వేలు పట్టి నడక నేర్పించిన నాన్నే... చేయి పట్టుకొని రేసింగ్‌కు తీసుకెళ్లాడు. పిల్లలకు కిక్‌ ఇచ్చే గో కార్టింగ్‌ రేసులో రయ్‌ రయ్‌ మనిపించే తనయుని ఉత్సాహాన్ని కళ్లారా చూశాక తండ్రి తన కుమారుడి తపనే తన తపన అనుకున్నాడు. ఏడేళ్ల ప్రాయం నుంచి టీనేజ్‌కొచ్చాక ఫార్ములావన్‌లో అరంగేట్రం చేసే వరకు ప్రతి పైసా తండ్రే వెచ్చించాడు. ఇలా తండ్రి ఆడమ్‌ చేయూత, లాండో నోరిస్‌ రాతను మార్చింది. ఎఫ్‌1 చాంపియన్‌ను చేసింది. సాక్షి క్రీడా విభాగంఇప్పుడు ఫార్ములావన్‌ (ఎఫ్‌1) ప్రపంచ మంతా నోరిస్‌ వైపే చూస్తోంది. తాజా ఎఫ్‌1 వరల్డ్‌ డ్రైవర్స్‌ చాంపియన్‌గా అతను ఘనతకెక్కాడు. 18 ఏళ్ల తర్వాత మెక్‌లారెన్‌ రేసింగ్‌ టీమ్‌ను విజేతగా నిలిపాడు. చివరిసారిగా హామిల్టన్‌ 2008లో మెక్‌లారెన్‌కు టైటిల్‌ అందించాడు. దిగ్గజ రేసర్‌ హామిల్టన్, తాజా చాంపియన్‌ నోరిస్‌ ఇద్దరు బ్రిటన్‌ డ్రైవర్లే కావడం గమనార్హం. ఇక మెక్‌లారెన్‌ టీమ్‌ను కాకుండా దేశం గురించే చెప్పుకుంటే బ్రిటన్‌ తరఫున 11వ ఫార్ములావన్‌ చాంపియన్‌ నోరిస్‌. 26 ఏళ్ల వయసులో తొలి టైటిల్‌ సాధించాడు. ఆఖరి రేసుదాకా ఉత్కంఠ రేపినా... స్టార్‌ రేసర్‌ వెర్‌స్టాపెన్‌ వెనకే ఉండి (రెండో స్థానం) వెంటాడినా తను మాత్రం తక్కువేం కాదని, సర్క్యూట్‌లో దిగితే తగ్గేదే లేదని తన విజయంతో చాటి చెప్పాడు. బాల్యంలోనే రేసింగ్‌ బాట ఏడేళ్ల పసి ప్రాయంలో రేసింగ్‌ బాట పట్టిన నోరిస్‌ తాజాగా ఏడో సీజన్‌లో ప్రపంచ చాంపియన్‌గా నిలవడం విశేషం. నోరిస్‌ తండ్రి ఆడమ్‌ కోటీశ్వరుడు కావడంతో డబ్చుకు కొదవేం లేదు. పైగా ధైర్యం కూడా ఎక్కువే! లేదంటే కోట్లకు వారసుణ్ని ఏ తండ్రి అయిన ప్రమాదకర రేసింగ్‌కు తీసుకెళ్తాడా. కానీ ఆడమ్‌ చేయి పట్టుకొని కారులో కూర్చోబెట్టుకొని మరీ కార్టింగ్‌కు పరిచయం చేశాడు. అలా మొదలైన ప్రయాణంలో ఓ ఏడాది గడిచేసరికే చిన్న చితక పోటీల్లో గెలవడం కూడా మొదలుపెట్టాడు. ఇలా మూడు, నాలుగేళ్లు గడిచే సరికి 11 ఏళ్ల వయసులో ‘ఎంఎస్‌ఏ బ్రిటిష్‌ క్యాడెట్‌ కార్ట్‌ చాంపియన్‌షిప్‌’లో పోటీలకు దిగాడు. మెరుపు వేగం అందిపుచ్చుకొని పలుమార్లు విజేతగా నిలిచాడు. లాండో నోరిస్‌ రోజు రోజుకి కాదు... కానీ రేసు రేసుకి జోరు పెంచుతున్నాడు. టీనేజ్‌లో పాల్గొన్న పోటీల్లో తన సత్తా జూనియర్‌ రేసింగ్‌ జట్లను ఆకట్టుకునేలా చేసింది. 14 ఏళ్లకే అవార్డు కూడా... నోరిస్‌కు బాగా తెలిసిన ప్రపంచం రేసింగ్‌. తనని దూసుకెళ్లేలా చేస్తున్న ప్రపంచం కూడా రేసింగే! అందుకేనేమో అతని ‘వేగం’ అంతే వేగంగా అవార్డును తెచ్చిపెట్టింది మరి! 14 ఏళ్ల టీనేజ్‌లోనే నోరిస్‌ తొలి అవార్డు అందుకున్నాడు. మూడుసార్లు ప్రపంచ చాంపియన్‌గా నిలిచిన సర్‌ జాకీ స్టివార్ట్‌ చేతుల మీదుగా 2013లో ఆ ఏడాదికి సంబంధించి ‘ఆటో స్పోర్ట్‌’ అవార్డు అందుకున్నాడు. ఇలా అవార్డుతో పాటు ఆ రేసు, ఈ రేసు గెలుచుకుంటూ సర్క్యూట్‌పై దుమ్మురేపే ప్రతిభనే ఆలంబనగా చేసుకొని రేసర్లంతా కలలు గనే ఎఫ్‌1 గడప తొక్కాడు. 2018, జనవరిలో 18 ఏళ్ల నోరిస్‌ మెక్‌లారెన్‌ రేసింగ్‌ టీమ్‌ సభ్యుడయ్యాడు. టీమ్‌ సీఈవో బ్రౌన్‌ ఆ యువ రేసర్‌కు అవకాశమివ్వాలని నిర్ణయించాడు. అప్పటికే సీనియర్‌గా ఉన్న డ్రైవర్‌ ఫెర్నాండో అలోన్సో స్థానంలో రేసు మొదలుపెట్టిన నోరిస్‌ ఆ తర్వాత కొంతకాలానికి పోల్‌ పొజిషన్‌లు సాధిస్తూ ముందంజ వేశాడు. అలా ఏకబికిన ఏడేళ్ల పాటు తన టీమ్‌ మెక్‌లారెన్‌ పెట్టిన నమ్మకానికి న్యాయం చేస్తూ ఏ సీజన్‌లోనూ, ఏ రేసులోనూ నమ్మకం కోల్పోకుండా తన రేసింగ్‌ జోరు చూపాడు. ఎట్టకేలకు తనకు అవకాశమిచ్చిన మెక్‌లారెన్‌ను గెలిపించాడు. ఎఫ్‌1 అరంగేట్రం నుంచి టైటిల్‌ గెలిచేదాకా మెక్‌లారెన్‌ రేసింగ్‌ జట్టుతోనే తన ఏడేళ్ల పయనం మొత్తానికి ఇలా విజయవంతంగా సాగిపోతోంది.వాడికేమో ఇష్టం, నాకేమో కష్టం ఎవరో చెబితేనో... సరదాకో రేసింగ్‌కు వెళ్లలేదు. ఎంతో ఇష్టపడే కార్టింగ్‌ కార్‌ స్టీరింగ్‌ పట్టాడు. మా ఆడమ్‌ (నోరిస్‌ నాన్న) కూడా ప్రోత్సహించాడు. దీని వల్ల ఏడేళ్ల ప్రాయం నుంచి ఇప్పటి వరకు నా కుమారుడిని మిస్‌ అవుతూనే ఉన్నా. మొదట్లో కార్టింగ్‌ అంటూ ఇంటికి దూరంగా... సర్క్యూట్‌కు దగ్గరగా ఎక్కువ సమయం గడిపాడు. అనంతరం జూనియర్‌ స్థాయి పోటీల కోసమని అటు ఇటూ తిరిగాడు. కొన్నేళ్లుగా ప్రొ సర్క్యూట్‌ రేసర్‌గా మరింత బిజీ అయిపోయాడు. ఏం చేస్తాం. వాడికేమో అదే ఇష్టం. వాణ్నిలా రోజులు, నెలల తరబడి విడిచి ఉండటం నాకేమో కష్టం. –నోరిస్‌ తల్లి సిస్కా

మెక్‌లారెన్ డ్రైవర్ లాండో నోరిస్ త‌న 17 ఏళ్ల సుదీర్ఘ‌ నిరీక్షణకు తెర దించాడు. త‌న కెరీర్‌లో మొట్టమొదటి ఫార్ములా వ‌న్ ప్రపంచ ఛాంపియన్‌షిప్‌ను గెలుచుకొని చరిత్ర సృష్టించాడు. ఆదివారం యాస్ మెరీనా సర్క్యూట్‌లో జరిగిన సీజన్-ముగింపు అబుదాబి గ్రాండ్ ప్రి (Abu Dhabi GP)లో మూడో స్ధానంలో నోరిస్ నిలిచాడు.The moment of glory 🏆#F1 #AbuDhabiGP pic.twitter.com/GJZJQ1oKnZ— Formula 1 (@F1) December 7, 2025అయితే డ్రైవర్స్ ఛాంపియన్‌షిప్ పాయింట్ల పట్టికలో నోరిస్ (423 పాయింట్లు) అగ్ర‌స్ధానంలో నిలిచి తొలి టైటిల్‌ను సొంతం చేసుకుంది. నాలుగు సార్లు ప్రపంచ ఛాంపియన్ మ్యాక్స్‌ వెర్‌స్టాపెన్‌ (రెడ్‌బుల్‌) కేవ‌లం రెండు పాయింట్ల తేడాతో టైటిల్‌ను కోల్పోయాడు.LANDO NORRIS IS THE 2025 FORMULA 1 WORLD CHAMPION!!!! 🏆#F1 #AbuDhabiGP pic.twitter.com/Rg4cc4OwlU— Formula 1 (@F1) December 7, 2025దుబాయ్‌లో జ‌రిగిన చివ‌రి రేసును వెర్‌స్టాపెన్ గెలుచుకున్న‌ప్ప‌టికి.. ఛాంపియన్‌షిప్ స్టాండింగ్స్‌లో(421 పాయింట్లు) రెండవ స్థానంతో సరిపెట్టుకోవలసి వచ్చింది. కాగా 2008లో లూయిస్ హామిల్టన్ (Lewis Hamilton) గెలిచిన తర్వాత మెక్‌లారెన్‌కు డ్రైవర్స్ ఛాంపియన్‌షిప్ దక్కడం ఇదే మొదటిసారి.

అబుదాబి: ఫార్ములావన్‌ (ఎఫ్‌1) డ్రైవర్స్‌ చాంపియన్‌షిప్‌ రేసు రసవత్తరంగా మారింది. 24 రేస్‌ల సీజన్‌లో ఇప్పటి వరకు 23 రేసులు ముగియగా... పాయింట్ల పట్టికలో మెక్‌లారెన్‌ డ్రైవర్‌ లాండో నోరిస్‌ 408 పాయింట్లతో అగ్రస్థానంలో కొనసాగుతున్నాడు. డిఫెండింగ్‌ చాంపియన్, రెడ్‌బుల్‌ డ్రైవర్‌ మ్యాక్స్‌ వెర్‌స్టాపెన్‌ 396 పాయింట్లతో రెండో స్థానంలో ఉన్నాడు. మూడో స్థానంలో మెక్‌లారెన్‌కే చెందిన ఆస్కార్‌ పియాస్ట్రి (392 పాయింట్లు) ఉన్నాడు.సీజన్‌లో చివరి రేస్‌ అబుదాబి గ్రాండ్‌ప్రి ఈ ఆదివారం జరగనుండగా... నోరిస్‌ పోడియంపై నిలిస్తే అతడికే ఈ ఏడాది టైటిల్‌ దక్కనుంది. ఈ నేపథ్యంలో... మెక్‌లారెన్‌ యాజమాన్యం శుక్రవారం ఆసక్తికర వ్యాఖ్యలు చేసింది. అవసరమైతే జట్టు తరఫున ఆదేశాలిస్తామని పేర్కొంది. ‘అవును, తప్పకుండా ప్రయత్నిస్తాం. మేము ఈ డ్రైవర్స్‌ చాంపియన్‌షిప్‌ టైటిల్‌ గెలవాలని అనుకుంటున్నాం. మా ఇద్దరు డ్రైవర్లు టైటిల్‌ రేసులో ఉన్నా... ఒకరికి మాత్రమే ఎక్కువ అవకాశాలున్నాయనేది సుస్పష్టం. ఇది జట్టు క్రీడ. చాంపియన్‌షిప్‌ సాధించేందుకు చేయగలిగినదంతా చేస్తాం. అలా చేయకపోవడం పిచ్చితనం అవుతుంది’ అని మెక్‌లారెన్‌ సీఈవో జాక్‌ బ్రౌన్‌ అన్నాడు. వెర్‌స్టాపెన్‌ కంటే 12 పాయింట్లు ఆధిక్యంలో ఉన్న నోరిస్‌ సీజన్‌ చివరి రేసులో తొలి మూడు స్థానాల్లో నిలిస్తే చాలు టైటిల్‌ దక్కనుంది. ఈ నేపథ్యంలో సహచర డ్రైవర్‌ పియాస్ట్రిని చాంపియన్‌షిప్‌ గెలిచేందుకు సహకరించమని అడగలేనని నోరిస్‌ ఇప్పటికే పేర్కొనగా... తాజాగా జట్టు మేనేజ్‌మెంట్‌ మాత్రం టైటిల్‌ కోసం ఎలాంటి నిర్ణయం అయినా తీసుకుంటామని వెల్లడించింది. మెక్‌లారెన్‌ జట్టు చివరిసారిగా 2008లో డ్రైవర్స్‌ చాంపియన్‌షిప్‌ టైటిల్‌ నెగ్గింది.

అబుదాబి: ఈ సీజన్‌ ఫార్ములావన్‌ చాంపియన్‌షిప్‌ కోసం జట్టు సహచరుడు పియా్రస్టితో ఎలాంటి మంతనాలు ఉండవని లాండో నోరిస్‌ వ్యాఖ్యానించాడు. మెక్‌లారెన్‌ డ్రైవర్లలో నోరిస్‌ 408 పాయింట్లతో అగ్రస్థానంలో ఉండగా, ఆస్కార్‌ పియాస్ట్రి 392 పాయింట్లతో మూడో స్థానంలో ఉన్నాడు. గత ఆదివారం ఖతర్‌ గ్రాండ్‌ప్రి గెలుపొందడంతో రెడ్‌బుల్‌ రేసర్‌ వెర్‌స్టాపెన్‌ (396) రెండో స్థానంలోకి దూసుకురావడంతోనే ఈ సీజన్‌ ‘ఫార్ములా’ ఆఖరి మజిలీకి చేరింది. ఈ ఆదివారం జరిగే అబుదాబి గ్రాండ్‌ప్రిపై రేసింగ్‌ ప్రియుల ఆసక్తిని పెంచింది. ఈ రేసుకు ముందు నిర్వహించిన మీడియా సమావేశంలో పియాస్ట్రి, వెర్‌స్టాపెన్‌లతో కలిసి నోరిస్‌ పాల్గొన్నాడు. ‘నిజాయితీగా చెబుతున్నా... గెలవాలని నాకున్నా గెలిపించేందుకు సహకరించమని అడగను. దీనికి ఆస్కార్‌ ఒప్పుకుంటాడో లేదో తెలీదు. తప్పనిసరి అని నేను భావించను’ అని నోరిస్‌ స్పష్టం చేశాడు. ఇద్దరు మెక్‌లారెన్‌ డ్రైవర్ల (పియాస్ట్రి, నోరిస్‌)లో నోరిస్‌కే టైటిల్‌ అవకాశాలు ఎక్కువగా ఉన్నాయి. ఎంతలా అంటే అబుదాబిలో వెర్‌స్టాపెన్‌ గెలిచినా కూడా నోరిస్‌ టాప్‌–3లో ఉంటే చాలు మెక్‌లారెన్‌ జట్టు 17 ఏళ్ల తర్వాత ఫార్ములావన్‌ విజేతగా నిలుస్తుంది. 2008లో హామిల్టన్‌ తర్వాత మరే మెక్‌లారెన్‌ డ్రైవర్‌ విజేతగా నిలువలేకపోయాడు. మరోవైపు వెర్‌స్టాపెన్‌ మాట్లాడుతూ ఆఖరి రేసులో ఏమైనా జరగొచ్చని, రేసు ఆషామాïÙగా ఉండబోదని చెప్పాడు.

సావోపాలో: క్వాలిఫయింగ్‌లో కనబరిచిన జోరును ప్రధాన రేసులోనూ కొనసాగించిన మెక్‌లారెన్‌ జట్టు డ్రైవర్‌ లాండో నోరిస్‌ ఈ సీజన్‌లో ఏడో విజయాన్ని అందుకున్నాడు. భారత కాలమానం ప్రకారం ఆదివారం అర్ధరాత్రి దాటాక ముగిసిన బ్రెజిలియన్‌ గ్రాండ్‌ప్రి ఫార్ములావన్‌ రేసులో లాండో నోరిస్‌ విజేతగా నిలిచాడు. నిర్ణీత 71 ల్యాప్‌ల రేసును ‘పోల్‌ పొజిషన్‌’ నుంచి ప్రారంభించిన నోరిస్‌ అందరికంటే వేగంగా, అందరికంటే ముందుగా 1 గంట 32 నిమిషాల 01.596 సెకన్లలో ముగించి అగ్రస్థానాన్ని దక్కించుకున్నాడు.మెర్సిడెస్‌ డ్రైవర్‌ కిమి ఆంటోనెల్లి (మెర్సిడెస్‌) రెండో స్థానాన్ని పొందగా... డిఫెండింగ్‌ ప్రపంచ చాంపియన్‌ మాక్స్‌ వెర్‌స్టాపెన్‌ (రెడ్‌బుల్‌) మూడో స్థానాన్ని సొంతం చేసుకున్నాడు. మెర్సిడెస్‌కు చెందిన జార్జి రసెల్‌కు నాలుగో స్థానం, మెక్‌లారెన్‌కు చెందిన ఆస్కార్‌ పియాస్ట్రి ఐదో స్థానం పొందారు. ప్రపంచ మాజీ చాంపియన్, ఫెరారీ డ్రైవర్‌ లూయిస్‌ హామిల్టన్‌ 37 ల్యాప్‌ల తర్వాత రేసు నుంచి నిష్క్రమించగా.. చార్లెస్‌ లెక్‌లెర్క్‌ (ఫెరారీ) ఐదో ల్యాప్‌లో, గాబ్రియేల్‌ బొర్టోలెటో (స్టేక్‌ ఎఫ్‌1 టీమ్‌) తొలి ల్యాప్‌లోనే వైదొలిగారు.రంగం సిద్ధంతాజా విజయంతో నోరిస్‌ తొలిసారి ప్రపంచ చాంపియన్‌షిప్‌ టైటిల్‌ సాధించేందకు రంగం సిద్ధం చేసుకున్నాడు. ప్రస్తుతం లాండో నోరిస్‌ 390 పాయింట్లతో టాప్‌ ర్యాంక్‌లో ఉండగా... నోరిస్‌ సహచరుడు పియాస్ట్రి 366 పాయింట్లతో రెండో స్థానంలో, వెర్‌స్టాపెన్‌ 341 పాయింట్లతో మూడో స్థానంలో, జార్జి రసెల్‌ 276 పాయింట్లతో నాలుగో స్థానంలో ఉన్నారు. ప్రపంచ టైటిల్‌ నోరిస్, పియాస్ట్రి, వెర్‌స్టాపెన్‌లలో ఒక్కరికే దక్కే అవకాశముంది.ఈ సీజన్‌లో మరో మూడు రేసులు మిగిలి ఉన్నాయి. గరిష్టంగా 75 పాయింట్లు అందుబాటులో ఉన్నాయి. నోరిస్, పియాస్ట్రి మధ్య 24 పాయింట్ల వ్యత్యాసం... నోరిస్, వెర్‌స్టాపెన్‌ మధ్య 49 పాయింట్ల వ్యత్యాసం ఉంది. ఈ నేపథ్యంలో చివరి మూడు రేసుల్లో నోరిస్, పియాస్ట్రి టాప్‌–10లో నిలవకుండా... వెర్‌స్టాపెన్‌ తప్పనిసరిగా రెండు రేసుల్లో విజేతగా నిలిచి, మరో రేసులో టాప్‌–10లో నిలిస్తేనే వరుసగా ఐదో ఏడాది అతని ఖాతాలో ప్రపంచ చాంపియన్‌షిప్‌ టైటిల్‌ చేరుతుంది. సీజన్‌లోని తదుపరి మూడు రేసులు వరుసగా నవంబర్‌ 23న లాస్‌ వేగస్‌ గ్రాండ్‌ప్రి... నవంబర్‌ 30న ఖతర్‌ గ్రాండ్‌ప్రి... డిసెంబర్‌ 7న అబుదాబి గ్రాండ్‌ప్రి జరగుతాయి.

మెక్సికో సిటీ: గత ఐదు రేసుల్లో ఆశించిన ఫలితాలు అందుకోలేకపోయిన మెక్‌లారెన్‌ జట్టు డ్రైవర్‌ లాండో నోరిస్‌ మళ్లీ గెలుపు బాటలో పడ్డాడు. ఐదు రేసుల తర్వాత ఈ ఏడాది ఫార్ములావన్‌ (ఎఫ్‌1) సీజన్‌లో ఆరో విజయాన్ని అందుకున్నాడు. భారత కాలమానం ప్రకారం ఆదివారం అర్ధరాత్రి దాటాక జరిగిన మెక్సికో గ్రాండ్‌ప్రి రేసులో బ్రిటన్‌కు చెందిన లాండో నోరిస్‌ విజేతగా నిలిచాడు. ‘పోల్‌ పొజిషన్‌’తో ఈ రేసును ఆరంభించిన నోరిస్‌ నిరీ్ణత 71 ల్యాప్‌లను అందరికంటే వేగంగా, అందరికంటే ముందుగా ఒక గంట 37 నిమిషాల 58.574 సెకన్లలో పూర్తి చేసి అగ్రస్థానాన్ని అలంకరించాడు. ఈ సీజన్‌లో ఏడు విజయాలతో నిలకడగా రాణిస్తున్న మెక్‌లారెన్‌కే చెందిన మరో డ్రైవర్‌ ఆస్కార్‌ పియాస్ట్రి మెక్సికో గ్రాండ్‌ప్రిలో తడబడ్డాడు. చివరకు ఐదో స్థానంతో సరిపెట్టుకున్నాడు. ఫలితంగా 19 రేసులు ముగిశాక 346 పాయింట్లతో టాప్‌ ర్యాంక్‌లో ఉన్న పియాస్ట్రిమెక్సికో రేసు తర్వాత రెండో స్థానానికి పడిపోయాడు. మెక్సికో ట్రాక్‌పై రయ్‌మంటూ దూసుకుపోయిన నోరిస్‌ 25 పాయింట్లు తన ఖాతాలో వేసుకున్నాడు. 357 పాయింట్లతో డ్రైవర్స్‌ చాంపియన్‌íÙప్‌ రేసులో అగ్రస్థానానికి చేరుకున్నాడు.356 పాయింట్లతో పియాస్ట్రి రెండో స్థానంలో, 321 పాయింట్లతో వెర్‌స్టాపెన్‌ మూడో స్థానంలో ఉన్నారు. ఏప్రిల్‌లో ఐదో రేసు ముగిశాక నోరిస్‌ చివరిసారి టాప్‌ ర్యాంక్‌లో నిలిచాడు. ఆ తర్వాత పియాస్ట్రి మొదటి స్థానంలోకి వచ్చాడు. ఈ సీజన్‌లోని తొలి రేసు ఆ్రస్టేలియా గ్రాండ్‌ప్రిలో టైటిల్‌ నెగ్గి శుభారంభం చేసిన నోరిస్‌ ఆ తర్వాత మొనాకో, ఆ్రస్టియా, బ్రిటిష్‌ హంగేరి గ్రాండ్‌ప్రిలలో విజయం సాధించాడు. 24 రేసుల ఈ సీజన్‌లో ఇప్పటికి 20 రేసులు ముగిశాయి. తదుపరి రేసు సావోపాలోలో బ్రెజిలియన్‌ గ్రాండ్‌ప్రి నవంబర్‌ 9న జరుగుతుంది. గత రెండేళ్లుగా బ్రెజిలియన్‌ గ్రాండ్‌ప్రిలో విజేతగా నిలుస్తున్న వెర్‌స్టాపెన్‌ మెక్‌లారెన్‌ డ్రైవర్లను నిలువరిస్తూ ‘హ్యాట్రిక్‌’ సాధిస్తాడో లేదో వేచి చూడాలి.

బుడాపెస్ట్‌ (హంగేరి): ఫార్ములావన్‌ తాజా సీజన్‌లో మెక్‌లారెన్‌ డ్రైవర్ల జోరు సాగుతోంది. ఆస్కార్‌ పియాస్ట్రి, లాండో నోరిస్‌ మధ్య ఆఖరి వరకు హోరాహోరీగా సాగిన హంగేరి గ్రాండ్‌ప్రి ప్రధాన రేసులో నోరిస్‌ విజయం సాధించాడు. ఈ సీజన్‌లో నోరిస్‌కిది ఐదో విజయం కాగా... మెక్‌లారెన్‌ జట్టుకిది 200వ ఎఫ్‌1 గెలుపు కావడం విశేషం. ఆదివారం జరిగిన ఈ రేసులో నోరిస్‌ నిర్ణీత 70 ల్యాప్‌లను అందరికంటే వేగం6గా, అందరికంటే ముందుగా 1 గంట 35 నిమిషాల 21.231 సెకన్లలో ముగించి విజేతగా నిలిచాడు. మెక్‌లారెన్‌ జట్టుకే చెందిన పియాస్ట్రి 1 గంట 35 నిమిషాల 21.929 సెకన్లలో లక్ష్యాన్ని చేరి రెండో స్థానంలో నిలిచాడు. 0.698 సెకన్ల తేడాతో పియాస్ట్రి రెండో స్థానానికి పరిమితమయ్యాడు. తొలి ల్యాప్‌ ముగిసే సమయానికి ఐదో స్థానానికి పరిమితమైన నోరిస్‌ ఆ తర్వాత వాయువేగంతో దూసుకెళ్లాడు. ‘ఇది చాలా కష్టమైంది. ప్రాణం పోయినంత పనైంది. చివరి క్షణాల్లో పియాస్ట్రిని దాటేసేందుకు ఎంతగానో ప్రయత్నించా’ అని రేసు అనంతరం నోరిస్‌ అన్నాడు. గత వారం జరిగిన బెల్జియం గ్రాండ్‌ప్రిలో పియాస్ట్రి విజయం సాధించగా... నోరిస్‌ రెండో స్థానంలో నిలిచాడు. మెర్సిడెస్‌ డ్రైవర్‌ జార్జ్‌ రసెల్‌ (1 గంట 35 నిమిషాల 43.147 సెకన్లు) మూడో స్థానం దక్కించుకున్నాడు. ఇక ఈ ఏడాది తొలిసారి పోల్‌ పొజిషన్‌ దక్కించుకొని అగ్రస్థానంతో రేసును ప్రారంభించిన ఫెరారీ డ్రైవర్‌ చార్లెస్‌ లెక్‌లెర్క్‌ (1 గంట 36 నిమిషాల 3.791 సెకన్లు) నాలుగో స్థానంతో సరిపెట్టుకున్నాడు. నాలుగుసార్లు ప్రపంచ చాంపియన్‌ వెర్‌స్టాపెన్‌ (1 గంట 36 నిమిషాల 33.876 సెకన్లు; రెడ్‌బుల్‌) తొమ్మిదో స్థానంలో నిలవగా... ఏడుసార్లు ప్రపంచ చాంపియన్‌ లూయిస్‌ హామిల్టన్‌ (1 గంట 35 నిమిషాల 31.092 సెకన్లలో 69 ల్యాప్‌లు; ఫెరారీ) పన్నెండో స్థానానికి పరిమితమయ్యాడు. 24 రేసులో తాజా సీజన్‌లో ఇప్పటి వరకు 14 రేసులు ముగియగా... డ్రైవర్స్‌ చాంపియన్‌షిప్‌లో పియాస్ట్రి 284 పాయింట్లతో అగ్రస్థానంలో ఉండగా... నోరిస్‌ 275 పాయింట్లతో రెండో స్థానంలో కొనసాగుతున్నాడు. వీరిద్దరి మధ్య పాయింట్ల అంతరం 9కి తగ్గగా... డిఫెండింగ్‌ చాంపియన్‌ వెర్‌స్టాపెన్‌ 187 పాయింట్లతో మూడో స్థానంలో ఉన్నాడు. తదుపరి రేసు ఈ నెల 31న డచ్‌ గ్రాండ్‌ప్రి జరుగుతుంది.

స్పా–ఫ్రాంకోర్‌చాంప్స్‌ (బెల్జియం): ఫార్ములావన్‌ తాజా సీజన్‌లో మెక్‌లారెన్‌ డ్రైవర్‌ల జోరు సాగుతోంది. ఆస్కార్‌ పియాస్ట్రి, లాండో నోరిస్‌ మధ్య ఆధిక్యం చేతులు మారుతూ సాగిన బెల్జియం గ్రాండ్‌ప్రిలో పియాస్ట్రి విజయం సాధించాడు. ఈ సీజన్‌లో పియాస్ట్రికిది ఆరో విజయం కావడం విశేషం. ఆదివారం జరిగిన ఈ రేసులో పియాస్ట్రి నిరీ్ణత 44 ల్యాప్‌లను అందరికంటే వేగంగా, అందరికంటే ముందుగా 1 గంట 25 నిమిషాల 22.601 సెకన్లలో ముగించి విజేతగా నిలిచాడు. మెక్‌లారెన్‌ జట్టుకే చెందిన నోరిస్‌ 1 గంట 25 నిమిషాల 26.016 సెకన్లలో లక్ష్యాన్ని చేరి రెండో స్థానంలో నిలిచాడు. పోల్‌ పొజిషన్‌తో రేసును ప్రారంభించిన నోరిస్‌... 3.415 సెకన్ల తేడాతో రెండో స్థానానికి పరిమితమయ్యాడు. వర్షం అంతరాయం కారణంగా షెడ్యూల్‌ కన్నా ఆలస్యంగా ప్రారంభమైన రేసులో ఫెరారీ డ్రైవర్‌ చార్లెస్‌ లెక్‌లెర్క్‌ (1 గంట 25 నిమిషాల 42.786 సెకన్లు) మూడో స్థానం దక్కించుకున్నాడు. నాలుగుసార్లు ప్రపంచ చాంపియన్‌ మ్యాక్స్‌ వెర్‌స్టాపెన్‌ (1 గంట 25 నిమిషాల 44.432 సెకన్లు; రెడ్‌బుల్‌) నాలుగో స్థానంతో సరిపెట్టుకోగా... ఏడుసార్లు ప్రపంచ చాంపియన్‌ లూయిస్‌ హామిల్టన్‌ (1 గంట 26 నిమిషాల 3.280 సెకన్లు; ఫెరారీ) ఏడో స్థానానికి పరిమితమయ్యాడు. 24 రేసులో తాజా సీజన్‌లో ఇప్పటి వరకు 13 రేసులు ముగియగా... డ్రైవర్స్‌ చాంపియన్‌షిప్‌లో పియాస్ట్రి 266 పాయింట్లతో అగ్రస్థానంలో ఉండగా... నోరిస్‌ 250 పాయింట్లతో రెండో స్థానంలో కొనసాగుతున్నాడు. డిఫెండింగ్‌ చాంపియన్‌ వెర్‌స్టాపెన్‌ 185 పాయింట్లతో మూడో స్థానంలో ఉన్నాడు. తదుపరి రేసు ఆస్ట్రియా గ్రాండ్‌ప్రి ఆగస్టు 3న జరుగుతుంది.

స్పా–ఫ్రాంకోర్‌చాంప్స్‌ (బెల్జియం): ఫార్ములావన్‌ బెల్జియం గ్రాండ్‌ప్రి క్వాలిఫయింగ్‌ టోర్నీలో మెక్‌లారెన్‌ డ్రైవర్‌ లాండో నోరిస్‌ పోల్‌ పొజిషన్‌ దక్కించుకున్నాడు. శనివారం జరిగిన క్వాలిఫయింగ్‌ రేసులో నోరిస్‌ 1 నిమిషం 40.562 సెకన్లలో ల్యాప్‌ను పూర్తిచేసి అగ్రస్థానం దక్కించుకున్నాడు. ఆదివారం జరగనున్న ప్రధాన రేసును నోరిస్‌ పోల్‌ పొజిషన్‌ నుంచి ప్రారంభించనున్నాడు. 2012లో జాన్సన్‌ బటన్‌ తర్వాత బెల్జియం గ్రాండ్‌ప్రిలో పోల్‌ పొజిషన్‌ దక్కించుకున్న తొలి మెక్‌లారెన్‌ డ్రైవర్‌గా నోరిస్‌ నిలిచాడు. మెక్‌లారెన్‌కే చెందిన ఆస్కార్‌ పియాస్ట్రి 1 నిమిషం 40.647 సెకన్లలో ల్యాప్‌ను ముగించి రెండో స్థానం దక్కించుకోగా... ఫెరారీ డ్రైవర్‌ లెక్‌లెర్క్‌ 1 నిమిషం 40.903 సెకన్లతో మూడో స్థానంలో నిలిచాడు. నాలుగుసార్లు ప్రపంచ చాంపియన్, రెడ్‌బుల్‌ డ్రైవర్‌ మ్యాక్స్‌ వెర్‌స్టాపెన్‌ (1 నిమిషం 40.903 సెకన్లు) నాలుగో స్థానంలో నిలవగా... ఏడుసార్లు ప్రపంచ చాంపియన్, ఫెరారీ డ్రైవర్‌ లూయిస్‌ హామిల్టన్‌ (1 నిమిషం 41.939 సెకన్లు) 16వ స్థానానికి పరిమితమయ్యాడు. అంతకుముందు జరిగిన స్ప్రింట్‌ రేస్‌లో రెడ్‌బుల్‌ డ్రైవర్‌ మ్యాక్స్‌ వెర్‌స్టాపెన్‌ విజేతగా నిలిచాడు. 24 రేసులో తాజా సీజన్‌లో ఇప్పటి వరకు 12 రేసులు ముగియగా... డ్రైవర్స్‌ చాంపియన్‌షిప్‌లో పియాస్ట్రి 241 పాయింట్లతో అగ్రస్థానంలో ఉండగా... నోరిస్‌ 232 పాయింట్లతో రెండో స్థానంలో కొనసాగుతున్నాడు. డిఫెండింగ్‌ చాంపియన్‌ వెర్‌స్టాపెన్‌ 173 పాయింట్లతో మూడో స్థానంలో ఉన్నాడు.

సిల్వర్‌స్టోన్‌: ఆద్యంతం ఉత్కంఠభరితంగా సాగిన బ్రిటిష్‌ గ్రాండ్‌ప్రి ఫార్ములావన్‌ రేసులో బ్రిటన్‌ డ్రైవర్‌ లాండో నోరిస్‌ టైటిల్‌ సాధించాడు. ఆదివారం జరిగిన ఈ రేసులో మెక్‌లారెన్‌ జట్టుకు చెందిన నోరిస్‌ నిరీ్ణత 52 ల్యాప్‌లను అందరికంటే వేగంగా, అందరికంటే ముందుగా 1 గంట 37 నిమిషాల 15.735 సెకన్లలో ముగించి విజేతగా అవతరించాడు. సొంతగడ్డపై నోరిస్‌కిదే తొలి విజయం కాగా... ఈ సీజన్‌లో నాలుగోది.నా స్వప్నం సాకారమైంది‘సొంతనగరంలో టైటిల్‌ నెగ్గాలని కలలు కన్నాను. నా స్వప్నం సాకారమైంది. ఈ చిరస్మరణీయ విజయాన్ని నా మనుసులో ఎల్లవేళలా దాచుకుంటాను’ అని విజయానంతరం నోరిస్‌ వ్యాఖ్యానించాడు. మెక్‌లారెన్‌ జట్టుకే చెందిన ఆస్కార్‌ పియాస్ట్రి రెండో స్థానంలో నిలిచాడు. ‘పోల్‌ పొజిషన్‌’తో రేసును ఆరంభించిన డిఫెండింగ్‌ ప్రపంచ చాంపియన్‌ వెర్‌స్టాపెన్‌ (రెడ్‌బుల్‌) ఐదో స్థానంతో సరిపెట్టుకున్నాడు.టాప్‌ ర్యాంక్‌లో పియాస్ట్రివర్షం అంతరాయం కలిగించిన ఈ రేసులో ఏకంగా ఐదుగురు డ్రైవర్లు కిమీ ఆంటోనెలి (మెర్సిడెస్‌), ఐజాక్‌ హద్జార్‌ (రేసింగ్‌ బుల్స్‌), బొర్టోలెటో (స్టేక్‌ ఎఫ్‌1), లియామ్‌ లాసన్‌ (రేసింగ్‌ బుల్స్‌), కొలాపింటో (అల్పైన్‌ టీమ్‌) రేసును పూర్తి చేయలేకపోయారు. 24 రేసుల సీజన్‌లో ఇప్పటికి 12 రేసులు ముగిశాయి. పియాస్ట్రి 234 పాయింట్లతో టాప్‌ ర్యాంక్‌లో కొనసాగుతుండగా... 226 పాయింట్లతో నోరిస్‌ రెండో స్థానంలో, 165 పాయింట్లతో వెర్‌స్టాపెన్‌ మూడో స్థానంలో ఉన్నారు. సీజన్‌లోని తదుపరి రేసు బెల్జియం గ్రాండ్‌ప్రి ఈనెల 27న జరుగుతుంది.బ్రిటిష్‌ గ్రాండ్‌ప్రిలో బ్రిటన్‌ డ్రైవర్‌కే టైటిల్‌ లభించడం ఇది 12సారి కావడం విశేషం. గతంలో స్టిర్లింగ్‌ మోస్, పీటర్‌ కోలిన్స్, క్లార్క్, స్టీవార్ట్, హంట్, జాన్‌ వాట్సన్, మాన్సెల్, డామన్‌ హిల్, జానీ హెర్బర్ట్, డేవిడ్‌ కౌతార్డ్, హామిల్టన్‌ ఈ రేసులో గెలిచారు.