మానేయాలా బాబూ..
నేను దివ్యాంగుడిని. క్యూలైన్‌లో నిల్చోగలనా? నేను వ్యవసాయం మానేయాలా బాబూ.. నేనేమి చేయాలి చెప్పండి. గత ప్రభుత్వంలో రైతుభరోసా కేంద్రాలకే యూరియా వచ్చేది. ఇప్పుడు బస్తా యూరియా కోసం రైతులను ఇబ్బందులకు గురిచేస్తున్నారు. కనీసం ఒక బస్తా యూరియా కూడా అందలేదు.  – గడే సీతారాం, దివ్యాంగుడు, రైతు, ముకుందపురం