బాబు సర్కారు భూ పందేరం.. ఏడాదికి రూ.వెయ్యే!

సాక్షి, అమరావతి: రాష్ట్రంలో టీడీపీ కార్యాల­యా­లకు ప్రభుత్వ భూములను కారుచౌకగా లీజు­కు కట్టబెడుతూ మంత్రివర్గం నిర్ణయం తీసుకుంది. ఏడాదికి కేవలం రూ.వెయ్యి చొప్పున 33ఏళ్ల పాటు వీటిని ధారాదత్తం చేయనుంది. ప్రస్తుత ఉత్తర్వుల ప్రకారం గుర్తింపు పొందిన రాజకీయ పార్టీల కార్యాలయాలకు ప్రభుత్వ భూముల లీజు కాలం 33ఏళ్లుగా ఉంది. ఈ వ్యవధిని 66 సంవత్సరా­లకు, పార్టీలు మనుగడలో ఉంటే 99 ఏళ్లకు పెంచే అవకాశం కల్పించారు. సీఎం చంద్రబాబు అధ్యక్షతన సోమవారం సచివాలయంలో జరిగిన కేబినెట్‌ సమావేశంలో ఈ మేరకు నిర్ణయం తీసుకు­న్నారు. సమాచార మంత్రి పార్థసారథి మీడియాకు వెల్లడించిన కేబినెట్‌ భేటీ వివరాల ప్రకారం...

⇒ కృష్ణా జిల్లా మచిలీపట్నంలో రవాణా శాఖకు ఇచ్చిన 1.60 ఎకరాల ప్రభుత్వ భూమిని రద్దు చేసి టీడీపీ జిల్లా ఆఫీసుకు కేటాయింపు. తిరు­పతి రూరల్‌ మండలం అవిలాలలో 2 ఎకరాల ప్రభుత్వ భూమి టీడీపీ కార్యాలయానికి కేటా­యింపు. వార్షిక రుసుము రూ.వెయ్యి చొప్పున 33 ఏళ్లపాటు లీజు కింద మచిలీపట్నం టీడీపీ జిల్లా అధ్యక్షుడు, తిరుపతి పార్లమెంట్‌ నియోజకవర్గ జిల్లా అధ్యక్షుడికి భూమి బదిలీ.

⇒  గుంటూరు జిల్లా ఉండ­వల్లి పరిధిలోని భవానీ ద్వీపంలో ‘అడ్వెంచర్‌ థ్రిల్‌ సిటీ’ అభివృద్ధికి విశ్వనాథ్‌ స్పోర్ట్స్‌ అండ్‌ కన్వెన్షన్స్‌ ప్రైవేట్‌ లిమిటెడ్‌ కన్సార్షియంకు భూమి కేటాయింపు, ప్రోత్సాహకాలు అందించేందుకు ఆమోదం. 
⇒ మచిలీపట్నం తల్లపాలెం వద్ద అమ్యూ­జ్‌­మెంట్‌ పార్క్, రిసార్ట్‌ల అభివృద్ధికి మైరా బే వ్యూ రి­సా­ర్ట్స్‌కు భూమి కేటాయింపు, ప్రోత్సాహకాలు.

⇒  క్లీన్‌ ఎనర్జీకి అవసరమైన అసైన్డ్‌ భూములను ప్రైవేట్‌ సంస్థలకు 99 ఏళ్ల దీర్ఘకాలిక లీజుకు ఇచ్చేందుకు  1977 నాటి ఏపీ అసైన్డ్‌ భూముల (బదిలీ నిషేధం) చట్టంలో సవరణలకు సంబంధించి ఆంధ్రప్రదేశ్‌ అసైన్డ్‌ భూముల (బదిలీల నిషేధం)–2025 ముసాయిదా బిల్లుకు ఆమో­దం. ఆర్డినెన్స్‌ జారీకి అంగీకారం.  

⇒ అమరావతిలో ప్రాజెక్టుల కోసం కొత్తగా బడ్జెట్‌ బయట రూ.9వేల కోట్లు అప్పు తెచ్చేందుకు సీఆర్‌డీఏకు అనుమతి. 
⇒ అమరావతి రాజధాని సిటీలోని ఎల్‌పీఎస్‌ జోన్ల అభివృద్ధికి రూ.7,500 కోట్లు రుణం పొందేందుకు ఏపీసీఆర్‌డీఏ కమిషనర్‌కు అనుమతి. 
⇒  రాజధానిలో ముఖ్యమైన మౌలిక సదుపాయాల పనులు వేగవంతానికి ఆంధ్రప్రదేశ్‌ పవర్‌ ఫైనాన్స్‌ కార్పొరేషన్‌ లిమిటెడ్‌ (ఏపీపీఎఫ్‌­సీఎల్‌) నుంచి రూ.1,500 కోట్ల రుణం తీసుకునేందుకు అంగీకారం. 

⇒  రాష్ట్ర ప్రభుత్వ విద్యుత్‌ యుటిలిటీల నిర్వహ­ణకు, బొగ్గు, విద్యుత్‌ కొనుగోలు నిమిత్తం సర్కారుకు అప్పు ఇవ్వడానికి ఇండియన్‌ ఓవర్సీస్‌ బ్యాంకు నుంచి లోన్‌ పొందేందుకు ఏపీపీఎఫ్‌సీఎల్‌ రూ.1,000 కోట్లకు ప్రభుత్వం గ్యారెంటీ ఇచ్చేందుకు అంగీకారం. 
⇒  విద్యుత్‌ సంస్థలు, ఇతర మౌలిక సదుపాయాల అభివృద్ధి సంస్థలు రూ.5 వేల కోట్ల రుణం పొందేందుకు ప్రభుత్వం హామీ ఇస్తూ జారీచేసిన జీవోకు, ఎస్‌బీఐ, యూబీఐ నుంచి ఏపీ డిస్కమ్స్‌ తీసుకునే రూ.1,150 కోట్ల రుణంపై ప్రభు­త్వ గ్యారెంటీకి, ఖరీఫ్‌లో ధాన్యం సేకరణ కోసం మార్క్‌ఫెడ్‌ ద్వారా పౌర సరఫరాల సంస్థ రూ.5,000 కోట్ల రుణం పొందేందుకు ప్రభుత్వం గ్యారెంటీ ఇస్తూ జారీచేసిన జీవోకు ఆమోదం. 

⇒  ధాన్యం సేకరణ కోసం పౌర సరఫరాల సంస్థ తీసుకునే గరిష్ట రుణ పరిమితి రూ.39 వేల కోట్ల నుంచి రూ.44 వేల కోట్లకు పెంపు. 
⇒ కుప్పం, దగదర్తి, శ్రీకాకుళం విమానాశ్రయాల భూ సేకరణకు హడ్కోరుణం చెల్లించేందుకు హామీతో ప్రభుత్వ ‘లెటర్‌ ఆఫ్‌ కంఫర్ట్‌’ జారీకి, ఏపీ ఫైర్‌ సర్వీసెస్‌ చట్టం–1999లో సవరణలు చేస్తూ ఆర్డినెన్స్‌ విడుదలకు ఆమోదం.
⇒ ముగ్గురు జీవిత ఖైదీలకు క్షమాభిక్ష మంజూరు.

⇒  సీఆర్‌డీఏలో వివిధ సంస్థలకు భూ కేటాయింపులపై మంత్రుల కమిటీ చేసిన సిఫార్సులకు అనుగుణంగా చర్యల నిమిత్తం కమిషనర్‌ అనుమతికి అంగీకారం.
⇒ ఉండవల్లి వద్ద ఫ్లడ్‌ పంపింగ్‌ స్టేషన్‌–2కు రూ.595.01 కోట్లకు పరిపాలన అనుమతి
⇒ అమరావతిలో ల్యాండ్‌ పూలింగ్‌ గ్రామాల లే అవుట్‌లో అనుసంధానం పనులను రూ.1,863 కోట్లకు కాంట్రాక్టు ఇచ్చేందుకు అనుమతి.

⇒  ఏపీ ఎలక్ట్రిసిటీ డ్యూటీ చట్టం–1939కు సవరణ చేసే ఆర్డినెన్స్‌ జారీకి ఆమోదం. 
⇒  వివిధ కేటగిరీల కాంట్రాక్టర్ల ద్రవ్య పరిమితులు, వారి రిజిస్ట్రేషన్‌ ఫీజును, సాల్వెన్సీ సర్టిఫికెట్‌ మొత్తాన్ని, గత అనుభవం, పనుల విలువను పెంచడానికి ఆమోదం.

⇒ ఏలూరు జిల్లా పోలవరంలోని 15.25 ఎకరాల ప్రభుత్వ భూమి ఏపీ టూరిజం అథారిటీకి ఉచితంగా బదిలీ.
⇒  రియల్‌ టైమ్‌ గవర్నెన్స్‌ సొసైటీ డేటా లేక్‌ ప్రాజె­క్టు డిజైన్‌.. అభివృద్ధి, అమలు, ఆపరేషన్లు, నిర్వహణ కోసం సిస్టమ్‌ ఇంటిగ్రేటర్‌గా నియా­మకానికి మెస్సర్స్‌ టాటా కన్సల్టెన్సీ సర్వీసెస్‌ మూడేళ్ల కాలానికి షెడ్యూల్‌ విలువ రూ.181 కోట్లతో కోట్‌ చేసిన సింగిల్‌ బిడ్‌కు ఆమోదం. 

⇒ క్వాంటమ్‌ మిషన్‌ నిపుణుల కమిటీ ముందు బిడ్ల సాంకేతిక మదింపును ఉంచి, సమీక్ష, సిఫార్సులను పరిగణనలోకి తీసుకుని, టెండర్ల విధానాల ప్రకారం ఆర్‌ఎఫ్‌పీ పద్ధతిలో ఏక్యూసీసీ ప్రాజెక్టుకు టెండరింగ్‌ ప్రక్రియను ప్రారంభించడానికి సాంకేతిక చార్జీలు మినహాయించి రూ.99.62 కోట్లకు అంగీకారం. 
⇒ ఇటీవల ఎస్‌ఐపీబీలో తీసుకున్న నిర్ణయాలకు అనుగుణంగా పలు సంస్థలకు భూముల కేటాయింపులు, రాయితీలకు ఆమోదం
⇒  పలు ఎనర్జీ, టిడ్కో ప్రాజెక్టులకు భూముల కేటాయింపునకు గ్రీన్‌సిగ్నల్‌.