ఆస్ట్రేలియా సిరీస్లో యువరాజ్ సింగ్ పునరాగమనం!

ఆస్ట్రేలియా సిరీస్లో యువరాజ్ సింగ్ పునరాగమనం!

ఆస్ట్రేలియాతో స్వదేశంలో త్వరలో జరిగే పరిమిత ఓవర్ల క్రికెట్ సిరీస్కు భారత జట్టులో డాషింగ్ ఆల్రౌండర్ యువరాజ్ సింగ్కు చోటు దక్కే అవకాశాలున్నాయి. ఏకైక టి-20, తొలి మూడు వన్డేలకు సోమవారం భారత జట్టును ఎంపిక చేయనున్నారు. ఇటీవల వెస్టిండీస్-ఎతో సిరీస్లో యువీ అద్భుత ప్రదర్శనతో సెలెక్టర్ల దృష్టిని అకర్షించాడు. అతణ్ని జట్టులోకి తీసుకోవాలనే యోచనలో సెలెక్టర్లు ఉన్నట్టు క్రికెట్ వర్గాలు తెలిపాయి.

కరీబియన్లతో అనధికారిక వన్డే సిరీస్లో యువీ 123, 40, 61 స్కోర్లు నమోదు చేశాడు. ఇక ఏకైక టి-20లో 52 పరుగులు చేశాడు. చాలెంజర్ సిరీస్లో 84, 29 స్కోర్లు నమోదు చేశాడు. కాగా యువరాజ్ చివరిసారిగా టీమిండియా తరపున గత జనవరిలో ఆడాడు. ఆ తర్వాత ఫామ్లేమితో జట్టులో స్థానం కోల్పోయాడు. ఇటీవల మళ్లీ ఫామ్ అందుకోవడంతో పునరాగమనం చేయవచ్చని భావిస్తున్నారు. చాంపియన్స్ ట్రోఫీ, వెస్టిండీస్లో ముక్కోణపు సిరీస్లో ఆడిన భారత జట్టులో సెలెక్టర్లు కొన్ని మార్పులు చేసే అవకాశాలున్నాయి.