ఇది కూడా ఇన్ఫీని ఆదుకోలేకపోతుంది

సాక్షి, న్యూఢిల్లీ :  టెక్‌ దిగ్గజం ఇన్ఫోసిస్‌ను బైబ్యాక్‌ ఆఫర్‌ కూడా ఆదుకోలేకపోతుంది. సీఈవోగా విశాల్‌ సిక్కా రాజీనామాతో మొదలైన ఇన్ఫీ షేర్ల పతనం, సోమవారం ట్రేడింగ్‌లోనూ కొనసాగుతోంది. పలు బ్రోకరేజ్‌ సంస్థలు ఇన్ఫోసిస్‌ షేరు విలువను డౌన్‌ గ్రేడ్‌ చేయడంతో, ప్రారంభ ట్రేడింగ్‌లో ఇన్ఫోసిస్‌ షేర్లు 4.39 శాతం పడిపోతూ.. రెండేళ్ల కనిష్ట స్థాయిల వద్ద నమోదవుతున్నాయి. శుక్రవారం విశాల్‌ సిక్కా తన పదవికి రాజీనామా చేసినట్టు ప్రకటించడంతో, ఆ రోజు ట్రేడింగ్‌ ప్రారంభంలోనే ఇన్ఫీ భారీగా పతనమైంది. ఇంట్రాడేలో దాదాపు 13 శాతం మేర షేరు విలువ దిగజారింది. దీంతో ఇన్ఫీ మార్కెట్‌ క్యాపిటలైజేషన్‌లో రూ.30వేల కోట్ల మేర ఆవిరైపోయింది. కాగ, సిక్కా రాజీనామా అనంతరం ఒక్కరోజు వ్యవధిలోనే అంటే శనివారం ఇన్ఫోసిస్‌ రూ.13వేల కోట్ల బైబ్యాక్‌ ఆఫర్‌ ప్రకటించింది. ఇది మొత్తం ఈక్విటీ క్యాపిటల్‌లో 4.92 శాతం. బైబ్యాక్‌ ఆఫర్‌తో కంపెనీ షేర్లు కోలుకుంటాయని విశ్లేషకులు భావించారు.