బట్లర్ మెరుపు సెంచరీ

♦ ఇంగ్లండ్ 399/9   
♦ దక్షిణాఫ్రికాతో తొలి వన్డే
 బ్లోమ్‌ఫాంటీన్: దక్షిణాఫ్రికాతో టెస్టు సిరీస్ గెల్చుకున్న ఇంగ్లండ్ వన్డేలనూ దూకుడుగా ఆరంభించింది. ప్రధాన బ్యాట్స్‌మెన్ చెలరేగడంతో ఇంగ్లండ్ పరుగుల వరద పారించింది. ఇక్కడి మన్‌గాంగ్ ఓవల్ మైదానంలో జరుగుతున్న తొలి వన్డేలో ఇంగ్లండ్ 50 ఓవర్లలో 9 వికెట్ల నష్టానికి 399 పరుగుల భారీ స్కోరు నమోదు చేసింది. జాస్ బట్లర్ (76 బంతుల్లో 105; 11 ఫోర్లు, 5 సిక్సర్లు) మెరుపు సెంచరీ సాధించాడు. స్టోక్స్ (38 బంతుల్లో 57; 4 ఫోర్లు, 3 సిక్సర్లు), హేల్స్ (57; 6 ఫోర్లు, 2 సిక్సర్లు), రూట్ (52; 4 ఫోర్లు, 1 సిక్స్) అర్ధ సెంచరీలు చేయగా, రాయ్ (30 బంతుల్లో 48; 8 ఫోర్లు, 1 సిక్స్) రాణించాడు. వన్డేల్లో తమ రెండో అత్యధిక స్కోరు చేసిన ఇంగ్లండ్, తమ జట్టు తరఫున అత్యధిక సిక్సర్లు (15) నమోదు చేసింది. ఒక ఇన్నింగ్స్‌లో ఎనిమిది మంది బ్యాట్స్‌మెన్ కనీసం ఒక సిక్సర్ అయినా కొట్టడం వన్డేల్లో ఇదే మొదటిసారి కావడం విశేషం.