కోవెలకుంట్ల: 2024 సార్వత్రిక ఎన్నికల్లో తెలుగుదేశం పార్టీ అభ్యర్థులు ఎన్ని అడ్డదారులు తొక్కి అయినా గెలవాలన్న ఉద్ధేశం ఓటర్లను మభ్య పెట్టేందుకు ఉచిత హామీలు గుప్పిస్తున్నారు. బనగానపల్లె నియోజకవర్గంలో టీడీపీ అభ్యర్థి బీసీ జనార్ధన్‌రెడ్డి ఎన్నికల వేళ ఓటర్లకు ఇళ్లస్థలాల పేరుతో గాలం వేస్తున్నారు. టీడీపీ అధికారంలోకి వస్తే రెండు సెంట్ల స్థలాన్ని అందజేస్తామని కల్లిబొల్లిమాటలతో ప్రజలను తప్పుదోవ పట్టిస్తున్నారు. 2019లో వైఎస్సార్‌సీపీ ప్రభుత్వం అధికారంలోకి రాగానే నియోజకవర్గంలోని కోవెలకుంట్ల, సంజామల, అవుకు, కొలిమిగుండ్ల, బనగానపల్లె మండలాల్లోని ఆయా గ్రామాల్లో 12,136 మందికి ఇళ్లస్థలాలు మంజూరు చేసింది. పేదలకు సొంతింటి కల నెరవేర్చాలన్న ఉద్ధేఽశం ఆయా మండలాల్లో ఇళ్లు లేని నిరుపేదలను గుర్తించి ఇంటి స్థలంతోపాటు పక్కా హాలు మంజూరు చేసింది. కోవెలకుంట్ల మండలంలో 2,234 మందికి, కొలిమిగుండ్లలో 1,999 మందికి, సంజామల మండలంలో 1,530 మందికి, అవుకు మండలంలో వెయ్యి మందికి, బనగానపల్లె మండలంలో 5,373 మందికి ఇళ్ల స్థలాలు మంజూరయ్యాయి. ప్రభుత్వ స్థలాలు అందుబాటులోని లేని గ్రామాల్లో ప్రైవేట్‌ భూములను ఎకరా రూ. 20 లక్షల నుంచి రూ. 25 లక్షలతో కొనుగోలు చేసి ఇళ్లస్థలాలు పంపిణీ చేసింది. ఆయా గ్రామాల్లో జగనన్న కాలనీల్లో నిర్మించిన ఇళ్లు ఊర్లను తలపిస్తున్నాయి. బనగానపల్లెలో అడ్డుకున్న బీసీ వైఎస్సార్‌సీపీ ప్రభుత్వం పేదలకు ఇళ్లస్థలాలతో పక్కాగృహాలు మంజూరు చేయగా టీడీపీ అభ్యర్థి బీసీ జనార్ధన్‌రెడ్డి ఇళ్లస్థలాల పంపిణీకి మోకాలొడ్డాడు. బనగానపల్లె మేజర్‌ గ్రామ పంచాయతీలో 3,200 మందికి ఇళ్ల స్థలాలు కేటాయించగా లబ్దిదారులకు ఇళ్ల స్థలాలు ఇవ్వవద్దని బీసీ కోర్టును ఆశ్రయించారు. 2020 డిసెంబర్‌ 25వ తేదీన నియోజకవర్గంలోని మిగిలిన మండలాల్లో ఇళ్లస్థలాలు పంపిణీ చేయగా బీసీ జనార్ధన్‌రెడ్డి కుట్రతో బనగానపల్లె పట్టణంలో ఇళ్లస్థలాల పంపిణీకి బ్రేక్‌ పడింది. వైఎస్సార్‌సీపీ ప్రభుత్వం ఇళ్లస్థలాలు ఇవ్వడంతో పాటు పక్కాగృహ నిర్మాణానికి రూ. 1.80 లక్షల నిధులు మంజూరు చేసింది. 20 టన్నుల ఇసుక ఉచితంగా సరఫరా చేయడంతోపాటు రాయితీపై సిమెంట్‌, కడ్డీలు, కిటీకీలు, వాకిళ్లు, తదితర ఇంటి నిర్మాణ సామగ్రిని అందజేయడంతో పాటు మూడు విడతల్లో గృహ నిర్మాణ బిల్లులు చెల్లించింది. బనగానపల్లె పట్టణంలో మాత్రం బీసీ పుణ్యమా అంటూ లబ్ధిదారులు ఇళ్లస్థలాలకు నోచుకోలేదు. అలాగే 2014 సార్వత్రిక ఎన్నికల్లో కూడా కోవెలకుంట్ల మేజర్‌ గ్రామ పంచాయతీలో 200 మంది టైలర్లకు ఉచితంగా ఇళ్లస్థలాలు ఇస్తామని చెప్పి ఆ ఎన్నికల్లో గెలిచి అధికారంలోకి రాగానే ఒక్క సెంటు స్థలం ఇవ్వకుండా టైలర్లను మోసం చేశాడు. పేదలకు అనుకూలంగా తీర్పు బనగానపల్లె పట్టణంలో పేదలకు ఇళ్ల పట్టాలు ఇవ్వకుండా బీసీ జనార్థన్‌రెడ్డి అడ్డుకోగా సొంతిల్లు లేని పేదల కష్టాలను గుర్తించిన ఎమ్మెల్యే కాటసాని రామిరెడ్డి కోర్టు ద్వారా పోరాడారు. చివరకు అర్హులైన పేదలకు ఇళ్లస్థలాలు పంపిణీ చేయాలని ఇటీవల కోర్టు అనుకూలంగా తీర్పునిచ్చింది. ఎన్నికల కోడ్‌ అమలులో ఉండటంతో ఇళ్ల స్థలాలు పంపిణీ చేసేందుకు ఆస్కారం లేదు. ఇళ్లస్థలాలు పంపిణీ చేయకుండా ఐదేళ్లపాటు అడ్డుకున్న బీసీ ప్రస్తుత ఎన్నికల నేపథ్యంలో ఓట్ల కోసం పేదలకు రెండుసెంట్ల స్థలాన్ని ఇస్తామని చెబుతుండటాన్ని ప్రజలు తీవ్రంగా వ్యతిరేకిస్తున్నారు. ప్రభుత్వం కేటాయించిన ఇళ్లస్థలాలు ఇవ్వకుండా అడ్డుకున్న వ్యక్తి ఓట్ల కోసం ఇళ్లస్థలాల అంశాన్ని తెరపైకి తెచ్చాడని ప్రజలు ఆగ్రహం వ్యక్తం చేస్తున్నారు. వైఎస్సార్‌సీపీ ప్రభుత్వం పేదలందరికి ఇంటిస్థలం, పక్కాగృహాలు నిర్మించి సొంతింటి కల నేరవేర్చింది. నియోజకవర్గంలో అర్హులైన ప్రతి కుటుంబానికి ఇంటిస్థలం, పక్కాగృహం మంజూరు చేసి అందరికీ న్యాయం చేసింది. 2024 ఎన్నికల్లో ఇళ్లస్థలాల హామీని ఎరగా వేసి లబ్ధి పొందాలని బీసీ కుయుక్తులు పడుతున్నారు. టీడీపీ అభ్యర్థి ఇళ్లస్థలాల మాయను ఎటువంటి పరిస్థితుల్లో నమ్మబోమని ప్రజలు ముక్తకంఠంతో చెబుతున్నారు. బీసీ ‘గూడు’ పుఠాణిఓట్ల కోసం టీడీపీ అభ్యర్థి బీసీ జనార్ధన్‌రెడ్డి కుయుక్తులు మొన్న కోవెలకుంట్లలో ఇళ్లస్థలాల పేరుతో టైలర్లకు టోకరా నిన్న బనగానపల్లెలో ఇళ్లస్థలాలు ఇవ్వకుండా అడ్డుకున్న ఘనుడు నేడు రెండు సెంట్ల స్థలం ఇస్తామంటూ గాలం

కర్నూలు (న్యూటౌన్‌): ప్రభుత్వ అనుమతి లేకుండా ఇసుకను తరలిస్తే కేసులు నమోదు చేస్తామని జిల్లా మైనింగ్‌ డిప్యూటీ డైరెక్టర్‌ టి.రాజశేఖర్‌ హెచ్చరించారు. నందవరం ఇసుక క్వారీలో అక్రమంగా ఇసుక తవ్వి తరలిస్తున్నారనే సమాచారంతో జిల్లా మైనింగ్‌ విజిలెన్స్‌ అధికారులు తనిఖీలు చేశారు. ఎలాంటి అక్రమ తవ్వకాలు జరగలేదని నిర్ధారించారు. స్థానికులు వారి అవసరాల నిమిత్తం ఇసుకను ఎద్దుల బండ్లతో తీసుకుంటున్నారని, ఎలాంటి తవ్వకాలు జరగలేదని తెలిసింది. తనిఖీల్లో జిల్లా మైనింగ్‌ విజిలెన్స్‌ ఏడీ బైరాగినాయుడు, రాయల్టీ ఇన్‌స్పెక్టర్‌ అహ్మద్‌ పాల్గొన్నారు. వ్యక్తిపై దాడి కొలిమిగుండ్ల: మండల పరిధిలోని ఇటిక్యాల గ్రామానికి చెందిన గంగాధర్‌రెడ్డిపై దాడి చేసిన కేసులో ఓ వ్యక్తిపై కేసు నమోదు చేసినట్లు హెడ్‌ కానిస్టేబుల్‌ నరసింహులు మంగళవారం తెలిపారు. గంగాధర్‌రెడ్డి కనకాద్రిపల్లెలో ట్రాక్టర్‌ ఆపి స్వగ్రామానికి వెళ్తున్నాడు. అదే సమయంలో శివశంకర్‌రెడ్డి అడ్డగించి గతంలో నాట్రాక్టర్‌కు డ్రైవర్‌గా రమ్మని పిలిస్తే రావా అని అడగడంతో ఇద్దరి మధ్య మాట మాట పెరిగిందిజ గంగాధర్‌రెడ్డిని శివశంకర్‌రెడ్డి చెప్పుతో కొట్టి అవమానించాడు. బాధితుడి ఫిర్యాదు మేరకు కేసు నమోదు చేసుకున్నట్లు హెడ్‌కానిస్టేబుల్‌ తెలిపారు. పిల్లల ఎదుగుదలపై అవగాహన అవసరం కర్నూలు(హాస్పిటల్‌): పిల్లల ఎదుగుదలపై తల్లిదండ్రులు అవగాహన కలిగి ఉండాలని, ఈ మేరకు ఆశాలు చైతన్యపరచాలని డీఎంహెచ్‌వో డాక్టర్‌ వై. ప్రవీణ్‌కుమార్‌ చెప్పారు. మంగళవారం కర్నూలు మండలం ఇ. తాండ్రపాడు ప్రాథమిక ఆరోగ్య కేంద్రంలో నిర్వహించిన ఆశా సమీక్ష సమావేశంలో ఆయన పాల్గొని మాట్లాడారు. ఆశా కార్యకర్తలు గృహ సందర్శనలు చేసినప్పుడు పిల్లల శారీరక, మానసిక, భాష, సాంఘిక అభివృద్ధి దశల గురించి తల్లిదండ్రులకు అవగాహన కల్పించాలన్నారు. 18–22 వారాల హైరిస్క్‌ గర్భిణులను టిఫా స్కాన్స్‌ కోసం ఆరోగ్యశ్రీ ఎన్‌ప్యానెల్‌ ఆసుపత్రులకు వైద్యాధికారి సూచనలతో రెఫర్‌ చేయాలని తెలిపారు. ఆశా యాప్‌లో అర్హులైన దంపతుల సేవలు, ఐరన్‌ మాత్రల పంపిణీ, విటమిన్‌–ఎ ద్రావణ పంపిణీ, నవజాత శిశుసేవల వివరాలను క్రమం తప్పకుండా అప్‌లోడ్‌ చేయాలని తెలిపారు. లింగ వివక్షత నిర్మూలన, గర్భస్థ లింగనిర్ధారణ వ్యతిరేక చట్టం, ఆడపిల్లల ప్రాముఖ్యతపై ప్రజలకు అవగాహన కల్పించాలన్నారు. అనంతరం వడదెబ్బ లక్షణాలు, ప్రథమ చికిత్సగురించి ఆయన వివరించారు. కార్యక్రమంలో వైద్యాధికారి డాక్టర్‌ మంజూష, పీసీ పీఎన్‌డీటీ మానిటరింగ్‌ కన్సల్టెంట్‌ సుమలత, డిస్ట్రిక్ట్‌ కమ్యూనిటీ మొబిలైజర్‌ ప్రసాద్‌ పాల్గొన్నారు. 10న క్రికెట్‌ జట్ల ఎంపిక కర్నూలు (టౌన్‌) : ఈనెల 10 వ తేదీ ఉదయం 10 గంటలకు స్థానిక స్పోర్ట్స్‌ అథారిటీ ఔట్‌డోర్‌ స్టేడియంలో ఉన్న క్రికెట్‌ నెట్స్‌లో అండర్‌–23 విభాగం, సీనియర్‌ క్రికెట్‌ జట్లకు ఎంపిక పోటీలు నిర్వహిస్తున్నట్లు జిల్లా క్రికెట్‌ అసోసియేషన్‌ కార్యదర్శి కె. దేవేంద్రగౌడ్‌ మంళవారం ఒక ప్రకటనలో తెలిపారు. 2001 సంవత్సరం తరువాత జన్మించిన వారు అండర్‌ –23 ఎంపిక పోటీలకు అర్హులని తెలిపారు. బైక్‌పై నుంచి పడి ఒకరి మృతి రుద్రవరం: మండలంలోని చిన్నయ్య స్వామి చెంచుగూడెం వద్ద మోటర్‌ సైకిల్‌ అదుపు తప్పి కింద పడిన ఘనటలో భాస్కర్‌(32) మృతి చెందగా, మయూర్‌ అనే వ్యక్తికి తీవ్ర గాయాలయ్యాయి. గ్రామస్తులు తెలిపిన వివరాల మేరకు కోటకొండకు చెందిన భాస్కర్‌, మయూర్‌ మంగళవారం మోటార్‌ సైకిల్‌ గాజులపల్లె వైపు వెళ్తుండగా చెంచుగూడెం మలుపు వద్ద బైక్‌ అదుపు తప్పడంతో కిందపడి తీవ్ర గాయాలపాలయ్యారు. స్థానికులు వెంటనే నంద్యాల ప్రభుత్వ వైద్యశాలకు తరలించారు. అప్పటికే భాస్కర్‌ మృతి చెందినట్లు వైద్యులు ధ్రవీకరించారు. మయూర్‌ పరిస్థితి విషమంగా ఉండటంతో ప్రథమ చికిత్స అనంతరం మెరుగైన చికిత్స నిమిత్తం కర్నూలు ప్రభుత్వ వైద్యశాలకు రెఫర్‌ చేశారు. కేసు నమోదు చేసుకొని విచారణ చేపట్టిపట్లు ఎస్‌ఐ నిరంజన్‌రెడ్డి తెలిపారు.

కర్నూలు(హాస్పిటల్‌): ఆరోగ్యశ్రీ పథకం కారణంగా ఆసుపత్రి మరింత అభివృద్ధి చెందుతోందని, ఈ మేరకు వైద్యులు, సిబ్బంది చేస్తున్న కృషి అభినందనీయమని కర్నూలు ప్రభుత్వ సర్వజన వైద్యశాల సూపరింటెండెంట్‌ డాక్టర్‌ వి. వెంకటరంగారెడ్డి చెప్పారు. మంగళవారం ఆసుపత్రిలోని ధన్వంతరి హాలులో వివిధ విభాగాధిపతులు, ప్రొఫెసర్లతో ఆరోగ్యశ్రీ, ఈ–హాస్పిటల్‌, వివిధ అంశాలపై సమీక్ష సమావేశం నిర్వహించారు. ఈ సందర్భంగా ఆయన మాట్లాడుతూ అన్ని విభాగాల్లో ఆరోగ్యశ్రీకి సంబంధించి ఇచ్చిన లక్ష్యాలను పూర్తి చేసిన హెచ్‌ఓడీలను అభినందించారు. పలు విభాగాల్లో తిరస్కరించిన 57 కేసుల్లో 40 కేసులు అప్రూవల్‌ అయ్యాయని తెలిపారు. ఆసుపత్రిలోని పలు విభాగాల్లో ఈ–హాస్పిటల్‌ అమలు బాగా జరుగుతోందని కొనియాడారు. అన్ని విభాగాల్లో ఉండే హౌస్‌సర్జన్లు తప్పకుండా ఎఫ్‌ఆర్‌ఎస్‌ ద్వారా హాజరు వేసేలా చర్యలు తీసుకోవాలని హెచ్‌ఓడీలను ఆదేశించారు. హౌస్‌సర్జన్లపై పర్యవేక్షణ చేయాలని, డ్యూటీకి రాని వారిపై చర్యలు తీసుకోవాలని సూచించారు. సమావేశంలో డిప్యూటీ సూపరింటెండెంట్‌ డాక్టర్‌ సి. ప్రభాకర్‌రెడ్డి, కేఎంసీ వైస్‌ ప్రిన్సిపల్‌ డాక్టర్‌ హరిచరణ్‌, సీఎస్‌ఆర్‌ఎంవో డాక్టర్‌ వెంకటేశ్వరరావు, డిప్యూటీ సీఎస్‌ఆర్‌ఎంఓ డాక్టర్‌ హేమనళిని, ఆర్‌ఎంవో డాక్టర్‌ వెంకటరమణ, డాక్టర్‌ శ్రీనివాసులు, డాక్టర్‌ రాధారాణి, డాక్టర్‌ మంజులబాయి, డాక్టర్‌ విజయానందబాబు తదితరులు పాల్గొన్నారు.

పాణ్యం: ఆధారాలతో నిరూపించినా తనపై కబ్జాల ఆరోపణలు చేస్తున్న చంద్రబాబుకు మతి భ్రమించిందని ఎమ్మెల్యే కాటసాని రాంభూపాల్‌ రెడ్డి మండిపడ్డారు. మంగళవారం పాణ్యంలో నిర్వహించిన ఎన్నికల ప్రచారంలో పాల్గొన్న ఆయన విలేకరుల సమావేశంలో మాట్లాడారు. ఏ పార్టీ అయినా సొంత నిర్ణయాలు, మేనిఫెస్టో, విధి విధానాలుంటాయి.. అయితే టీడీపీలో మాత్రం ఇతర పార్టీల నుంచి కాపీ చేసినవే ఉంటాయి.. ప్రస్తుత ఎన్నికల్లో చిన్న పార్టీలు కూడా సొంతంగా మేనిఫెస్టో రూపొందించుకున్నాయి.. టీడీపీ అధినేత చంద్రబాబు మాత్రం సొంత మేనిపెస్టో తయారు చేసుకోలేని దద్దమ్మ అని విమర్శించారు. మీకు లబ్ధి చేకూరి ఉంటేనే ఓటు వేయండని చెప్పిన దమ్మున్న నాయకుడు సీఎం వైఎస్‌ జగన్‌మోహన్‌రెడ్డి. అలా 40 ఏళ్ల రాజకీయ జీవితంలో బాబు ఒక్కనాడైనా అలా చెప్పగలిగాడా అని ప్రశ్నించారు. ఇంట్లో ఆడవారితో రాజకీయమా.. అసెంబ్లీలో తన కుటుంబ సభ్యులను అన్నారని ఆపాదించుకొని మీడియా ముందుకు వచ్చి ఏడ్చి ఇంట్లో ఆడవాళ్లతో రాజకీయం చేశాడన్నారు. నాయకుడు ఆదర్శంగా ఉండాల్సింది పోయి నీచ రాజకీయ సంస్కృతికి తెరలేపారని మండిపడ్డారు. మీ కుటుంబ సభ్యుల కబ్జాలు తెలసుకోండి.. తరచూ తనపై కబ్జాలు అంటూ ప్రచారం చేసే టీడీపీ వాళ్లు వారి కుటుంబ సభ్యుల కబ్జాల గురించి తెలుసుకోవాలని హితవు పలికారు. నంద్యాల ఎంపీ అభ్యర్థి శబరి.. నీ తండ్రి కబ్జాలు ప్రజలందరికీ తెలుసన్నారు. నీ తండ్రి.. మైదుకూరుకు చెందిన వారి ప్లాట్‌ను లాక్కొని ఇంటిని నిర్మించున్నారన్నారని గుర్తు చేశారు. టీడీపీ అసెంబ్లీ అభ్యర్థి భర్త, బంధువు కబ్జాల గురించి తెలుసుకుంటే బాగుంటుందన్నారు. కబ్జరాయుళ్లను పక్కనబెట్టుకొని తిరుగుతున్నది నీవే బాబు అని ఎద్దేవా చేశారు. తాను ఆధారాలతో నిరూపించినా బాబు మతిభ్రమించి ఆరోపణలు చేస్తున్నాడన్నారు. జెడ్పీటీసీ మాజీ సభ్యుడు సద్దల సూర్యనారాయణరెడ్డి, వైఎస్సార్‌సీపీ నాయకుడు పీవి బద్రీనాథ్‌రావు, ఉప సర్పంచ్‌ పాలం చంద్రశేఖర్‌రెడ్డి, గగ్గటూరు శ్రీనివాసరెడ్డి, రామలక్ష్మయ్య పాల్గొన్నారు. సొంతమేనిఫెస్టో తయారు చేసుకోలేని నాయకుడు చంద్రబాబు ఆధారాలతో నిరూపించినా తనపై పదేపదే కబ్జాలంటూ దుష్ప్రచారం శబరి తండ్రి చేసిన కబ్జాలు కనిపించడం లేదా? గౌరు చరిత భర్త, బంధువుల ఆగడాలు ఎవరికి తెలియవు? విలేకరుల సమావేశంలో ఎమ్మెల్యే కాటసాని

నంద్యాల(అర్బన్‌): నంద్యాలలో మంగళవారం రాత్రి గంటన్నర పాటు ఈదురు గాలులతో కూడిన భారీ వర్షం కురిసింది. రెండు నెలలుగా ఎండవేడిమి, ఉక్కపోతతో అల్లాడిన జనానికి కాస్త ఉపశమనం కలిగింది. నంద్యాల మొత్తం తడిసి ముద్దయ్యింది. ఉన్నఫలంగా పెద్ద శబ్దాలతో ఉరుములు, మెరుపులు రావడంతో పట్టణ ప్రజలు బెంబేలెత్తిపోయారు. ఏం జరుగుతుందో తెలియక ఆందోళనకు గురయ్యారు. విద్యుత్‌ సరఫరా లేకపోవడంతో ఇంట్లో నుంచి బయటకు వచ్చేందుకు సాహసించలేక పోయారు. పలు ఇళ్ల ముందు ఉన్న పైకప్పుల రేకులు ఎగిరిపోయాయి. బైరవాణికుంటలో 4 కేజీల వడగండ్ల వాన దేవనకొండ: మండలంలోని పలు గ్రామాల్లో మంగళవారం రాత్రి 10 గంటల సమయంలో వడగండ్లతో కూడిన వర్షం కురిసింది. బైరవాణికుంటలో సుమారు 4 కేజీల వడగండ్లు లభ్యమయ్యాయి. గ్రామంలో పిడుగుపాటుకు 20 మేకలు మృత్యువాత పడ్డాయి. సుమారు రూ.2 లక్షలు నష్టపోయినట్లు బాధితుడు తెలిపాడు. అలాగే నేలతలమరి, గుండ్లకొండ గ్రామాల్లో వడగండ్ల వాన కురిసింది. వడగండ్ల వాన కర్నూలు (అగ్రికల్చర్‌): కొద్ది రోజులుగా ఎండలు, వడగాల్పులతో ఉక్కిరిబిక్కిరి అయిన ప్రజలకు కొంత ఉపశమనం లభించింది. మంగళవారం సాయంత్రం నుంచి కర్నూలు సహా వివిధ పట్టణాల్లో పెనుగాలులు, ఉరుములు, మెరుపులతో వర్షం కురిసింది. కర్నూలు, కల్లూరు, చిన్నటేకూరు, పెద్దటేకూరు, ఉలిందకొండ తదితర ప్రాంతాల్లో భారీ వర్షం పడింది. కర్నూలు, కల్లూరు మండలాల్లోని వివిధ గ్రామాల్లో వడగండ్లు పడ్డాయి. ఈదురుగాలుల తీవ్రత ఎక్కువగా ఉండడం వల్ల విద్యుత్‌ సరఫరాకు అంతరాయం ఏర్పడింది.