TV
తాడేపల్లిగూడెం: వినూత్న ఆలోచనలకు ఉద్యానరంగం వేదికగా మారిందని ఇండస్ట్రీయల్ ఇంటర్నేషనల్ ప్రోగ్రామ్స్ డైరెక్టర్ డాక్టర్ పద్మలత అన్నారు. స్థానిక ఉద్యాన కళాశాలలోని హార్టీబిజినెస్ ఇంక్యుబేషన్ సెంటర్లో రాజమహేంద్రవరం రతన్ టాటా ఇన్నోవేషన్ హబ్ ఆధ్వర్యంలో రాష్ట్రీయ ఇన్నోవేషన్ ఛాలెంజ్ 1.0 లో భాగంగా నిర్వహించిన హార్టీ ఇన్నోవేటివ్ ఐడియా హ్యాకథాన్ మంగళవారం నిర్వహించారు. ఈ కార్యక్రమానికి ముఖ్యఅతిథిగా హాజరైన పద్మలత మాట్లాడుతూ విద్యార్థుల్లో సృజనాత్మకతను వెలికితీయడానికి హ్యాకథాన్లు ఎంతో దోహదపడతాయన్నారు. కళాశాల అసోసియేట్ డీన్ డాక్టర్ ఎన్.బి.వి. చలపతిరావు మాట్లాడుతూ త్వరగా పాడైపోయే పండ్లు, కూరగాయల్లో కోత అనంతర నష్టాలను తగ్గించేందుకు ఆధునిక సాంకేతికతలు, శీతలీకరణ, సమర్థవంతమైన రవాణా వ్యవస్థలు అవసరమని చెప్పారు. హ్యాకథాన్లో విద్యార్థులు పంటల ఉత్పత్తి, విలువ ఆధారిత ఉత్పత్తుల తయారీ, వనరుల సమర్థ వినియోగంపై రూపొందించిన స్టార్టప్ ప్రతిపాదనలు, సాంకేతిక పరిష్కారాలను నిపుణుల ముందు ప్రదర్శించారు. ఈ కార్యక్రమంలో ఆర్టీఐహెచ్ సీఈఓ షేక్ యాసీన్, అసిస్టెంట్ ప్రొఫెసర్ డాక్టర్ శిరీష తదితరులు పాల్గొన్నారు.
