బొడ్డుచింతలపల్లిని ఆదర్శ గ్రామంగా తీర్చిదిద్దాలి

గీసుకొండ: క్లీన్‌ అండ్‌ గ్రీన్‌ పంచాయతీ పోటీల్లో బొడ్డుచింతలపల్లి జాతీయ స్థాయిలో ద్వితీయ స్థానంలో నిలిచిందని, ఈ క్రమంలో ఆదర్శ గ్రామంగా తీర్చిదిద్దడానికి కృషి చేయాలని డీపీఓ కల్పన సూచించారు. గ్రామంలో చేపట్టిన జలసిరి పనులతో పాటు పల్లెప్రకృతి వనాన్ని శనివారం పరిశీలించారు. పంచాయతీ రికార్డులను తనిఖీ చేశారు. ఈ సందర్భంగా ఆమె మాట్లాడుతూ వంద శాతం ఇంటి పన్నులు వసూలు చేయాలని, పారిశుద్ధ్య నిర్వహణ, తడి పొడి చెత్త వేర్వేరుగా సేకరించడం, కంపోస్టు ఎరువు తయారీ, ప్లాస్టిక్‌ వాడకం నివారణను పాటించాలని చెప్పారు. ఈ సందర్భంగా గ్రామంలో చేపడుతున్న అభివృద్ధి పనులను వివరించారు. అనంతరం డీపీఓ ఎలుకుర్తి హవేలి గ్రామంలో చేపడుతున్న పనులను పరిశీలించారు. ఆయా కార్యక్రమాల్లో ఎంపీడీఓ శ్రీధర్‌, సర్పంచ్‌లు పోగుల వనిత, దివ్యభారతి, పంచాయతీ కార్యదర్శి దేవేందర్‌, వార్డు సభ్యులు పాల్గొన్నారు.

డీపీఓ కల్పన