సాక్షి, సంగారెడ్డి: డ్రైవర్‌ అప్రమత్తతో ఘోర ప్రమాదం తప్పింది. జిల్లాలో ఓ ప్రైవేట్‌ పాఠశాలకు చెందిన బస్సులో ఒక్కసారిగా మంటలు చెలరేగాయి. అయితే స్థానికుల సాయంతో డ్రైవర్‌ పిల్లలను దించేయడంతో అంతా క్షేమంగా బయటపడ్డారు. శనివారం ఉదయం నారాయణఖేడ్‌లో విజ్ఞాన్ పాఠశాల బస్సు పిల్లలతో బయల్దేరింది. అయితే ఒక్కసారిగా బస్సు నుంచి దట్టమైన పొగలు రావడంతో డ్రైవర్‌ అప్రమత్తమయ్యాడు. స్థానికులను కేక వేసి పిల్లలను వెంటనే దించేశాడు. అగ్నిమాపక సిబ్బంది మంటలను ఆర్పే ప్రయత్నంలో ఉన్నారు. ప్రమాదానికి గల కారణాలు తెలియాల్సి ఉంది.గురువారం అర్ధరాత్రి టైంలో.. హైదరాబాద్‌ నుంచి బెంగళూరు వెళ్తున్న వీ కావేరీ ట్రావెల్స్‌ వోల్వో బస్సు కర్నూల్‌ శివారులో ఉల్లిందకొండ క్రాస్‌ వద్ద ఘోర ప్రమాదానికి గురైన సంగతి తెలిసిందే. మంటలు ఎగసి పడి బస్సు దగ్ధమైపోగా.. అందులోని ప్రయాణికుల్లో 19 మంది సజీవ దహనం అయిపోయారు. ఈ నేపథ్యంలో తెలుగు రాష్ట్రాల్లో ఆర్టీవో అధికారుల తనిఖీలు ముమ్మరంగా కొనసాగుతున్నాయి.ఇదీ చదవండి: కర్నూలు ఘటన.. ఎట్టకేలకు డ్రైవర్‌ అరెస్ట్‌

సాక్షి, మెదక్‌: చోరీలు చేస్తున్న మహిళను పోలీసులు సీసీ ఫుటేజీ ద్వారా గుర్తించి అరెస్ట్‌ చేశారు. గురువారం నారాయణఖేడ్‌ ఎస్‌ఐ వెంకట్‌రెడ్డి తెలిపిన వివరాలు ప్రకారం కంగ్టి మండలం చుక్కల్‌ తీర్థ్‌ గ్రామానికి చెందిన విఠాబాయి ఈనెల 16 తేదీన హైదరాబాద్‌ నుంచి నారాయణఖేడ్‌కు వచ్చింది.  స్టీలు దుకాణంలో వస్తువులు కొనుగోలు చేసింది. దుకాణదారుడికి డబ్బులు చెల్లించేందుకు తన బ్యాగ్‌లో నుంచి నగదు తీస్తుండగా మరో మహిళ చూసింది. ఆమె చాకచక్యంగా బ్యాగులో నుంచి రెండు బంగారు ఉంగరాలు, కొంత నగదు చోరీ చేసింది. బంగారు ఉంగరాలు, నగదు పోగొట్టుకున్న బాధిత పోలీసు స్టేషన్‌లో ఫిర్యాదు చేసింది. 17 తేదీన పట్టణంలోని మార్కెట్‌లో మరో మహిళ పర్సును చోరీ చేసేందుకు యత్నించింది. చోరీ కేసు దర్యాప్తు చేస్తున్న పోలీసులు సీసీ ఫుటేజీలో చోరీకి యత్నిస్తున్న దృశ్యం కనిపించడంతో నిందితురాలిని అరెస్ట్‌ చేశారు. నిందితురాలు మహారాష్ట్రలోని డెగ్‌లూర్‌కు చెందిన దుర్గావాడేకర్‌గా గుర్తించారు.  గతంలో కర్ణాటక, మహారాష్ట్రలో పలు చోరీ కేసుల్లో జైలు శిక్ష అనుభవించినట్లు  ఎస్‌ఐ వివరించారు.   చదవండి: మహిళ అక్రమ నిర్బంధం.. అయిదుగురు జీఎస్టీ అధికారులపై కేసు

సాక్షి, నారాయణఖేడ్‌: అనుమానాస్పద స్థితిలో బాలిక మృతి చెందిన సంఘటన మండలంలోని లింగాపూర్‌లో మంగళవారం చోటు చేసుకుంది. నారాయణఖేడ్‌ ఎస్‌ఐ వెంకట్‌రెడ్డి తెలిపిన వివరాల ప్రకారం.. లింగాపూర్‌కు చెందిన కుమ్మరి పుష్పలత (16) ఇంటర్‌ ప్రథమ సంవత్సరం చదువుతోంది. ఈనెల 17న రాత్రి పుష్పలతను అదే కాలనీకి చెందిన చాకలి పండరి మాయమాటలు చెప్పి ఇంటి వెనకాలకు తీసుకెళ్లగా బాలిక తండ్రి వెంకయ్య వెతుకుతూ వెళ్లగా ఆయనను చూసి పారిపోయారు. చదవండి: హైదరాబాద్‌లో విషాదం: సెప్టిక్‌ ట్యాంక్‌లో పడి బాలుడి మృతి గంట తర్వాత పండరి గ్రామానికి రాగా పుష్పలత రాలేదు. ఆచూకీ కోసం వెతుకుతుండగా సోమవారం గ్రామ శివారులోని మంగలి లక్ష్మయ్య చేనులో చెట్టుకు చున్నీతో ఉరివేసుకుని మృతిచెందిన స్థితిలో బాలిక కనిపించింది. కూతురి మృతి విషయంలో పండరిపై అనుమానం ఉందని బాలిక తండ్రి ఫిర్యాదు చేయగా కేసు నమోదు చేసుకుని దర్యాప్తు చేస్తున్నామని ఎస్‌ఐ వివరించారు.   చదవండి: చదువులో ఒత్తిడి తట్టుకోలేక ఎంత పనిచేసింది..

సాక్షి ప్రతినిధి, సంగారెడ్డి: కరోనా కారణంగా ప్రభుత్వ ఆదాయం తగ్గినా ప్రభుత్వం రైతు సంక్షేమ పథకాలను ఎలాంటి ఆటంకం లేకుండా అమలు చేస్తోందని ఆర్థికశాఖ మంత్రి హరీశ్‌రావు అన్నారు. రైతుబంధు వానాకాలం సీజన్‌కు సంబంధించి రూ.7,500 కోట్లు రైతుల ఖాతాల్లో జమ చేస్తున్నామన్నారు. ఇప్పటివరకు రూ.6,012 కోట్లను 57.67 లక్షల మంది రైతుల ఖాతాల్లో జమ చేశామన్నారు. సంగారెడ్డి జిల్లాలో 1.65 లక్షల ఎకరాలకు సాగునీరందించే లక్ష్యంతో నిర్మించతలపెట్టిన బసవేశ్వర ఎత్తిపోతల పథకం సర్వే పనులను సోమవారం ఆయన ప్రారంభించారు. ఈ సందర్భంగా మనూరు మండలం బోరంచ గ్రామం వద్ద ఏర్పాటుచేసిన సభలో మాట్లాడారు. బసవేశ్వర ఎత్తిపోతల పథకం నిర్మాణం పనులు త్వరగా పూర్తయ్యేలా బోరంచ నల్లపోచమ్మ దీవించాలని అంటూ, నిర్మాణం పూర్తయితే అమ్మవారికి ముక్కుపుడక చేయిస్తానని మొక్కుకున్నారు. ఈ జన్మకిది చాలు.. బసవేశ్వర ఎత్తిపోతల పథకం సర్వే పనుల ప్రారంభ కార్యక్రమంలో మంత్రి హరీశ్‌రావుకు ఓ మహిళ తారసపడింది. ఆమెను గుర్తుపట్టిన మంత్రి.. ‘చిమ్నీబాయి కైసే హో’ అని ఆప్యాయంగా పలకరించారు. ఆమె కూడా ‘కాలుబాబా తల్లి ఆశీర్వాదంతో మీరు చల్లగా ఉండాలి’ అని బదులిచ్చారు. కాగా, కార్యక్రమంలో మాట్లాడిన మంత్రి మధ్యలో ఆమె ప్రస్తావన తెచ్చారు. ఆదివారం రాత్రి రోడ్డు ప్రమాదం జరిగిందని తెలియగానే కంగ్టి మండలానికి చెందిన చిమ్నీబాయి ఫోన్‌చేసి తన యోగక్షేమాలు అడిగి తెలుసుకున్నారని అంటూ భావోద్వేగానికి గురయ్యారు. ఈ జన్మకు ఇది చాలనుకున్నానని వ్యాఖ్యానించారు.   

సాక్షి, నారాయణఖేడ్‌: పై చిత్రంలో ముఖానికి మాస్కు లేకుండా చూస్తున్న వ్యక్తి నారాయణఖేడ్‌ మండలం అబ్బెంద గ్రామ సర్పంచ్‌. అతన్నుంచి రూ. 500 జరిమానా వసూలు చేసి రశీదు ఇస్తున్నది పంచాయతీ కార్యదర్శి. సంగారెడ్డి జిల్లా పంచా యతీ అధికారి సురేశ్‌ మోహన్‌ ఆకస్మిక పర్యటన సందర్భంగా ఉపసర్పంచ్‌తో కలసి మాస్కు ధరించకుండా ఇంటి నుంచి బయటకు వచ్చినందుకు అధికారి వారిద్దరికీ రూ. 500 చొప్పున జరిమానా విధించారు. ఈ ఫొటో చూశారుగా... ముఖానికి మాస్కుల్లేకుండా, భౌతికదూరం నిబంధన పట్టించుకోకుండా నగరవాసులు ఇలా యథేచ్ఛగా బయట తిరుగుతున్నారు. మెహదీపట్నం సమీపంలోని గుడిమల్కా పూర్‌ పూల మార్కెట్‌కు వీరంతా ఇలా పోటెత్తారు. గ్రామాల్లో చూపుతున్న స్ఫూర్తిని నగరవాసులు కూడా ప్రదర్శిస్తే కరోనాకు అడ్డుకట్ట వేయడం  సాధ్యమవుతుంది.

సాక్షి, నారాయణఖేడ్ ‌: బండరాళ్లతో మోది యువకుడిని దారుణంగా హత్య చేసిన సంఘటన నారాయణఖేడ్‌ జంట గ్రామం మంగల్‌పేట్‌లో చోటుచేసుకుంది. మృతదేహన్ని పందులు పీక్కుతింటుండడంతో స్థానికులు గుర్తించి పోలీసులకు సమాచారం అందించారు. నారాయణఖేడ్‌–2 ఎస్‌ఐ మొగులయ్య తెలిపిన వివరాల ప్రకారం.. కల్హేర్‌ మండలం ఖాజాపూర్‌కు చెందిన వడ్డె రాజు (23) ఇస్నాపూర్‌లో పని చేసేందుకు వెళ్తున్నానని సోమవారం ఇంట్లో చెప్పి వెళ్లాడు. ఈ క్రమంలో మంగళవారం ఉదయం  పట్టణంలోని కొత్త బస్టాండ్‌ ఆవరణలోని చెట్లపొదల్లో ఓ మృతదేహాన్ని స్థానికులు గుర్తించారు. పందులు పీక్కు తింటుండగా వెంటనే పోలీసులకు సమాచారం అందించారు. సంఘటనా స్థలాన్ని సీఐ రవీందర్‌రెడ్డి పరిశీలించారు. క్లూస్‌టీం, డాగ్‌స్కా్వడ్‌ను పిలిపించారు. మృతదేహం గుర్తించడానికి వీలులేకుండా మారింది. మర్మాంగాలు కోసినట్లు గుర్తించారు. సమీపంలో రక్తపు మరకలతో రెండు బండరాళ్లు ఉండడంతో తలపై బండరాళ్లతో మోది హత్యచేసినట్లు భావిస్తున్నారు. ఘటనా స్థలంలో రెండు జతల చెప్పులు, బెల్టు, మృతుడి ఒంటిపై ఉన్న దుస్తుల్లో ఓ పర్సు, ఆధార్‌కార్డు జిరాక్స్‌ ప్రతులను స్వా«దీనం చేసుకున్నారు. అందులోని వివరాల ఆధారంగా మృతుని కుటుంబసభ్యులకు సమాచారం ఇచ్చారు. గ్రామానికి చెందిన వడ్డె సునీల్‌ వచ్చి మృతదేహాన్ని పరిశీలించి తన సోదరుడు వడ్డె రాజుగా గుర్తించాడు. డాగ్‌ స్క్వాడ్‌ మృతదేహం వద్ద ఉన్న చెప్పుల వాసన చూసి సమీపంలోని పాలశీతలీకరణ కేంద్రం ఆవరణలోంచి ఎదురుగా ఉన్న పెట్రోల్‌ బంక్‌ వరకు వెళ్లి తిరిగి మృతదేహం సమీపానికి వచ్చి ఆగింది. క్లూస్‌టీం వేలిముద్రలను సేకరించింది. కేసు నమోదు చేసి దర్యాప్తు చేస్తున్నట్లు ఎస్‌ఐ మొగులయ్య తెలిపారు.  

సాక్షి, సంగారెడ్డి: గురుకులానికి చెడ్డపేరు తీసుకు వచ్చేలా వ్యవహరిస్తే ఎవ్వరినీ ఉపేక్షించేది లేదని, శాఖాపరమైన చర్యలతోపాటు అవసరమైతే ప్రిన్సిపాల్‌ను సస్పెండ్‌ చేస్తామని గురుకుల పాఠశాలల రీజినల్‌ కోఆర్డినేటర్‌(ఆర్సీఓ) బాలస్వామి హెచ్చరించారు. నారాయణఖేడ్‌ మండలం జూకల్‌లోని సాంఘిక సంక్షేమ గురుకుల ప్రిన్సిపాల్‌ మధుసూదన్‌రావుతోపాటు పలు పలువురు అధ్యాపకుల తీరును నిరసిస్తూ వర్కర్లు ధర్నా చేయడం, తల్లిదండ్రుల ఆరోపణలపై ఆర్సీఓ మంగళవారం విచారణ జరిపారు. ఈ సందర్భంగా ఆయన విలేకరులతో మాట్లాడుతూ ప్రిన్సిపాల్‌తోపాటు కొందరు అధ్యాపకులపై ఆరోపణలు వచ్చాయని అన్నారు. తల్లిదండ్రులు, విద్యార్థుల నుంచి పూర్తిస్థాయిలో వివరాలు సేకరిస్తున్నట్లు చెప్పారు. ప్రిన్సిపాల్‌ మద్యం సేవించి వర్కర్లతో అసభ్యంగా ప్రవర్తిస్తున్నాడని, భోజనం బాగుండడం లేదని ఫిర్యాదులు వచ్చాయని అన్నారు. సరిపడా సరుకులు ఇవ్వడం లేదని, మటన్‌ కాంట్రాక్టర్‌తో ఇబ్బందులు ఎదురవడం, కాంట్రాక్టు మార్చడం, మెనూ ప్రకారం వంటకాలు ఉండడం లేదని పలు ఫిర్యాదులు వచ్చాయని తెలిపారు. ఈ ఆరోపణలపై అంశాలవారీగా విచారణ చేసి గురుకుల పాఠశాలల రాష్ట్ర కార్యదర్శి డా.ప్రవీణ్‌కుమార్‌కు నివేదిస్తామని అన్నారు. కొందరు లెక్చరర్లు, సిబ్బందితో కూడా సఖ్యతగా ఉండడం లేదని తెలపారు. ఈ అంశాలను విచారణ చేసి నిజం అని తేలితే శాఖాపరంగా తీసుకోవాల్సిన చర్యలతోపాటు అవసరమైతే ప్రిన్సిపాల్‌ను సస్పెండ్‌ కూడా చేస్తామని అన్నారు. గురుకుల పాఠశాలకు చెడ్డపేరు తీసుకువస్తే ఊరుకునేది లేదని అన్నారు. ప్రిన్సిపాల్‌ గతంలో సస్పెన్షన్‌కు గురై ఇక్కడ బాధ్యతల్లో చేరారని, ఆయన ప్రవర్తనలో మార్పు తెచ్చుకోవాలని సూచిస్తామన్నారు.  తాగుబోతు ప్రిన్సిపాల్‌ వద్దు..   పేరెంట్స్‌ కమిటీ సభ్యులు, ప్రజా సంఘాల బాధ్యులు ఆర్సీఓను కలిసి ప్రిన్సిపాల్‌పై ఫిర్యాదు చేశారు. బాధ్యతగా ఉండాల్సిన ప్రిన్సిపాల్, కొందరు అధ్యాపకులు తాగివచ్చి గురుకులం పేరును చెడగొడుతున్నారని, ఇలాంటి వారిపై తప్పకుండా చర్యలు తీసుకోవాలని పేర్కొన్నారు.  తాగుబోతు ప్రిన్సిపాల్‌ను విధుల నుంచి తొలగించి గురుకులాన్ని మెరుగుపర్చాలని విద్యార్థుల తల్లిదండ్రులు కోరారు. ఇదిలా ఉండగా ఆర్సీఓ విచారణ జరుపుతున్న తరుణంలోనే ప్రిన్సిపాల్‌ మధుసూదన్‌రావు తాను ప్రిన్సిపాల్‌గా విధులు నిర్వర్తించనని రాజీనామా లేఖను ఆర్సీఓకు అందించారు. 

కంగ్టి(నారాయణఖేడ్‌): ఓ మహిళ బ్యాంకు ఖాతా నుంచి ఆమెకు తెలియకుండా గూగుల్‌ పే యాప్‌ ద్వారా డబ్బులు కాజేసిన వ్యక్తిని పోలీసులు చాకచక్యంతో పట్టుకున్నారు. అతడి వద్ద నుంచి రూ. 2.4 లక్షలు రికవరీ చేశారు. ఈ సంఘటనలో నిందితుడిని సంగారెడ్డి జిల్లా కంగ్టి మండల పరిధిలోని నాగుర్‌(కే) గ్రామంలో పోలీసులు  గురువారం అరెస్ట్‌ చేశారు. కంగ్టి సీఐ వెంకటేశ్వర్‌రావు తెలిపిన వివరాల ప్రకారం... మండలంలోని నాగుర్‌(కే) గ్రామానికి చెందిన నడిమిదొడ్డి శాంతమ్మకు కంగ్టిలోని ఏపీజీవీబీలో సేవింగ్‌ ఖాతా ఉంది. తొమ్మిది నెలల క్రితం ఆమె భర్త బాబు మృతి చెందడంతో రైతు బీమా డబ్బులు రూ.5 లక్షలు, కూతురు వివాహం జరగడంతో కల్యాణలక్ష్మి డబ్బులు రూ. 75 వేలు ఖాతాలో జమయ్యాయి. అయితే ఈ ఖాతాల్లో సొమ్ము వచ్చేలా చూడాలని గ్రామంలో పైరవీలు చేసే వాగ్‌మారే తుకారాంకు  బాధిత మహిళ బ్యాంకు ఖాతా, ఆధార్‌ కార్డు జిరాక్స్‌లు ఇచ్చింది. ఈ క్రమంలో తుకారాం మహిళను నమ్మించి మాయ మాట లు చెప్పి ఏటీఎం కార్డు సైతం తస్కరించాడు. శాంతమ్మ ఖాతాలో ఉన్న డబ్బులు కాజేయాల ని పథకం వేశాడు. అంతలోనే గ్రామానికి చెందిన రాజు అనే వ్యక్తి సెల్‌ఫోన్‌ పోగొట్టుకున్నాడు. అది తుకారాంకు దొరికింది. రాజు తన సిమ్‌ కార్డును రిచార్జీ చేసి దాన్ని వేరే ఫోన్‌లో యాక్టివేట్‌ చేయించుకొన్నాడు. తనకు దొరికిన ఫోన్‌లోని నంబర్‌ను శాంతమ్మ బ్యాంకు ఖాతాకు లింక్‌ చేసుకొనేందుకు మరో మహిళను తీసుకువెళ్లాడు. బ్యాంకులో మరో మహిళ ను పరిచయం చేసి ఆమె శాంతమ్మ అని ఫోన్‌  నంబర్‌ లింక్‌ చేయాలంటూ దరఖాస్తు చేయించాడు. దీంతో తుకారాం మార్గం సుగమం అయింది. తస్కరించిన ఏటీఎం కార్డును ఉపయోగించి తన మొబైల్‌లో గుగూల్‌పే యాప్‌లో డబ్బులను దశల వారీగా డ్రా చేయడం ప్రారంభించాడు. ఇలా రెండు నెలల వ్యవధిలో రూ. 2.5 లక్షలు డ్రా చేశాడు. గత నెల 29వ తేదిన శాంతమ్మ బ్యాంకుకు వెళ్లి ఆరా తీసి రూ. 2.5 లక్షలు డ్రా చేసినట్లు తేలడంతో గగ్గోలు పెట్టింది. ఏడుస్తూ పోలీసులను ఆశ్రయించింది. పోలీసులు కేసు నమోదు చేసుకొని విచారణ చేపట్టారు. వివరాలు తెలుసుకొన్న పోలీసులు గురువారం నిందితుడిని పట్టుకొని అతని వద్ద నుంచి రూ. 2.4 లక్షలు స్వాధీనం చేసుకొన్నారు. నిందితున్ని జ్యుడీషియల్‌ రిమాండ్‌కు పంపినట్లు సీఐ వెంకటేశ్వర్‌రావు, ఎస్‌ఐ అబ్దుల్‌ రఫీక్‌ తెలిపారు. కార్యక్రమంలో ఏఎస్‌ఐ నారాయణ, సిబ్బంది ప్రేమ్‌సింగ్, తుకారం ఉన్నారు.

నారాయణఖేడ్‌: సంగారెడ్డి జిల్లాలో ఓ ఆర్టీసీ బస్సు శనివారం మధ్యాహ్నం పొలాల్లోకి దూసుకెళ్లింది. ఈ ఘటనలో బస్సులో ప్రయాణిస్తున్న 10 మందికి స్వల గాయాలయ్యాయి. నారాయణఖేడ్‌ డిపోకు చెందిన టీఎస్‌ 15 జెడ్‌ 0154 నంబరు గల బస్సు 30 మంది ప్రయాణికులతో నారాయణఖేడ్‌ నుంచి లింగంపల్లికి వెళుతుండగా పట్టణ శివారులో అదుపుతప్పి పొలాల్లోకి దూసుకెళ్లింది. దీంతో బస్సులో ప్రయాణిస్తున్న బోడగట్టుకు చెందిన సంజీవ్‌తోపాటు మరో 9 మందికి స్వల్ప గాయాలయ్యాయి. రోడ్డు పక్కన గోతులు ఉండడం, వాటిని పూడ్చే పనులు జరుగుతుండడంతో బస్సు అదుపుతప్పింది. కాగా, బస్సు డ్రైవర్‌ మద్యం తాగి నడపడం వల్లే ఈ ప్రమాదం చోటుచేసుకుందని ప్రయాణికులు ఆరోపించారు. దీంతో ఆర్టీసీ అధికారులు బ్రీత్‌ అనలైజర్‌తో పరీక్షలు జరపగా డ్రైవర్‌ మద్యం తాగ లేదని తేలింది. తృటిలో పెద్ద ప్రమాదం తప్పడంతో అందరూ ఊపిరి పీల్చుకున్నారు.  

సాక్షి,మెదక్‌ : నాగల్‌గిద్ద మండలం కరస్‌గుత్తిలో భార్య, కొడుకును హత్యచేసిన సంఘటనను పోలీసులు ఛేదించారు. ఇందుకు సంబంధించిన వివరాలను నారాయణఖేడ్‌ డీఎస్పీ సత్యనారాయణరాజు, ఖేడ్‌ సీఐ వెంకటేశ్వరరావులు స్థానిక విలేకరుల సమావేశంలో వెల్లడించారు. వారి కథనం ప్రకారం కరస్‌గుత్తి గ్రామానికి చెందిన చింతాకి వెంకట్‌రెడ్డి(32) ఈనెల 12న తన భార్య కవిత(28), కొడుకు దినేష్‌రెడ్డి(04)లను మధ్యాహ్నం భోజన సమయంలో తినే కూరలో మత్తుపదార్థం కలిపిడాన్నారు. తదనంతరం కాసేపటికి వారు నిద్రలోకి వెళ్లారని.. ఆ సమయంలో ఇంట్లో పూజగదిలోకి తీసుకెళ్లి భార్యపైన, కొడుకుపైన కిరోసిన్‌ పోసి నిప్పంటించాడని తెలిపారు. అనంతరం డ్రెస్‌ మార్చుకుని బయటకు వెళ్లి తనకు ఏమి తెలియనట్లు వ్యవహరించి ఆత్మహత్యగా చిత్రికరించే ప్రయత్నం చేశాడన్నారు. రాత్రి ఇంటివద్ద ఉన్న తుఫాన్‌ వాహనం తీసుకెళ్లే ప్రయత్నంలో సమాచారం పోలీసులకు అందడంతో నిందితున్ని తమ అదుపులోకి తీసుకోవడం జరిగిందన్నాడు.  అనుమానం, ఆస్తి తగాదాలే కారణం  తన భార్య కవితపై వెంకట్‌రెడ్డికి పలు అనుమానాలు ఉండేవని, వీటితోపాటు తనకు జన్మించిన కుమారుడు సైతం తనకు పుట్టలేడని అనుమానలు ఉండేవన్నారు. తన గ్రామంలో ఉన్న భూమిలో ఒక ఎకరం భూమి అమ్ముకుని వచ్చిన డబ్బులతో ఒక తుఫాన్‌ వాహనం కొనుగోలు చేశాడన్నారు. కాగా మిగిలిన డబ్బులను మద్యం తాగుతూ జల్సా చేశాడన్నారు. దీంతో డబ్బులు అయిపోవడంతో తన భార్య పేరుమీదుగా ఉన్న భూమిని అమ్ముదామని నిత్యం భార్యను వేదింపులు చేసేవాడని ఇదే క్రమంలో భార్య ఒప్పుకోకపోవడంతో భార్యను హతమార్చి ఆస్తిని సొంతం చేసుకోవాలనుకున్నాడని తెలిపారు. ఈ క్రమంలోనే పలు మార్లు గొడవలు జరుగగా పెద్దల సమక్షంలో పలు పంచాయితీలు సైతం చేశారన్నారు. హత్యరోజున వెంకట్‌రెడ్డి భార్య కవిత తన అన్నకు ఫోన్‌చేసి తన కుమారున్ని తీసుకెళ్లాలని కోరిందన్నారు. కాగా అంత లోపే భర్త వెంకట్‌రెడ్డి ఈ అఘాయిత్యానికి పాల్పడటం జరిగిందన్నారు. కాగా నిందితుని జహీరాబాద్‌ కోర్టులో హాజరుపర్చి రింమాండ్‌కు పంపడం జరుగుతుందన్నారు. సమావేశంలో నాగల్‌గిద్ద, మనూరు ఎస్‌ఐలు శేఖర్, నరేందర్, పోలీసు సిబ్బంది ఉన్నారు.  

నారాయణఖేడ్‌: కర్ణాటక, మహారాష్ట్రకు సరిహద్దుగా ఉన్న నారాయణఖేడ్‌ నియోజకవర్గం త్రివేణీ సంగమంగా విరాజిల్లుతుంది. రాష్ట్రంలోనే అత్యంత వెనుకబడి ఉన్న ప్రాంతంగా ఈ నియోజకవర్గం పేరుగాంచింది. కాంగ్రెస్‌ కంచుకోటగా ఉన్న ఈ నియోజకవర్గంలో 2016లో జరిగిన ఉప ఎన్నికల్లో టీఆర్‌ఎస్‌ పాగావేసింది. మళ్లీ ఈ గడ్డపై గులాబీ జెండాను ఎగురవేయాలన్న లక్ష్యంతో ఆ పార్టీ నేతలు ప్రచారన్ని సాగిస్తున్నారు. నియోజకవర్గంలో ఇప్పటివకు పటోళ్ల, షెట్కార్, మహారెడ్డి కుటుంబాల పాలనే సాగుతూ వస్తోంది. ప్రస్తుత ఎన్నికల్లో సైతం ప్రధాన పార్టీల నుంచి ఆ కుటుంబాల వారే బరిలో నిలిచారు. రెండున్నరేళ్లలో చేసిన అభివృద్ధే తనను గెలిపిస్తుందన్న ధీమాతో టీఆర్‌ఎస్‌ అభ్యర్థి భూపాల్‌రెడ్డి ముందుకు సాగుతున్నారు. తన తండ్రి దివంగత ఎమ్మెల్యే స్వర్గీయ కిష్టారెడ్డి నియోజకవర్గాన్ని ఎంతగానో అభివృద్ధి చేశాడని గుర్తు చేస్తూ బీజేపీ అభ్యర్థి సంజీవరెడ్డి ప్రచారన్ని సాగిస్తున్నారు. ప్రభుత్వ వైఫల్యాలు, కాంగ్రెస్‌ గతంలో చేసిన అభివృద్ధే తనను గెలిపిస్తుందన్న ధీమాతో ఆ పార్టీ అభ్యర్థి సురేశ్‌ షెట్కార్‌ చెబుతున్నారు. ఖేడ్‌లో ఈ ముగ్గురి నడమే ప్రధానంగా పోటీ నెలకొంది. పట్లోళ్ళ సంజీవరెడ్డి (బీజేపీ అభ్యర్థి)  ఖేడ్‌ మండలం పంచగామకు చెందిన మాజీ ఎమ్మెల్యే కిష్టారెడ్డి కుమారుడు పట్లోళ్ళ సంజీవరెడ్డి. వృత్తి రిత్యా వైద్యుడు. 2004లో రాజకీయాల్లోకి ప్రవేశించారు. 2006 నుంచి 2011 వరకు ఖేడ్‌ జెడ్పీటీసీగా పనిచేశారు. 2013లో ఎంపీటీసీగా గెలుపొంది ప్రస్తుతం నారాయణఖేడ్‌ ఎంపీపీగా ఉన్నారు. తండ్రి వెంటే రాజకీయాల్లో ఉంటూ ఎన్నికల సమయంలో తండ్రి గెలుపుకోసం శ్రమించారు. కిష్టారెడ్డి హఠాన్మరణం చెందడంతో 2016 ఉప ఎన్నికల్లో పోటీచేశారు. ముక్కుసూటితనం ఉండడం, ఒక్కమారుగా పార్టీ మారడం కొంత ప్రతికూలత అయినా, తండ్రి క్యాడర్, ఉప ఎన్నికల ఓటమి సానుభూతి, ప్రభుత్వంపై ఉన్న వ్యతిరేకత, కార్యకర్తలకు అందుబాటులో ఉండడం, యువత సపోర్ట్‌ తదితర అంశాలతో గెలుపొందుతాననే ధీమాతో ఉన్నారు. సురేష్‌ షెట్కార్‌ (కాంగ్రెస్‌ అభ్యర్థి)  ఖేడ్‌ పట్టణానికి చెందిన స్వాతంత్ర సమరయోధుడు, దివంగత మాజీ ఎమ్మెల్యే శివరావు షెట్కార్‌ కుమారుడు సురేష్‌ షెట్కార్‌. 1997లో రాజకీయాల్లో ప్రవేశించారు. యూత్‌ కాంగ్రెస్‌ జిల్లా ఉపాధ్యక్షుడిగా, రాష్ట్ర కార్యదర్శిగా ఒక పర్యాయం కొనసాగారు. డీసీసీ అధ్యక్షుడిగా సైతం పనిచేశారు. 2004లో నారాయణఖేడ్‌ ఎమ్మెల్యేగా గెలుపొందారు. 2009లో జరిగిన ఎన్నికల్లో జహీరాబాద్‌ ఎంపీగా పోటీచేసి గెలుపొందారు. 2014లో అదే స్థానానికి ఎంపీగా పోటీ చేసి ఓడిపోయారు. ప్రస్తుత ఎన్నికల్లో ప్రజా కూటమి తరఫుగా ఖేడ్‌ శాసనసభ స్థానం నుంచి ఎమ్మెల్యేగా పోటీ చేస్తున్నారు. కాంగ్రెస్‌ పార్టీ నుంచి ఆయన బరిలో నిలిచారు. స్థానికంగా అందుబాటులో ఉండడనే అపవాదు ఉండడం, ఉప ఎన్నికల్లో క్యాడర్‌ కొంత దూరం కావడం కొంత ప్రతికూల అంశాలుగా ఉన్నాయి. ఎమ్మెల్యే, ఎంపీగా ఖేడ్‌కు చేసిన అభివృద్ధే తనను గెలిపిస్తుందనే ధీమాతో ఉన్నారు.  సిట్టింగ్‌ ప్రొఫైల్‌..  భూపాల్‌రెడ్డిది కల్హేర్‌ మండలం ఖానాపూర్‌(కె). దివంగత మాజీ ఎమ్మెల్యే మహారెడ్డి వెంకట్‌రెడ్డి కుమారుడు. కృష్ణాపూర్‌ ప్రాథమిక సహాకర సంఘం చైర్మన్‌గా జిల్లా సహకార కేంద్ర బ్యాంకు డైరెక్టర్‌గా పనిచేశాడు. 2008లో టీఆర్‌ఎస్‌ పార్టీలో చేరి పార్టీ రైతు విభాగం రాష్ట్ర నాయకులుగా> ఎన్నికయ్యారు. 2009లో టీఆర్‌ఎస్, టీడీపీ పొత్తులో భాగంగా టీఆర్‌ఎస్‌ టిక్కెట్‌ దక్కించుకొని ఓటమి చెందారు. తిరిగి 2014 అసెంబ్లీ ఎన్నికల్లో టీఆర్‌ఎస్‌ అభ్యర్థిగా బరిలో నిలిచి రెండో సారి ఓటమిపాలయ్యారు. అనంతరం 2016లో అప్పటి ఎమ్మెల్యే కిష్టారెడ్డి మరణంతో జరిగిన ఉప ఎన్నికల్లో ఎమ్మెల్యేగా గెలుపొంది శాసనసభలో అడుగుపెట్టారు. అభివృద్ధి పనులు..  ఖేడ్‌లో మార్కెట్‌ యార్డు, పెద్దశంకరంపేటలో సబ్‌మార్కెట్‌ యార్డు, మండలానికి ఒక గిడ్డంగి నిర్మాణం. మద్దతు ధరకు ధాన్యం కొనుగోళ్లు చేపట్టడం.  15 నూతన 33/11 కేవీ సబ్‌స్టేషన్లు ఒక 132కేవీ సబ్‌స్టేషన్‌ నిర్మాణం, 80మంది నిరుద్యోగులకు ఉపాది. విద్యుత్‌ సమస్య నివారణ రూ.24కోట్లతో నల్లవాగు కాల్వల ఆధునికీకరణ. 8 కొత్త చెరువులు మంజూరు, 12 చెరువులకు హైడ్రాలిక్‌ అనుమతులు.  7.5 కోట్లతో మనూరు, నాగల్‌గిద్ద మండలాలకు సాగునీటికోసం నాలుగు ఎత్తిపోతల పథకాల రమ్మతులు  15కిలోమీటర్లు ఉన్న డబుల్‌లైన్‌ రోడ్డు 130కిలోమీటర్లకు విస్తరించడం. పీఆర్, ఆర్‌అండ్‌బీలో 100కోట్లతో రోడ్ల మరమ్మతులు.  ఏడు గురుకులాలు మంజూరు మనూరుకు జూనియర్‌ కళాశాల మంజూరుతోపాటు, కల్హేర్, కంగ్టిలో కళాశాల భవనాల ఏర్పాటు, ఖేడ్‌లో మోడల్‌ డిగ్రీ కళాశాల ప్రారంభం. ఖేడ్‌లో 100 పడకల ఆస్పత్రి ప్రారంభం. డయాలసిస్‌ కేంద్రం ఏర్పాటు, మండలాల్లోని పీహెచ్‌సీల స్థాయి పెంపు.  ఖేడ్‌ డివిజన్‌ కేంద్రం, డీఎస్పీ కార్యాలయం, రెండు నూతన మండలాల ఏర్పాటు.  రూ.70కోట్లతో 20 నూతన వంతెనల నిర్మాణం, రూ.30కోట్లతో నియోజకవర్గంలో సీసీ రోడ్ల నిర్మాణం.  ప్రధాన సమస్యలు..  ఖేడ్‌ నుండి వలసలు శాశ్వతంగా నిలిచిపోకపోవడం, కర్మాగారాల నిర్మాణం జరగకపోవడం.  డబుల్‌బెడ్‌రూం ఇండ్లు ఇంకా లబ్ధిదారులకు అందకపోవడం.  మంజీరా నీరు సాగుకు అందకపోవడం.  మిషన్‌ భగీరథ పథకం పూర్తికాకపోవడం.  రోడ్ల విస్తరణ పనులు పూర్తికాకపోవడం, ఖేడ్‌ ఆస్పత్రిలో సిబ్బంది కొరత.  

నారాయణఖేడ్‌ : నాగల్‌గిద్దలో అంబేడ్కర్‌ గద్దె విషయంలో నారాయణఖేడ్‌ ఎస్‌ఐ నరేందర్‌ తన పరిధి కానప్పటికీ అగ్రవర్ణాలతో కుమ్మక్కై పోలీసు బలగాలు, లాఠీలతో వచ్చి దళితులను దూషించినందుకు ఆయనను సస్పెండ్‌ చేసి ఎస్సీ, ఎస్టీ అట్రాసిటీ కేసు నమోదు చేయాలని పలు దళిత సంఘాల నాయకులు డిమాండ్‌ చేశారు. నారాయణఖేడ్‌ అంబేడ్కర్‌ భవన్‌లో ఆదివారం ఏర్పాటు చేసిన విలేకరుల సమావేశంలో మాదిగ జేఏసీ రాష్ట్ర కన్వీనర్‌ జీవన్, కేవీపీఎస్‌ జిల్లా ఉపాధ్యక్షుడు నర్సింహులు, ఖేడ్‌ నియోజకవర్గ అంబేడ్కర్‌ సంఘం అధ్యక్షుడు కాన్షీరాం, నాగల్‌గిద్ద మండలశాఖ అధ్యక్షుడు గణపతి, అంబేడ్కర్‌సేన అధ్యక్షుడు రాజ్‌కుమార్, నియోజకవర్గ మాలమహానాడు అధ్యక్షుడు భీంసేనలు మాట్లాడుతూ.. నాగల్‌గిద్దలో గద్దె విషయంలో అభ్యంతరం ఉంటే దళిత సంఘాల వారిని పిలిపించి మాట్లాడాల్సిందని అన్నారు. కూల్చివేయాలనుకుంటే నోటీసులు ఇవ్వాల్సిందన్నారు. అవేమీలేకుండా పోలీసు బలగాలతో వచ్చిన ఎస్‌ఐ నరేందర్‌ దళితులను దూషిస్తూ జేసీబీతో గద్దెను కూల్చివేయడమే కాకుండ, నాగల్‌గిద్ద దళిత సర్పంచ్‌ని అవమనపర్చాని ఆరోపించారు. ఆయా విషయాలపై డీజీపీ, ఎస్సీ, ఎస్టీ రాష్ట్ర, జాతీయ కమిషన్‌లకు ఫిర్యాదు చేయడంతో పాటు, త్వరలోనే ఆత్మగౌరవసభ పెట్టి హక్కులను సాధించుకుంటామని అన్నారు.  


 నారాయణఖేడ్‌: నియోజకవర్గాన్ని మళ్లీ భారీ వర్షం అతలాకుతలం చేసింది. భారీగా ఆస్తినష్టం మిగిల్చింది. వర్షాకాలం ప్రారంభం అయ్యాక ఒక్క రోజు ఇంత మేర వర్షం కురవడం ఇదే మొదటిసారి. శనివారం తెల్లవారు జామున వర్షం ప్రారంభమైంది. ఉదయం నుంచి మధ్యాహ్నం వరకు తెరపి ఇచ్చినా మళ్లీ సాయంత్రం మొదలయ్యింది.
 నారాయణఖేడ్‌ మండలంలో 11.9 సెంటీ మీటర్ల వర్షం పడింది. గంగాపూర్‌ మొండి మత్తడి, తుర్కాపల్లి పటేల్‌ చెరువులకు గండ్లు పడ్డాయి.నీరంతా వృథాగా పోయింది. మండలంలో సుమారు 5 వేల ఎకరాల్లో పంటలు దెబ్బతిన్నాయి. పక్షం రోజులుగా వర్షాలు, వరదల వల్ల పంటలన్నీ దెబ్బతిన్నట్లు రైతులు ఆవేదన వ్యక్తం చేశారు.
 కంది, పెసర, మినుము, సోయా, పత్తి, మొక్కజొన్న, జొన్న పంటలకు తీవ్ర నష్టం జరిగింది. పంటలు నీట మునిగి కుళ్లిపోయాయి. నారాయణఖేడ్‌ పట్టణ శివారులో గల వాగు పొంగి ప్రవహించింది. కంగ్టి, సిర్గాపూర్‌- నారాయణఖేడ్‌ రూట్లో నెహ్రూ నగర్‌- మన్సుర్‌పూర్‌ గ్రామాల మధ్య ఉన్న వంతెనపై నుంచి ఐదు అడుగుల ఎత్తు మేర నీరు ప్రవహించింది. దీంతో వంతెన వద్ద గల రోడ్డు కొట్టుకుపోయింది. ఫలితంగా నారాయణఖేడ్‌- కంగ్టి, సిర్గాపూర్‌ మార్గంలో రాకపోకలు నిలిచిపోయాయి. దెబ్బతిన్న రోడ్డును అధికారులు మరమ్మతులు చేస్తున్నారు.


 
 115 ఓట్లతో గెలిచిన జగన్నాథ్‌పూర్‌ ఎంపీటీసీ మాణిక్యం
 
 ఖేడ్‌ అభివృద్ధికి ప్రజాతీర్పే నిదర్శనం: ఎమ్మెల్యే భూపాల్‌రెడ్డి
 
 నారాయణఖేడ్‌: నారాయణఖేడ్‌ మండల పరిధిలోని జగన్నాథ్‌పూర్‌ ఎంపీటీసీ స్థానానికి జరిగిన ఉప ఎన్నికలో టీఆర్‌ఎస్‌ ఆభ్యర్థి మాణిక్యం ఘనవిజయం సాధించారు. కాంగ్రెస్‌ అభ్యర్థి నర్సింలుపై మాణిక్యం 115 ఓట్ల మెజారిటీతో  గెలుపొందినట్లు ఎన్నికల అధికారి ప్రకటించారు.  కాంగ్రెస్‌ అభ్యర్థికి 490 ఓట్లు రాగా టీఆర్‌ఎస్‌ అభ్యర్థికి 605, టీడీపీ అభ్యర్థికి 36 ఓట్లు వచ్చాయి. 7 ఓట్లు నోటాకు 7 పోలయ్యాయి.  
 టీఆర్‌ఎస్‌ కార్యకర్తల విజయోత్సావం
 ఎంపీటీసీగా మాణిక్యం గెలుపొందడంతో టీఆర్‌ఎస్‌ నాయకులు నారాయణఖేడ్‌తో పాటు బాణాపూర్‌, అంత్వార్‌, జగన్నాథ్‌పూర్‌ గ్రామాల్లో  సంబురాలు జరుపుకున్నారు. ఈ సందర్భంగా ఖేడ్‌ ఎమ్మెల్యే  భూపాల్‌రెడ్డి మాట్లాడుతూ ప్రజలు అభివృద్ధినే కోరుకుంటున్నారన్నారు.
 ఖేడ్‌ను అభివృద్ధి పథంలో నడిపించడానికి ప్రజల తీర్పే నిదర్శనమన్నారు. అంతకు ముందు ఖేడ్‌లో టీఆర్‌ఎస్‌ నాయకులు బాణాసంచా పేల్చి విజయోత్సవ సంబురాలు జరుపుకొన్నారు. కార్యక్రమంలో టీఆర్‌ఎస్‌ నాయకులు ప్రభాకర్‌, సిద్దయ్య స్వామి, చెనబస్సప్ప, పండరియాదవ్‌, మలిశెట్టియాదవ్‌ తదితరులు పాల్గొన్నారు.


 
 జిల్లాల పునర్విభజన.. దగాపడ్డ నారాయణఖేడ్‌
 
 అభిప్రాయ సేకరణ.. మెదక్‌ జిల్లాలోనే ఉండాలి
 
 లేదు.. ఎక్కడైనా పర్వాలేదు.. ఏదైనా మంచిదే కదా!..
 
 ఖేడ్‌వాసుల అభిప్రాయాన్ని సేకరించిన ‘సాక్షి’
 
 సాక్షి ప్రతినిధి, సంగారెడ్డి/సాక్షి నెట్‌వర్క్‌: జిల్లా పునర్విభజనపై రైతులు, రైతు కూలీలు, సాధారణ ప్రజలు ఇంకా ఒక అంచనాకు రాలేదు. రాజకీయ నేతలు, పనిగట్టుకున్న ఒక వర్గం మాత్రమే తమ సొంత వాదనలను ప్రజాభిప్రాయంగా చూపించే ప్రయత్నం జరుగుతున్నట్లు  తేలింది. బుధవారం ‘సాక్షి’ నెట్‌వర్క్‌ నారాయణఖేడ్‌ నియోజకవర్గంలో ప్రజాభిప్రాయాన్ని సేకరించింది. ప్రతి మండలానికి 250 మంది చొప్పున మొత్తం 1,250 మంది నుంచి అభిప్రాయాల్ని సేకరించింది.
 కేవలం 40 శాతం మంది మాత్రమే స్పష్టమైన అభిప్రాయాన్ని వ్యక్తం చేయగా మిగిలిన 60 శాతం ప్రజలు ఏ జిల్లా అయినా ఒకటే అని చెప్పారు. ఈ 60 శాతం మందిలో ఎక్కువగా రైతులు, వ్యవసాయ కూలీలు, చేతి వృత్తుల వారు ఉన్నారు. విద్యావంతులు మాత్రం మిశ్రమంగా స్పందించారు. జీవితాన్ని చదివిన అనుభవజ్ఞులు, విశ్రాంత ఉద్యోగులు ‘నారాయణఖేడ్‌ మెదక్‌ జిల్లాలోనే కలవాలం’టూ తేల్చి చెప్పారు.  
 
 ముందుకు చూద్దాం!
 ఈయన పేరు వీర్‌శెట్టి, రిటైర్డ్‌ ప్రధానోపాధ్యాయుడు. నారాయణఖేడ్‌ మండలం రుద్రార్‌కి చెందిన ఈయన ‘సంగారెడ్డిలో ఖేడ్‌ కలిస్తే కొత్తగా పరిశ్రమలు రావు’ అంటున్నారు. ‘అవన్నీ జహీరాబాద్‌లోని నిమ్జ్‌కి వెళ్లిపోతాయి. ఫలితంగా ఖేడ్‌ పిల్లల భవిష్యత్తు అంధకారమవుతుంది’ అని తన వాదన వినిపించారు.
 ‘ప్రత్యేక రాష్ట్రంలో వెనుకబడ్డ జిల్లాలు, ప్రాంతాలకు అత్యధిక ప్రాధాన్యత ఉంటుంది. ప్రస్తుత అవసరాలను కాకుండా ముందు తరాలు, విద్యార్థుల భవిష్యత్తును ఆలోచిస్తే మెదక్‌ జిల్లాలోనే నారాయణఖేడ్‌ చేరడం అన్నివిధాలా మేలు. అప్పుడు ఖేడ్‌లోని పడావు భూముల్లో కర్మాగారాలు ఏర్పాటవుతాయి. ఉపాధి, ఉద్యోగావకాశాలు లభిస్తాయి’ అని గట్టిగా చెప్పారు.
 
 రెండింధాలా మేలు కదా!
 ఈ యువకుడి పేరు సయ్యద్‌ కలీం. మాసాన్‌పల్లి క్రాస్‌రోడ్డులో సైకిల్‌ రిపేర్‌షాపు నడుపుతున్నాడు. ఖేడ్‌ను ఏ జిల్లాలో కలపాలని అడిగినప్పుడు ‘సంగారెడ్డిలో ఉంటే అక్కడ పనులు చేసుకుని అట్నుంచటే హైదరాబాద్‌కు వెళ్తాం. ఒకే రోజు రెండు పనులు చేసుకోవచ్చు కదా! మెదక్‌ పోయేందుకు బస్సులు సరిగా ఉండవు’ అని తన అనుభవాన్ని వివరించాడు.
 
 మెదక్‌ జిల్లాలోనే  మేలు
 మన పిల్లలకు నౌకరీలు దొరకాలే. కార్ఖానాలు రావాలంటే మనందరం మెదక్‌ జిల్లాల ఉండాలె. లేకుంటే మనదిక్కు అధికారులు రారు. మనల్ని ఎవరూ పట్టించుకోరు. - డి.రాజులు, రిటైర్డ్‌ ప్రధానోపాధ్యాయులు, తడ్కల్‌
 
 సంగారెడ్డిలెందుకు చేరుస్తున్నరు?
 మనకు దెగ్గరున్న మెదక్‌లో మనం ఉంటే బాగుంటది. కాదని సంగారెడ్డిలో చేరిస్తే పొయిరానికి దినం సరిపోదు. ఇప్పుడు బస్సులు లేకుంటే ఏమాయే. జిల్లా చేస్తే బస్సులు చాలయితయి. పనులేమయినా ఉన్నా చేసుకొని ఇంటికి రానీకి బాగుంటది. సంగారెడ్డికి ఎందుకు అంటున్నారో ఏమీ అర్థమవుతలేదు. - సాయిరెడ్డి, రైతు, ముర్కుంజాల్, కంగ్టి మండలం
 
 మానసికంగా ‘సంగారెడ్డి’కి అలవాటు పడ్డాం
 ప్రస్తుతం ఉన్న రవాణా సదుపాయాలు, విద్యాపరంగా ఖేడ్‌ నియోజకవర్గం సంగారెడ్డిలోనే కొనసాగితే బాగుంటుంది.  హైదరాబాద్‌తో మంచి సంబంధాలు ఉన్నాయి. మానసికంగా సంగారెడ్డి జిల్లాకు అలవాటు పడ్డాం. - సంతోష్‌కుమార్, ఎస్‌ఏ, చాప్టా(కే) గ్రామం, కంగ్టి మండలం
 
 మెదక్‌లోనే ఉద్యోగావకాశాలు ఎక్కువ
 సంగారెడ్డిలోని పట్టణీకరణ, పోటీతత్వం ఉన్న విద్యార్థులతో ఖేడ్‌ విద్యార్థులు తట్టుకోలేరు. ఖేడ్, మెదక్‌ పిల్లల ఐక్యూ(ఇంటెలిజెంట్‌ కోషియంట్‌) స్థాయి దాదాపుగా సమానంగా ఉంది. విద్యార్థులకు ఉద్యోగావకాశాలు పెరగాలంటే ఖేడ్‌ మెదక్‌ జిల్లాలో కొనసాగడమే ఉత్తమం. - కాశీనాథ్‌రావు, ప్రధానోపాధ్యాయులు, జడ్పీహెచ్‌ఎస్‌ తడ్కల్, కంగ్టి మండలం
 
 ఉపాధి పెరగాలంటే మెదక్‌తోనే..
 కంగ్టి మండలంలోని 70 శాతం ప్రజలు వలసలపై అధారపడి జీవిస్తున్నారు. వలసలు తగ్గాలంటే కొత్త జిల్లాలో ఏర్పడే పరిశ్రమలు, అభివృద్ధి పనులతోనే స్థానికులకు బతుకుదెరువు దొరుకుతుంది. దీంతో వలసలు తగ్గుతాయి. - యశ్వంత్, ఎస్‌ఏ, సుక్కల్‌తీర్థ్‌ తండా, కంగ్టి మండలం
 
 ‘ప్యాకేజీ’తో లబ్ధి పొందుతాం
 మెదక్‌ జిల్లా కేంద్రంగా ఏర్పడితే మౌలిక వసతుల కల్పన, పారిశ్రామికాభివృద్ధి కోసం ప్రభుత్వాలు విడుదల చేసే అభివృద్ధి ప్యాకేజీలు మన నియోజకవర్గానికి అందే అవకాశం ఎక్కువగా ఉంది. దానికి తోడు కంగ్టిలాంటి రాళ్లరప్పల భూముల్లో పంటలు పండక రైతులు ఎదుర్కొంటున్న కష్టాలు పరిశ్రమల అభివృద్ధితో తొలగుతాయి. మన ప్రాంతం అన్ని రకాలుగా అభివృద్ధి చెందుతుంది. - ఎంఏ ఖాదర్, మండల కో-ఆప్షన్‌ సభ్యులు, కంగ్టి మండలం, తడ్కల్‌
  
 మెదక్‌లో ఉంటేనే అభివృద్ధి
 మెదక్‌ జిల్లాలో ఉంటేనే ఖేడ్‌ అభివృద్ధి జరుగుతుంది. 70 ఏళ్లుగా సంగారెడ్డిలో ఉంటే మనం అభివృద్ధి చెందలేదు. మన ప్రాంతం వారు ఉద్యోగాల్లో చాలా వెనుకబడి ఉన్నారు. మాకు ఉపాధి కూడా దొరక్క ఏదో పొట్టనింపుకొనే పనులు చేస్తూ కాలం వెళ్లదీస్తున్నాం. పిల్లల బతుకులు బాగుండాలంటే చిన్న జిల్లాగా ఏర్పడుతున్న మెదక్‌లోనే ఖేడ్‌ ఉండాలి. - అంజి, పెయింటర్, తడ్కల్, కంగ్టి మండలం
 
 ఎక్కడైనా సరే..
 జిల్లాల్లో సంగారెడ్డి, మెదక్‌ ఏదైనా సరే. కల్హేర్‌ మండలం నుంచి రెండు పట్టణాలకు అంతే దూరంగా ఉంటుంది. మెదక్‌కు గుర్తింపు అంతగా లేదు. - సివేందర్, ఆటోడ్రైవర్, మాసాన్‌పల్లి
 
 పెద్దగా పట్టించుకోను..
 మాసాన్‌పల్లి చౌరస్తా వద్ద పెట్రోల్‌బంక్‌లో పనిచేస్తున్నాను. భార్య పిల్లలు లేరు. జిల్లాల ఏర్పాటు గురించి నేను పెద్దగా పట్టించుకోను.  - అంబదాస్, పెట్రోల్‌బంక్‌ వర్కరు, హన్మంత్‌రావుపేట
 
 ఏదైనా పర్వానై..
 జిల్లా ఏదైనా పర్వానై. మెదక్‌ పోతే అంత బస్సు సౌకర్యం ఉండదు. రెండు మూడు చోట్ల బస్సులు ఎక్కాల్సి వస్తాది. అన్ని సౌకర్యలు కలిపిస్తే బాగుంటది. - కాషప్ప, హోటల్‌ యజమాని, కల్హేర్‌
 
 ఇప్పటికే ఎగతెగినట్లు ఉన్నాం ..
 ఉపయోగం ఉంటే ఒప్పుకోవాలి లేకుంటే లేదు. సంగారెడ్డి అంటున్నారు. కానీ ఏమైనా లాభం ఉందా..ఇప్పటికే ఎగతెగినట్లు ఉన్నాం. అభివృధ్ది లేకుంటే మరింత ఎగతెగినట్లు మారిపోతాం. - శివన్న, బాదల్‌గాం, మనూరు
 
 నాకేం తెలుస్తుంది..
 ఖేడ్‌ను ఎండ్ల కలిపితే నాకేంది. పనిచేస్తే తప్ప బతుకుదెరువుకాదు. అదంతా పెద్దోళ్లు చూసుకుంటారు. మేమే పని చేసుకొని బతుకుతున్నాము. జిల్లా, మండలం అనేంది మాకేమి అవసరం లేదు. - శ్యాంసన్, పుల్‌కుర్తి, రైతు
 
 జిల్లా గురించి తెల్వదు..
 ఏ జిల్లా అయితే ఏంది సారు?. పిల్లలకు ముందటి భవిష్యత్తు బాగుండాలి. కొలువులు రావాలి. అందరూ ఏది అంటే సర్కారు అదే చేయాలి. సర్కారోళ్లు సర్వే చేయాలి. ఆఫీసర్లు, నాయకులు వాళ్ల సేఫ్టీ చూసుకుంటరు. - గాళెప్ప, బోరంచ
 
 సంగారెడ్డిలో ఉంటేనే బాగు..
 మెదక్‌ కంటే సంగారెడ్డిల ఉంటేనే బాగు. ఏదైనా పనికి పోతే తెలిసిన వారు ఉంటారు. అదే మెదక్‌ పోతే నీళ్లు ఇచ్చేవారు కూడా ఉండరు. సమయం తప్పితే ఉత్తిదే. - నర్సింహారెడ్డి, మనూరు
  
 అందరు ఎట్లంటే అట్లా..
 కొత్త జిల్లా గురించి నాకు అస్సలే తెలియదు. ఊర్లో వారు అందరూ కొత్తగా సంగారెడ్డి జిల్లా, మెదక్‌ జిల్లా అంటున్నారు. ఏ జిల్లా అయితే లాభమో తెలియదు. ఏదైతే ఏమి బతుకు దెరువు ముఖ్యం. - పోతుల అశోక్‌రెడ్డి, బెల్లాపూర్‌
  
 రవాణా సదుపాయం కావాలి
 సంగారెడ్డి అభివృద్ధి చెందడంతో పాటు రవాణాపరంగా అనుకూలంగా ఉంది. మెదక్‌కు రవాణా పరంగా ఇబ్బందులు ఉన్నాయి. రవాణా సౌకర్యాలు ఏర్పడితే సంగారెడ్డి కంటే మెదక్‌ దగ్గరవుతుంది. ప్రాంతం అభివృద్ధి ముఖ్యం. - గోపి జైస్వాల్, జిరాక్స్‌సెంటర్‌ నిర్వాహకుడు, మంగల్‌పేట
 
 జనానికి మేలు జరగాలి
 జిల్లా ఏర్పాటుతో జనాలకు మేలు జరగాలి. నారాయణఖేడ్‌ ప్రాంతం అభివృద్ధి చెందాలి. ఇక్కడ అభివృద్ధి జరగాల్సి ఉంది. అందుకు ఏది బాగైతే సర్కారు అదే చేయాలి. - ఉప్పరి గోపాల్, మెకానిక్, అతిమ్యాల్‌
 ఏదైనా సరే..
 జిల్లా ఏదైనా సరే. సంగారెడ్డి, మెదక్‌ ఏది చేసినా మంచిగనే ఉంటుంది. ఇక్కడ పనులు దొరకవు.పనులులేక జనం గోస  పడుతుండ్రు. చదువుకున్నోళ్లకు పనులు దొరికేలా ఉంటేనే లాభం. - నాగరాజు, దాబా నిర్వాహకుడు, నారాయణఖేడ్‌


 
 భవిష్యత్తు ప్రశ్నార్థం
 
 పాలకులది పాత పల్లవే..
 
 ‘మెదక్‌’తోనే అభివృద్ధి: మేధావులు
 
 సంగారెడ్డితో విడదీయరాని
 
 అనుబంధం: స్థానిక నేతలు
 
 ‘సాక్షి’ కథనానికి స్పందన
 
 పొద్దంతా కాయకష్టం చేసే జనం. సావైనా బతుకైనా ‘సాగే లోకం’.  
 
 చెమటను పారించి.. దిగుబడి సాధించటమే వాళ్ల వ్యాపకం.  నిజాం రాజుల ఏలుబడి నుంచి ఖేడ్‌కు ‘ఎద్దు– ఎవుసమే’ ఆదెరువు. స్వాతంత్య్రం వచ్చి కూడా 70 ఏళ్లు అవుతోంది. అప్పటి నుంచి సంగారెడ్డితోనే నారాయణఖేడ్‌కు అనుబంధం. ఈ 70 ఏళ్ల కాలంలో ప్రాథమిక జీవన ఆధారమైన వ్యవసాయం రంగం  ఏనాడూ ‘బాల్య’దశ దాటలేదు.
 ఈ ఏడాది మొదటి పాదం వరకు కనీసం నియోజకవర్గం కేంద్రంలోనే వ్యవసాయ మార్కెట్‌  లేదు. ఇక్కడి రైతును బీదర్, లాతూర్, ఉద్గీర్‌ వ్యవసాయ మార్కెట్లు చేరదీశాయి. కానీ సొంత జిల్లా మార్కెట్‌ ఏనాడూ దగ్గరకు రానివ్వలేదు. పునర్విభజనతోనైనా కొత్త ఆశలు చిగురిస్తాయకుంటే.. పాలకులు మళ్లీ పాత పల్లవినే ఎత్తుకోవడంతో ఖేడ్‌ రైతాంగం భవితవ్యం ప్రశ్నార్థకం అవుతోందని వ్యవసాయ పరిశోధకులు ఆందోళన వ్యక్తం చేస్తున్నారు.
 సాక్షి ప్రతినిధి, సంగారెడ్డి:
 నారాయణఖేడ్‌ నియోజకవర్గం వ్యవసాయంపైనే ఆధారపడిన ప్రాంతం. పట్టా, ప్రభుత్వ, అటవీ భూములు కలుపుకుని మొత్తం 2.50 లక్షల ఎకరాలున్నాయి. దాదాపు 75 వేల రైతు కుటుంబాలున్నాయి. ఇందులో 1.85 లక్షల ఎకరాలు సాగుకు యోగ్యమైన భూములున్నప్పటికీ సాగు నీళ్లు లేక 1.20 లక్షల ఎకరాల్లో ఏడాదికి ఒక్కసారి మాత్రమే పంట పండుతోంది. నల్లవాగు ప్రాజెక్టు కింద కలే్హర్‌ మండలంలో 6 వేల ఎకరాలు,  200 కుంటలు, 50 చెరువుల ద్వారామరో 30 వేల ఎకరాలకు సాగు నీరు అందుతోంది.
 నియోజకవర్గం వ్యాప్తంగా చిన్న కమతాలు కలిగిన సన్న చిన్న కారు రైతులే ఎక్కువగా ఉన్నారు. ఉన్న కొద్దిపాటి భూమికి సాగునీటి వసతి చేసుకోలేక  భూములను బీడు పెట్టి వలస బాట పడుతున్నారు.   నియోజకవర్గం నుంచి యోటా కనీసం 75 వేలకు మందికి పైగా రైతులు, రైతు కూలీలు వలస పొతున్నట్లు గణాంకాలు చెప్తున్నాయి.  
 మనూరు, కంగ్టి, నారాయణఖేడ్‌ మండలాల్లో ప్రధానంగా  పెసర, మినుము, కంది, జొన్న, పత్తి, సోయా, వరి, మొక్కజొన్న, ఉల్లి పంటలను సాగుచేస్తారు. కలే్హర్, పెద్దశంకరంపేట మండలాల్లో వరి, మొక్కజొన్న పంటలు అధికంగా సాగవుతాయి. చెరువులు, కుంటలు, బోరు బావుల కింద వరి, మొక్కజొన్న, చెరకు,  సాగుచేస్తారు. నియోజకవర్గం నుంచి ఏడాదికి సగటున 1352.37 టన్నుల వివిధ రకాల పంట దిగుబడి వస్తోంది.
 ఇందులో సోయా11094హెక్టార్లకు గాను 221.88 టన్నులు,పత్తి 13427హెక్టార్లులో 268.54 టన్నులు, వరి 25,368 హెక్టార్లకు గాను 203 టన్నులు, మొక్కజొన్న 4587 హెక్టార్లలో 321.09 టన్నులు దిగుబడితో అగ్రస్థానంలో ఉన్నాయి.
 ఆ తరువాత స్థానంలో  ఉల్లి, పప్పుధాన్యాలున్నాయి. గడిచిన పదేళ్ల మార్కెట్‌  విక్రయాలను రికార్డును పరిశీలిస్తే.. నారాయణఖేడ్‌ రైతులు పండించిన ధాన్యంలో కేవలం 5 శాతం మాత్రమే సంగారెడ్డి, జోగిపేట మార్కెట్‌కు వచ్చాయి. 20 శాతం పంటను కర్ణాటకలోని బీదర్‌ మార్కెట్‌కు, తరువాత వరుసగా ఔరాద్, మహారాష్ట్రలోని ఉద్గీర్, లాతూర్, దెగులూర్‌ మార్కెట్‌కు ధాన్యం విక్రయించినట్టు రికార్డులు చెప్తున్నాయి.
 భౌగోళికంగా... సాగు జలాల లభ్యతను బట్టి చూస్తే నారాయణఖేడ్‌ ప్రాంతం భూమలు వ్యవసాయం కంటే పారిశ్రామికంగానే అనుకూలమైనవి, చవకైన భూములు. కానీ ఇప్పటి వరకు ఇక్కడ పరిశ్రమలు స్థాపించడానికి ఏ ఒక్క పెట్టుబడిదారుడు ముందుకు రాలేదు. దీనికి కారణాలు అనేకం ఉన్నాయి. పారిశ్రామికవేత్తలు హైదరాబాద్‌ చుట్టు పక్కల ప్రాంతాల మీదనే దృష్టి పెట్టారు. ఎగుమతి, దిగుమతులకు హైదరాబాద్‌ అనుకూలం. మంచి రవాణా సౌకర్యంతో పాటు  నాణ్యమైన పారిశ్రామిక ఉత్పత్తుల దిగుబడిని ప్రోత్సహించే వాతావరణం ఉండటంతో  పారిశ్రామికవేత్తలు హైదరాబాద్‌ వైపే చూస్తున్నారు. ఇక నారాయణఖేడ్‌ ప్రాంత ఆర్థిక పరిపుష్టికి వ్యవసాయమే మూలం. నీటి వనరులు అభివృద్ధి పరుచుకొని వ్యవసాయ రంగాన్ని బలోపేతం చేసుకోవటమే మార్గం. అది జరగాలంటే సంగారెడ్డి జిల్లా ఎలా అనుకూలం అవుతుంది అంటున్నారు వ్యవసాయ శాస్త్రవేత్తలు. భవిష్యత్తులో మెదక్‌జిల్లా వ్యవసాయక జిల్లాగా గుర్తింపు పొందే అవకాశాలు ఎక్కువగా ఉన్నాయని అంచనా వేస్తున్నారు. ఘణపురం ఆయకట్టు కింద దాదాపు 20 వేల ఎకరాల్లో భూమి సాగు అవుతుంది. ఆనకట్ట ఎత్తు పెంచి మరో 30 వేల ఎకరాలకు సాగు నీరు అందించాలనే లక్ష్యంతో తెలంగాణ ప్రభుత్వం ముందుకు కదులుతోంది. అదే జరిగితే మెదక్‌ జిల్లా దక్షిణ తెలంగాణ ధాన్యాగారంగా మారడం ఖాయం. ఈ క్రమంలో జిల్లాకు మరిన్ని వ్యవసాయ రాయితీలు, ప్రోత్సాహకాలు వచ్చే అవకాశం ఉంది. పంట విధానాలపై, మేలైన వంగడాల సృష్టి కోసం విస్తృతమైన  ప్రయోగాలు జరిగే అవకాశం ఉంది. ఈ సంక్షేమ, ప్రయోగా ఫలాలు  సహజంగానే  జిల్లా అంతటికీ విస్తరించి వ్యవసాయ రంగం మెరుగుపడే అవకాశాలు అద్భుతంగా ఉంటాయని వ్యవసాయ పరిశోధకులు అంచనా వేస్తున్నాయి.
 సాక్షి కథనం అప్పుడే చర్చనీయాంశంగా మారింది. మొదటి కథనంతోనే ప్రజలు, ప్రజా ప్రతినిధులు, ప్రభుత్వ ఉద్యోగులు తదితరులు ‘సాక్షి’ కార్యాలయానికి ఫో¯ŒS చేసి తమ అభిప్రాయాలు పంచుకున్నారు. నారాయణఖేడ్‌ ఎమ్మెల్యే భూపాల్‌రెడ్డి, మాజీ ఎంపీ సురేష్‌ షట్కర్‌ సాక్షి కథనాలను ఖండించగా.. మాజీ ఎమ్మెల్సీ, సీనియర్‌ జర్నలిస్టు ఆర్‌ సత్యనారాయణ, మేధావులు, విద్యావంతులు, అధికారులు కథనాలను సమర్థించారు.


 నారాయణఖేడ్‌: ప్రధాని నరేంద్ర మోడీ పిలుపు మేరకు నారాయణఖేడ్‌లో తిరంగా యాత్ర కార్యక్రమాని సోమవారం ఘనంగా నిర్వహించారు. ఇందులో భాగంగా వివిధ పార్టీల నాయకులు, విద్యార్థి, యువజన సంఘాల నాయకులు పాల్గొన్నారు. దేశానికి స్వాతంత్ర్యం వచ్చి 70 సంవత్సరాలు పూర్తి అయిన సందర్భంగా వారి త్యాగాలను నేటి తరం గుర్తుచేసుకోవాల్సి ఉందన్నారు. ఇందులో భాగంగానే తిరంగా యాత్ర నిర్వహించడం జరిగిందన్నారు. కార్యక్రమానికి ముఖ్యఅతిథిగా మహారాష్ట్ర ఔరంగాబాద్‌కు చెందిన ఎమ్మెల్సీ దిలీప్‌ పాటిల్‌ పాల్గొన్నారు.
 ఈ సందర్భంగా ఏర్పాటు చేసిన కార్యక్రమంలో పలువురు వక్తలు మాట్లాడారు. కార్యక్రమంలో బీజేవైఎం జిల్లా ప్రధాన కార్యదర్శి సాయిరాం, టీడీపీ పార్టీ మండల అధ్యక్షులు కక్కెరివాడ విఠల్‌రెడ్డి, వ్యవసాయ శాఖ ఏఓ శ్రీనివాస్‌రెడ్డి, ఎంబీఆర్‌ యువసేన తాలూకా అధ్యక్షులు సతీష్‌యాదవ్‌, టైగర్‌ నరేంద్ర సేవా సమితి తాలూకా అధ్యక్షులు విలాస్‌రావు, బజరంగ్‌దళ్‌ నాయకులు ప్రవీణ్‌, జగదీష్‌, దేశ్‌ముఖ్‌, దుదన్‌కర్‌ సంతోష్‌, క్రిష్ణా జాదవ్‌, సంతోష్, నిరుద్యోగ జేఏసీ నాయకులు నీలేష్‌, నాగరాజు, సూరి, రాజు తదితరులు పాల్గొన్నారు.


 
 నారాయణఖేడ్‌కు పూర్వవైభవం
 
 రెవెన్యూ డివిజన్‌ కేంద్రంగా ఖేడ్‌ పట్టణం
 
 స్థానికుల్లో హర్షాతిరేకాలు
 
 నారాయణఖేడ్‌: ఎంతో కాలంగా ఎదురు చూస్తున్న నారాయణఖేడ్‌ వాసులు కల నెరవేరనుంది. ఉమ్మడి రాష్ట్రంలో అన్ని రకాలుగా నష్టపోయిన ఖేడ్‌ పట్టణం తెలంగాణ రాష్ట్రంలో రెవెన్యూ డివిజన్‌ కేంద్రం కానుంది.  ఖేడ్‌ను రెవెన్యూ డివిజన్‌ కేంద్రం చేస్తూ ప్రభుత్వం నిర్ణయం తీసుకోవడంతో ఈ ప్రాంత ప్రజల్లో సంబురాలు అంబరాన్నంటుతున్నాయి. 
 రెండు రోజుల క్రితం జరిగిన అఖిలపక్షం సమావేశంలో సీఎం కేసీఆర్‌ కొత్త జిల్లాలు, రెవెన్యూ డివిజన్ల ఏర్పాటుపై నిర్ణయం తీసుకున్న విషయం తెలిసిందే. త్వరలో జిల్లాలు, డివిజన్ల విభజనకు సంబంధించిన తుది ముసాయిదాను ప్రభుత్వం ప్రచురించడంతో రెవెన్యూ డివిజన్‌ ఏర్పాటుకు మార్గం సుగమమమైంది.
 మొదట నారాయణఖేడ్, జహీరాబాద్‌ నియోజకవర్గాలు, అందోల్‌ నియోజకవర్గంలోని పలు మండలాలను కలుపుతూ ఖేడ్‌ను రెవెన్యూ డివిజన్‌ చేస్తారని భావించారు. అయితే సంగారెడ్డి జిల్లాలో నారాయణఖేడ్‌ను ఓ డివిజన్‌గా, జహీరాబాద్‌ను మరో రెవెన్యూ డివిజన్‌గా ఏర్పాటు చేశారు.
 ప్రస్తుతం ఏర్పాటు కానున్న ఖేడ్‌ రెవెన్యూ డివిజన్‌లో నియోజకవర్గంలోని ఖేడ్, మనూరు, కల్హేర్, కంగ్టి, అందోల్‌ నియోజకవర్గంలోని రేగోడ్‌ మండలాలతోపాటు ఖేడ్‌ నియోజకవర్గంలో కొత్తగా ఏర్పాటు కానున్న నాగల్‌గిద్ద, సిర్గాపూర్‌ మండలాలను కలుపుతున్నారు. అంటే ఖేడ్‌ నియోజకవర్గంలోని ఆరు మండలాలు, అందోల్‌ నియోజకవర్గంలోని రేగోడ్‌ మండలాలు కలపడంతో మొత్తం ఏడు మండలాలతో ఖేడ్‌ రెవెన్యూ డివిజన్‌ ఏర్పాటు కానుంది.
 ఖేడ్‌ నియోజకవర్గంలో ఉన్న పెద్దశంకరంపేట మండలాన్ని ఆ ప్రాంత వాసుల కోరిక మేరకు మెదక్‌ రెవెన్యూ డివిజన్‌లో కలపనున్నారు.  నియోజకవర్గాల పునర్విభజనకు ముందు పెద్దశంకరంపేట మండలం మెదక్‌ నియోజకవర్గంలోనే ఉంది. పునర్విభజనతో ఖేడ్‌లో కలిసింది. ఇక ఈ డివిజన్‌లో అందోల్‌ నియోజకవర్గంలోని రేగోడ్‌ మండలం ఒక్కటే అదనంగా చేరుతుంది. భౌగోళికంగా చూస్తే ఈ మండలాలన్నీ ఖేడ్‌ నియోజకవర్గ కేంద్రానికి సమీపంలోనే ఉంటాయి. మధ్యస్థంగా నారాయణఖేడ్‌  ఉండగా చుట్టూ మండలాలు ఉన్నాయి. ప్రభుత్వం సైతం రవాణా, పరిపాలనా పరంగా ప్రజలకు అందుబాటులో ఉండేలా ఈ డివిజన్‌ను ఏర్పాటు చేస్తోంది.
 గతంలో ఖేడ్‌ డివిజన్‌ కేంద్రమే!
 ఆరో నిజాం కాలం నుంచే నారాయణఖేడ్‌ రెవెన్యూ డివిజన్‌ కేంద్రంగా ఉండేది. వికారాబాద్‌ జిల్లా కేంద్రంగా ఉన్న సమయంలో నారాయణఖేడ్‌ డివిజన్‌ కేంద్రంగా ఉండేంది. ఈ ప్రాంతాన్ని నాడు నాలుగు సర్కిళ్లుగా విభజించారు. కల్హేర్, ఏల్గోయి, కంగ్టి, నారాయణఖేడ్‌ సర్కిళ్లుగా ఉండేవి.  అప్పట్లో 16 జిల్లాలు ఉండగా కర్ణాటక, మహారాష్ట్ర, హైదరాబాద్‌ రాష్ట్రాలను మూడుగా విభజించారు.
 దేశ్‌ముఖ్‌లు మాలీపటేళ్లుగా, దేశ్‌పాండేలు పట్వారీలుగా, మైనార్టీ ప్రముఖులు పోలీస్‌ పటేళ్లుగా కొనసాగారు. అనంతరం బీదర్‌ జిల్లా కింద నారాయణఖేడ్, జహీరాబాద్‌ నియోజకవర్గాలను మార్చారు. 1956లో రాష్ట్రాల పుర్వ్యవస్థీకరణలో నారాయణఖేడ్, జహీరాబాద్‌ ప్రాంతాలు ఆంధ్రప్రదేశ్‌లో వీలీనం కావడంతో డివిజన్లను తొలగించారు. కేవలం నియోజకవర్గాలుగానే ఉంచారు.
 అభివృద్ధికి ఆస్కారం
 రెవెన్యూ డివిజన్‌ ఏర్పాటుతో ఖేడ్‌ ప్రాంతం అన్ని రకాలుగా అభివృద్ధి సాధించే అవకాశం ఉంది.  ఆర్డీఓతోపాటు, పంచాయతీరాజ్, ఇరిగేషన్, ఆర్‌డబ్ల్యూఎస్, విద్య, వైద్య, పశువైద్య, వ్యవసాయ తదితర శాఖల్లో డివిజన్‌స్థాయి అధికారులు, ఎస్సీ స్థాయి అధికారులు ఇక్కడ కొలువుదీరే అవకాశం ఉంది. 
 ఇక్కడ రెవెన్యూ డివిజన్‌ ఏర్పాటుకు అన్ని వనరులు ఉన్నాయి. నిజాంపేట్‌ నుంచి నారాయణఖేడ్‌ మీదుగా బీదర్‌ వరకు ఉన్న రహదారిని నేషనల్‌ హైవే 51గా మారుస్తూ ప్రభుత్వం నిర్ణయం తీసుకుంది. మంజీరా పరీవాహక ప్రాంతం కావడం, కర్మాగారాల ఏర్పాటుకు భూములు, నీటి అనుకూలత ఉంది. ఖేడ్‌ మండలం జూకల్‌ శివారులో పాలిటెక్నిక్, మార్కెట్‌ యార్డు తదితర ప్రభుత్వ భవనాలు ఉన్నందున ఈ ప్రాంతంలో ఎక్కువ మొత్తంలో ప్రభుత్వ భూమి ఉంది. 
 ప్రభుత్వ కార్యాలయాలు నిర్మించేందుకు కూడా ఎటువంటి స్థల సమస్య లేదు. ఉప ఎన్నిక సమయంలో కూడా ఖేడ్‌ రెవెన్యూ డివిజన్‌ ఏర్పాటు అంశం తెరపైకి వచ్చింది. మంత్రి హరీశ్‌రావు ఖేడ్‌ను డివిజన్‌ చేస్తామని హామీ ఇవ్వడంతోపాటు బహిరంగంగా ప్రకటించారు.  మొత్తంగా ఈ ప్రాంత ప్రజల  కల ఎన్నో ఏళ్లకు నెరవేరుతుండటంతో స్థానికులు సంబురాలు జరుపుకునేందుకు సిద్ధమాయ్యారు.


 నారాయణఖేడ్‌: ఆఫర్‌లో తక్కువ ధరకే మొబైల్‌ ఫోన్‌ ఇస్తామంటూ పనికి రాని వస్తువులు పంపించి తనను మోసం చేశారని మండలంలోని నమ్లిమేట్‌ గ్రామానికి చెందిన రాజు ఆవేదన వ్యక్తం చేశారు. తన మొబైల్‌ ఫోన్‌కు ఇటీవల ఓ ఫోన్‌ వచ్చిందని, రూ. 18వేల విలువ చేసే టచ్‌ స్క్రీన్‌ ఫోన్‌ను రూ.3,500లకే అందజేస్తామంటూ వివరించారని అన్నారు.
 దీంతో తాను నమ్మి ఫోన్‌లోనే ఆర్డర్‌ ఇచ్చి తన ఇంటి అడ్రస్‌ ఇచ్చినట్లు తెలిపారు. కాగా తన పేర హన్మంత్‌రావుపేట పోస్టాఫీస్‌కు పార్శిల్‌ వచ్చిందని, వారు కోరిన విధంగా రూ.3,500లు చెల్లించి పార్శిల్‌ను తీసుకున్నట్లు చెప్పారు. దాన్ని విప్పిచూడగా కుభేర యంత్రం, దేవుళ్ల ఫొటోలు ఉన్నాయన్నారు. ఇవన్నీ రూ.500ల విలువ కూడా చేయవని తెలిపారు. దీంతో తాను మోసపోయానని బాధితుడు రాజు ఆవేదన వ్యక్తంచేశారు.
  


 
 జ్వరంతో చేరిక.. తెల్లవారు జామున పెరిగిన వేడి
 
 వైద్యం వికటించిందని కుటుంబీకులు, బంధువుల వాదన
 
 నారాయణఖేడ్: వైద్యం వికటించి బాలుడు మరణించాడని ఆరోపిస్తూ బంధువులు, గ్రామస్తులు, స్థానికులు పట్ణంలోని శ్రీ పద్మావతి ఆస్పత్రి ముందు గురువారం ఆందోళనకు దిగారు. ఆందోళనకారుల కథనం ప్రకారం దీనికి సంబంధించిన వివరాలిలా ఉన్నాయి. పెద్దశంకరంపేట పట్టణానికి చెందిన సంగయ్య, సుజాత దంపతులకు ఓ కూతురు, ఇద్దరు కుమారులు. కాగా చిన్న కుమారుడు విష్ణు(5) జ్వరంతో బాధపడుతుండడంతో నారాయణఖేడ్‌లోని శ్రీ పద్మావతి ఆస్పత్రికి బుధవారం రాత్రి తీసుకు వచ్చారు.
 ఆస్పత్రిలో చేర్పించామని, జ్వరం అంతకంతకూ పెరిగిందని వారు తెలిపారు. రాత్రి పొద్దుపోయాక జ్వరం తీవ్రమైందని, ఆస్పత్రిలో సరైన వైద్యం అందలేదని ఆరోపించారు. దీంతో బాలుడు తెల్లవారు జామున మరణించినట్లు తెలిపారు. ఆస్పత్రిలో సరైన చికిత్స అందకపోవడం, ఆస్పత్రి సిబ్బంది నిర్లక్ష్యం కారణంగానే బాలుడు మరణించాడని వారు ఆరోపించారు. ఉదయం పెద్దశంకరంపేట వాసులు, బంధువులు, స్థానికులు ఆస్పత్రి ముందు గుమిగూడి ఆందోళన వ్యక్తం చేశారు. ఉదయం నుండి సాయంత్రం వరకు ఆందోళన కొనసాగింది.
 విషయం తెలుసుకున్న ఎస్‌ఐ నాగేశ్వర్‌రావు తన సిబ్బందితో వచ్చి ఆస్పత్రి వద్ద పరిస్థితిని పర్యవేక్షించారు. దీనికి సంబంధించి ఆయన వైద్యుడు, కుటుంబ సభ్యులతో మాట్లాడి వివరాలు సేకరించారు. ఆందోళన విషయంపై శ్రీ పద్మావతి ఆస్పత్రి వైద్యుడు డా.టి.వినయ్‌కుమార్‌ వద్ద విలేకర్లు ప్రస్తావించగా బాలుణ్ణి రాత్రి 8.30 గంటలకు ఆస్పత్రికి తీసుకు వచ్చారని, చికిత్స అందించడంతో 10.30వరకు జ్వరం తీవ్రత తగ్గిందని అన్నారు. 102.7 టెంపరేచర్‌ ఉండగా తగ్గిందని, వెళ్ళిపోవాల్సిందిగా సూచించామని అన్నారు. వారు ఆస్పత్రిలోనే ఉన్నారని, తెల్లవారు జామున 4గంటల ప్రాంతంలో తమ సిబ్బంది వచ్చి బాలుడికి జ్వరం తీవ్రమైందని చెప్పడంతో పరీక్షించామన్నారు. అప్పుడు 104 టెంపరేచర్‌ ఉందని తెలిపారు. తాము ఇతర ఆస్పత్రికి తీసుకు వెళ్లాలని సూచించినట్లు వైద్యుడు తెలిపారు. రక్త నమూనాలు సేకరించామని, టైఫాయిడ్‌, మలేరియా లేదని, బాలుడికి మరేదైనా సమస్య ఉండి ఉండవచ్చని తెలిపారు.


 
 బోరంచ నీటిపథకం ప్రారంభం
 
  ఖేడ్‌ సంప్‌కు నీటిపంపింగ్‌
 
 నారాయణఖేడ్‌:మంజీరా నీటిపథకం బోరంచ జాక్‌వెల్‌ నుంచి నారాయణఖేడ్‌ పట్టణానికి తాగునీటి సరఫరాను ఆర్‌డబ్ల్యూఎస్‌ అధికారులు ఆదివారం ప్రారంభించారు. గత వేసవిలో మంజీరా నదిలో నీరు లేకపోవడంతో దాదాపు ఐదారు నెలలుగా నారాయణఖేడ్‌కు మంజీరా నీటిసరఫరా నిల్చిపోయింది. ఎగువ కర్ణాటక రాష్ట్రంలో ఇటీవల సమృద్ధిగా వర్షాలు కురుస్తుండడంతో మంజీరా నదిలోకి వరద నీరు వచ్చి చేరుతోంది. దిగువన సింగూరు ప్రాజెక్టుకు నీరు వెళ్తున్నా మంచినీటి పథకాల వద్ద కొద్దిగా నీరు ప్రవహిస్తోంది.
 దీంతో అధికారులు మరమ్మతులు పూర్తిచేసి బోరంచ నీటిపథకం నుండి తాగునీటిని సరఫరాను అధికారులు పునరుద్ధరించారు నారాయణఖేడ్‌ పట్టణ శివారులోని సంప్‌లో నీటి పంపింగ్‌ ప్రారంభమైంది. నదిలోకి మరింత వరద నీరు వచ్చిచేరితే తాగునీటి ఇబ్బందులు పూర్తిగా తొలగిపోనున్నాయి. ఇదిలా ఉండగా పలువురు టీఆర్‌ఎస్‌ నాయకులు ర్యాకల్‌లో సీఎం కేసీఆర్‌, మంత్రి హరీశ్‌రావు, ఎమ్మెల్యే భూపాల్‌రెడ్డి ఫ్లెక్సీలకు జలాభిషేకం నిర్వహించారు.


 
 భారీగా వచ్చిన వరద.. మునిగిపోయిన రోడ్లు
 
 స్తంభించిన రాకపోకలు
 
 నారాయణఖేడ్‌: నారాయణఖేడ్‌లో శనివారం భారీ వర్షం కురిసింది. పైనుంచి కూడా వరద నీరు భారీగా వచ్చింది. దీంతో మండలంలోని రుద్రారం-పైడిపల్లి రహదారిలో రాకపోకలు నిలిచిపోయాయి. నారాయణఖేడ్‌-రాయిపల్లి రూట్లో రుద్రారం, పైడిపల్లి గ్రామాల మధ్య నూతనంగా వంతెనలు నిర్మిస్తున్నారు. వాహనాలను తాత్కాలికంగా దారి మళ్లించారు. వర్షం వరద నీటితో డైవర్షన్‌ రహదారి కొట్టుకుపోయింది. నీరు భారీగా రావడంతో నూతనంగా నిర్మిస్తోన్న వంతెన పిల్లర్లుసైతం మునిగిపోయాయి. రాకపోకలు నిలిచిపోయాయి. కొందరు నీటిలో నుంచే ప్రమాదకర పరిస్థితుల్లో రోడ్డు దాటారు. మండలంలో వర్షపాతం 5.6మి.మీగా నమోదైనట్లు రెవెన్యూ అధికారులు తెలిపారు.


 ►పెళ్లి చేసుకోవాలని బైఠాయింపు..  ప్రియుడు కానిస్టేబుల్‌
 
 నారాయణఖేడ్‌: ప్రియుడి ఇంటి ముందు ప్రియురాలు ఆందోళనకు దిగింది. తనను మోసం చేశాడంటూ పెళ్లి చేసుకోవాలని కానిస్టేబుల్‌ ఇంటి ముందు బైఠాయించింది. ఈ సంఘటన మండలంలోని కొండపూర్‌ స్కూల్‌ తండాలో బుధవారం చోటుచేసుకుంది. ఈ సంఘటనకు సంబంధించిన వివరాలిలా ఉన్నాయి.
 
 మనూరు మండలం శేరి దామర్‌గిద్ద  పంచాయతీ పరిధిలోని గోప్యానాయక్‌ తండాకు చెందిన విస్లావత్‌ లలిత(21) పెద్దశంకరంపేటలో డిగ్రీ చదువుతోంది. కొండాపూర్‌ స్కూల్‌ తండాకు చెందిన రాథోడ్‌ విశ్వనాథ్‌ ఏఆర్‌ కానిస్టేబుల్‌గా విధులు నిర్వర్తిస్తున్నాడు. కాగా వీరిద్దరి మధ్య పరిచయం కాస్త ప్రేమగా మారింది. కొన్నాళ్లు  వీరు పరస్పరం ప్రేమించుకున్నారు.
 
 ప్రస్తుతం కానిస్టేబుల్‌ విశ్వనాథ్‌ పెళ్లి చేసుకోవడానికి నిరాకరించాడు. దీంతో బాధితురాలు మనూరు పోలీసులను రెండు రోజుల క్రితం ఆశ్రయించగా పోలీసులు కేసు నమోదు చేశారు. కాగా సదరు మహిళ బుధవారం స్వయంగా కానిస్టేబుల్‌ ఇంటికి వెళ్లి తనను విశ్వనాథ్‌ మోసం చేశాడని, పెళ్లి చేసుకొని న్యాయం చేసేవరకు కదిలేది లేదని బైఠాయించింది.
 
 మూడు గంటలపాటు ఇంటిముందే ధర్నా చేపట్టింది. విషయం తెలుసుకున్న నారాయణఖేడ్‌ సీఐ సైదానాయక్‌ తండాకు వెళ్లి యువతికి నచ్చచెప్పారు. నిందితుడిపై తగు చర్యలు తీసుకునేలా తాము చూస్తామని హామీ ఇచ్చి ఆందోళన విరమింపచేశారు.


 
 నదిలోని నీరొస్తున్నా కళతప్పిన నీటి పథకాలు
 
 ‘శాపూర్‌’ వద్ద పనులు చేపట్టని అధికారులు
 
 ఎగువున మరిన్ని భారీ వర్షాలు కురిస్తేనే ఆశలు
 
 నారాయణఖేడ్‌: మంజీరా నదిలోకి చేరుతున్న వరద.. నీటి పథకాలకు ఏమాత్రం ఊతమివ్వడం లేదు. ఏటా వర్షాకాలం ప్రారంభంలోనే నదికి జీవకళ వచ్చేది. ఈసారి సరైన వర్షాలు లేకపోవడంతో నది వట్టిపోయింది. ఈనేపథ్యంలో రెండ్రోలుగా ఎగువు ప్రాజెక్టుల నుంచి కొద్దికొద్దిగా నీరు వస్తుండటం కొంత ఊరట కలిగిస్తోంది. అయితే, భారీ వరదలు వస్తే తప్ప సింగూరు వద్ద నిర్మించిన ప్రాజెక్టుకు నీరు చేరని పరిస్థితి. ప్రస్తుతం చిన్నపాటి ఇన్‌ఫ్లో వల్ల సింగూరు ప్రాజెక్టుకు ఆదివారానికి కొద్దిగా నేరు చేరే పరిస్థితి ఉంది.
 
 మంజీరా నది జిల్లాలో మనూరు మండలం గౌడ్‌గాం జన్‌వాడ వద్ద ప్రారంభమవుతుంది. అక్కడి నుంచి నారాయణఖేడ్, జహీరాబాద్, అందోల్, మెదక్‌ నియోజకవర్గాల మీదుగా ప్రవహిస్తుంది. సింగూరు ప్రాజెక్టు ఎగువున మంజీరాపై నారాయణఖేడ్, జహీరాబాద్, ఆందోల్‌ తదితర నియోజకవర్గాల నీటి పథకాలు ఉన్నాయి. వరద పెరిగి బ్యాక్‌వాటర్‌ నిలిస్తే తప్ప నీటిపథకాలు పనిచేయని పరిస్థితి. శాపూర్‌ నీటిపథకం వద్ద భారీ లోయ ఉండటంతో అక్కడ కొద్దిగా నీరు పంపింగ్‌ చేసే పరిస్థితి ఏర్పడింది.
 ఈ పథకం వద్ద మోటార్ల మరమ్మతులతో పాటు చిన్నపాటి పనులు చేయాలని ఎమ్మెల్యే ఇటీవల ఆర్‌డబ్ల్యూఎస్‌ అధికారులకు ఆదేశించినా పనులు ప్రారంభం కాలేదు. ఖేడ్‌ నియోజకవర్గం బోరంచ, గూడూరు ఇన్‌టేక్‌వెల్‌.. జహీరాబాద్‌ నియోజకవర్గం పుల్‌కుర్తి వద్ద ఉన్న ఇన్‌టేక్‌వెల్‌ వరకు పూర్తిస్థాయిలో వరద నీరు రాలేదు.
 
 ఇవీ పథకాలు
 గూడూరు వద్ద 13 ఏళ్ల క్రితం రూ.14కోట్లతో మంజీరా నదిపై 74 గ్రామాలకు తాగునీరు అందించేందుకు నీటిపథకం నిర్మించారు. ఎన్‌ఏపీ పథకం ద్వారా బోరంచ నుంచి 28 గ్రామాలకు, ఇదే ప్రాంతం నుంచి ఫేజ్‌-1 కింద 32 గ్రామాలకు, శాపూర్‌ పథకం ద్వారా 24 గ్రామాలకు తాగునీటి సరఫరా జరుగుతోంది. పెద్దశంకరంపేట నియోజకవర్గంలో ఇటీవల పథకాన్ని ప్రారంభించారు. దీంతో పాటు పుల్‌కుర్తి సమీపంలోని నీటి పథకం ద్వారా జహీరాబాద్‌ నియోజకవర్గానికి తాగునీటి సరఫరా జరుగుతోంది.
 
 నీరు నిలవాల్సిందే
 సింగూరు ప్రాజెక్టులోకి భారీగా వరద నీరు వచ్చి చేరితే తప్ప నీటి పథకాలు పనిచేసేందుకు పరిస్థితి లేదు. ఎగువ నుంచి ఇన్‌ఫ్లో ఉన్నా.. మంజీరా నదిలో నీరు లేని కారణంగా వరద నీరు కిందకు పోతోంది. సింగూరు ప్రాజెక్టు నిండితేనే మంజీరా నదిలో నీరు నిలిచి బ్యాక్‌వాటర్‌ పెరిగే అవకాశం ఉంది. ఇందుకు మరిన్ని వరదలు రావాల్సి ఉంది. వర్షాకాలం ప్రారంభమై రెండు నెలలు గడుస్తున్నా నదిలోకి నీరు చేరకపోవడంతో తాగునీటి ఇబ్బందులు ఎదురవుతున్నాయి. మరో వారం రోజుల పాటు కర్ణాటకలో భారీ వర్షాలు కురిస్తే తప్ప.. నీటి పథకాలు పనిచేయని దుస్థితి ఉంది. మంజీరా నదిలోకి నీరు చేరితే భూగర్భ జలాలు పెరిగి బోరు, బావులు రీచార్జ్‌ కానున్నాయి.


 
 ఆర్భాటంగా  ఎన్నికల ప్రచారం
 
 గుర్తింపు కోసం తలపడుతున్న యూనియన్లు
 
 నారాయణఖేడ్‌: ఆర్టీసీలో జరుగుతున్న గుర్తింపు ఎన్నికల్లో ఆధిపత్యాన్ని నిలుపుకునేందుకు వివిధ కార్మిక సంఘాలు హోరాహోరీగా ప్రచారం నిర్వహిస్తున్నాయి. ఇప్పటికే డిపో ఆవరణంలో ఎన్నికల సందడి మొదలైంది. ఈనెల 19న పోలింగ్‌ జరగనున్నాయి.
 ఇప్పటి వరకు ఎన్‌ఎంయూదే ఆధిపత్యం
 నారాయణఖేడ్‌లో ఆర్టీసీ డిపో 1987వ సంవత్సరంలో ఆవిర్భవించింది. డిపో ఆవిర్భావం నుంచి ఎక్కువసార్లు నేషనల్‌ మజ్దూర్‌ యూనియన్‌(ఎన్‌ఎంయూ)నే ఆధిపత్యం కొనసాగిస్తోంది. 1991లో ఒకసారి భారతీయ మజ్దూర్‌సంఘ్‌(బీఎంఎస్‌) గెలుపొందింది. ఇదిలా ఉండగా, గత ఏడాది ఎన్నికల్లో నూతనంగా ఆవిర్భవించిన తెలంగాణ మజ్దూర్‌ యూనియన్‌(టీఎంయూ) గెలిచింది.
 టీఎంయూ ఏర్పాటు అనంతరం ఎన్‌ఎంయూ భారీగా పతనమైంది. ఎన్‌ఎంయూలో చాలామంది నాయకులు, కార్మికులు టీఎంయూలో చేరడంతో ఆ యూనియన్‌ బలపడింది. ఈసారి కూడా తన ఆధిపత్యాన్ని కొనసాగించేందుకు టీఎంయూ ప్రయత్నిస్తుండగా.. ఆ యూనియన్‌ను మట్టికరిపించాలని మిగతావారు ప్రయత్నాలు కొనసాగిస్తున్నారు. డిపోలో 327 మంది కార్మికులు ఓటర్లుగా ఉన్నారు.
 గట్టిపోటీ ఇవ్వనున్న టీఎంయూ
 ఎన్నికల్లో రాష్ట్రస్థాయి గుర్తింపునకు క్టాస్‌–3కు తెలుపురంగు ఓటరు స్లిప్పుపై, రీజినల్‌æస్థాయిలో గుర్తింపునకు క్లాస్‌–6 పింక్‌కార్డు ఓటరు స్లిప్పుపై ఓటేయాల్సి ఉంది. రీజియన్‌ స్థాయిలో గెలిచిన యూనియన్‌ అధికారికంగా స్థానిక డిపోల్లో అధికారిక యూనియన్‌గా చలామణి అవుతుంది. నారాయణఖేడ్‌ డిపోలో టీఎంయూ మాత్రమే స్వతహాగా క్లాస్‌–3, క్లాస్‌–6కు పోటీ చేస్తోంది.
 కాగా, ఎంప్లాయీస్‌ యూనియన్‌(ఈయూ), బీఎంఎస్, ఎన్‌ఎంయూ యూనియనుల్లు జేఏసీగా ఏర్పడి పోటీ చేస్తున్నాయి. ఈ మూడు యూనియన్లు రీజియన్‌ స్థాయిలో క్లాస్‌–6కు ఐక్యంగా పోటీలో ఉన్నాయి. రాష్ట్రస్థాయిలో క్లాస్‌–3కి మాత్రం విడివిడిగా పోటీకి దిగుతున్నారు. ఇప్పటికే టీఎంయూతో కలిసి టీఆర్‌ఎస్‌ నాయకులు ప్రచారం నిర్వహించారు.
 ఆ యూనియన్‌ రాష్ట్ర అధ్యక్షుడు తిరుపతయ్య, జహీరాబాద్‌ ఎంపీ బీబీ పాటిల్, ఎమ్మెల్యే భూపాల్‌రెడ్డి, టీఆర్‌ఎస్‌ జిల్లా అధ్యక్షుడు మురళీయాదవ్‌.. యూనియన్‌ తరపున బహిరంగ సభల్లో పాల్గొన్నారు. అధికారంలో టీఆర్‌ఎస్‌ ప్రభుత్వం ఉన్నందున కార్మికులంతా టీఎంయూకు ఓటేసి గెలిపించాలని, తమ సమస్యల పరిష్కారానికి టీఎంయూ మాత్రమే ప్రత్యామ్నాయమని హామీలిచ్చారు.
 కాగా, బీఎంఎస్‌ నుంచి రీజియన్‌ కార్యదర్శి మెట్టు రాఘవులు, ఎంప్లాయీస్‌ యూనియన్‌ నుంచి జిల్లా కార్యదర్శి కాన్షీరాం, ఎన్‌ఎంయూ జిల్లా అధ్యక్షుడు రాములు ప్రచారాన్ని నిర్వహించారు. టీఎంయూ నాయకులు కార్మికుల వద్ద ముడుపులు వసూలు చేస్తూ వారిని ఇబ్బందులకు గురిచేస్తున్నారని ప్రచారం చేస్తున్నారు. ఇలా ఒకరిపై ఒకరు ఆరోపణలు గుప్పించుకుంటున్నారు.


 నారాయణ్‌ఖేడ్‌లోని బసవేశ్వరం చౌక్ వద్ద సోమవారం తెల్లవారుజామున నెంబర్ వన్ ఏటీఎం మెషిన్‌ను గుర్తుతెలియని దుండగులు ధ్వంసం చేశారు. దుండగులు ఏటీఎం మెషిన్‌ను గడ్డపార, పలుగుతో పెకలించడానికి ప్రయత్నించారు. ఈ ఘటనకు సంబంధించి ఇద్దరు అనుమానితులను అదుపులోకి తీసుకున్నట్లు సమాచారం. ఎంత మొత్తంలో నగదు చోరీ జరిగిందనే వివరాలు తెలియాల్సి ఉంది. పోలీసులు కేసు నమోదు చేసి దర్యాప్తు చేస్తున్నారు.
 
  


 ♦ అభివృద్ధిలో పరుగులు పెట్టిస్తా
 ♦ పాఠశాలలు ఏర్పాటు చేయిస్తా
 ♦ మంత్రి హరీశ్‌రావు వెల్లడి
 ♦ సిద్దిపేటలో ‘ఖేడ్’ విద్యార్థుల
 ♦ విద్యాభ్యాసంపై విస్మయం
 ♦ గత పాలకుల వైఫల్యమే కారణమని వ్యాఖ్య
 సిద్దిపేట జోన్: ‘బాబు దినేష్.. పదో తరగతి చదువు కోసం నారాయణఖేడ్ నుంచి సిద్దిపేటకు రావడం బాధాకరంగా ఉంది. ఇటీవల ఖేడ్ ఉప ఎన్నికల్లో కొన్ని రోజులు అక్కడే ఉన్నా. అక్కడి పరిస్థితి చూస్తే బాధ వేసింది. విద్య, తాగు, సాగు నీరు, మౌలిక వసతులు లేక ఖేడ్ ప్రజలు పడుతున్న బాధలు నన్ను కలచి వేశాయి. నారాయణఖేడ్‌ను అభివృద్ధి వైపు పరుగులు పెట్టించి దశ మారుస్తా’నంటూ భారీ నీటిపారుదల శాఖ మంత్రి హరీశ్‌రావు వెల్లడించారు.   గురువారం స్థానిక హైస్కూల్‌లో పలు అభివృద్ధి కార్యక్రమాల్లో పాల్గొన్న మంత్రి ఆకస్మికంగా పదో తరగతిని పరిశీలించారు. తరగతి గదిలో అత్యధికంగా తండాకు చెందిన పిల్లలను గుర్తించిన మంత్రి.. నారాయణఖేడ్‌కు చెందిన వారు ఎందరున్నారని ప్రశ్నించారు.
 14 మంది విద్యార్థులు లేచి తమతమ ఊర్ల పేర్లను వినిపించారు. ఒక్కసారిగా 14 మంది ఒకే తరగతి గదిలో ఖేడ్ పిల్లలు విద్యాభ్యాసం చేస్తున్న విషయం తెలుసుకుని మంత్రి విస్మయం చెందారు. వెంటనే ఆయన ఆ విద్యార్థులతో యోగ క్షేమాలు అడిగి తెలుసుకున్నారు. విద్యార్థులతో మాట్లాడుతూ విద్యా బోధన, వసతి గృహాల్లో సౌకర్యాల గూర్చి ఆరా తీశారు. అక్కడే ఉన్న అధికారులు, నాయకులు, ఉపాధ్యాయులచే ఖేడ్ పరిస్థితిపై చర్చించారు. నారాయణ్‌ఖేడ్ నియోజకవర్గం కంగ్టి మండలంలో కేవలం మూడు పాఠశాలలే ఉండటం ఆ ప్రాంత దారుణ స్థితిని తెలుపుతున్నాయన్నారు. గత పాలకుల నిర్లక్ష్యం కారణంగానే ఖేడ్‌లో విద్యారంగం అభివృద్ధి చెందలేదన్నారు. ఖేడ్ లాంటి ప్రాంతం లో ఆశించిన స్థాయిలో పాఠశాలలు లేక అక్కడి తండా విద్యార్థులు వందలాది మంది సిద్దిపేట, మెదక్ లాంటి వసతి గృహాల్లో విద్యాభ్యాసానికి వస్తున్నారన్నారు. అన్ని రంగాల్లో వెనుకబడిన ఖేడ్‌ను సిద్దిపేట తరహాలో అభివృద్ధి చేస్తానన్నారు. ఖేడ్‌లో పాఠశాలల సంఖ్యను పెంచేందుకు కృషి చేస్తానన్నారు.  కార్యక్రమంలో ఆర్డీఓ ముత్యంరెడ్డి, నాయకులు రాజనర్సు  తదితరులు పాల్గొన్నారు.
  విద్యార్థులను ఇబ్బంది పెట్టొద్దు
 విద్యార్థులను ఇబ్బంది పెట్టడం మంచిది కాదని మంత్రి హరీష్‌రావు విద్యాశాఖ అధికారులపై ఆగ్రహం వ్యక్తం చేశారు. స్థానిక ఉన్నత పాఠశాలలో అరబిందో సహకారంతో నిర్మిం చిన మరుగుదొడ్ల బ్లాక్, అదనపు తరగతి గదులను ప్రారంభించారు. ఈ సందర్భంగా ప్రారంభోత్సవ కార్యక్రమానికి విద్యార్థులను తరగతి గదుల నుంచి బయటకు వదిలిన విషయాన్ని గ్రహించి మంత్రి ఆగ్రహం వ్యక్తం చేశారు.


 ♦ గట్టులింగంపల్లిలో భారీ రిజర్వాయర్!
 ♦ ఖేడ్‌కు  వరప్రదాయిని..
 ♦ కార్యరూపం  దిశగా అడుగులు
 ♦ 77 వేల ఎకరాలకు సాగునీరు అందే అవకాశం
 ♦ కేసీఆర్ హామీపై  కోటి ఆశలు
 సాక్షి ప్రతినిధి, సంగారెడ్డి: నారాయణఖేడ్ ఉప సంగ్రామం ముగిసింది. ఎమ్మెల్యేగా అధికార పార్టీకి చెందిన వ్యక్తే విజయం సాధించారు. ఇప్పుడిక నాటి ఎన్నికల ప్రచారసభలో సీఎం కేసీఆర్ ఇచ్చిన ‘హామీ’యే సర్వత్రా చర్చనీయాంశమవుతోంది. ‘గోదావరి జలాలు తెచ్చి ‘ఖేడ్’ ప్రజల కాళ్లు కడుగుతా.. తాగు, సాగునీటి సమస్య లేకుండా చేస్తా’ అని కేసీఆర్ చేసిన ప్రకటనపై ఆసక్తి నెలకొంది. ఖేడ్ నియోజకవర్గాన్ని ఏళ్లకేళ్లుగా దుర్భిక్షం పట్టిపీడిస్తోంది. సీఎం ప్రకటనతోనైనా తాగు, సాగునీటి కష్టాలు తీరుతాయని ఇక్కడి ప్రజలు ఆశ పెట్టుకున్నారు. నీళ్ల కోసం ఇక్కడి జనం బాధలు అన్నీ ఇన్నీకావు.. చిన్నారులు సైతం బడి మానేసి నీటి బాట పడుతున్నారు. పొద్దంతా పడిగాపులు కాసినా మూడు బిందెలు కూడా దొరకని దుస్థితి. ఇలాంటి ఖేడ్ నియోజకవర్గానికి అపర సంజీవినిగా మారబోతున్నది ‘గట్టులింగంపల్లి’..
  గట్టులింగంపల్లి పెద్ద రిజర్వాయర్‌గా రూపుదిద్దుకోబోతోంది. నారాయణఖేడ్‌కు వర ప్రదాయినిగా మారబోతోంది. అంతా అనుకున్నట్టుగా సాగితే మంజీర నదిపై నిజాం రాజులు కట్టిన ఘణపురం ఆనకట్ట కంటేగట్టు లింగంపల్లి రిజర్వాయర్ పెద్దదిగా అవతరించనున్నది. మనూరు, నారాయణఖేడ్, పెద్దశంకరంపేట మండలాల్లో దాదాపు 77 వేల ఎకరాలను సాగు నీరు అందించే విధంగా అధికారులు ప్రణాళిక రూపొందిస్తున్నారు. దీనికి కేంద్ర పాలక సంస్థ ‘వ్యాస్కోప్’ డిజైన్ రూపొందించే పనిలో పడింది. 
 ఇదే ప్రణాళిక....
 సింగూరు ప్రాజెక్టు బ్యాక్ జలాలు మనూరు మండలానికి తాకుతాయి. ఈ జలాలు సముద్ర మాట్టానికి 517 నుంచి 520  మీటర్ల ఎత్తులో ఉంటాయి.  మంజీరకు కేవలం 1.5 కిలో మీటర్ల దూరంలోనే గట్టు లింగంపల్లి ఉంది. నాలుగు దిక్కులా కొండలు కలిగి సహజ సిద్ధంగా ఏర్పడిన రిజర్వాయర్. తూర్పునకు బుడ్డగట్టు, మడగట్టు, పడమరకు రానాపురం గట్టు ,దక్షిణం వైపునకు దూద్‌గొండ, ఉత్తరం దిక్కున ఊరగట్టులున్నాయి.  ఈ కొండల నడుమ విశాలమైన  లోతట్టు ప్రాంతం ఉంది.  లింగంపల్లి ఊరు వైపున్న బుడ్డగట్టు, మడగట్టు నుంచి  ఊరగట్టు వరకు ఆనకట్ట నిర్మించి, లోతట్టు ప్రాంతాన్ని రిజర్వాయర్‌గా చేసే విధంగా రూపకల్పన చేస్తున్నారు. దీనికి దక్షిణం వైపు అంటే దూద్‌గొండ వెనుక  మంజీరా నది ప్రవహిస్తుంది. దూద్‌గట్ట్టును తవ్వి కాల్వ చేస్తే సింగూరు జలాలు పల్లానికి చేరి రిజర్వాయర్ నిండే విధంగా డిజైనింగ్ రూపొందించారు.
 ఈ రిజర్వాయర్‌లో నీటి నిల్వ సామర్థ్యం 0.5 టీఎంసీ నుంచి  ఒక టీఎంసీ వరకు ఉంటుందని అంచనా..  గట్టు లింగంపల్లి  రిజర్వాయర్‌ను మనూరు, నారాయణఖేడ్, పెద్దశంకరంపేట మండలాలలోని చెరువులకు కాల్వల ద్వారా అనుసంధానం చేస్తారు. వీలును బట్టి మధ్య మధ్యలో చెక్ డ్యాంల నిర్మాణం చేసి వాటి సాధ్యమైనంత ఎక్కువ విస్తీర్ణంలో  సాగుకు నీళ్లు అందిస్తారు.  నారాయణఖేడ్ మండలంలో రుద్రార్, లింగాపూర్, మద్వార్,హన్మంతరావు పేటమత్తడి, నిజాంపేటలోని మదిరాల చెరువు నిండిన తరువాత మిగులు జలాలు నిజాంసాగర్‌లో కలుస్తాయి. మనూరు మండలం కారముంగి వద్ద ఒక ఎత్తిపోతల ప్రాజెక్టు ఏర్పాటు చేసి దాదాపు 12 గ్రామాలకు సాగు నీరు అందిస్తారు. మరో వైపు ప్రాణహిత చేవెళ్ల నుంచి పెద్దశంకరంపేట మండలంలో దాదాపు 17 వేల ఎకరాలకు సాగు నీరు అందించే విధంగా ప్రణాళిక చేసిన విషయం తెలిసిందే.
  రైతు రాజే..
 ప్రస్తుతం నారాయణఖేడ్ నియోజకవర్గంలో 55 వేల హెక్టార్లలో సాగు భూమి ఉంది. చెరువులు, కుంటలు, వాగులు  ద్వారా కేవలం 16 వేల ఎకరాలు మాత్రమే సాగు నీరు అందుతుంది. మనూరు మండలంలో రాతినేలలు, గులక రాళ్లు భూములు, నారాయణఖేడ్, పెద్దశంకరంపేట మండలాల్లో ఎర్ర నేలలు, నల్లమట్టి నేలలు ఉన్నాయి. నీళ్లుంటే ఈ భూముల్లో వాణిజ్య పంటల నాణ్యమైన విత్తనాలు పండుతాయి. ఉల్లిగడ్డ, ఎల్లిగడ్డ, పసుపు,అల్లం పంటలు విస్తారంగా పండేందుకు అవకాశం ఉన్న భూములు. ఇప్పటికీ ఇక్కడి రైతులు ఉల్లి, వెల్లుల్లి, శనగ, చెరకు పంటలు పండిస్తున్నారు. కానీ సాగు నీరు లేక 20, 30 ఎకరాలు ఉన్న రైతులు కూడా వలస కూలీలుగానే కాలం గడుపుతున్నారు. పట్టణాలకు వలసపోయి పిల్లలను చదివించుకుంటున్నారు. గట్టు లింగంపల్లి రిజర్వాయర్ పూర్తయితే ఈ ప్రాంతంలో బంగారమే పండుతుంది.
  గట్టులింగంపల్లికి బీజంపడింది ఇలా..
 కొద్ది రోజుల క్రితం మంత్రి హరీశ్‌రావు మనూరు మండలానికి వచ్చినప్పుడు స్థానిక విలేకరులతో ముచ్చటించారు. ఆ సందర్భంలోనే ఈ ప్రాంతానికి ఒక జల ప్రాజెక్టు కావాలని విలేకరులు మంత్రి దృష్టికి తెచ్చారు. ‘మీ ఆశ.. ఆశయం గొప్పది.. కానీ రాళ్లు తేలిన మనూరు మండలానికి ప్రాజెక్టు సాధ్యమయ్యే పనేనా’ అంటూ మంత్రి ఆలోచనలో పడ్డారు. సరిగ్గా అప్పుడే ‘సాక్షి’ మనూరు విలేకరి.. గట్టులింగంపల్లి ‘గుట్టు’ చెప్పారు. అంతే మంత్రి మోములో ఆనందం.. ‘మీరు చెప్పేది నిజమైతే తపస్సు చేసైనా ముఖ్యమంత్రిని ఒప్పిస్తా’ అని మాటిచ్చారు.  వెంటనే సెల్‌ఫోన్‌లోనే నీటిపారుదల శాఖ ఇంజనీర్లను ఏకం చేశారు.  ‘చలో పోదం పదా.. గట్టు లింగంపల్లికి’అంటూ  పయనమయ్యారు. ఇది గత సెప్టెంబ ర్‌లో జరిగిన సంఘటన. ఆ వెంటనే ఆయన సీఎం చేత ఏకంగా ప్రకటన చేయించారు. ఇప్పడది కార్యరూపం దాల్చబోతున్నది.
  గట్టు లింగంపల్లి ఒక పరిష్కారం
 గట్టు లింగంపల్లి సహజసిద్ధంగా ఏర్పడిన రిజర్వాయర్. 60 ఏళ్ల నుంచి పాలిస్తున్న నాయకులు దీని గురించి ఎందుకు ఆలోచన చేయలేదో నాకు  అర్థం కావటం లేదు. నారాయణఖేడ్ ప్రాంతానికి అత్యవసరంగా సాగు, తాగు నీళ్లు అవసరం. దీనికి గట్టు లింగంపల్లి రిజర్వాయర్ ఒక పరిష్కారం చూపెడుతుంది. దీని డిజైనింగ్ ప్రస్తుతం ‘వ్యాస్కోప్’ రూపొందిస్తోంది. మనూరు, నారాయణఖేడ్, పెద్దశంకరంపేట మండలాలకు కనీసం 77 వేల ఎకరాల్లో సాగు నీరు అందిస్తుందని అంచనా వేస్తున్నాం.  నిజానికి ఇది తక్కువ ఖర్చుతో ఎక్కువ విస్తీర్ణం సాగులోకి తెచ్చే ప్రయత్నం. ఈ రిజర్వాయర్ ద్వారా గొలుసుకట్టు చెరువును నింపుకుంటూ వెళ్తే సాధ్యమైనన్ని ఎక్కువ గ్రామాలకు నీళ్లు అందుతాయి. ఈ రిజర్వాయర్ నిర్మాణంపై ముఖ్యమంత్రి కేసీఆర్ కూడా సానుకూలంగా స్పందించారు. -  భారీ నీటిపారుదల శాఖ మంత్రి హరీశ్‌రావు
 చెరువు నీళ్లు అడిగితే తలలు పగులగొట్టిండ్రు
 గట్టు లింగంపల్లి చెరువు కట్ట వేస్తేనే ఓటేస్తం అని చెప్పినందుకు  జనాన్ని తీసుకొచ్చి ఊరుమీదపడి తలలు పగలగొట్టిండ్రు. పోలీసులకు చెప్పి కేసులు పెట్టిండ్రు. మక్కెలు ఇరుగ తన్నిచ్చిండ్రు. ఇక అప్పటి నుంచి చెరువు మాటే ఎత్తలే.  -గొట్టం రాములు పగిడిపల్లి
 కరువు తీరుద్ది
 రెండు దినాలు పోతే జీవాలకు కూడా నీళ్లు దొరకవు. దెబ్బలకు బయపడి సెరువు అడుగుడు సార్ధారిచ్చుకున్నాం.. హరీశ్ వచ్చి తలాబ్ కట్టిత్తం అన్నడు. ఊరగట్టు నుంచి బుడ్డ గట్టు దాక కట్టిస్తా అంటుండు...సూడాలే ఎట్టయిద్దో.. తలాబ్ కడితే  కరువు దీరుద్ది.  
  - నర్సుగొండ, పగిడిపల్లి


 మెదక్ జిల్లా నారాయణఖేడ్ అసెంబ్లీ నియోజకవర్గానికి జరిగిన ఉప ఎన్నికల్లో అక్రమాలు చోటు చేసుకున్నాయని తెలంగాణ టీడీపీ అధ్యక్షుడు ఎల్.రమణ ఆరోపించారు. ఈ మేరకు ఆయన కేంద్ర ఎన్నికల సంఘానికి లేఖ రాశారు. నారాయణఖేడ్ ఉప ఎన్నికల ఫలితాలు నిలుపుదల చేయాలని ఆ లేఖలో కోరారు.
 ‘ఉప ఎన్నికల్లో అధికార పార్టీ అక్రమాలకు పాల్పడిన విషయం ఫలితాల ద్వారా మరో సారి స్పష్టం అయ్యింది. ఈవీఎంల ట్యాంపరింగ్ పాల్పడినట్లు స్పష్టమవుతోంది. టీడీపీ బలంగా ఉన్న గ్రామాల్లో కేవలం సింగిల్ డిజిట్‌లో ఓట్లు వచ్చాయి. జీహెచ్‌ఎంసీ ఎన్నికల్లో ఏ విధంగా అక్రమాలకు పాల్పడ్డారో, నారాయణఖేడ్ ఉప ఎన్నికల్లోనూ అదే విధంగా చేశారు...’ అని కేంద్ర ఎన్నికల చీఫ్ కమిషనర్ నసీమ్ జైదీకి రాసిన లేఖలో ఎల్.రమణ పేర్కొన్నారు.
 అధికార పార్టీకి, ఇతర పార్టీలకు ఇచ్చిన ఓటర్ల జాబితాల్లో కూడా అనేక తప్పులు ఉన్నాయని ఆరోపించారు. అధికార పార్టీ నాయకుల వద్ద, అధికారుల వద్ద తాజా జాబితా ఉండగా, ప్రతిపక్ష పార్టీలకు మాత్రం పాత జాబితాలు ఇచ్చారని ఆ లేఖలో వివరించారు. ఉప ఎన్నికపై సమగ్ర విచారణకు ఆదేశించాలని కోరారు. ఇదే లేఖ ప్రతిని రాష్ట్ర ఎన్నికల సంఘానికి కూడా ఎల్.రమణ అందజేశారు.
  


 పెద్దశంకరంపేట : వెనుకబడిన నారాయణఖేడ్ అభివృద్ధే టీఆర్‌ఎస్ ధ్యేయమని ఖేడ్ ఎమ్మెల్యే అభ్యర్థి భూపాల్‌రెడ్డి అన్నారు. ఆదివారం పేటలో ఏర్పాటు చేసిన విలేకరుల సమావేశంలో ఆయన మాట్లాడుతూ శనివారం జరిగిన ఉప ఎన్నికలో టీఆర్‌ఎస్ పార్టీకి ఓటేసిన ప్రతి ఒక్కరికి ఆయన కృతజ్ఞతలు తెలిపారు. వివిధ ప్రాంతాల నుంచి టీఆర్‌ఎస్‌కు మద్దతు తెలిపేందుకు వచ్చి ఓటేసిన ఓటర్లకు రుణపడి ఉంటానన్నారు. పోలింగ్ సరళి టీఆర్‌ఎస్‌కు అనుకూలంగా ఉందన్నారు. భారీ మెజార్టీతో టీఆర్‌ఎస్‌ను గెలిపించబోతున్న ఓటర్ల రుణం తీర్చుకుంటానన్నారు. కార్యక్రమంలో రాష్ట్ర గీత పారిశ్రామిక సంస్థ మాజీ చైర్మన్ విగ్రాం రామాగౌడ్, మండల టీఆర్‌ఎస్ అధ్యక్షుడు విజయరామరాజు, సర్పంచ్ జంగం శ్రీనివాస్, నాయకులు బక్కారెడ్డి, అయూబ్‌ఖాన్, క్రిష్ణమూర్తి, మాణిక్‌రెడ్డి, రాగం సంగయ్య, సత్యం, గంగారం, సలీం, బాగయ్య, భీంరావు, గంగారం, అశోక్, నాగభూషణం తదితరులున్నారు.
  


 21 రౌండ్లకు
 14 టేబుళ్ల ఏర్పాటు
 ఈవీఎంలకు పటిష్ట భద్రత
  
 నారాయణఖేడ్: ఖేడ్ ఉప ఎన్నిక ముగియడంతో అధికారులు కౌంటింగ్‌కు ఏర్పాట్లు చేస్తున్నారు. ఈనెల 13న జరిగిన పోలింగ్ అనంతరం ఈవీఎంలను నారాయణఖేడ్ మండలం జూకల్ గ్రామ శివారులోని పాలిటెక్నిక్ కళాశాలలోని గదిలో భద్రపరిచారు. 16వ తేదీన అధికారులు పాలిటెక్నిక్ కళాశాలలో కౌంటింగ్‌కు ఏర్పాట్లు చేస్తున్నారు. కళాశాల పైగదిలో కౌంటింగ్ ప్రక్రియను ఉదయం 8గంటలకు ప్రారంభిస్తారు. 14 టేబుళ్ల ద్వారా 21 రౌండ్లు నిర్వహించి ఫలితాన్ని ప్రకటిస్తారు. ప్రతి రౌండ్‌కు 14 ఈవీఎంలను అధికారులు లెక్కిస్తారు. ఇలా 21 రౌండ్లలో 286 ఈవీఎంలను అధికారులు లెక్కిస్తారు. ప్రతి రౌండ్‌ను 10నిమిషాల్లో పూర్తిచేస్తారు. మధ్యాహ్నం 12గంటలకల్లా ఫలితం వెలువడనుంది.
 
 
 ఈవీఎంల గదికి పటిష్ట భద్రత
 ఈవీఎంలు భద్రపర్చిన గదికి అధికారులు పటిష్ట భద్రత కల్పించారు. పాలిటెక్నిక్ పై గదిలో ఈవీఎంలను భద్రపర్చిన అధికారులు సీలు వేశారు. నాలుగు సీసీ కెమెరాలను ఏర్పాటు చేసి ఆర్‌ఓ పర్యవేక్షిస్తున్నారు. అటువైపు ఎవరినీ అనుమతించడంలేదు.కౌంటింగ్‌కు సంబంధించి అధికారులు  స్కృటినీ పూర్తిచేశారు. ఓటరు హాజరును రిజిస్టరు ఎన్నికల ఏజెంట్ల సమక్షంలో అబ్జర్వర్ పూర్తిచేశారు. పోలైన ఓట్ల డైరీని పూర్తిచేసి సీలు వేశారు.
 
 ప్రతీ టేబుల్‌పై మైక్రోఅబ్జర్వర్
 కౌంటింగ్‌కు సంబంధించి అధికారులు ప్రతి టేబుల్‌కు ఒక మైక్రో అబ్జర్వర్‌ను నియమిస్తారు. ఇలా 14మంది మైక్రో అబ్జర్వర్లను నియమిస్తారు. వీరితోపాటు ప్రతి టేబుల్‌కు ఆయా పార్టీలకు చెందిన కౌంటింగ్ ఏజెంట్లను నియమిస్తారు.
 
  నేర చరిత్ర లేనివారే ఏజెంట్లు
 ఎలాంటి నేరచరిత్ర లేని కౌంటింగ్  సిబ్బందిని నియమించేందుకు అధికారులు ఏర్పాట్లు చేస్తున్నారు. ఆయా పార్టీలకు చెందిన 14టేబుళ్లకు టేబుల్‌కు ఒకరి చొప్పున ఏజెంట్లను నియమించుకోవచ్చు. అభ్యర్థులు ఇచ్చిన ఏజెంట్ల పేర్లపై అధికారులు విచారణ చేపట్టి ఏజెంట్లుగా నియమించనున్నారు. ఏజెంట్లుగా నియమితులైన వారు అరగంట ముందుగానే కౌంటింగ్ కేంద్రానికి హాజరు కావాల్సి ఉంటుంది.
  


 నారాయణఖేడ్ /పెద్దశంకరంపేట/పటాన్‌చెరు టౌన్:ఉప ఎన్నికల విధుల్లో పాల్గొన్న హెడ్ కానిస్టేబుల్ హీరాసింగ్ రక్తపోటుకు గురై మరణించాడు. నారాయణఖేడ్ మండలం కొండాపూర్ పోలింగ్ కేంద్రం వద్ద పటన్‌చెరు పోలీస్‌స్టేషన్‌లో కానిస్టేబుల్‌గా పనిచేసే హీరాసింగ్ శనివారం ఎన్నికల విధులు నిర్వర్తించారు. మధ్యాహ్నం సమయంలో ఆయన తీవ్రమైన రక్తపోటుతో పాటు ఛాతీలో నొప్పితో బాధపడుతూ కుప్పకూలాడు. తోటి సిబ్బంది వెంటనే ఆయనను ఖేడ్ ప్రభుత్వాస్పత్రికి తరలించారు. ఇక్కడ ప్రథమ చికిత్స అనంతరం హైదరాబాద్‌కు తరలించారు. దీంతో మార్గమధ్య లో సంగారెడ్డి సమీపంలోకి వెళ్లగానే మరణించాడు. ఈ యన భౌతికకాయాన్ని సంగారెడ్డి ఆస్పత్రిలో ఉంచారు. హెడ్‌కానిస్టేబుల్ మృతి విషయం ఎన్నికల కమిషన్‌కు నివేదించామని, ప్రభుత్వం ద్వారా కుటుంబానికి సహా యం అందేలా చూస్తామని కలెక్టర్ రోనాల్డ్‌రాస్ తెలిపా రు. మృతుడు హీరాసింగ్‌ది పెద్దశంకరంపేట మండలం కోలపల్లి గ్రామం. ఆయనకు భార్య, కూతురు ఉన్నారు.
 
 
  హీరాసింగ్ కుటుంబాన్ని ఆదుకుంటాం: కలెక్టర్
 విధినిర్వహణలో ప్రాణాలు విడిచిన హీరాసింగ్ (48) కుటుంబాన్ని జిల్లా కలెక్టర్ రోనాల్డ్‌రాస్, జిల్లా ఎస్పీ సుమతి, అడిషనల్ ఎస్పీ సురేందర్‌రెడ్డి శనివారం రాత్రి పరామర్శించారు. మృతదేహంపై పుష్పగుచ్ఛం ఉంచి నివాళలర్పించారు. ఎన్నికల విధులు పూర్తయ్యాయనే సంతోషంలో ఉన్న తమను హెడ్‌కానిస్టేబుల్ మృతి చెం దాడన్న వార్త కలిచివేసిందన్నారు. అయన కుటుం బాన్ని ప్రభుత్వ పరంగా ఆదుకుంటామన్నారు. హీరాసింగ్ భార్య ప్రతిభ, కుమార్తె హారికలను ఓదార్చారు. వీరి వెంట మెదక్ డీఎస్పీ రాజారత్నం, అడిషనల్ డీఎస్పీ వెంకన్న, సీఐలు నాగయ్య, లింగేశ్వర్, పేట ఎస్‌ఐ మహేష్‌గౌడ్ తదితరులున్నారు.
 
 
  హెడ్ కానిస్టేబుల్ మృతితో విషాదం
 ఖేడ్ ఉప ఎన్నికల్లో భాగంగా శనివారం నారాయణఖేడ్‌లో పోలింగ్ బందోబస్తు నిర్వహిస్తూ హెడ్ కానిస్టేబుల్ హీరాసింగ్ మృతిచెందిన ఘటన విషాదాన్ని నిం పింది. 1959 బ్యాచ్‌లో ఉద్యోగం పొందిన హీరాసింగ్ ఆయా పోలీస్ స్టేషన్‌లలో పని చేశారు. ప్రస్తుతం కొంత కాలంగా పటాన్‌చెరు పీఎస్‌లో విధులు నిర్వహిస్తున్నారు. పటాన్‌చెరులోని జేపీ కాలనీలో నివాసముంటున్నారు. ఆయనకు భార్య ప్రతిభాబాయి, పదోతరగతి చదువుతోన్న కూతురు హారిక ఉన్నారు. హీరాసింగ్ మృతి పట్ల పోలీసు అధికారుల సంఘం నాయకుడు ఆసిఫ్ సంతాపం ప్రకటించారు. స్థానిక పోలీసులు సంతాపం వ్యక్తం చేశారు.


 నారాయణఖేడ్/మనూరు/రేగోడ్: తమ ఓట్లను గల్లంతు కావడంతో ఖేడ్ మండలం అనంతసాగర్ పంచాయతీ పరిధిలోని గౌరారం తండాకు చెందిన గిరిజన ఓటర్లు ఆందోళన వ్యక్తం చేశారు. బండ్రాన్‌పల్లి పోలింగ్ బూత్‌లో గౌరారం తండాకు చెందిన ఓటర్లకు ఓటు హక్కు ఉంది. తండాకు చెందిన 60 మందికి ఓటరు స్లిప్పులు అందజేసినా పోలింగ్ బూత్‌కు వెళ్లగా ఓట్లు లేకపోవడంతో వారంతా ఆందోళనకు దిగారు. పోలింగ్ బూత్ అధికారులకు 2015 ఓటరు జాబితా సరఫరా చేశారని, గ్రామంలో స్లిప్పులు పంపిణీ చేసింది మాత్రం 2016 జాబితా అని ఓటర్లు తెలిపారు. మనూరు మండలం రాణాపూర్‌లో 150, మావినెల్లిలో 100, కిషన్‌నాయక్ తండాలో192 ఓట్లు గల్లంతైనట్టు ఓటర్లు ఆరోపించారు. ఉట్‌పల్లిలో ఎన్నికల సిబ్బంది వద్ద 2016కు సంబంధించి ఓటరు జాబితా ఉండగా గ్రామస్తుల వద్ద 2015 ఓటరు జాబితా ఉండటంతో గందరగోళం నెలకొంది. తమ పార్టీలకు చెందిన ఓట్లను కావాలనే జాబితా నుంచి తొలగించారని టీడీపీ మనూరు మండల అధ్యక్షుడు మోహన్‌రెడ్డి, నాయకుడు అంజాగౌడ్, కాంగ్రెస్ నాయకుడు బస్వరాజ్ ఆరోపించారు.


  ఓట్ల పండగే..
 ఖేడ్ చరిత్రలోనే భారీ పోలింగ్
 81.79 శాతం ఓటింగ్ నమోదు
 ఫలించిన అభివృద్ధి మంత్రం
 ఏకపక్షంగా సాగిన ఓటింగ్ సరళి
 ఆకట్టుకున్న
  
 మోడల్ పోలింగ్ కేంద్రాలు
 సాక్షి ప్రతినిధి, సంగారెడ్డి: నారాయణఖేడ్ అసెంబ్లీ ఉప ఎన్నికలో భారీ పోలింగ్ నమోదయింది. గతంలో ఎన్నడూ లేనంతగా 81.79 శాతం మంది ఓటు హక్కు వినియోగించుకున్నారు. రాష్ట్ర సరిహద్దు గ్రామాల్లో ఫ్యాక్షన్ తరహా రాజకీయాలు ఉండటంతో ఎన్నికల్లో ఘర్షణలు జరగవచ్చని అధికారులు అనుమానించారు. కానీ ఎలాంటి అవాంఛనీయ ఘటనలు జరగకపోవడంతో అధికారులు, పోలీసులు ఊపిరిపీల్చుకున్నారు. సాధారణ ఎన్నికల్లో సెంటిమెంట్ మంత్రంతో అధికారంలోకి వచ్చిన గులాబీ పార్టీ.. నారాయణఖేడ్‌కు వచ్చే సరికి అభివృద్ధి తంత్రంతో సెంటుమెంటును పక్కకు నెట్టేసింది. ఓటింగ్ సరళిని చూసిన రాజకీయ పరిశీలకులు టీఆర్‌ఎస్ పార్టీకి భారీ మెజార్టీ దక్కుతుందని అంచనా వేస్తున్నారు. 168 రెవెన్యూ గ్రామాల్లోని 286 పోలింగ్ కేంద్రాల్లో ఉదయం ఏడు గంటల నుంచి ఓటింగ్ ప్రక్రియ మొదలైంది. 198 పోలింగ్ కేంద్రంలో ఈవీఎం మొరాయించడంతో దాని స్థానంలో కొత్త దానిని ఏర్పాటు చేశారు. మనూరు మండలంలో ఔదత్‌పూర్‌లో కొంత ఆలస్యంగా ఓటింగ్ ప్రారంభమయింది.
 
 
 పెద్దశంకరంపేట మండలంలో అత్యధికంగా 85.85 శాతం, నారాయణఖేడ్ 75, మనూరు మండలంలో 81, కల్హేర్ మండలంలో 84, కంగ్టి మండలంలో 80.76 శాతం పోలింగ్ నమోదు అయింది. 143 కేంద్రాల్లో వెబ్‌కాస్టింగ్.. సెల్‌ఫోన్ సిగ్నల్స్ అందుబాటులో ఉన్న 143 కేంద్రాల్లో ఎన్నికల అధికారులు లైవ్ వెబ్ కాస్టింగ్ ఏర్పాటు చేశారు. జిల్లా ఎన్నికల అధికారి, కలెక్టర్ రోనాల్డ్‌రాస్ లైవ్ వెబ్‌కాస్టింగ్‌తోనే ఎన్నికల సరళిని   పర్యవేక్షించారు. ఒక గ్రామంలో కాంట్రాక్టు పీఈటీ ఉద్యోగి ఎన్నికల ఏజెంటుగా కూర్చున్నారని ఫిర్యాదు రావడంతో వెబ్‌కాస్ట్‌లోనే అతని పరిశీలించి విధుల నుంచి తొలగిస్తున్నట్లు ప్రకటించారు. జూకల్ పాలిటెక్నిక్ కాలేజ్‌లో ప్రత్యేక వెబ్ వీక్షణ వ్యవస్థ ఏర్పాటు చేయడంతో పాటు, కలెక్టర్ వద్ద ఉన్న ట్యాబ్‌ద్వారా ఎన్నికల సరళి సమీక్షించారు. ఎన్నికలు ప్రశాంతంగా.. వేగం గా జరుగుతుండతో రోనాల్డ్‌రోస్ ఉత్సాహంగా కనిపించారు. అన్ని రాజకీయ పార్టీల నుంచి ఎలాంటి ఫిర్యాదులు వచ్చినా ఆయన స్వీకరించారు. వారికి పరిష్కారం కూడా చూపెట్టి అన్ని పార్టీ అభ్యర్థుల మన్ననలు అందుకున్నారు.
 
 దానికే ఓటు వేసిన..
 ‘రెండు పూటల సుశీల తింటున్నా.. సెడగొట్టుకుంటమా బిడ్డా... దానికే ఓటు వేసిన.. ’అని ఓ వృద్దురాలు సమాధానం. ఎన్నికల సర్వే చేస్తున్న వారికి ఇలాంటి సమాధానాలే వినిపించాయి. నియోజకవర్గంలోని ఐదు మండలాల్లో కలిపి 1.53 లక్షల మంది ఓటర్లు ఓటు హక్కు వినియోగించుకున్నారు. వీరిలో 75 శాతంపైగా ఓటర్లు ఒకే పార్టీ గుర్తుకు ఓటేసినట్లు సర్వేలు చెప్తున్నాయి. నిజానికి శతాబ్దకాలంగా నారాయణఖేడ్ ప్రజలకు అభివృద్ధి, ప్రభుత్వ సహకారం అంటే ఏమిటో తెలియదు. దివంగత ఎమ్మెల్యే కిష్టారెడ్డి మరణం తరువాత అధికార టీఆర్‌ఎస్ పార్టీ  పక్కా ప్రణాళిక ప్రకారం అభివృద్ధి పనులు చేసుకుంటూ వెళ్లింది. ముఖ్యంగా రోడ్లు, మంచినీటి మీద దృష్టి పెట్టి ప్రగతిని చూపించింది. భారీ నీటిపారుదల శాఖ మంత్రి హరీశ్‌రావు దాదాపు ఐదు నెలలుగా నియోజకవర్గంలోనే తిరుగుతూ ప్రజల కష్టాలసుఖాలను నేరుగా విని తెలుసుకున్నారు. చిన్నచిన్న పనులను తక్షణమే పరిష్కరించడంతో వారికి స్వాంతన చేకూరింది. దీంతో ఓటర్లు అధికారపార్టీ వైపునకు మొగ్గు చూపారని రాజకీయ పరిశీలకుల విశ్లేషణ.
 
  ఆకట్టుకున్న మోడల్ పోలింగ్ కేంద్రాలు
  నియోజకవర్గంలోని ఐదు మండలాల్లో 20 మోడల్  పోలింగ్ కేంద్రాలు ఏర్పాటు చేశారు. మామిడి తోరణాలు కట్టి, టెంట్లు వేసి పెళ్లి మందిరిలా ముస్తాబు చేశారు. ఈ కేంద్రాల్లో ఓటర్‌కు రెడ్ కార్పెట్ పరిచి, పువ్వులతో ఆహ్వానం పలికారు. ఎండ తీవ్రత పెరిగిన మధ్యాహ్నం సమయంలో ఓటర్లకు మజ్జిగ, మంచినీళ్లు అందించారు. కల్హేర్ మండలం మాసాన్‌పల్లి మోడల్ కేంద్రం అధికారులను సైతం ఆకర్షించింది. ఇక్కడ పోలీసులు ఓటర్లతో అత్యంత మర్యాదగా మెలిగారు


 నారాయణఖేడ్: మెదక్‌ జిల్లా నారాయణఖేడ్ నియోజకవర్గానికి శనివారం జరుగుతున్న ఉప ఎన్నికల పోలింగ్ ఉదయం మందకొడిగా ప్రారంభమైనా... మధ్యాహ్నానికి పుంజుకుంది. శనివారం మధ్యాహ్నం 1 గంట సమయానికి పోలింగ్ 58.43 శాతానికి చేరుకుంది. పోలింగ్ కేంద్రాల వద్ద ఓటర్లు బారులు తీరారు. నియోజక వర్గ పరిధిలో 286 పోలింగ్ కేంద్రాలను ఏర్పాటు చేశారు. 
  
 మరోవైపు చాలా చోట్ల ఓట్లు గల్లంతు కావడంతో ఓటర్లు అసహనం వ్యక్తం చేస్తున్నారు. గౌరారం తండాలోనే 70 ఓట్లు గల్లంతయ్యాయి. పలు చోట్ల ఇదేవిధమైన పరిస్థితి కనిపించింది. ఎన్నికల సిబ్బంది దగ్గర 2015 సంవత్సరానికి సంబంధించిన ఓటర్ల జాబితా ఉండగా... ఏజెంట్లు 2016 జాబితా ఆధారంగా ఓటర్ స్లిప్పులు పంపిణీ చేశారు. దీంతో ఓట్ల గల్లంతు అయిన విషయం స్పష్టంగా కనిపిస్తోంది. 


 సాక్షి, హైదరాబాద్: రాష్ట్రమంత్రిగా ఉంటూ రెండేళ్లుగా నారాయణఖేడ్‌ను పట్టించుకోని హరీశ్‌రావు ఇప్పుడు దత్తత తీసుకుంటామంటూ అవమానిస్తున్నారని మాజీ ఎంపీ పొన్నం ప్రభాకర్ విమర్శించారు. గాంధీభవన్‌లో బుధవారం ఆయన విలేకరులతో మాట్లాడుతూ నారాయణఖేడ్ నీటి ఎద్దడికి మంత్రి హరీశ్‌రావు, డిప్యూటీ స్పీకర్ పద్మా దేవేందర్‌రెడ్డిలే కారణమని ఆరోపించారు. సింగూరు జలాలను నిజాంసాగర్‌కు తరలించడం వల్ల నారాయణఖేడ్‌లో తాగునీటికి ఇబ్బందులు వస్తున్నాయన్నారు. నారాయణఖేడ్ ప్రజలకు తాగునీరు కూడా లేకుండా చేసిన హరీశ్‌రావు, ఇప్పుడు దత్తత తీసుకుంటానని అనడం మోసమని పొన్నం విమర్శించారు. నారాయణఖేడ్‌ను దత్తత తీసుకుంటానని చెప్పడం ద్వారా అక్కడ ఉప ఎన్నికల్లో పోటీచేస్తున్న టీఆర్‌ఎస్ అభ్యర్థి అసమర్థుడని చెప్పడమే అవుతుందన్నారు.


 ♦ నారాయణఖేడ్‌కు వెలుగు రావాలి
 ♦ ఉప ఎన్నికల ప్రచార సభలో కేసీఆర్
 ♦ నియోజకవర్గంలో మార్కెట్ యార్డు, ఆసుపత్రి ఉండదా?
 ♦ఇంతటి వెనుకబాటుతనం ఎక్కడా లేదంటున్నారు
 ♦ ఇప్పటిదాకా ఇక్కడ గెలిచిన ఎమ్మెల్యేలు ఏం చేశారు?
 ♦ టీఆర్‌ఎస్‌ను గెలిపించండి.. హైదరాబాద్‌లా అభివృద్ధి చేస్తాం
 ♦ ఎన్నికల తర్వాత రెండ్రోజులు ఇక్కడే ఉంటా.. పనులు దగ్గరుండి చేయిస్తా
 
 సాక్షి ప్రతినిధి, సంగారెడ్డి: ‘‘నియోజకవ ర్గంలో మార్కెట్ యార్డు ఉండదా? ఆసుపత్రులు ఉండవా? ఇంత దారుణమైన పరిస్థితులు ఉంటయా? ఇంకా ఇంత దరిద్రమైన పరిస్థితుల్లో ఉండాలా? నారాయణఖేడ్‌కు వెలుతురు రావాలి. కాంగ్రెస్, టీడీపీల సంగతి మీకు తెలియంది కాదు.. పాత చింతకాయ పచ్చడే! ఇయ్యాల రాష్ట్రంలో అధికారంలో ఉన్న పార్టీ టీఆర్‌ఎస్. భూపాల్‌రెడ్డిని గెలిపిస్తే నారాయణఖేడ్ అద్భుతంగా ముందుకు పోతది. అన్ని రకాలుగా నారాయణఖేడ్‌ను అభివృద్ధి చేస్తా..’’ అని ముఖ్యమంత్రి కె.చంద్రశేఖర్‌రావు అన్నారు. ఉపఎన్నికల్లో అభివృద్ధికే పట్టం కట్టాలని ప్రజలకు పిలుపునిచ్చారు. ‘‘వరంగల్, గ్రేటర్ తరహా తీర్పు ఇచ్చే బాధ్యత మీది. నారాయణఖేడ్‌ను హైదరాబాద్ తరహాలో అభివృద్ధి చేసే బాధ్యత నాది..’’ అని చెప్పారు.
 మెదక్ జిల్లా నారాయణఖేడ్ ఉప ఎన్నికల ప్రచారంలో భాగంగా బుధవారం నియోజకవర్గ కేంద్రంలో టీఆర్‌ఎస్ నిర్వహించిన భారీ బహిరంగ సభలో ముఖ్యమంత్రి ప్రసంగించారు. వచ్చే బడ్జెట్ నుంచి తెల్లరేషన్ కార్డు ఉన్న ప్రతి ఒక్కరికి కల్యాణ లక్ష్మి, షాదీ ముబారక్ పథకాలు వర్తింపజేస్తామని చెప్పారు. వచ్చే పంచాయతీ ఎన్నికల నాటికి గిరిజన తండాలను గ్రామ పంచాయతీలుగా చేసి తీరుతామన్నారు. త్వరలో గిరిజనులకు 12 శాతం రిజర్వేషన్లు అమలు చేస్తామని ప్రకటించారు.  తండాల్లో దుర్భర పరిస్థితులు ఉన్నందున తమ ప్రభుత్వం మొదటి కేబినెట్ సమావేశంలోనే తండాలను గ్రామ పంచాయతీలుగా చేస్తూ ఆర్డర్ పాస్ చేసిందని చెప్పారు. కేసీఆర్ ఏమన్నారో ఆయన మాటల్లోనే..
  ఇంత దరిద్రం ఎక్కడ లేదంటున్నరు
 నారాయణఖేడ్ మెదక్ జిల్లాలో ఉందా? అని చాలామంది అడుగుతున్నరు. ఇంతటి వెనుకబాటు, దరిద్రం ఎక్కడ లేదని చెప్తున్నరు. ఒకే ఒక్కమాట.. మేధావులు, పెద్దలు ఆలోచన చేయాలి. ఖేడ్‌లో స్వాతంత్య్రం లేదు. కొన్ని చోట్ల ఓట్లు కూడా వేయనీయని పరిస్థితి ఉంది. మాట కూడా మాట్లాడనీయని పరిస్థితి. గూండాగిరి.. దాదాగిరి.. ఎలక్షన్ వచ్చిందంటే డబ్బులు ఇయ్యడం, తాగించడం.. ఇదే పాత చింతకాయ పచ్చడి తప్ప దేశమంతా బాగుపడుతుంటే మనం బాగు పడాలనే సోయి లేదు
  హరీశ్ దూసుకుపోయే బుల్లెట్..
 అద్భుతమైన మంత్రి మీ జిల్లాలో ఉన్నడు. బుల్లెట్ లాగ దూసుకపోయే తత్వం ఉన్న మని షి. నాలుగైదు నెలల నుంచి మీ మధ్య తిరుగుకుంటూ పనిజేస్తుండు. ఇక్కడ తిరిగి మీ బాధలు చూసి గుండెలు అవిసిపోయి.. ‘మీ కాళ్లు మొక్కుతా..’ అని నన్ను అంటున్నడు. నా కాళ్లు మొక్కే అవసరం లేదు. నేను హరీశ్‌కు, హరీశ్ ద్వారా మీరు గెలిపించబోయే ఎమ్మెల్యే భూపాల్‌రెడ్డికి, ఈ నారాయణఖేడ్ ప్రజలందరికీ ఒకటే మాట చెప్తున్నా. ఇదే హరీశ్ చేత గోదావరి నీళ్లు తెప్పిస్తా. గట్టులింగంపల్లి ప్రాజెక్టు తెచ్చుకొని మీ కాళ్లు కడుగుతా. నారాయణఖేడ్‌కు వెలుతురు రావాలి. కేసీఆర్ మొం డిఘటం.
 నేనేదైనా చెప్పితే ఆరు నూరైనా సరే చేసి తీరుతా. ఆనాడు తెలంగాణ కోసం కొట్లాటకు పోతే బక్కపేగులోడు.. వీనితోని ఏమైతది అన్నరు. తెలుగుదేశపోల్లు, కాంగ్రెసోల్లు శానా మాట్లాడిండ్రు. కానీ ఈ బక్కోడే తెలంగాణ తెచ్చిన మాట నిజం. పట్టుదల ఉన్న మంత్రి. హరీశ్ ఒక్కటే మాట మీకు చెప్పిండు. నారాయణఖేడ్‌ను వంద శాతం సిద్దిపేట లాగా చేస్తానని చెప్పిండు. శక్తి ఉన్నోడు.. యువకుడు నాలుగైదు నెలల నుంచి మీ మధ్య తిరుగుతున్నడు. మీ బాధలు జూస్తున్నడు. వందకు వందశాతం హరీశ్ మాట నిలబెడుతా.
  రెండ్రోజులు ఇక్కడే ఉంటా..
 ఇంకో విషయం మీరు ఆలోచన చేయాలే. అంత గుడ్డిగ ఓటు వేస్తమా? ఇన్ని రోజుల నుంచి ఖేడ్‌లో మార్కెట్ కమిటీ ఉండదా? ఇక మేం సిపాయిలం అంటే మేం సిపాయిలం అంటున్నరు. ఇన్ని రోజులు గెలిచిన ఎమ్మెల్యేలు ఏం జేసిండ్రు. భూపాల్‌రెడ్డిని గెలిపిస్తే ఖేడ్ అద్భుతంగా ముందుకు పోతది. ఎన్నికల తర్వాత ప్రత్యేకంగా రెండ్రోజులు ఖేడ్‌లోనే ఉంటా. నేను వచ్చి అన్ని మండల కేంద్రాలు తిరుగుతా. మీకు కావాల్సిన అభివృద్ధి పనులు స్వయంగా నేనే ఉండి చేయిస్తా.
 వెయ్యి ఏనుగుల బలాన్నివ్వండి
 నేను కూడా మీ జిల్లా బిడ్డనే. నారాయణఖేడ్ ఇంత వెనుకబడి ఉండటం నాకు కూడా తెలివి ముచ్చట కాదు. నేను ఎక్కడకన్నా పోయి మాట్లాడబోతే.. మీ జిల్లాలో ఖేడ్ సక్కదనం మంచిగ లేదు. ఇక నువ్వు మాకేం చెప్తవు అంటరు. హరీశ్ మీద ఎంత బాధ్యత ఉందో నా మీద కూడా అంతే ఉంది. ఏ పార్టీ గెలిస్తే ఖేడ్ బాగుపడుతదో మేధావి వర్గం ఒక్కసారి ఆలోచన చేయాలే. 20 ఏళ్ల కింద నేను రవాణా మంత్రిగా ఉన్నప్పుడు అందోల్ ఉప ఎన్నికల్లో బాబూమోహన్‌ను గెలిపించడానికి బోయినం. ఈ రోజు హరీశ్ ఎట్లైతే చెప్పిండో.. ఆ రోజు నేను కూడా అలానే చెప్పడం జరిగింది. 20 ఏళ్ల తర్వాత నారాయణఖేడ్ వస్తే మళ్లీ హరీశ్ కూడా అదే చెప్పే పరిస్థితి ఉంది. పశ్చిమ మెదక్ జిల్లాలో పెద్ద ప్రయత్నం జరగాలి. వరంగల్, గ్రేటర్ తరహా తీర్పు ఇచ్చే బాధ్యత మీది. నారాయణఖేడ్‌ను హైదరాబాద్ తరహాలో అభివృద్ధి చేసే బాధ్యత నాది. కారు గుర్తుకు ఓటేసి భూపాల్‌రెడ్డిని భారీ మెజార్టీతో గెలిపించి హరీశ్‌కు వెయ్యి ఏనుగుల బలాన్ని ఇవ్వండి.
 
 కేసీఆర్‌కు జన్మదిన కానుకగా ఇస్తాం హరీశ్‌రావు
 నారాయణఖేడ్ ఉప ఎన్నికలో టీఆర్‌ఎస్ సీటును గెలిచి ముఖ్యమంత్రి కేసీఆర్‌కు జన్మదిన కానుకగా ఇస్తామని మంత్రి హరీశ్‌రావు అన్నారు. ఈ నెల 16వ తేదీన ఉప ఎన్నికల ఫలితాలు వెలువడితే.. 17న కేసీఆర్ పుట్టిన రోజని తెలిపారు. ఈ ఎన్నికలో ప్రత్యర్థి పార్టీల అభ్యర్థులకు డిపాజిట్లు కూడా దక్కవని, టీఆర్‌ఎస్ అభ్యర్థి ఎం.భూపాల్‌రెడ్డి భారీ మెజార్టీతో గెలుపొందుతారని ధీమా వ్యక్తం చేశారు. రూ.19 కోట్లతో 150 పడకల ఆసుపత్రి మంజూరు చేయించి ఈ ప్రాంత నాయకుల ఇజ్జత్ నిలబెట్టానని తెలిపారు. ‘‘జిల్లా మంత్రిగా నేను మీ మధ్య ఉంటా. నారాయణఖేడ్‌ను దత్తత తీసుకున్నా. ముఖ్యమంత్రి కాళ్లు మొక్కైనా దుబ్బాక తరహా ప్యాకేజీ తీసుకొచ్చి నియోజకవర్గాన్ని అభివృద్ధి చేస్తా’ అని తెలిపారు. పార్టీ జిల్లా అధ్యక్షుడు మురళీయాదవ్ అధ్యక్షతన జరిగిన ఈ బహిరంగ సభలో డిప్యూటీ స్పీక ర్ పద్మాదేవేందర్‌రెడ్డి, ఎంపీ బీబీ పాటిల్, ఎమ్మెల్యేలు సోలిపేట రామలింగారెడ్డి, చింతా ప్రభాకర్, సీహెచ్ మదన్‌రెడ్డి, మహిపాల్‌రెడ్డి, జెడ్పీ చైర్‌పర్సన్ రాజమణి, పార్టీ నాయకులు దేవేందర్‌రెడ్డి పాల్గొన్నారు.


 హైదరాబాద్: నారాయణఖేడ్ లో నీటిఎద్దడికి మంత్రి హరీష్ రావే కారణమని మాజీ ఎంపీ, కాంగ్రెస్ నేత పొన్నం ప్రభాకర్ ఆరోపించారు. ఆయనిక్కడ బుధవారం మాట్లాడుతూ  సింగూరు రిజర్వాయర్ నుంచి నీటిని మెదక్ తరలించారన్నారు. నారాయణ ఖేడ్ అసెంబ్లీ  సెగ్మెంట్ ను దత్తత తీసుకుంటానంటూ.. హరీష్ ప్రకటించడం ఆ నియోజక వర్గ ప్రజలను అవమానించడమే అని పొన్నం తెలిపారు.


 బడిక ఎగనామం..నీటికి కోసం పక్క గ్రామం నిత్యం తప్పని నీటి పాట్లుఖేడ్’ తండాల్లోవిద్యార్థుల నీటి గోసక్షేత్రస్థాయిలో‘సాక్షి’ పరిశీలన విద్యార్థి.. స్కూల్ బ్యాగు మోస్తేనే దేశ పార్లమెంటు చలించి పోయింది. పుస్తకాల మోతతో విద్యార్థి బాల్యం బరువెక్కుతోందని ఉభయ సభలు తల్ల‘ఢిల్లి’పోయాయి. బ్యాగు బరువును దించాల్సిందేనని ఎంపీలు అంతా ఏకాభిప్రాయానికి వచ్చి ‘యశపాల్ కమిటీ’  వేశారు.. ఇదీ ఢిల్లీ, హైదరాబాద్ మెట్రో నగరాల్లోని విద్యార్థులకు దొరికిన భరోసా... ఇదిగో...వీళ్లూ విద్యార్థులే. నారాయణఖేడ్ తండాల్లో పుట్టారు. నీళ్ల కోసం స్కూల్ బ్యాగ్‌ను మూలకు పడేశారు. గుక్కెడు నీళ్ల కోసం బడికి ఎగనామం పెట్టి వ్యవసాయ బోరు బావుల దగ్గర పడిగాపులు గాస్తున్నారు. బ్యాగు బరువు కాదు...తమ కంటే మూడింతలు బరువుండే నీళ్ల బిందలతో కిలో మీటర్లు నడుస్తున్నారు. మెడ ఎము కలు  చిట్లి పోతున్నా...వెన్నెముక వంగిపోతున్నా ఏ పాలకుడు ఇంత వరకు ఈ విద్యార్థుల వైపు కన్నెత్తి చూడలేదు. విద్యార్థుల నీళ్ల కష్టాలు అసెంబ్లీ వరకైనా తీసుకుపోతాననే భరోసా ఇవ్వలేదు. 
  
  సాక్షి ప్రతినిధి, సంగారెడ్డి:
  ఎండాకాలం వస్తే మంజీర ఎండిపోతుంది.  వాగులు, చెరువులు బావుల్లో చుక్కనీరు ఉండదు. బోర్లు ఎండిపోతాయి. భూగర్భ జలాలు అడుగంటి పోతాయి. నీళ్ల కోసం జనం వలస బాట పడతారు. నారాయణఖేడ్ నియోజకవర్గంలో పల్లెల్లో ఏళ్లకేళ్లుగా ఇదే జరుగుతోంది. ఇప్పటి వరకు ఏ పాలకుడు ప్రజల కష్టాల వైపు చూడలేదు. గుక్కెడు నీళ్లు తెచ్చి జనం గొంతు తడిపే ప్రయత్నం చేయలేదు. ఇక్కడి జనం కూడా అంతే..! పాలకుల మీద ఆశలు పెట్టుకోకుండా వలసలను నమ్ముకుంటున్నారు. బడికి వెళ్లే పిల్లలను, వయసు మీద పడిన తల్లిదండ్రులను ఇంటి వద్ద వదిలేసి భార్యాభర్తలు  ముంబాయి, దుబాయి, హైదరాబాద్, బెంగళూరు  తదితర ప్రాంతాలకు వలసపోయారు.ఈ ఏడాది దాదాపు 25 వేల కుటుంబాలు వలస పోయినట్లు అంచనా.సాక్షి ప్రతినిధుల బృందం రెండు రోజులుగా దాదాపు 45 గ్రామల్లో, గిరిజన తండాల్లో పర్యటించింది.
 
 ప్రతి గ్రామంలో దాదాపు 20 శాతం మంది విద్యార్థులు నీళ్ల కోసం స్కూల్‌కు గైర్హాజరయ్యారు.  మనూరు, కంగ్టి, నారాయణఖేడ్, కల్హేరు మండలాల్లో తీవ్ర నీటి ఎద్దడి నెలకొని ఉంది. భార్యభర్తలు, యువతీయువకులు వలసలు పోయి పల్లెలు బోసిపోయి ఉన్నాయి.  వయసు మళ్లిన వృద్ధులు, బడికి వెళ్లే పిల్లలు మాత్రమే తండాల్లో కన్పించారు.  కంగ్టి మండలం చాప్టా(బీ) గ్రామ  తుకారం తండాలో.. స్కూల్ యూనిఫాంతో నెత్తిన నీళ్ల బిందులు బోస్తూ... నిక్కి నీలిగి నడుస్తున్న విద్యార్థుల గుంపులు కన్పించాయి . ‘ స్కూల్ లేదా’ అని సాక్షి ప్రతినిధి పలకరిస్తే..  బడి ఉంది గాని, ‘నీళ్ల కోసం బడికి పోలేదు సార్’ అని సమాధానం చెప్పారు. ఎక్కడి నుంచి నీళ్లు తెచ్చుకుంటున్నారు అని అడిగితే...‘నిజామాబాద్ జిల్లా విఠల్‌వాడీ తండా నుంచి తెచ్చుకుంటున్నాం’ అని చెప్పారు. తుకారం తండాకు విఠల్‌వాడీ తండా దాదాపు 3 కిలో మీటర్ల దూరంలో ఉంటుంది. అంతకు ముందు సర్ధార్ తండాలోనూ ఇదే పరిస్థితి కనిపించింది.  ఈ తండాలో దాదాపు 117 మంది విద్యార్థులు వలస వెళ్లగా.. 25 మంది విద్యార్థులు నీళ్ల కోసం బడి మానేశారు.
 
 వయసులో ఉన్న వారంతా పొట్ట చేత పట్టుకొని వలస వెళ్లగా.. గ్రామాల్లో  వృద్ధులు మాత్రమే ఉండటంతో పిల్లలకు నీటి కష్టాలు తప్పటం లేదు.  పెద్దశంకరంపేట మండలం కోళాపల్లి, మల్కాపూర్, జి.వెంకటాపూర్, కమలాపూర్, బూర్గుపల్లి, తమ్మలకుచ్చ తండా, బూర్గుపల్లి తండాలతో నీటి ఎద్దడి తీవ్రంగా ఉంది. తల్లిదండ్రులు పనులు,  వలసలు వెళ్లడంతో పిల్లలు నీళ్లు మోస్తూ కనిపించారు. నారాయణఖేడ్ మండలంలోని పంచగామ, పైడిపల్లి, తుర్కాపల్లి, ర్యాకల్, నిజాంపేట్, హన్మంత్‌రావుపేట్ తదితర గ్రామాల్లో పదుల సంఖ్యలో విద్యార్థులు బడి మాని నీళ్ళు మోస్తున్నారు. వచ్చిరానీ కొద్దిపాటి నీటికోసం వేచి ఉండడం, ఒకరికి ఒక బిందె మాత్రమే నీరు పట్టుకొనే పరిస్థితి ఉండడంతో ఇంట్లో ఉన్న తమ ఆడపిల్లలను తల్లిదండ్రులు బడిమానిపించి నీరుమోయిస్తున్నారు. కుళాయి, బోరుబావి వద్ద గంటలపాటు వేచి ఉండడంతో బడి మానక విద్యార్థులకు తప్పడంలేదు.
 
 మనూరులో తాగునీటి ఎద్దడి రోజురోజుకు తీవ్రమవుతోంది.ఇంట్లో నీళ్లు అయిపోయాయంటే వారు ఆరోజు పాఠశాలకు వెళ్లడం మానెయ్యాల్సిన పరిస్థితి ఏర్పడింది. మనూరు మండలం మాయకోడ్ గ్రామంలో  బోరుబావుల వద్ద  స్కూల్ యూనిఫాంతో ఖాళీబిందెలతో నిలబడిన సాయికుమార్ అనే విద్యార్థి క న్పించాడు, ‘బడికి వెళ్లలేదా?’అని అడిగితే  ‘రాత్రి నీళ్లు దొరకలేదు సారు.. పొద్దున బడి మానేసి నీళ్లకు వచ్చిన. ఇంకా కరెంటు రాలేదు,  కరెంటు వచ్చాక నీళ్లు తీసుకొని పోతా నని చెప్పాడు. వారంలో రెండు మూడు సారు బడి మానేసి నీళ్ల కోసం వస్తున్నట్టు సాయికుమార్ చెప్పాడు.  బోరుబావి యజమానికి నీళ్లు తీసుకోనివ్వకపోతే  మరో కిలో మీటర్ దూరం వెళ్లి తెచ్చుకోవాల్సి వస్తుందని చెప్పాడు. ఉపాధ్యాయుల పర్మిషన్ తీసుకుని ఇంటికి వెళ్లి నీళ్లు నింపి మళ్లీ పాఠశాలలకు వెళుతున్న సంఘటన అనేకంగా నెలకొంటున్నాయని  పాఠశాలల ఉపాధ్యాయులు సాక్షి ప్రతినిధికి చెప్పారు.


 మాటమీద నిలబడతా
 ఖేడ్‌లో మంత్రి హరీశ్‌రావు రోడ్ షో..
 నారాయణఖేడ్ :  రాష్ర్ట నీటిపారుదలశాఖ మంత్రి హరీశ్‌రావు ఆధ్వర్యంలో శనివారం సాయంత్రం నారాయణఖేడ్ పట్టణంలో రోడ్‌షో నిర్వహించారు. మంత్రి హరీశ్‌రావుతోపాటు, అభ్యర్థి భూపాల్‌రెడ్డి, ఎంపీ బీబీ పాటిల్, ఎమ్మెల్యేలు సోలిపేట రామలింగారెడ్డి, బాబుమోహన్, ఎమ్మెల్సీ రాములునాయక్, నాయకులు మోహిద్‌ఖాన్, బిడెకన్నె హన్మంతు, అశోక్ షెట్కార్ తదితరులు ర్యాలీలో పాల్గొన్నారు. బసవేశ్వర చౌక్ నుంచి ప్రారంభమైన రోడ్‌షో రాజీవ్‌చౌక్, నెహ్రూనగర్, మన్సుర్‌పూర్, చాంద్‌ఖాన్‌పల్లి వరకు కొనసాగింది. ఈ సందర్భంగా రోడ్‌షోలో మంత్రి హరీశ్‌రావు మాట్లాడుతూ టీడీపీకి ఓటేస్తే నల్లవాగు ప్రాజెక్టులో వేసినట్లేనన్నారు.
 
 నారాయణఖేడ్ నియోజకవర్గంలో ఆస్పత్రి, వంతెన, రోడ్డు, బస్టాండ్‌లో సీసీ రోడ్డు, మార్కెట్‌యార్డు, పండరీపూర్, వేములవాడ బస్సునడగితే ఎవరు అభివృద్ధి చేశారో చెబుతాయన్నారు. కేవలం కాంగ్రెస్ దింపుడు కళ్లెం ఆశతో ఉందన్నారు. ఎన్నికలయ్యాక జానారెడ్డి, హైదరాబాద్‌లో రేవంత్‌రెడ్డి, ఉత్తమ్‌కుమార్‌రెడ్డి నల్లగొండ జిల్లాకు పోతారన్నారు. తాను జిల్లా మంత్రిగా ఇక్కడే ఉండి అభివృద్ధి చేస్తానని, ఇచ్చిన మాట నిలబెట్టుకుంటానన్నారు. లక్ష మెజార్టీ సాధించుకొని సీఎం వద్దకు వెళ్ళి ప్రత్యేక ప్యాకేజీ తెచ్చుకొని అభివృద్ధి


  ‘ఖేడ్’ ఉపపోరు మరింత హోరు
 ♦  ముగిసిన గ్రేటర్ ఫైట్ నేతల దృష్టి ఖేడ్‌పైనే
 ♦  వేడెక్కనున్న  రాజకీయాలు
 ♦  ఇప్పటికే చుట్టేసిన మంత్రి హరీశ్‌రావు
 ♦  క్యూకట్టనున్న  ఆయా పార్టీల నేతలు
  
  సాక్షిప్రతినిధి, సంగారెడ్డి: గ్రేటర్ ఫైట్ ముగియడంతో ఇక అందరి దృష్టి నారాయణఖేడ్ ఉపపోరుపై పడింది. అన్ని పార్టీల నేతలంతా ఇక్కడే మకాం వేసి ప్రచారాన్ని వేడెక్కించనున్నారు. పటాన్‌చెరు నియోజకవర్గ పరిధిలోని పటాన్‌చెరు, రామచంద్రాపురం, భారతీనగర్ డివిజన్లలో మంగళవారం జీహెచ్‌ఎంసీ పోలింగ్ పూర్తయింది. అయితే గ్రేటర్ వాసులు ఓటు వేయడానికి పెద్దగా ఆసక్తి చూపలేదు. టీఆర్‌ఎస్, కాంగ్రెస్, బీజేపీ, టీడీపీలు ప్రధానంగా పోటీపడ్డాయి. మహానగరంలో టీడీపీ, బీజేపీ రాజకీయ పొత్తుతో బరిలో నిలబడితే.. పటాన్‌చెరు డివిజన్‌లో ఆ రెండు పార్టీలు మాత్రం వేర్వేరుగా పోటీ చేశాయి. అన్ని పార్టీల మధ్య  హోరాహోరీ పోరు నడిచినట్టు ఎన్నికల పరిశీలకులు చెబుతున్నారు. మూడు సీట్లను మూడు ప్రధాన పార్టీలు ఒక్కొక్కటి చొప్పున గెలుచుకోవచ్చని వారు అంచనా వేస్తున్నారు.
  
  ఇక ఖేడ్‌కు నేతల వలస..
  ఇప్పటివరకు హైదరాబాద్‌కే పరిమితమైన ఆయా పార్టీల నేతలు తాజాగా నారాయణఖేడ్ బాట పట్టనున్నారు. టీఆర్‌ఎస్ మినహా మిగిలిన రాజకీయ పార్టీల నాయకులు ప్రచారానికి దూరంగా ఉన్నారు.
  గ్రేటర్ ఎన్నికలు ముగిసిన నేపథ్యంలో ఇక సదరు నాయకులంతా నారాయణఖేడ్ వైపు క్యూ కట్టనున్నారు. ఖేడ్ ఉప ఎన్నికల్లో ఒక్క టీఆర్‌ఎస్ మాత్రమే చెప్పుకో తగిన స్థాయిలో ఎన్నికల ప్రచారాన్ని చేపడుతోంది. రాష్ట్ర నీటిపారుదల శాఖ మంత్రి హరీశ్‌రావు ఉప ఎన్నికల నోటిఫికేషన్ రాకముందు నుంచే ఇక్కడ మకాం వేశారు. దాదాపు రూ.1,000 కోట్ల అభివృద్ధి పనులతో ప్రజల్లోకి వెళ్లారు.
  
  ఎన్నికల నోటిఫికేషన్ వెలువడిన తరువాత పూర్తి సమయాన్ని నారాయణఖేడ్ నియోజకవర్గానికే కేటాయించారు. అవకాశం ఉన్నప్పడు రాత్రి బస కూడా నియోజకవర్గంలో చేశారు. దాదాపు అన్ని గ్రామాల్లో కలియదిరిగారు. టీఆర్‌ఎస్ అభ్యర్థి ఎం.భూపాల్‌రెడ్డి కంటే కూడా హరీశ్‌రావే ఎక్కువగా పర్యటించారు. దుబ్బాక ఎమ్మెల్యే సోలిపేట రామలింగారెడ్డి, టీఆర్‌ఎస్ జిల్లా అధ్యక్షుడు మురళీయాదవ్, మాజీ ఎమ్మెల్సీ ఆర్.సత్యనారాయణ, దేవేందర్‌రెడ్డి తదితరులు మండలానికి ఒకరి చొప్పున ఇన్‌చార్జి బాధ్యతలు తీసుకున్నారు. మొత్తానికి హరీశ్‌రావు మంత్రాంగంతో నియోజకవర్గంలోని  మండలాల్లో ఇప్పటికే  కారు గుర్తును పటిష్టమైన స్థితికి తీసుకొచ్చారు.
  
  కాంగ్రెస్ తరఫున దామోదర్...
  కాంగ్రెస్ పార్టీ అభ్యర్థిగా దివంగత ఎమ్మెల్యే కిష్టారెడ్డి కుమారుడు పి.సంజీవరెడ్డి బరిలో నిలిచారు. నోటిఫికేఫన్ నాటి నుంచి వారి కుటుంబ సభ్యులు మాత్రమే ప్రచారం చేస్తున్నారు. మధ్యలో ఒకసారి మాజీ డిప్యూటీ సీఎం దామోదర్ రాజనర్సింహా, మాజీ మంత్రి సునీతారెడ్డి ఒక్కటి, రెండు రోజులు తిరిగిపోయారు. సంజీవరెడ్డి ఒంటరిగానే ప్రజల్లోకి వెళ్తున్నారు. తన  తండ్రి కిష్టారెడ్డి చేసిన సేవలు, పనులను గుర్తుచేస్తూ ఓటర్లను ఆకర్శించే ప్రయత్నం చేస్తున్నారు. సంజీవరెడ్డికి ఆయన సోదరులు, కుటుంబ సభ్యులు సహకరిస్తున్నారు.
  
  టీడీపీ అభ్యర్థి ఒంటరి ప్రచారం...
  ఇక టీడీపీ ప్రచారంలో బాగా వెనుకబడి ఉంది. పార్టీ అభ్యర్థి ఎం.విజయ్‌పాల్‌రెడ్డి ఒక్కరే  ఎన్నికల ప్రచారం నిర్వహిస్తున్నారు. నామినేషన్ రోజు పార్టీ నేతలు వచ్చి కొంత హడావిడి చేసి వెళ్లిపోయారు. మళ్లీ ఇప్పటివరకు రాలేదు. గ్రేటర్ ఎన్నికలు ముగిసినందున ఇక అన్ని రాజకీయ పార్టీల రాష్ట్ర స్థాయి నేతలు ఉప ఎన్నికలకు తరలిరానుండటంతో నారాయణఖేడ్ రాజకీయాలు వేడెక్కుతాయని రాజకీయ పరిశీలకులు అంటున్నారు.
  


 ఖేడ్ ఉప ఎన్నిక మరోమారు రెండు కుటుంబాల ఆధిపత్య పోరుకు తెర తీసింది.  ఈ ఉప ఎన్నికలో ముగ్గురి మధ్యే ప్రధాన పోరు జరుగుతోంది. 1952 నుంచి ఒక్క పర్యాయం మినహా ఎక్కువ పర్యాయాలు మూడు కుటుంబాలకు చెందిన నాయకులే ఇక్కడ ఎన్నికవుతూ వచ్చారు. కాగా ఈమారు మాత్రం రెండు కుటుంబాల మధ్య పోరు సాగుతుంది.
 వీరిలో ప్రధానంగా ఇద్దరు అన్నదమ్ములు తలపడుతున్నారు. నారాయణఖేడ్ అసెంబ్లీ స్థానానికి ఈనెల 13న జరగనున్న ఎన్నికలో 8మంది అభ్యర్థులు రంగంలో ఉన్నారు. వీరిలో ప్రధానంగా మూడు పార్టీల మధ్యే పోరు కొనసాగుతుంది. టీఆర్‌ఎస్ తరఫున భూపాల్‌రెడ్డి, కాంగ్రెస్ తరఫున సంజీవరెడ్డి, టీడీపీ తరఫున విజయపాల్‌రెడ్డి పోటీచేస్తున్నారు. టీఆర్‌ఎస్, టీడీపీ అభ్యర్థులు ఇద్దరూ స్వయానా అన్నదమ్ములు. ఇప్పటివరకు నారాయణఖేడ్ అసెంబ్లీ స్థానానికి జరిగిన ఎన్నికల్లో షెట్కార్, వెంకట్‌రెడ్డి, కిష్టారెడ్డి కుటుంబాలే ఎన్నికవుతూ వచ్చాయి. ఒక్కసారి మాత్రం స్వతంత్ర అభ్యర్థి రాంచెందర్‌రావుదేశ్ పాండే గెలుపొందారు.
 
 ఇప్పటి వరకు గెలపొందింది వీరే..
 నియోజకవర్గం అనాదిగా కాంగ్రెస్ కంచుకోటగా ఉంది. ఇప్పటి వరకు జరిగిన ఎన్నికల్లో ఎక్కువ పర్యాయాలు కాంగ్రెస్ పార్టీనే గెలుపొందింది. ఈ మారు కాంగ్రెస్ కోటను బద్దలుకొట్టేందుకు టీఆర్‌ఎస్ తీవ్ర ప్రయత్నం చేస్తోంది.  ఇప్పటివరకు 14మార్లు ఎన్నికలు జరగగా 10మార్లు కాంగ్రెస్ , రెండు పర్యాయాలు స్వతంత్రులు,  రెండు పర్యాయాలు టీడీపీ గెలిచింది.


 మీరూ సిద్ధమేనా అని ఉత్తమ్, రేవంత్‌లకు హరీశ్ సవాల్
 పెద్దశంకరంపేట: మెదక్ జిల్లా నారాయణఖేడ్ ఉప ఎన్నికలో టీఆర్‌ఎస్ ఓడిపోతే రాజీనామాకు సిద్ధమని భారీ నీటిపారుదల శాఖ మంత్రి హరీశ్‌రావు అన్నారు. బుధవారం రాత్రి మెదక్ జిల్లా పెద్దశంకరంపేట మండలం కమలాపూర్‌లో ఆయన విలేకరులతో మాట్లాడారు. ఖేడ్‌లో టీఆర్‌ఎస్ ఓడిపోతే తాను మంత్రి పదవికి రాజీనామా చేస్తానని.. లేకుంటే పీసీసీ అధ్యక్ష పదవికి ఉత్తమ్‌కుమార్‌రెడ్డి, ఎమ్మెల్యే పదవికి రేవంత్‌రెడ్డి రాజీనామా చేస్తారా అని సవాల్ విసిరారు. 18 నెలల్లో నారాయణఖేడ్‌ను రూ. 500 కోట్లతో అభివృద్ధి చేశామన్నారు.
 ఎమ్మెల్యే కిష్టారెడ్డి చనిపోక ముందే ఖేడ్‌ను అభివృద్ధి చేశామన్నారు. ఓడిపోతామనే ఒత్తిడిలో టీడీపీ, కాంగ్రెస్ నాయకులు అవాకులు చవాకులు పేలుతున్నారని ఆగ్రహం వ్యక్తం చేశారు. మార్కెట్ మంత్రిగా ఉన్నప్పుడు దామోదర రాజనర్సింహ నారాయణఖేడ్‌కు ఒక్క మార్కెట్‌యార్డునూ ఇవ్వలేదని, పంచాయతీరాజ్ మంత్రిగా ఉన్నప్పుడు జానారెడ్డి ఈ ప్రాంతాన్ని ఏమి అభివృద్ధి చే శారో చెప్పాలన్నారు. ప్రజలకు తమపై విశ్వాసం ఉందని, ఆదరిస్తారని అన్నారు. వరంగల్‌లో ఇలాగే మాట్లాడితే అక్కడి ప్రజలు కర్రుగాల్చి వాత పెట్టారన్నారు. ఉద్యమాలకు పురిటిగడ్డ సిద్దిపేట అని, దాని గురించి అవహేళనగా మాట్లాడితే సహించేది లేదన్నారు. కార్యక్రమంలో ఎంపీ బీబీపాటిల్, ఖేడ్ ఎమ్మెల్యే అభ్యర్థి భూపాల్‌రెడ్డి, మాజీ ఎమ్మెల్సీ సత్యనారాయణ తదితరులు పాల్గొన్నారు.


  నారాయణఖేడ్ : గుట్టుచప్పుడు కాకుండా వ్యభిచారం కొనసాగిస్తున్న ఓ గృహంపై పోలీసులు దాడి చేసి నిందితులను అరెస్టు చేశారు. సీఐ ముని కథనం మేరకు..  గురువారం పట్టణ బైపాస్ రోడ్డులో గల వాటర్ ట్యాంకు వద్ద ఉన్న సువర్ణ ఇంట్లో వ్యభిచారం జరుగుతోందని సమాచారం అందిందన్నారు. దీంతో దాడులు నిర్వహించి సువర్ణ, సత్యమ్మలతో పాటు బాధితులు రేణుక, రామవ్వ విటుడు సర్దార్ రవిలను అదుపులోకి తీసుకున్నామని తెలిపారు.
 
 ఖేడ్‌కు చెందిన సువర్ణ, సత్యమ్మలు ఇద్దరు కలిసి సువర్ణ గృహంలో వ్యభిచారం జరుపుతున్నారని విచారణలో వెల్లడైందన్నారు. ర్యాలమడుగుకు చెందిన రేణుక, రామవ్వలను వ్యభిచారంలోకి దింపారని, దాడులు సమయంలో ఇంట్లో రూ.5 వేల నగదు, 6 సెల్‌ఫోన్లు, కండోమ్ ప్యాకెట్లు, బీరు, కల్లు సీసాలు లభించగా వాటిని సీజ్ చేసినట్లు సీఐ వివరించారు. సువర్ణ, సత్యమ్మ, రవిలపై పిటా యాక్ట్ కింద కేసు నమోదు చేసి రిమాండ్‌కు తరలిస్తున్నట్టు తెలిపారు. రేణుక, రామవ్వలను సంగారెడ్డిలోని రెస్క్యూ హోంకు తరలిస్తామని తెలిపారు.
 
  ఖేడ్ సర్కిల్‌లో అసాంఘిక కార్యకలాపాలు జరిగితే ప్రజలు వెంటనే సమాచారాన్ని పోలీసులకు అందించాలన్నారు. సమాచారం అందించిన వారి వివరాలు గోప్యంగా ఉంచుతామని తెలిపారు. దాడుల్లో ఎస్‌ఐలు సునీల్, శ్రీనివాస్, పోలీసు సిబ్బంది ఉన్నారని సీఐ పేర్కొన్నారు.


 నారాయణఖేడ్:  ఖేడ్ నియోజకవర్గంలోని నామినేటెడ్ పోస్టులపై టీఆర్‌ఎస్ ద్వితీయ శ్రేణి నాయకులు ఆశలు పెట్టుకున్నారు. ఎలాగైనా నామినేటెడ్   పదవులు దక్కించుకోవాలని  ఎవరి ప్రయత్నాలు వారు చేసుకుంటున్నారు.  దీంతో పోటీ రోజురోజుకు పెరుగుతోంది. నియోజకవర్గంలో ముఖ్యంగా రెండు నామినేటెడ్ పోస్టులు మాత్రమే ఉన్నాయి.
 
 అవి రెండు కూడా వ్యవసాయాధారిత పోస్టులు కావడం విశేషం. వ్యవసాయ మార్కెట్ కమిటీ చైర్మన్ (ఏఎంసీ) పదవి ఒకటి కాగా రెండోది ఆత్మ (వ్యవసాయ సాంకేతిక యాజమాన్య అథారిటీ) చైర్మన్ పదవి మరొకటి. రెండు చైర్మన్ పదవులతో పాటు పాలకవర్గాలను సైతం భర్తీ చేయాల్సి ఉంటుంది. కాగా ఆయా కమిటీల పదవీకాలం పూర్తి కాకపోవడంతో పోస్టుల భర్తీ ప్రక్రియ ఎప్పటి లోగా జరుగుతుందోనని ఆశావహులు ఎదరుచూస్తున్నారు.
 
  ఎదురు చూస్తున్న నేతలు
  నియోజకవర్గంలోని టీఆర్‌ఎస్ నేతలతో పాటు ఇతర ప్రధాన పార్టీల నేతలు సైతం చైర్మన్ పదవులు పొందేందుకు తమ ప్రయత్నాలు చేస్తున్నట్టు సమాచారం. మార్కెట్ కమిటీ చైర్మన్ల భర్తీలో రిజర్వేషన్లు కల్పిస్తామని సీఎం కేసీఆర్ ప్రకటించడంపై ఖేడ్‌లోని నేతలు హర్షం వ్యక్తం చేస్తున్నారు. రిజర్వేషన్లు అనుకూలిస్తే తమకే పదవి దక్కుతుందని ఆశతో ఉన్నారు. టీఆర్‌ఎస్ పార్టీలో మార్కెట్ కమిటీ చైర్మన్ పదవి కోసం ప్రధానంగా కల్హేర్ మండలంలోనే పోటీ అధికంగా నెలకొంది.  మాజీ మార్కెట్ కమిటీ చైర్మన్ వెంకట్‌రాంరెడ్డి సైతం తిరిగి తనకే దక్కేలా ప్రయత్నాలు చేస్తున్నట్టు వినికిడి.
 
 కల్హేర్ మండల నాయకులు గుండు మోహన్,  కృష్ణమూర్తి,  కిష్టారెడ్డి, నర్సింహారెడ్డి,  గుండు మోహన్,  కృష్ణమూర్తి,  కిష్టారెడ్డి, నర్సింహారెడ్డి పోటీలో ఉంటూ తమవంతు ప్రయత్నాలు  చేస్తున్నారు. ఖేడ్ మండలం నుంచి గిరిజన నాయకులు రవీందర్‌నాయక్, పార్టీ మండల అధ్యక్షులు ప్రభాకర్, గొల్లకుర్మ యాదవ సంఘం జిల్లా ప్రధాన కార్యదర్శి మల్‌శెట్టియాదవ్, తదితరులు చైర్మన్ పదవి కోసం ప్రయత్నిస్తున్నట్లు సమాచారం. కాగా ఆత్మ కమిటీ చైర్మన్ రేసులో మారుతిపటేల్ ముందున్నట్టు తెలిసింది. కాగా మరికొందరు నేతలు కమిటీల డెరైక్టర్ పదవులను పొందేందుకు తమ నేతల వద్ద ప్రయత్నాలు చేస్తున్నారు.


 నారాయణఖేడ్:  పంద్రాగస్టు అనగానే సాధారణంగా గుర్తుకొచ్చేది స్వాతంత్య్ర దినోత్సవం. జాతీయ పండుగ అయిన స్వాతంత్య్ర దినోత్సవం రోజున ప్రజలు వేడుకలా జరుపుకోవడం దేశభక్తిని చాటుతోంది. స్వాతంత్య్ర దినోత్సవం రోజునే వివాహం చేసుకుంటే వధూవరులకు ప్రత్యేకమైన రోజున పెళ్లి చేసుకున్నామన్న సంతోషం అంతా ఇంతా కాదు. మునుపెన్నడూ లేని విధంగా శ్రావణ మాసంలో స్వాతంత్య్ర దినోత్సవమైన ఆగస్టు 15వ తేదీన వివాహ ముహూర్తం ఉండడం విశేషంగా చెప్పుకోవచ్చు.
 
  40 రోజుల విరామం అనంతరం పురోహితులు ఆగస్టు మాసంలో కొన్ని రోజుల్లో అధిక వివాహాలు చేసేందుకు ముహూర్తాలు పెట్టారు.  గత నెల జూలై మాసంలో 27న శ్రావణ మాసం మొదలైనా మంచి ముహూర్తాలు లేవు. పురోహితులు ఈ నెల 11, 15, 20, 22వ తేదీల్లో వివాహాలకు ముహుర్తాలు నిర్ణయించారు. అందులో పంద్రాగస్టున జిల్లాలో వందలాది వివాహాలు జరగనున్నాయి. శ్రావణ మాసానికి ముందు ఆషాఢ మాసం ఉండడంతో మూఢాల కారణంగా వివాహాలకు మంచి ముహూర్తాలు లేక పెళ్లిళ్లు జరగలేదు.
 
  దీంతో ఉన్న నాలుగు తేదీల్లోనూ విశేష దినమైన ఆగస్టు 15న వివాహాలు నిర్వహించేందుకు పెద్దలు సైతం ఆసక్తి చూపించారని పురోహితులు చెబుతున్నారు. తన 15 ఏళ్ల పౌరోహిత్యంలో ఆగస్టు 15న పెళ్లి ముహూర్తం పెట్టలేదని ఖేడ్‌కు చెందిన పురోహతుడు మలమంచి మనోహరశర్మ తెలిపారు. ఈ ఏడాది మాత్రమే ఆగస్టు 15న శ్రావణ శుక్రవారం కారణంగా భారీగా ముహూర్తాలు పెట్టానని వివరించారు. శ్రావణ మాసం తర్వాత మళ్ళీ మూఢాలు వస్తుండడంతో ఈ నెలలోనే వివాహాది శుభకార్యాలు చేసేందుకు ప్రజలు సిద్ధమవుతున్నారు. ఇక 11,15,20,22 తేదీల్లో వివాహ  జరిపేందుకు ఇప్పటికే దాదాపు అన్ని ఫంక్షన్ హాల్‌లు బుక్ అయిపోయాయి.
 
 దీంతో ఫంక్షన్ హాల్‌లు లభించని వారు ప్రత్యామ్నాయ ఏర్పాట్లను చేసుకోవడంలో నిమగ్నమయ్యారు. శ్రావణం తర్వాత భాద్రపదం, ఆశ్వయుజం, కార్తీకం, పుష్యం, మాఘం, పాల్గుణం మాసాల్లో ముహూర్తాలు లేకపోవడంతో ఈ నెలలోనే వివాహాలు చేసేందుకు అందరూ సిద్ధమయ్యారు. దీంతో జిల్లా కేంద్రం సంగారెడ్డితో సహా అన్ని నియోజకవర్గ కేంద్రాల్లో వేలాదిగా వివాహాలు జరగనున్నాయి. దీంతో ఫంక్షన్ హాల్‌లతో పాటు బ్యాండు, సన్నాయి, పురోహితులు, క్యాటరింగ్, డెకరేషన్, వాహనాలు, ఫోటో, వీడియోగ్రాఫర్, టెంట్‌హౌస్, బంగారు, వస్త్ర దుకాణాలకు గిరాకీ పెరగనుంది.


 వారంతా గిరిజన విద్యార్థులు... వసతి గృహాలకు వెళితే...కడుపుమాడకుండా..నాలుగు అక్షరాలు నేర్చుకోవచ్చని ఆశపడ్డారు...తల్లిదండ్రులను వదిలి నారాయణఖేడ్ గిరిజన వసతి గృహానికి వచ్చేశారు. కానీ అమ్మాలా చూడాల్సిన హాస్టల్ వారితో ఆకలి కేకలు పెట్టిస్తోంది. నిర్వాహకులు పెట్టే పురుగుల అన్నం తినలేక కడుపు మాడ్చుకోలేక విద్యార్థులు నరకయాతన అనుభవించారు. ఒకరోజు, రెండు రోజులు కాదు.. రోజూ ఇదే పరిస్థితి తలెత్తడంతో శనివారం తల్లిదండ్రులను హాస్టల్‌కు పిలిపించుకుని తమ కడుపుమంటల గురించి కన్నీటిపర్యంతమయ్యారు. ఇక్కడుండడం తమ వల్ల కాదంటూ తల్లిదండ్రలతో పాటు ఇంటిబాట పట్టారు.
  
  నారాయణఖేడ్: పాఠశాలల్లో విద్యార్థుల సంఖ్య పెంచడానికి మండల స్థాయి అధికారులు బడి బాట కార్యక్రమం నిర్వహిస్తున్నారు. అయితే నారాయణఖేడ్ గిరిజన బాలికల వసతి గృహంలో పరిస్థితులు ఇందుకు భిన్నంగా ఉన్నాయి. సిబ్బంది చర్యల కారణంగా బాలికలు ఇంటి బాట పట్టాలని గట్టిగా నిర్ణయించుకున్నారు.
  
  ఇందుకు సంబంధించిన వివరాలు ఇలా ఉన్నాయి. వారం రోజుల నుంచి ఈ హాస్టల్ విద్యార్థినులకు సిబ్బంది పురుగుల అన్నం వడ్డిస్తున్నారు. ఆ భోజనం తినలేక బాలికలు కడుపు మాడ్చుకుంటున్నారు. భోజనంలో పురుగులు ఎక్కువగా ఉండడంతో అన్నాన్ని పారేస్తున్నారు. సిబ్బందిలో మార్పు రాకపోవడంతో తల్లిదండ్రులను వసతిగృహానికి పిలిపించుకొని పరిస్థితి వివరిస్తున్నారు. చాలా మంది ఇంటికి వస్తామని తల్లిదండ్రుల వెంట పడుతున్నారు.
  
  ఇంత జరుగుతున్నా హాస్టల్ అధికారుల్లో మాత్రం చలనం లేదు. విద్యార్థుల తల్లిదండ్రులు భోజన విషయాన్ని హాస్టల్ సిబ్బందిని ప్రశ్నిస్తే బియ్యం మార్చుతామని తాపీగా సమాధానం చెబుతున్నారు.
  నారాయణఖేడ్ గిరిజన బాలికల వసతిగృహంలో 190 మంది బాలికలు ఉన్నారు. వీరు పట్టణంలోని వివిధ ప్రభుత్వ పాఠశాలల్లో మూడు నుంచి పదో తరగతి వరకు చదువుకుంటున్నారు. అయితే హాస్టల్ సిబ్బంది మెనూ ప్రకారం భోజనం పెట్టడం లేదు. జూన్ 12న హాస్టల్ ప్రారంభమైంది. గత ఏడాది సరఫరా చేసిన బియ్యం మగ్గిపోయాయి. ఆ బియ్యానికి పురుగులు పట్టాయి. వాటిని శుభ్రం చేయకుండా అలాగే వంట చేస్తున్నారు. దీంతో విద్యార్థులు తీవ్ర ఇబ్బందులు పడుతున్నారు.
  
  కేవీపీఎస్ నాయకుల
   ఫిర్యాదుతో విచారణ
  ఖేడ్ ఎస్టీ హాస్టల్‌లో పురుగుల అన్నం పెడుతున్నారనే సమాచారం తెలుసుకున్న కేవీపీఎస్ నాయకుడు నర్సింలు శనివారం తహశీల్దార్ రాణా ప్రతాప్ సింగ్‌కు ఫిర్యాదు చేశారు. దీంతో ఆయన హాస్టల్‌కు చేరుకొని వార్డెన్, విద్యార్థులు, వారి తల్లిదండ్రులతో మాట్లాడారు.
  
  పురుగుల అన్నం పిల్లలకు ఎలా పెడతారని ఆగ్రహం వ్యక్తం చేశారు. అనంతరం తహశీల్దార్ మాట్లాడుతూ గత విద్యా సంవత్సరం వచ్చిన బియ్యాన్ని పౌరసరఫరాల గోదాంకు తరలించాలని సూచించారు. కొత్త బియ్యం సరఫరా అయ్యేలా చర్యలు తీసుకుంటామని వివరించారు. సిబ్బంది తీరును సంగారెడ్డి ఆర్డీఓ మధుకర్ రెడ్డికి వివరిస్తామని తెలిపారు.
  


 నారాయణ్‌ఖేడ్: మెదక్‌ జిల్లా నారాయణ్‌ఖేడ్‌ మండలం వెంకటాపూర్‌లో దారుణం చోటు చేసుకుంది. తల్లి, ఇద్దరు కూతుళ్లు కత్తితో పొడుచుకుని ఆత్మహత్యాయత్నం చేశారు. కూతురు మృతి చెందగా, తల్లి, మరో కూతురు ప్రాణాలతో పోరాడుతున్నారు. వీరిద్దరి పరిస్థితి విషమంగా ఉంది.
 
 అయితే వీరేందుకు ఆత్మహత్యాయత్నం చేశారో తెలియరాలేదు. స్థానికంగా కలకలం రేపిన ఈ ఘటనపై పోలీసులు దృష్టి సారించారు. ఆత్మహత్యాయత్నానికి దారి తీసిన పరిస్థితులపై ఆరా తీస్తున్నారు.


  మనూరు, న్యూస్‌లైన్: వైఎస్సార్ సీపీతోనే అభివృద్ధి సా ధ్యమని ఆ పార్టీ నారాయణఖేడ్ అసెంబ్లీ అభ్యర్థి అప్పారావు షెట్కార్ అన్నారు. ఆదివారం ఆయన మనూరు మండలం మోర్గిలో నిర్వహించిన కార్యకర్తల సమావేశంలో మాట్లాడారు. దివంగత సీఎం వైఎస్ రాజశేఖరరెడ్డి కృషి ఫలితంగానే ఆంధ్ర, కర్ణాటక సరిహద్దున మంజీర నదిపై వంతెన నిర్మాణం జరిగిందన్నారు. వంతెన అసంపూర్తిగా ఉండడంతో ప్రజలు ఎన్నో ఇబ్బందులు ఎదుర్కొనేవారని మహా నేత హయాంలోనే వంతెన నిర్మాణం పూర్తయిందన్నారు.
 
  ప్రజల దాహార్తిని తీర్చేందుకు వైఎస్ రూ.70 కోట్ల నిధులు మంజూరు చేశారని తెలి పారు. రాజన్న ఉంటే అన్ని గ్రా మాలకు పూర్తిస్థాయిలో తాగునీరు అందేదన్నారు. నియోజకవర్గ ప్రజలు తనను ఆదరించి ఫ్యాన్ గుర్తుకు ఓటు వేసి గెలి పించాలని అప్పారావు షెట్కార్ అభ్యర్థించారు. పార్టీ అధినేత వైఎస్ జగన్‌మోహన్‌రెడ్డి సోదరి షర్మిల సోమవారం నిర్వహించే రోడ్‌షోకు ప్రజలు భారీగా తరలివచ్చి విజయవంతం చేయాలని కోరారు.
 
  వైఎస్సార్ సీపీలో చేరికలు..
  మనూరు మండలం మోర్గిలోని వివిధ పార్టీలకు చెందిన సుమారు 200 మంది కార్యకర్తలు అప్పారావు షెట్కార్ ఆధ్వర్యంలో వైఎస్సార్ సీపీలో చేరారు. మోర్గి కి చెందిన ఇబ్రహీమ్, తుకారం, శిరోమణి, సంగప్ప, కల్లప్ప, శర్ణప్ప, ఏశ ప్ప, అబ్రహం, చంద్రమ్మ, పెంటమ్మ, కాంత మ్మ, బాలమ్మ, శాపూర్ గ్రామానికి చెందిన వార్డు సభ్యులు జగన్నాథ్ తన అనుచరులతో పార్టీలో చేరారు.
 
  పంచగామలో భారీగా..
  నారాయణఖేడ్: మండలంలోని పంచగామ గ్రామంలో కాంగ్రెస్ నాయకులు పలువురు ఆదివారం రాత్రి వైఎస్సార్ సీపీలో చేరారు. పార్టీ ఖేడ్ అసెంబ్లీ అభ్యర్థి అప్పారావు షెట్కార్ కండువాలు కప్పి వారిని పార్టీలోకి స్వాగతించారు. పార్టీలో చేరిన వారిలో దేవిదాస్, డాని యల్, మానిక్యయ్య, సుకుమార్, విష్ణు, సురేశ్, నవీన్, ప్రభాకర్, జైలు, సుభాష్, బాబు, మల్లేశ్, నాగయ్య, ఏసయ్య, నర్సింలు, జాన్, లాజర్ ఉన్నారు.