పులివెందుల రూరల్ : పులివెందుల మండలం కొత్తపల్లె గ్రామంలో సోమవారం ప్రమాదం తృటిలో తప్పింది. గ్రామానికి చెందిన గుండన్న తన ఇంటి ముందర ఉన్న ఒక పెద్ద వేప చెట్టును తొలగిస్తుండగా ఈ ఘటన చోటుచేసుకుంది. చెట్టును నరుకుతున్న సమయంలో దాని కొమ్మలు ఒక్కసారిగా పక్కనే ఉన్న హైటెన్షన్ విద్యుత్ వైర్లపై పడ్డాయి. ఆ బరువుకు వరుసగా ఉన్న 9 విద్యుత్ స్తంభాలు ఒక్కదాని వెనుక ఒకటి విరిగి కిందపడిపోయాయి. స్తంభాలు విరిగిపడిన సమయంలో ఆ ప్రాంతంలో జనసంచారం లేకపోవడంతో ఎలాంటి ప్రాణనష్టం జరగలేదు. దీంతో గ్రామస్థులు పెద్ద ప్రమాదం తప్పిందని ఊపిరి పీల్చుకున్నారు. అయితే, ఒకేసారి 9 స్తంభాలు నేలమట్టం కావడంతో గ్రామంలో విద్యుత్ సరఫరా పూర్తిగా నిలిచిపోయింది. స్థానికులు తీవ్ర ఆందోళన వ్యక్తం చేస్తున్నారు. విద్యుత్ శాఖ అధికారులు తక్షణమే స్పందించి, విరిగిపోయిన పాత స్తంభాల స్థానంలో కొత్తవి ఏర్పాటు చేసి గ్రామానికి విద్యుత్ సరఫరాను పునరుద్ధరించాలని కోరుతున్నారు.


