ప్రవేశ పరీక్షలకు వేళాయే

సాక్షి, అమరావతి/అనంతపురం: రాష్ట్రంలో వివిధ కోర్సుల్లో ప్రవే­శాలకు సంబంధించిన పరీక్షలకు వేళయ్యింది. ఈ నెల 6 నుంచి జూన్‌ 13 వరకు ఎనిమిది ప్రవేశ పరీక్షలను ఉన్నత విద్యా మండలి నిర్వ­హించనుంది. ఈనెల 6న ఈసెట్, 7న ఐసెట్‌ పరీక్షల నిర్వహణకు ఏర్పాట్లు పూర్తి చేసింది. నిర్ణీత సమయానికంటే నిమిషం ఆలస్య­మైనా పరీక్షా కేంద్రంలోకి అనుమతించేది లేదని ఉన్నత విద్యా మండలి స్పష్టం చేసింది.

ఇప్పటికే పరీక్షల తేదీల వారీగా హాల్‌టికెట్లను అందుబాటులో ఉంచామని తెలిపింది. అభ్యర్థులు తమ హాల్‌టికెట్‌తో పాటు వ్యక్తిగత గుర్తింపు కార్డు, బ్లాక్‌/బ్లూ బాల్‌పాయింట్‌ పెన్నును తీసుకెళ్లాలని సూచించింది. హాల్‌టికెట్‌పై ముద్రించిన వివరాలపై అభ్యంతరం ఉంటే పరీక్షా కేంద్రంలోని అబ్జర్వర్‌ దృష్టికి తీసుకెళ్లాలని కోరింది. అరగంట ముందే పరీక్ష కేంద్రానికి చేరుకోవాలని సూచించింది.

ఈసెట్‌ నిర్వహణకు సిద్ధం: ఏపీ ఈసెట్‌ను మంగళవారం నిర్వహించేందుకు ఏర్పాట్లు పూర్తి చేసినట్లు ఈసెట్‌ కన్వినర్‌ ప్రొఫెసర్‌ బి.దుర్గాప్రసాద్‌ వెల్లడించారు. లేటరల్‌ ఎంట్రీ కింద ఇంజినీరింగ్‌ సెకండియర్‌లో ప్రవేశాలకు నిర్వహిస్తున్న ఈ­సెట్‌ ఉదయం  సెషన్‌ 9 గంటలకు ప్రారంభ­మై 12 గంటలకు ముగుస్తుందని.. మధ్యాహ్నం సెషన్‌ 2 గంటల నుంచి సాయంత్రం 5 వరకు ఉంటుందన్నారు.