ట్యాంకర్‌ పేలి 62 మంది మృతి

దార్‌ ఎస్‌ సలామ్‌ (టాంజానియా): తూర్పు ఆఫ్రికా దేశమైన టాంజానియాలో ఆయిల్‌ ట్యాంకర్‌ పేలింది. ఈ దుర్ఘటనలో 62 మంది ప్రాణాలు కోల్పోయారు. శనివారం మొరోగొరో పట్టణంలో ఆయిల్‌ను వెలికితీయడానికి కొందరు వ్యక్తులు ఓ ఆయిల్‌ ట్యాంకర్‌ చుట్టూ చేరారు. ఆ ట్యాంకర్‌ అప్పటికే శిథిలావస్థలో ఉండడంతో పేలుడుకు గురైంది. ఈ ఘటనలో 62 మంది మరణించగా, 70 మంది గాయపడ్డారని స్థానిక పోలీస్‌ కమిషనర్‌ స్టీవెన్‌ కాబ్వే తెలిపారు. ఆయిల్‌ ట్యాంకర్ల నుంచి అక్రమంగా ఆయిల్‌ను దొంగిలించడం ఈ దేశంలో సాధారణంగా జరిగే విషయమే. 2013లో సైతం ఇలాంటి పేలుడులో 29 మంది మృతిచెందారు. ట్యాంకర్లనుంచి ఆయిల్‌ను తీసేటపుడు జరిగే పేలుళ్ల గురించి అవగాహన లేకపోవడం వల్లే ఇలాంటి ఘటనలు జరుగుతున్నాయని రోడ్డు భద్రతా నిపుణుడు హెన్రీ బంటు అన్నారు.