తొలిసారి పడిపోయిన వివో, ఒప్పో

మొట్టమొదటిసారి వివో, ఒప్పో కంపెనీలు తమ అమ్మకాల్లో పడిపోయాయి. జూలై నెలలో వీటి అమ్మకాలు 30 శాతం ఢమాలమన్నాయి. మొత్తంగా దేశంలో స్మార్ట్‌ఫోన్‌ మార్కెట్‌ సుమారు 8 శాతం వృద్ధి చెందిన క్రమంలో వీటి అమ్మకాలు పడిపోవడం గమనార్హం. ఈ ఏడాదిలో ఈ రెండు స్మార్ట్‌ఫోన్‌ కంపెనీలు దేశీయ స్మార్ట్‌ఫోన్‌ మార్కెట్‌లో 22 శాతం వాటాను కలిగి ఉన్నాయి. అంతకముందు ఎక్స్‌క్లూజివ్‌గా ఆన్‌లైన్‌ విక్రయాలు మాత్రమే జరిపే షావోమి లాంటి ఇతర స్మార్ట్‌ఫోన్‌ తయారీదారులు, ఆఫ్‌లైన్‌ మార్కెట్‌లోకి ప్రవేశించడంతో వివో, ఒప్పోలకు ఈ పరిస్థితి ఏర్పడింది. ఇప్పటివరకు షావోమి తన రెడ్‌మి నోట్‌ 4 స్మార్ట్‌ఫోన్‌ విక్రయాలు 5 మిలియన్‌ యూనిట్లకు పైగా నమోదుచేసింది. తన పోటీదారులకు షావోమి మరింత గట్టి పోటీని ఇస్తోంది.