సభ్యుడు కాకపోయినా లోక్‌సభలోకి వచ్చేశాడు!

న్యూఢిల్లీ: కాంగ్రెస్ సీనియర్ నాయకుడు మణిశంకర్ అయ్యర్ బుధవారం లోక్‌సభ చాంబర్‌లో కనిపించడం పలువురిని ఆశ్చర్యపరిచింది. ఆయన లోక్‌సభ సభ్యుడు కాదు. కాంగ్రెస్‌ నుంచి రాజ్యసభలో సభ్యుడిగా ఉన్నారు.

ప్రశ్నోత్తరాల సమయంలో లోక్‌సభ చాంబర్‌లోకి వచ్చిన అయ్యర్‌..  చివరి వరుసలో కాసేపు ఉన్నారు. ఆయన ఎందుకొచ్చారో తెలియదుకానీ లోక్‌సభ సహాయకుడితో కొంతసేపు ముచ్చటించి ఆ తర్వాత వెళ్లిపోయారు. కొన్ని నిమిషాల తర్వాత మళ్లీ చాంబర్ ఎంట్రన్స్‌ వరకు ఆయన వచ్చారు. అయితే ఈసారి లోక్‌సభ లోపలికి ప్రవేశించలేదు. అక్కడే ఉన్న లోక్‌సభ సహాయకుడితో కాసేపు మాట్లాడి.. అటు నుంచి అటే వెళ్లిపోయారు. ఇంతకు ఆయన లోక్‌సభలోకి ఎందుకొచ్చారన్న విషయం మాత్రం తెలియలేదు.